1 Áádóó kʼad, shikʼiske ayóí ánihííníshʼníinii, Diyin Bóhólníihii bibee ahadaʼdeetʼaahii Israel bighandóó háájéʼígíí tʼáá ałtso yił ahaʼdeestʼánée nihił béédahodoozįįł biniyé díí nihichʼįʼ yíłtaʼ—

2 Azhą́ hodeeyáádą́ą́ʼ, dóó kojįʼ daʼíchíhígíí biyiʼjįʼ, Diyin yá yádaałtiʼii dadiyinii, Jew dineʼé yichʼįʼ yááłtiʼ, dóó tʼáá yichʼįʼ yááłtiʼgo, ńléí sodizin tʼáá aaníinii dóó Diyin God bi-dineʼé yaa náhidookah; ahodoolzbihjįʼ éí kéyah bił ahadaʼdeestʼánée bikáaʼjįʼ ahą ándoolníiłgo, dóó kéyah bee ahaʼdeetʼánígi bikááʼgóó tʼáá ałtsogo kéédahatʼį́į́ dooleeł.

3 Áko shooh, Bóhólníihii Diyin God nihaʼáłchíní yikʼijidoodliiłígíí biniinaa, shikʼis ayóí ánihííníshʼníi, díí bee nihił hashneʼ Háálá díí baa nihił dahodoozhǫǫł, dóó ahoolʼáágóó bee hadaʼíínółníi dooleeł biniyé.

4 Háálá nohłąʼída, náasjįʼ ádahodooníłígíí tʼáá íiyisíí nihił béédahodoozįįł danohsingo, hadanohtá ńtʼę́ʼígíí shił bééhózin; ákohgo shił bééhózingo nihił béédahózin nihitsʼíís hadadootih dóó náádanihidiʼdoolyééł; ákótʼée ndi, nihitsʼíís bee éí Diyin God deidiiltsééł.

5 Aooʼ, shił bééhózingo nihił béédahózin Jerusalemdi kéédahatʼínígíí, nihí niikaidę́ę́ʼ, bitsʼíís yee yichʼįʼ ííshją́ ádiʼdidoolnííł; háálá éí bitahdi ákóhodoonííł hwiinízin; háálá Tʼáá Ałtsoní Áyilaií ayóóʼátʼéii bíniʼ bikʼehgo bitsʼíís hólǫ́ǫgo nihokááʼ dineʼé bá hooʼáałgo ádiʼdidoolnííł, dóó nihokááʼ dineʼé tʼáá ałtso yá dadootsaał, háálá tʼáá ałtso nihokááʼ dineʼé bichʼįʼ nináhidookah.

6 Háálá tʼáá ałtso nihokááʼ dineʼé dadínóonééł Tʼáá Ałtsoní Áyilaií ayóóʼátʼéii binahatʼá bee ajoobaʼii beʼdoolnííł biniyé, adziilii bee nááʼdaʼiidooʼnááłígíí éí nidzin, dóó Adam asiihgo biniinaa nihokááʼ dineʼé nááʼdahiidooʼnááłgo bá nahootʼą́; bąąhági átʼéii hazlį́į́ʼ doo ádoolníłę́ę ályaago biniinaa; dóó diné asihígíí biniinaa Diyin Bóhólníihii bił hazʼą́ą́dóó nahjįʼ kódabiʼdiilyaa.

7 Ákohgo, díí bąąhági átʼéii bikʼé nináʼílyáhígíí doo nińtʼiʼgóó ádooníiłgo éí tsʼídá nízin—doo tsʼídá ahoolʼáágóó bąąhági átʼéii bikʼé nináʼílyáhígíí átʼéego tʼéiyá díí atsʼíís bąąhági átʼéhígíí doo hadaałtʼé ńdadoodleeł da. Ákohgo, nihokááʼ dineʼé áłtsé bee bá nihootʼánée éí tʼahdii ahoolʼáágóó bee honítʼiʼ doo ńtʼę́ę́ʼ. Áádóó díí kótʼéego éí, díí atsʼíís, ałtso didoołdził dóó bimá nahasdzáán bikáaʼjįʼ didoozééł, dóó doo nááhiidooʼnaał da.

