1 Áádóó kʼad shí, Jacob, shikʼiské ayóó anihiiníshníinii, nihichʼįʼ haanáánásziih, díí Diyinkʼehgo deiyíkáhígíí bitsʼaozʼaʼ bídéétʼiʼ baa yéiłtiʼę́ę ááhdishní.

2 Háálá áko shooh, ahadaʼdeetʼą́ éí tsʼísee kʼehgo ahadaʼdeestʼánígíí ádaatʼé; ákohgo, ląʼí da nihaʼáłchíní tsʼísee kʼehgo ndadootsxiłgo shił ííshjání ályaa, ákótʼée ndi, Diyin God ląʼí da yaa jidoobaał; dóó nihaʼáłchíní dadoodzih, báNináʼnídláii tʼáá aaníí bił béédahodoozįįłgo yaa hidookah.

3 Ákohgo, nichʼįʼ haasdzíiʼgo, Christ nidzingo—akéedi tłʼéeʼgo Diyin yá naalʼaʼí shichʼįʼ haadzíiʼgo díí eí bízhiʼ shidííniid—éi Jew dineʼé yitaadoogááł, íiyisíí dineʼ tsiʼnaakai bił nahazʼáágóó—dóó tsin ałnáozʼáii yikááʼ yił adaʼdoołkał—NihiDiyin God íiyisíí bá hwiinizin, doo nááná ła nahasdzáan bikáaʼgi diné dah yikahii kótʼáo biDiyin God tsin ałʼnáozʼai yikááʼ yił adaʼdoołkał da.

4 Háálá nááná łaʼ dadineʼé ayóó átʼáo álílee baa heesyáago ádaa ńdaʼdookąął, dóó biDiyin nilį́įgo bił béédahodoozįįł.

5 Ákondi naʼagiz dóó bąąhági átʼéii yaa naakaí biniinaa, Jerusalemdiígíí bikʼos yichʼįʼ deidoołtłʼis, áko tsin ałnáozʼá bikáajįʼ yił adaʼdoołkał.

6 Ákohgo, bibąąhági ádaatʼéii, dahalchxǫʼ, téʼéʼį́ naałniihii, dóó dił dilzas bí bikʼi hodooleeł; dóó doo nidaaztseedígíí tʼáá ałtso dineʼé dahólǫ́ǫgo daʼníłtsʼą́ąjigo ałtsʼádahidínóolkał.

7 Ákondi shooh, Bóhólníihii Diyin God ání: Áajįʼ ayííłką́ągo, Christ áshtʼínígíí dashíísółtsʼą́ąʼgo, ákogo dabizhéʼéyę́ę bił ahadaʼdinishtʼánée bee bitsʼíís nahasdzáán bikáaʼgi hashtʼéídadeeshdlííł, kéyah baadahideestʼą́ąjįʼ.

8 Áádóó baa hodoolzhish ałkʼídą́ą́ ałtsʼáheeskaiyę́ędę́ę́ʼ ałhąʼándoolnííł, Tónteel bikááʼ kédaayahdę́ę́ʼ, dóó nahasdzáán bikááʼ dį́į́ʼ ahidahodeezʼáádę́ę́ʼ; Gentile dineʼé shinááʼ biyiʼdi ayóó ádaatʼéii doo, Diyin God kóníiniʼ, kéyah baa deetʼą́ bichʼįʼ yiyééłgo.

9 Aooʼ, Gentiledóó aláahdi hastóí naatʼáanii dóó aláahdi sáani naatʼáanii baa ádahayáa doo; ákohgo, Diyin Bóhólníihii biʼahadaʼdeestʼą́ Gentile dineʼé bichʼįʼ ayóó átʼée doo, háála bí ádííniid, dóó háish éí yikʼijįʼ yáłtiʼ doo.

10 Ákondi shooh, díí kéyah, ní Diyin God, éí kéyah nihaadeetʼáanii átʼée doo, dóó éí kéyah bikááʼ Gentile dineʼé bikʼidahozhdoodliił.

11 Áádóó díí kéyah Gentile dineʼé bichʼįi tʼáá nííkʼeh dooleeł dóó díí bikááʼ adáadi naatʼaaníí ádaadin doo, éí Gentile dineʼé yichʼįʼ nídidookah.

12 Áádóó shí díí kéyah tʼáá ałtso diné dadeikáíhii yikʼijįʼ bitsxeʼgo ádeeshlįįł.

13 Áádóó Zion yikʼijįʼ naabaahígíí éí ádadooldįįł, ní Diyin God.

14 Háálá háiida aláahdi naatʼáanii shikʼijįʼ yiyiisįʼgo ábidiʼdooldįįł, háálá shi, Diyin Bóhólníihii, yáʼąąsh aláahdi binaatʼáanii, aláahdi binaatʼáanii deeshłééł, dóó hoolʼáágóó beʼadinídíín nishłį́į doo, dashóóshtsʼą́ą́ʼii.

