Jekjōn 105
Revelesōn letok kōn Josep Smith Rikanaan eo, ioon Reba Fishing, Missouri, Juun 22, 1834. Iumin tōl eo an Rikanaan eo, Ro Rekwōjarjar jān Ohio im bar jikin ko jet rekar m̧aaj n̄an Missouri ilo juon jar eo tokālik kar jeļā kake bwe ej Kamp eo an Zaion. Kōttōpar eo aer ekar n̄an aparetok Ro Rekwōjarjar ilo Missouri im kar kadieojļo̧k er tok n̄an bwidej ko jikier ilo Jackson Kounty. Ri Missouri ro rekar kaen̄taan Ro Rekwōjarjar m̧oktaļo̧k rekar mijak n̄e ekar wōr idenwōņe jān Kamp eo an Zaion im kar kōjjerak im kakkure jet ian Ro Rekwōjarjar rej jokwe ilo Kle Kounty, Missouri. Ālkin an kar kōbna eo kar jenliktak jān kallim̧ur eo an n̄an rejtake Ro Rekwōjarjar. Josep Smith ekar bōk revelesōn in.
1–5, Zaion enaaj ekkal jān errā ippān kien selestial; 6–13, Lo̧mo̧o̧ren an Zaion ej rum̧wijļo̧k ium̧win jidik tōrean; 14–19, Irooj enaaj ire ilo pata ko an Zaion; 20–26, Ro Rekwōjarjar ren mālōtlōt im jab kōmmejāje kōn jerbal ko reļļap ilo aer ae; 27–30, Bwidej ko ilo Jackson im kounty ko rej ekkejeltok aikuj in wiaiki; 31–34, Elder ro rej itōn bōk mennin letok ekwōjarjar eo aer ilo m̧weo im̧ōn Irooj ilo Kirtland; 35–37, Ro Rekwōjarjar ro im kar jim̧or kūr im kāālet er renaaj kokwōjarjar er; 38–41, Ro Rekwōjarjar rej itōn kotak juon flag in aenōm̧m̧an n̄an laļ in.
1 Em̧ool Ij ba n̄an kom̧ ro rekar kuktok ippān doon bwe kom̧in maron̄ jeļā ankilaō kōn lo̧mo̧o̧ren eo an armej ro ren̄taan Aō—
2 Lo, Ij ba n̄an kom̧, eļan̄n̄e ekar jab kōn nana ko an armej ro Aō, ekkōnono kōn kabun̄ eo im jab kōn kajjojo armej, remaron̄ kar bōk lo̧mo̧o̧ren em̧ool kiiō.
3 A lo, rej jan̄in jeļā n̄an pokake men ko me Ikar aikuji jān peier, ak reobrak kōn aolep mennin nana otemjeļo̧k, im rej jab ajej jān jeban ko aer, āinwōt ekkar n̄an ro rekwōjarjar, n̄an ro rejeram̧ōl im ren̄taan ilubwiljier;
4 Im rej jab juon wōt ekkar n̄an ippān doon eo aikuji jān kien eo an aelōn̄ selestial;
5 Im Zaion ej jab maron̄ ekkal ijello̧kun wōt ej jān pedped ko an kien eo an aelōn̄ selestial; eļan̄n̄e jaab Ij ban maron̄ bōk e n̄an Eō make.
6 Im armej ro Aō reaikuj kauwe m̧ae aer jeļā pokake, eļan̄n̄e emennin aikuj, jān men ko me rej en̄taan kaki.
7 Ij ekkōnono jaab kōn ro kar jitōn̄ er n̄an tōl armej ro Aō, ro rej elder ro m̧oktata an kabun̄ eo Aō, bwe rej jab aolep pād ium̧win liaakeļo̧k in;
8 A Ij ekkōnono kōn jarlepju ko in rijar ko ijoko jet—elōn̄ ro renaaj ba: Ewi Anij eo aer? Lo, Enaaj lo̧mo̧o̧ren er ilo iien apan̄, eļan̄n̄e jaab jeban wanlōn̄ļo̧k n̄an Zaion, im naaj dāpij m̧ani ko ad.
9 Kōn menin, ilo jarjar jān nana ko an armej ro Aō, ej mennin aikuj ilo N̄a bwe elder ro Aō ren kōttar ium̧win jidik tōrean n̄an lo̧mo̧o̧ren eo an Zaion—
10 Bwe er make ren maron̄ pojak, im bwe armej ro Aō ren maron̄ katakin er ilo eļapļo̧k weeppān, im wōr aer imminene, im jeļā ilo eļapļo̧k weeppān kōn ijoko kuņaer, im men ko me Ij aikuji jān peier.