8 O Diyin God bibee ééhózinii, dooládóʼ biʼaʼááh hasin dóó bibee ajoobaʼ da lá! Háálá áko shooh, nihitsʼíís doo náádiidzáágóó éí naalʼaʼí nihii naazíinii éí Hoolʼáágóó Diyin God yitsʼąądóó náátłizhgo binantʼaʼí dooleeł ńtʼę́ę́ʼ, dóó biʼiiníziinii silį́į́ʼ, éí doo nínáádidoodááł da.

9 Áádóó nihiiʼ naazíinii éí bineiltʼé siidlį́į́ʼ ńtʼę́ę́ʼ, dóó biʼiiníziinii dasiidlį́į́ʼ ńtʼę́ę́ʼ, dóó biʼiiníziinii bá ndaalʼaʼí dasiidlį́į́ʼ, háálá nihiDiyin God bił hazʼą́ą́dóó nihidáʼdeelkaalgo, yoochʼííd bizhéʼé bił honiidlǫ́ǫgo, bígi átʼáo, tsʼídá doo nihił dahózhǫ́ǫ́góó ndeikai doo ńtʼę́ę́ʼ; aooʼ, éí diné bichʼįʼ éí áłtsé nihimá dóó nihizhéʼé yinaʼazloʼ, dóó adinídíín yá naalʼaʼí ándiilʼįįhgo, nihokááʼ dineʼé baʼáłchíní, ndanitʼingo ádaʼałʼį́ yił íishjaní áyoolíiłgo ndaʼałtseed dóó chahałheeł biyiʼ danichʼǫʼígíí yaa naakai ńtʼę́ę́.

10 O dooládóʼ nihiDiyin God yáʼátʼéehgo ayóó átʼée da, éí éiyá naayééʼ tsʼídá báhádzidii bílákʼeedóó hadiilwołgo nihá hashtʼeʼhósin; aooʼ, naayééʼ báhádzidii, anoonééł dóó chʼį́įdiitah, éí éiyá atsʼíís daaztsánígíí ááłdishní, dóó iiʼ sizíinii ádin silíʼígíí ałdóʼ ááłdishní.

11 Áádóó nihiDiyin God, Israel biDiyin Ayóóʼátʼéii, nihá hashtʼehóolaígíí biniinaa, díí anoonééł baa yááłtiʼígíí, éí éiyá atsʼíseekʼehgo anoonééł, éí daneeznánígíí néididoodlééł; éí daneeznánígíí łeeyiʼ dahólǫ́.

12 Áádóó díí anoonééł baa yááłtiʼígíí, iiʼ sizíiniikʼehgo iiná ádingo; éí bidaneeznánée yee deididoochił; iiʼ sizį́kʼeh anoonééł éí chʼį́įdiitah átʼé; ákohgo atsʼíískʼehjí daneeznánée dóó chʼį́įdiitahdi daneeznánígíí ąąh shijééʼyę́ę wóshdę́ę́ʼ chʼéédooʼnił, chʼį́įdiitahdi iiʼ sizíinii ąąh shijééʼyę́ę éí wóshdę́ę́ʼ kónídoolnííł, dóó atsʼíís łeeyiʼ dahólónée wóshdę́ę́ʼ kóńdoolnííł, dóó diné bitsʼíís dóó biiʼ sizíinii éí ahiih nídahidooʼkah; dóó díí éí Israel biDiyin Ayóóʼátʼéii bee nááʼiiná bibee ádziil bikʼehgo.

13 O dooládóʼ nihiDiyin God binahatʼá ayóó átʼée da! Háálá ałdóʼ, Diyin God bikéyah hózhónídóó, iiʼ sizíinii yáʼadaátʼéehii yidadidoochił, dóó atsʼíís, łeeyiʼdóó yáʼadaátʼéehii daabitsʼíísyę́ę yidadidoochił; dóó atsʼíís dóó iiʼ sizíinii ahiih ńdookah, áádóó tʼáá ałtso nihokááʼ dineʼé doo bidééłníi da dooleeł, dóó doo náádadootsxaał da, dóó atsʼíís dóó ayiʼ naazíinii ahiih náákʼaigo dahiiná nidadoodleeł, nihitsʼíís dahólǫ́ nahalingo nihiʼééhózinígíí hałtʼé, áko niheʼééhózinígíí éí hadaałtʼé dadooleeł.

