Chapit 14
Abinadi ak Wa Nowe
Nowe pa t yon bon wa tankou papa li. Li te mechan epi li pa t obeyi kòmandman Bondye yo.
Li te fòse pèp li a ba l yon pati nan rekòt yo, bèt, lò yo, al lajan yo.
Wa Nowe te fè sa paske l te parese. Li te fè Nefit yo ba l tout sa l te bezwen pou l te viv.
Li te ranplase bon prèt yo papa l te genyen yo pa prèt mechan. Prèt mechan yo te anseye pèp la pou yo te fè peche.
Wa Nowe te fè konstwi anpil bèl batiman, ladan yo yon gran palè avèk yon twòn. Batiman yo te dekore avèk lò, ajan, ak bwa presye.
Wa Nowe te renmen richès yo l te pran nan men pèp li a. Limenm ak prèt li yo te pase tan yo ap bwè diven ak fè mechanste.
Bondye te voye yon pwofèt ki te rele Abinadi devan pèp Nowe a. Abinadi te avèti yo ke si yo pa t repanti, yo t ap vin tounen esklav Lamanit yo.
Lè Wa Nowe te tande kisa Abinadi te di, li te fache. Li te voye gason pou te mennen Abinadi nan palè a pou l te ka touye l.
Yo te mennen Abinadi devan wa a. Wa Nowe ak prèt li yo te poze l anpil kesyon. Yo te eseye pyeje li pou yo te ka fè l di yon move bagay.
Abinadi pa t pè reponn kesyon yo. Li te konnen ke Bondye t ap ede li. Prèt yo te etone devan repons Abinadi yo.
Wa Nowe te fache epi l bay prèt li yo lòd pou yo te touye Abinadi. Abinadi te di si yo touche l Bondye t ap touye yo.
Sentespri a te pwoteje Abinadi pou l te ka fin di sa Senyè a te vle l di yo. Vizaj Abinadi te klere. Prèt yo te pè touche li.
Abinadi te pale avèk pouvwa Bondye, epi l te te pale moun yo konsènan mechanste yo. Li te li kòmandman yo pou yo.
Li te di yo Jezikri ta pral pran nesans sou tè a. Jezi ta pral rann posib pou moun yo repanti, resisite, epi viv avèk Bondye.
Abinadi te di moun yo pou yo repanti epi kwè nan Jezikri sinon yo pa t ap ka sove.
Wa Nowe ak tout prèt li yo, eksepte youn, te refize kwè Abinadi. Nowe te di prèt yo pou yo te touye Abinadi. Yo te mare li epi lage l nan prizon.
Grenn prèt ki te kwè nan Abinadi a te rele Alma. Li te mande Wa Nowe pou l te kite Abinadi ale.
Wa a te fache kont Alma epi li te fè yo mete l deyò. Apresa li te voye sèvitè l yo pou yo te touye li. Alma te kouri al kache, epi sèvitè yo pa t janm jwenn ni.
Apre l pase twa jou nan prizon, yo te mennen Abinadi devan Wa Nowe ankò. Wa a te di Abinadi pou l te retire sa l te di yo konsènan limenm ak pèp li a.
Wa Nowe te di Abinadi ke si l pa t renye tout sa l te di yo, li t ap touye li.
Abinadi te konnen ke sa l t ap di yo sete verite. Li te dispoze pou l te mouri olye pou l te renye bagay Bondye te voye l pou l di yo.
Wa Nowe te bay prèt li yo lòd pou yo te touye Abinadi. Yo te mare li, yo te bat li, epi yo te boule l jiskaske l te mouri. Avan l te mouri, Abinadi te di Wa Nowe ke l t ap mouri nan dife tou.
Gen kèk nan Nefit yo ki te pa t dakò avèk Wa Nowe epi yo te eseye touye li. Lame Lamanit yo te vin goumen kont wa a ak moun ki t ap suiv li yo tou.
Wa a ak moun ki t ap suiv li yo te kouri al lwen Lamanit yo, men Lamanit yo te tonbe sou yo epi yo te kòmanse touye yo. Wa a te di mesye l yo pou yo te kite fanmi yo epi kontinye kouri.
Anpil nan mesye yo pa t vle ale. Lamanit yo te kaptire yo.
Pifò nan mesye k te kouri avèk Wa Nowe yo te vin regrèt. Yo te vle retounen pou yo t al ede madanm yo ak pitit yo ak pèp yo a.
Wa Nowe pa t vle mesye yo retounen al jwenn fanmi yo. Li te ba yo lòd pou yo te rete avèk li.
Mesye yo te ankòlè kont Wa Nowe. Yo te boule l jiskaske l te mouri, jan Abinadi te pwofetize a. Apresa yo te retounen al jwenn fanmi yo.