11 Im men in eban maron̄ kūrm̧ool m̧ae iien elder ro Aō rej jeban kōn kajoor jān ijo eutiej.
12 Bwe lo, Iaar kōpooj juon mennin letok ekwōjarjar eo eļap im kōjeraam̧m̧an n̄an lutōkleplep ļo̧k ioer, toun wōt aer tiljek im wōnm̧aanļo̧k ilo ettā Im̧aō.
13 Kōn menin emennin aikuj ilo N̄a bwe elder ro Aō ren kōttar ium̧win jidik tōrean, n̄an lo̧mo̧o̧ren eo an Zaion.
14 Bwe lo, Ij jab aikuji jān peier bwe ren ire ilo pata ko an Zaion; bwe, āinwōt Iaar ba ilo juon kien m̧oktaļo̧k, em̧ool āindein I naaj kūrm̧ool—I naaj tariņae pata ko ami.
15 Lo, riko̧kkure eo Iaar jilkinļo̧k n̄an ko̧kkure im kōlo̧urō rikōjdat ro Aō; im ej jab elōn̄ iiō ko jān kiiō reban pād n̄an kattoone ļām̧oran eo Aō, im n̄an blaspimi Eta ioon āne ko Iaar kōjenolo̧ki n̄an kuktok ippān doon eo an ro rekwōjarjar Aō.
16 Lo, Iaar jiron̄ karejera Josep Smith, Jun., n̄an ba n̄an kajoor eo an m̧weo Im̧ō, em̧ool ritariņae ro Aō, likao ro aō, im em̧m̧aan em̧m̧an ded ro, n̄an aintok ippān doon n̄an lo̧mo̧o̧ren eo an armej ro Aō, im julaļļo̧k im̧ōn bar ko an rikōjdat ro Aō, im kajjeplōklōk rikakkōl ro aer;
17 A kajoor eo an m̧weo Im̧ō ekar jab eo̧ron̄i naan ko Aō.
18 A toun wōt an wōr ro rej eo̧ron̄i naan ko Aō, em̧ōj Aō kōpooj juon kōjeraam̧m̧an im juon mennin letok ekwōjarjar n̄an er, eļan̄n̄e renaaj wōnm̧aanļo̧k ilo tiljek.
19 Em̧ōj Aō ron̄ jar ko aer, im naaj bōk joortak eo aer; im emennin aorōk ilo N̄a bwe ren bōktok er n̄an idajon̄jon̄ eo in tōmak eo aer.
20 Im kiiō, em̧ool Ij ba n̄an kom̧, juon kien Ij lewōj n̄an kom̧, bwe jon̄an wōt eo eaar wanlōn̄tak ijin, ro remaron̄ pād ilo jikin ko ipeļaakin ijin, kōtļo̧k bwe ren pād wōt;
21 Im ro rejjab maron̄ pād wōt, ro ewōr baam̧le ko aer iturear, ren pād ium̧win jidik tōrean, toun wōt an karejera Josep naaj jitōn̄ n̄an er;
22 Bwe Inaaj kapilōk e kōn menin, im aolep men ko jabdewōt enaaj jitōn̄e n̄an er renaaj kūrm̧ool.
23 Im kōtļo̧k bwe aolep armej ro Aō rej jokwe ilo jikin ko ipeļaakin ijin ren kanooj tiljek, im obrak kōn jitōbōn jar, im ettā Im̧aō, im jab kwaļo̧ki men ko me Iaar kwaļo̧ki n̄an er, m̧ae e ej mālōtlōt ilo N̄a bwe ren aikuj in waļo̧k.
24 Jab ekkōnono kōn ekajet ko, barāinwōt jab kōmmejāje kōn tōmak ak jerbal ko reļļap, ak kōjparok ami kuktok ippān doon, jon̄an wōt eo emaron̄ ipeļaakin ijekein, ekkar n̄an en̄jake ko an armej;
25 Im lo, Inaaj lewōj n̄an kom̧ mennin medek im jouj ilo mājeer, bwe kom̧in maron̄ kakkije ilo aenōm̧m̧an im jokane, ke kom̧ij ba n̄an armej raņ: Kōm̧m̧ani ekajet im jim̧we n̄an kōm ekkar n̄an kakien, im ņa woņeam̧ kōn bōd ko ņae kōm.