14 Ákohgo, asiilzíihgo nihainítʼínée, dóó bąąhági ániitʼéhę́ę, dóó baa yá niidzinée tʼáá ałtso nizhónígo nihił béédahózin dooleeł; dóó tʼáá ákogi ádaátʼéii yę́ę, tʼáá ałtso yaa bił dahózhónígíí, dóó biyáʼadaátʼéehii, índa tsʼídá chin bąąh ádaadinii yee hadadítʼée doo, aooʼ, índa yáʼátʼéehii ʼééʼ ninéez yee hadadítʼéego bił béédahózin dooleeł.

15 Áádóó baa hodoolzhish éí tʼáá ałtso nihokááʼ dineʼé díí kodóó áłtsé anoonééłdę́ę́ʼ iiná yiyiʼjįʼ chʼékaigo, dóó doo daatsaahii daazlį́įʼgo, Israel biDiyin Ayóóʼátʼéii bibee ánihwiitʼaah bikááʼdahʼasdáhídi nahiizhdookah; dóó há ndahodiyootʼááł, dóó éí, Diyin God bibee ánihwiitʼaah diyinii bikʼehgo há ndahodiyootʼááł.

16 Áádóó kʼad tʼáá aaníí, Diyin Bóhólníihii hiináago, éí Bóhólníihii Diyin God yee haadzííʼ, dóó ahoolʼáágóó bizaad átʼé, dóó doo nahjįʼ ánéehii átʼé, diné éí tʼahdii Diyinkʼehgo deikááh dooleeł, dóó diné doo yáʼátʼéehii éí ałdóʼ tʼahdii diné doo yáʼátʼéehii danilį́į́ dooleeł; ákohgo, doo yáʼátʼééhgóó dahiinánígíí éí biʼiiníziinii dóó yá ndaalʼaʼí ádáátʼį́; éí éiyá ahoolʼáágóó hodookʼąąłgóó ahidookah, díí éí bá hashtʼeelyaa; dóó tiʼdahooníhígíí éí tsékʼǫʼ beʼekʼid doo nitséésgóó ahoolʼáágóó dookʼąłígíí nahalin dooleeł, índa doo nitséésgóó ahoolʼáágóó bikǫʼ dego dookʼą́ą́ł dooleeł.

17 O nihiDiyin God bibee Ayóóʼátʼéii dóó biʼánahwiiʼaah da! Háálá bizaad tʼáá ałtso éí yeʼełʼį́, dóó bí bizaad yee haadzííʼ, dóó bibee hazʼáanii tʼáá ałtso bidaʼdoolnííł.

18 Ákondi, shooh, tʼáá ákogi átʼéii dahinánígíí, Israel biDiyin Ayóóʼátʼéii yá naazínígíí, Israel biDiyin Ayóóʼátʼéii dayoodlánígíí, nahasdzáán bikáaʼgi beʼoodląʼ biniinaa tiʼhooʼnííh yikʼeh dadeesdlį́įʼii, dóó yáhásin nahjįʼ, kódayiilaaígíí, Diyin God bił hazʼą́ądi bá hazʼąą doo, díí éí tʼáhdoo nahasdzáán álnéhę́ędą́ą́ʼ bá hashtʼeelyaa, dóó ahoolʼáágóó bił dahózhǫ́ǫ dooleeł.

19 O dooládóʼ nihiDiyin God bibee aʼááh hasin ayóóʼátʼéii da, Israel biDiyin Ayóóʼátʼéii! Háálá bá naazínígíí naayééʼ báhádzidii biʼiiníziinii nilíinii yitsʼą́ą́dóó yisdánáyinííł, dóó anoonééł dóó, chʼį́įdiitah hólǫ́ǫdééʼ, dóó łeetsoii dookʼą́ą́ł dahsikaadééʼ, éí éiyá ahoolʼáágóó tiʼhooʼníihii átʼé.

20 O dooládóʼ nihiDiyin God bidiyinii Ayóóʼátʼéii da! Háálá tsʼídá tʼáá ałtsoní bił bééhózin, dóó tʼáadoo leʼé łaʼ doo bił bééhóziní da.

