Chapit 17

Alma ak pèp li a chape

moun k ap travay nan jaden

Yon jou pandan pèp Alma a t ap travay nan jaden yo, yon lame Lamanit te travèse fwontyè a antre nan peyi yo a.

Mozya 23:25

Alma ap pale ak pèp la

Nefit yo te panike epi yo te kouri al nan vil la pou yo t al abrite yo. Alma te di yo pou yo sonje Bondye epi li t ap ede yo. Nefit yo te kòmanse priye.

Mozya 23:26–28

Alma ap pale ak Lamanit yo

Senyè a te adousi kè Lamanit yo, epi yo pa t fè Nefit yo anyen. Lamanit yo te pèdi pandan yo t ap chèche pèp Wa Limi an.

Mozya 23:29–30

Alma k ap montre Lamanit yo wout lakay yo

Lamanit yo te pwomèt Alma ke yo pa t ap deranje pèp li a si l te di yo kijan pou yo te retounen al nan peyi yo. Alma te montre yo wout la.

Mozya 23:36

Lamanit k ap veye pèp Alma a

Men Lamanit yo pa t kenbe pwomès yo. Yo te mete gad antoure peyi a, epi Alma ak pèp li a pa t gen libète yo ankò.

Mozya 23:37

Amilon ap pale avèk gad Lamanit

Wa Lamanit la te mete Amilon kòm gouvènè pèp Alma a. Amilon sete yon Nefit epi l sete youn nan prèt mechan Wa Nowe yo.

Mozya 23:39; 24:8–9

Amilon ap siveye moun k ap travay

Amilon te fè pèp Alma a travay di. Yo te priye pou yo te jwenn èd, men Amilon te di l t ap touye nenpòt moun li kenbe k ap priye. Moun yo te kontinye priye nan kè yo.

Mozya 24:10–12

tigason k ap pote yon pànye

Bondye te tande priyè yo epi l te fòtifye pèp la pou travay yo te parèt fasil. Moun yo te fè kè yo kontan epi yo te pran pasyans.

Mozya 24:14–15

Bondye pale ak Alma

Bondye te kontan paske pèp li a te rete fidèl. Li te di Alma ke l t ap ede yo chape anba men Lamanit yo.

Mozya 24:16–17

Pèp Alma a ap chape

Pandan nuit la, pèp la te rasanble manje ak bèt yo. Nan demen maten, Bondye te kenbe Lamanit yo nan somèy pandan Alma ak pèp li a te kite vil la.

Mozya 24:18–20

Wa Mozya ap akeyi Alma

Apre yo te fin vwayaje pandan 12 jou, pèp la te rive nan Zarayemla, kote Wa Mozya ak pèp li a te akeyi yo.

Mozya 24:25