15 Ákohgo, díí biniyé, shi ahadaʼdeestʼánée dah bedaʼdoolnííł éí nihokááʼ dineʼé baʼáłchíní bichʼįʼ hastʼeiishlaa, éí tʼah atsʼíís beedahólǫ́ǫgo ádeeshłííł, chahałheeł dóó nadaʼałtseedii, dóó tʼóó badaaʼihii binaanish danilíinii deeshchxǫǫł.

16 Ákohgo, Zion yikʼijįʼ naabaahígíí, Jew dineʼé dóó Gentile dineʼé, ąąh naazhjéʼígíí dóó tʼáá nííkʼeh deíkáhígíí, hastóí dóó sáanii, danilíinígíí ádooldįįł; éí eii nahasdzáán biʼałjiłnii danilį́; háálá háiida doo shił danilínígíí éí shikʼijįʼ danilį́, ní nihiDiyin God.

17 Háálá shí nihokááʼ dineʼé baʼáłchíní bichʼįʼ shi ahadaʼdeestʼą́ ałtso ádadeeshłííł, tʼah atsʼíís bee dahólǫ́ǫgo bichʼįʼ bedaʼdeeshłííł.

18 Ákohgo, shikʼiské ayóó íínishʼníinii, ní nihiDiyin God: Gentile dineʼé bílaʼ bee nílástsiiʼ átídeeshłííł, ákótʼée ndi, Gentile dineʼé bijéí yilzhóólí ádadeeshłiił; áko éí bichʼįʼ azhéʼé ndahalin doo; ákohgo, Gentile dineʼé bikʼihojidoodliił dóó Israel bighandóó háájéʼígíí bił yídooltah.

19 Ákohgo, díí kéyah nílástsiiʼ bichʼįʼ yideesįįł, dóó hoolʼáágóó, tʼáá ałtso nílástsiiʼ bitah deídóołltah, kéyah daabí dooleełgo; kéyah tsʼídá ílíinii átʼé, shiłní Diyin God, tʼáá áłtso kédaayah biláahdi átʼé, ákohgo tʼáá ałtso dineʼé yikááʼ hináanii shichʼįʼ dahodísin doo, ní Diyin God.

20 Áádóó kʼad, shikiʼiské ayóó aníhíínishniinii, nihiDiyin God joobaʼii yiitʼį́įgo díí tʼáá ałtsoní bee ayóó átʼáo ééhózin nihainíláago, nihí bénéílniih doo, dóó nihibąąhági ádaatʼéii nahjįʼ ndadiiʼnił, dóó doo nihí nihitsiitsʼiin yaa kódadiilnííł da, háálá doo nahjįʼ kódanihiʼdiilyaa da; ákótʼée ndi, nihikéyah nihaa deetʼánée biyiʼdóó chʼínihidiʼneelkaad; ákondi kéyah hózhǫ́ yáʼátʼééhgóó nihiʼdeetʼeezh, háálá Diyin Bóhólníihii tónteel niheʼatiin áyiilaa dóó tónteel bikááʼgóó dahoniidlǫ́.

21 Ákondi Diyin Bóhólníihii bibee ahadaʼdeestʼą́ tónteeł yikááʼ dahólóonii bichʼįʼ ayóó átʼéii doo; ákohgo tónteel bikááʼ haʼní, díí tʼah bibąąhgóó shį́į́ dahólǫ́, dóó éí nihikʼiské yikááʼ kéédahatʼį́.

22 Háálá áko shooh, Bóhólníihii Diyin God Israel bighandóó tʼáá náhodiʼnaahgo chʼíyiiʼéésh, íinízin dóó bił yáʼátʼéhígíí bikʼehgo. Áádóó kʼad áko shooh, Diyin Bóhólníihii tʼáá ałtso kʼídahaastiʼii tʼáá átʼé yénálniih, ákohgo nihí ałdóʼ nihénálniih.

23 Éí bąą, nihijéí bił dahóshǫ́, dóó tʼáá nííkʼeh ádaʼołʼínígíí béédaałniih—hoolʼáágóó anoonééł daatsʼí éí doodago hoolʼáágóó iiná.

24 Ákohgo, shikʼiské ayóó ánihííníshníinii, Diyin God bił kʼé ndaʼahididohniił, biʼiiníziinii dóó tsʼísee kʼehgo éí dooda, dóó béédaałniih, Diyin God bił kʼé ndaʼahidohniidgo Diyin God bibee ajoobaʼ biiʼ dóó biníkááʼ góneʼ tʼéiyá yisdádoohkah.

25 Ákohgo, Diyin God anoonééłdę́ę́ʼ nánihidiilá nááʼiiná beʼadziilii bee, dóó hoolʼáágóó anoonééł bąąhági átʼéii bikʼé nináʼílyáhígíí beʼadziilii ałdóʼ bee, áko hoolʼáágóó Diyin God bił hazʼą́ą́ góneʼ ná yah ahóótʼiʼ dooleeł, áko Diyin bibee ajoobaʼ biníkááʼ góneʼ baa hodíínih. Amen.