21 Áádóó tʼáá ałtso biinééʼ deididootsʼį́į́łígíí yisdéidoonił biniyé nahasdzáán yikáaʼjįʼ níyá; háálá áko shooh, tʼáá ałtso nihokááʼ dineʼé bił ndahoniłgaahígíí, aooʼ, tʼáá ałtso dahiináanii bił ndahoniłgaahígíí, hastiin dóó asdzání tʼáá áłah, Adam bighan hazʼą́ dóó baʼáłchíní danilínígíí, yá tiʼhoozniiʼ.

22 Áádóó díí biniyé tiʼhoozniiʼ, tʼáá ałtso diné nááʼdahiidooʼnaał áádóó tʼáá ałtso bidááhdóó deidoozįįł, ayóó átʼé ándahwiitʼaah bijį́įdi.

23 Áádóó tʼáá ałtso nihokááʼ dineʼé ádaańdaʼoohkąąh, dóó bízhiʼ binahjįʼ tó bee danihiʼdilzį́į́h yiłní, dóó hózhǫ́ hadaałtʼéego Israel biDiyin Ayóóʼátʼéii deinohdlą́, éí doodago éíí doo Diyin God bił hazʼą́ądi yisdánáhidookah da.

24 Áádóó tʼáadoo ádaańdaʼooskąądgóó dóó bízhiʼ doo dayoodlą́ą́góó, dóó bízhiʼ binahjįʼ doo tó bee dabiʼdoolzį́į́ʼgóó, dóó náádabiʼdiilyáajįʼ doo yáʼátʼééhgóó dahiináago, éí tsʼídá doo náás dadínóosééł da; háálá Bóhólníihii Diyin God, Israel biDiyin Ayóóʼátʼéii, díí yee haadzííʼ.

25 Ákohgo, bee hazʼáanii éí niinílá; dóó háadida bee hazʼáanii ádingo éí ndaʼiisdzííʼ bąąh daʼílínígíí ałdóʼ ádin doo; dóó ndaʼiisdzííʼ bąąh daʼílínígíí ádingo éí bee akʼihodidootʼáłígíí ałdóʼ ádin doo; dóó bee akʼihodidootʼáłígíí ádingo éí Israel biDiyin Ayóóʼátʼéii bibee aʼááh hasin bá nináʼdoodlééł, háálá diné bibąąhági átʼéii bikʼé nináʼílyáhígíí biniinaa; índa bibee ádziil binahjįʼ yisdánáhidookah.

26 Háálá tʼáá ałtso bee hazʼáanii doo baa haasyáhígíí éí, bąąhági átʼéii bikʼé nináʼílyáhígíí nináʼdoodlééł, háálá naayééʼ báhádzidii, anoonééł dóó chʼį́įdiitah, dóó biʼiiníziinii, dóó łeetsoii dookʼą́ą́ł dahsikaad, éí éiyá ahoolʼáágóó tiʼhooʼnííh átʼé, bitsʼą́ądóó yisdánáhidookah; dóó éí éiyá Diyin God, éí Israel biDiyin Ayóóʼátʼéii níłchʼi beiníláhígíí biyiʼ nínáhádlááh.

27 Ákondi yíi tʼáá háiida bee hazʼáanii beʼelyaaígíí, aooʼ, nihí, éí tʼáá ałtso Diyin God bibee hazʼáanii bił béédahózinígíí, dóó doo yikʼeh hółʼį́į́įgo, dóó nabiʼdilkaahgo bíiníłką́ą ndi tʼóó yee naazneʼgo, háálá tʼóó báhádzidgo bił hazʼąą dooleeł!

28 O dooládóʼda chʼį́įdii doo yáʼáshóonii binaʼagiz binahatʼáhí! O nihokááʼ dineʼé bił dahatsoh da, dóó doo dabídziil da, dóó doo ádahalyąą da! Ídahoołʼą́ąʼgo ayóo nihił éédahózin danízin, dóó Diyin God bá nahaʼáago doo dayiistsʼą́ąʼ da, háálá éí tʼóó nahjįʼ kódayiiłʼįįh, tʼáá nihił béédahózin daaníigo, ákohgo, beʼééhózinii éí doo áhályáanii átʼé dóó doo yitsʼąądóó ńdeididooléłí da. Dóó dadínóonééł.