26 Kiiō, lo, Ij ba n̄an kom̧, ro jera, ilo wāween in kom̧ maron̄ lo jouj ilo mejān armej raņ, m̧ae jarin tariņae eo an Israel ej kanooj ļap.
27 Im Inaaj kameoeoik bōro ko būruōn armej raņ, āinwōt Iaar kōm̧m̧an n̄an būruōn Pero, jān iien n̄an iien, m̧ae iien karejera Josep Smith, Jun., im elder ro Aō, ro Iaar jitōn̄ er, renaaj wōr aer iien n̄an aintok kajoor eo an m̧weo Im̧ō,
28 Im n̄an kar jilkinļo̧k em̧m̧aan ro remālōtlōt, n̄an kakūrm̧ool men eo me Iaar jiron̄ kōn wiaiki aolepān bwidej ko ilo Jackson Kounty im maron̄ in wiaiki, im ilo kounty ko rej ekkejelļo̧k ipeļaakin ijo.
29 Bwe e ej ankilaō bwe bwidej kein ren wiaiki; im ālikin aer wiaiki bwe ro rekwōjarjar Aō ren bōki ekkar n̄an kien wūjlepļo̧k ko me Iaar liwōji.
30 Im ālikin kar wiaiki bwidej kein, Inaaj dāpij jarin tariņae ko an Israel ejjeļo̧k ruweer ilo bōk bwe en aer make bwidej kein, ko me rekar wiaiki m̧oktaļo̧k kōn m̧ani ko aer, im kōn jolaļļo̧k im̧ōn bar ko an rikōjdat ro Aō me remaron̄ pād ioer, im kajjeplōklōk rikakkōl ro aer, im idenoņeik Eō ippān rikōjdat ro Aō n̄an epepen eo kein kajilu im kein kāāmen ian er ro rej dike Eō.
31 A m̧okta kōtļo̧k bwe jarin tariņae eo Aō en kanooj ļap, im kōtļo̧k bwe en kokwōjarjar e Im̧aō, bwe en maron̄ jatōltōl āinwōt al, im erreo āinwōt allōn̄, im bwe flag ko an ren maron̄ kaen̄tanaan n̄an aolep laļ ko;
32 Bwe aelōn̄ in kiin̄ ko an laļ ren maron̄ kipel er n̄an ba bwe aelōn̄ in kiin̄ an Zaion ej ilo lukkuun m̧ool aelōn̄ eo ad Anij im Kraist eo An; kōn menin, jen erom ro rej pād ium̧win kakien ko an.
33 Em̧ool Ij ba n̄an kom̧, e ej mennin aikuj ilo N̄a bwe elder ro m̧oktata an kabun̄ eo Aō ren bōk mennin leļo̧k ekwōjarjar eo aer jān ijo eutiej ilo m̧weo Im̧ō, eo Iaar jiron̄ bwe en ekkal n̄an Eta ilo āneen Kirtland.
34 Im kien ko me Iaar liwōj kake Zaion im kakien ko an ren kōm̧akūtkūti im kakūrm̧ooli, ālikin lo̧mo̧o̧ren eo an.
35 Ekar wōr juon raan in kūri, ak iien em̧ōj an itok n̄an raan in jokāālet; im ro me kāālete er ren tōllo̧ke.
36 Im naaj kaalikkare n̄an karejera, jān ainikien Jetōb eo, ro kar kāālet er; im renaaj kokwōjarjar er;
37 Im toun wōt aer ļoore kapilōk eo me rekar bōke, enaaj wōr aer kajoor ālikin elōn̄ raan ko n̄an kadedeļo̧k aolep men ko otemjeļo̧k rej ekkejeltok n̄an Zaion.
38 Im bar juon alen Ij ba n̄an kom̧, akweļap kōn aenōm̧m̧an, jab wōt n̄an armej ro rekar den̄ļo̧ke kom̧, a barāinwōt n̄an aolep armej;
39 Im kotak lōn̄ļo̧k juon flag in aenōm̧m̧an, im kōm̧m̧ane juon kean̄ in aenōm̧m̧an n̄an jem̧ļo̧k ko in laļ;
40 Im kōm̧m̧ani pepe ko kōn aenōm̧m̧an n̄an ro rekar den̄ļo̧ke kom̧, ekkar n̄an ainikien Jetōb eo me ej ilo kom̧, im aolep men otemjeļo̧k renaaj jerbal ippān doon n̄an em̧m̧an eo ami.
41 Kōn menin, kom̧in tiljek, im lo, im lo, N̄aij pād ippemi em̧ool n̄an jem̧ļo̧kin. Em̧ool āindein. Amen.