29 Ákondi Diyin God binaʼnítin ajíistsʼą́ąʼgo íhwijiiłʼaahgo éí yáʼátʼééh.

30 Ákondi yíi naalyéhé ląʼígo deitʼíinii, nahasdzáánkʼehgo ayóo binaalyeʼ dahólónígíí. Háálá ayóo binaalyeʼ dahólónígíí biniinaa éí baa dahojoobáʼígíí dabijoołá dóó aa hojoobaʼígíí yichʼįʼ ndahwiiłná, binaalyeʼ tʼéiyá yaa ntsídaakees; ákohgo, binaalyeʼ éí biDiyingo ádayósin. Áádóó áko shooh, binaalyeʼ ałdóʼ yił dínóonééł.

31 Áádóó yíí bijéhdaakałígíí doo tʼáá kʼad daʼdiiztsʼąʼígíí; háálá éí ałdóʼ dadínóonééł.

32 Yíi binááʼ ádaadinii doo tʼáá kʼad dadeezghalii, háálá éídóʼ dadínóonééł.

33 Yíi tsʼídá doo bijéí biyiʼdi daalzį́įʼii, háálá ákéédi baa honíłką́ągo bibąąhági ádaatʼéii bił béédahózingo atídabidoolííł.

34 Yíi biyoochʼídígíí, háálá chʼį́įdiitahgóó yah abidiʼyoolghąął.

35 Yíi naʼałtseedii éí tʼáá aaníí átʼį́įgo naʼałtseedgo, háálá éí éiyá dadootsaał.

36 Yíi ałjiłnii yee tsiʼnaakaahígíí, háálá éí éiyá chʼį́įdiitahgóó yah ahidooltłʼił.

37 Aooʼ, yíi tʼáadoo leʼé ádaalyaago yichʼįʼ sodadilzinígíí, háálá bidaʼiiníziinii aláahdi binanitʼaʼí tsʼídá yaa bił hózhǫ́.

38 Áádóó, índa, yíi tʼáá ałtso bąąhági ádaatʼéii tʼahdii yaa ndaakaigo daneeznánígíí; háálá Diyin God baa náhizhdookah, áádóó áko shooh tʼahdii bąąhági ádaatʼį́įgo Diyin God biniiʼ deidoołtsééł.

39 O, shikʼiské ayóí ánihííníshʼnínii, Diyin God bikʼijįʼ ajiisiihgo tʼóó báhádzidígi átʼéhígíí béédaałniih, dóó biʼiiníziinii nahagizii bee ájítʼį́įgo ałdóʼ tʼóó báhádzidígi átʼéhígíí! Béédaałniih, atsʼíseekʼehgo doo yáʼátʼéehii tʼéiyá hontsékeesgo éí anoonééł átʼé, dóó diyinkʼehjí ntsíjíkeesgo éí ahoolʼáágóó iiná átʼé.

40 O, shikʼiské ayóí ánihííníshʼníinii, shizaad deísínóołtsʼą́ąʼ. Israel biDiyin Ayóóʼátʼéii tsʼídá aláahdi átʼéii béédaałniih. Tʼáadoo leʼé chʼééh álʼíinii bee nihichʼįʼ yéíníłtiʼ tʼáadoo dadohníní; háálá ákódaahdzaago éí, tʼáá aaníinii bikʼijįʼ dadoohłeeł; háálá Ániilaaígíí éí bizaad bee haasdzííʼ. Tʼáá ałtso bąąhági átʼéii yaa naakaiígíí éí saad tʼáá aaníinii doo yídeighahgóó shił bééhózin; ndi diyinkʼehgo dahinánígíí éí doo yéédaaldzid da, háálá éí éiyá tʼáá aaníinii ayóí ádayóʼní dóó doo bidaʼdiiłʼáa da.

41 O índa, shikʼiské ayóí ánihííníshʼnínii, wóshdę́ę́ʼ Diyin Bóhólníihii, éí Diyin Ayóóʼátʼéii, baa hohkááh. Bihonítʼiʼjí éí yáʼátʼéehgo iiná éí béédaałniih. Áko shooh, diné éí áłtsʼóózígo bá honítʼiʼ, ndi bitsijįʼ éí kʼéhózdongo átʼé, dóó dáádílkał yaa áhályánígíí éí Israel biDiyin Ayóóʼátʼéii; dóó doo éí łaʼ bá naalnish da áadi; doo éí náánáłahgo átʼáo yah aʼatiin da anítʼiʼ bidáńdítį́į́hí góneʼ tʼéiyá; háálá doo éí bidiʼnóotʼah da, háálá Bóhólníihii Diyin God éí bízhiʼ.

42 Áádóó tʼáá háíshį́į́ dáádílkał neiniłtsʼinígíí, yichʼįʼ ąą íidoolííł; dóó shił ééhózin nízinígíí, dóó íhoołʼaahígíí, dóó daʼatʼínígíí, háálá ayóó shił ééhózin, dóó íhoołʼą́ą́ʼ dóó ashtʼį́ nízingo éí ádaa haʼniihígíí—aooʼ, díí éiyá tʼáá íiyisíí tʼóó yijoołaah; dóó tʼáá hazhóʼó díí tʼáadoo leʼé nahjįʼ ádayiilaagóó tʼéiyá, dóó tʼáadoo Diyin God bidááhdóó tʼóó shaa yáhásin niizį́įʼgo, dóó hojoobaʼ ákwiinidzin yę́ę tʼáadoo niizį́įʼgo, éí doo yichʼįʼ ąą íidoolíił da.

43 Ákondi tʼáá íiyisíí binahjįʼ éédahózinii dóó binahjįʼ nizhónígo ntsáhákeesii éí ahoolʼáágóó bitsʼą́ą nanilʼin dooleeł—aooʼ, ił hózhóonii éí Diyin yá naazínígíí yá hashtʼelnééh.

44 O, shikʼiské ayóí ánihííníshʼníinii, shizaad éí béédaałniih. Áko shooh, shiʼééʼ éí ádaadiistsóós, dóó nihidááhdóó yishxáád; shí sodiszin Diyin God yisdáshidoołtéełii binááʼ tsʼídá tʼáá ałtsoní yee haisíídii yee shidínóołʼįįł nisingo; ákohgo, kʼadę́ę nihoogháágóó nihił béédahodoozįįł, tʼáá ałtso nihokááʼ dineʼé naanish ádayiilaahąą binahjįʼ bá ndahwiitʼaahgo, éí Israel biDiyin God binááł, nihibąąhági ádaatʼéii shiyiʼ sizíinii dóó yíshxáád, dóó shitsʼádinídíingo bidááhdóó sézíi, dóó nihidił doo shąąh da.

45 O, shikʼiské ayóí ánihííníshʼnínii, nihibąąhági ádaatʼéii bitsʼą́ądóó nahjįʼ kódaohnééh; bibéésh daʼahólzhaʼí yéego yee nihikʼí naʼaztłʼónée nahjįʼ kódaahłééh; Diyin God nitseʼ bee yisdáʼiildéehii nilíinii baa hohkááh.

46 Nihiiʼ naazíinii hózhǫ́ǫgo bichʼįʼ hoolzhishígíí biká hashtʼeʼádadoołnééh áko tʼáá ákogi ádaatʼéii bee ajoobaʼgo ákáʼaʼayeedii bee ánahwiitʼaah nihichʼįʼ kódadoolnííł, azhą́ ánahwiitʼaah bijį́įdi ndi, háálá doo ńdaałdzidgóó doo nahjįʼ kódadoohníił da; dóó tʼóó baaʼihgo aszihígíí hainítʼį́įgo tsʼídá doo béédaałnih da doo, dóó doo kódadidoohniił da: O Bóhólníihii Diyin God Ayóóʼánóodziilii neʼánihwiitʼaah éí diyin, éí diyin—ndi bąąhági átʼéii shee hólónígíí éí shił bééhózin; nibee hazʼáanii kʼínítiʼę́ę, dóó naʼayísiʼyę́ę éí tʼáá shí; dóó biʼiiníziinii shisił, háálá tʼáá íiyisíí tʼóó baaʼihgo doo bił hózhónígíí éí bá hajaʼ íishłaa.

47 Ákondi shooh, shikʼis danohłíinii, daʼ doo yáʼátʼéehgo nihił hazʼánígíí nihił ííshją́ą́ íishłaago tʼéiyá chʼéénihideesił? Nihintsékees haałtʼéegoóísh nihiiʼ naasizíinii bił hahodínééshchał? Daʼ tʼáadoo nanitłʼahgoísh nihił hashneʼ dooleeł tʼáá aaníinii baa haneʼ doo nanitłʼahí dóó bąąhági átʼéii doo nihídadéétʼiʼgóó?

48 Áko shooh, dahodíínóhsingo éí dadiyinii bee nihichʼįʼ yáshtiʼ dooleeł ńtʼę́ę́ʼ; ndi doo éí dahodinohsingo, dóó nihinaʼnitiní nílį́į dashíínóhʼníigo dashinółʼį́, áko bąąhági átʼéii bitsʼą́ądóó hazhdooniłígíí bee nanihidínéeshtįįł tʼáá íiyisíí nisin.

49 Áko shooh, shiiʼ sizíinii eíí bąąhági átʼéii tsʼídá doo bił yáʼátʼéeh da, dóó shijéí éí yáʼátʼéehii tsʼídá bił nizhóní; dóó shiDiyin God bízhiʼ diyinii éí baa hashniih dooleeł.

50 Wóshdę́ę́ʼ, shikʼis danohłíinii, tʼáá anółtso dibááʼ danohłį́nígíí, díí tó baa hohkááh; dóó tʼáá háiida bibéeso ádinígíí, wóshdę́ę́ʼ ndaʼiyołniih dóó daʼohsą; aooʼ, wóshdę́ę́ʼ béeso tʼáá géedgo chʼil naʼatłʼoʼí bitooʼ dóó abeʼ ndahołniih éí doo bą́ą́h ílíní da.

51 Ákohgo, haʼátʼííshį́į́ doo daʼílíinii tʼáadoo nihibéeso bee ndahohłniihí, dóó naanish doo bee náás adoodáałii tʼáadoo nihinaanish ádeínóhsiní. Tʼáá íiyisíí dashíínóołtsʼą́ąʼ, dóó saad bee yááłtiʼę́ę béédaałniih; dóó Israel biDiyin Ayóóʼátʼéii baa hohkááh, dóó tʼáadoo leʼé doo ádoodįįłígíí chodeinoołʼįįh, índa doo doochxǫǫłii, dóó bíniʼ nihiiʼ naazíinii tʼáadoo leʼé daneeskʼahii yaa bił dahózhǫ́.

52 Áko shooh, shikʼiské ayóí ánihííníshʼnínii, nihiDiyin God bizaad béédaałniih; tʼáá ákwííjį́ éí bichʼįʼ sodadołzin, dóó tʼáá ákwíí tłʼééʼ, bízhiʼ diyinii bichʼįʼ ahéheeʼ dadohní. Bíniʼ nihijéí bił dahózhǫ́.

53 Áádóó áko shooh dooládóʼ Diyin Bóhólníihii bibee ahadaʼdeetʼaahii da, dóó dooládóʼ binaanish baʼáłchíní yá ííłʼínígíí ayóóʼátʼée da; dóó dooládóʼ ayóó átʼáo nihokááʼ dineʼé baʼáłchíní yichʼįʼ adááyáa da, dóó háálá beʼayóóʼátʼéii, dóó bibee ajoobaʼ dóó bibee aa aʼááh hasin biniinaa, atsʼíseekʼehgo, náás nihaʼáłchíní dooleełígíí doo tʼáá ałtso ndabidiʼdootsxiłgóó yee nihił ahaʼdeetʼą, ákondi yaa áhályąągo doo éí ádadooníłí da; dóó náás hodeeshzhiizhgo éí Israel bighan dooleełígíí danilíinii bitsʼáozʼaígíí diné yáʼátʼéehgo dadínóosééł.

54 Áádóó kʼad, shikʼiské danohłíinii, ląʼída bee nihichʼįʼ hanáádeesdzih nisin; ndi yiską́ągo éí shizaad yidziihígíí bee nihichʼįʼ hanáádeesdzih. Amen.