1 Áko shooh, áhoodzaa shí, Nephi, łą́ądi Bóhólníihii shiDiyin God bichʼįʼ yichá, shínaaí bá háchįʼígíí biniinaa.

2 Ákondi shooh, tʼóó yíwohda shichʼįʼ bádahachįʼ, wónáásdóó dashidiyoołhéełgo shíká nideiʼá.

3 Aooʼ, shidááh yáłtiʼ daazlį́į́ʼ, kódaaníigo: Nihitsilí nihikʼi naatʼáanii deeshłeeł nízingo nitsékees; dóó łą́ągo biniinaa tiʼdahwisiiʼniiʼ; ákohgo, tįʼ kʼad dahodiyiilyééł, bizaad éí doo bikʼee tiʼ náádahwiidiiʼnih da. Háálá áko shooh, doo éí nihikʼihooʼáałgo ádiilníił da; jó éí nihí nihaadeetʼą́, alą́ąjįʼ neitʼaashígíí, díí dineʼé bikʼi hwiitʼááłii niidlį́.

4 Kʼad shí tʼáá ałtso saad yee shikʼijįʼ hahasdzíʼę́ę díidí béésh tʼą́hí doo bikááʼ áshłéeh da. Ákondi tʼáá kóníłtsogo ádíshní, dashidiyoołhéełgo shíká ndeizʼá.

5 Áádóó baa hoolzhiizh Diyin Bóhólníihii shił hoolneʼ, shí, Nephi, dóó tʼáá háiida ádeinízinígíí ałdóʼ, nihínaaí bitsʼą́ą́dóó diné doo kééhatʼíní góneʼ dah didoohnééł nihidóóniid.

6 Ákohgo, baa hoolzhiizh shí, Nephi, sheʼasdzą́ą́ dóó shaʼáłchíní dóó Zoram ałdóʼ, dóó beʼasdzą́ą́ dóó baʼáłchíní, índa Sam, shínaaí nilíinii, dóó beʼasdzą́ą́ dóó baʼáłchíní dóó Jacob dóó Joseph, shitsilíké, dóó shilahké ałdóʼ, dóó háí shį́į́ shídóʼ, danízinígíí. Áádóó tʼáá ałtso shił dah diikaiígíí éí Diyin God kóhodoonííł nínígíí dóó diyingo ííshją́ą́ áyiilaa deidoodląąłígíí tʼéiyá ádáátʼį́; ákohgo, shizaad deidiiztsʼą́ą́ʼ.

7 Áádóó nihiníbaal dóó chodeidiilʼįįłígíí, doo kééhatʼínígóó yiiʼnéełgo tʼóó ahayóí danihiiską́. Áádóó yiiʼnéełgo ląʼí da danihiiską́ągo índa, nihiníbaal ndasiiʼnil.

8 Áádóó shidineʼé éí niniiʼnánígi, Nephi bee deiyídíijiił dadííniid; ákohgo, Nephi, hoolyéego yee deiyíízhiʼ.

9 Áádóó tʼáá ałtso shił naakaiígíí, Nephi bidineʼé deiniilyée dooleeł, dadííniid.

10 Áádóó tʼáá ałtsojįʼ Diyin Bóhólníihii yee nahwiisʼáanii, dóó bibee hazʼáanii dóó yee hahadziihii bídaniitaahgo bikʼeh dahoniilʼį́į́ ńtʼę́ę́ʼ, díí éí Moses bibee hazʼáanii bikʼehgo.

11 Áádóó Diyin Bóhólníihii éí nihił hólǫ́ǫ́ ńtʼę́ę́ʼ; dóó tʼáá íiyisíí náásdeekai; háálá kʼǫ́ǫ́ʼ kʼéédaʼdiilyéehgo tsʼídá ląʼígo ńdaʼniiltʼį́į́h ńtʼééʼ. Áádóó dibé dóó tłʼízí, dóó béégashii ádaatʼéii índa naaldlooshii ałʼąą ádaátʼééłíí, nihee dahazlį́į́ʼ.

12 Áádóó shí, Nephi, béésh łitsoii tʼą́hí bikááʼ haneʼ nááháasdzoyę́ę ałdóʼ níʼą́; dóó tʼáadoo leʼé nímazgo, biyiʼ dah atsihí, bikʼehgo niiʼnánée, Diyin Bóhólníihii bílaʼ yee, shizhéʼé yá áyiilaahą́ą ałdóʼ níʼą́ naʼíisdzoyę́ę bikʼehgo.

13 Áádóó baa hoolzhiizh tʼáá íiyisíí náásiideekai, dóó nihidineʼé ląʼí da silį́į́ʼ díí kéyah bikáaʼgi.

14 Áádóó shí, Nephi, Laban bibéésh hał ńdiitą́, dóó bikʼehgo béésh hał ląʼí da béédaʼiilyaa, Laman dineʼé daosyeʼígíí baa ayidahwiidlihgo biniinaa; háálá shí dóó shaʼáłchíní dóó shidineʼé dabidinínígíí deijoołáhígíí shił bééhózingo biniinaa.

15 Áádóó shidineʼé, kin álʼínígíí bee nanétą́ą́ʼ, dóó tʼáá ałtso tsin, dóó béésh ditʼóódígíí, dóó béésh łichíiʼii, índa béésh łitsoii, dóó béésh óola, dóó béésh łigaii, índa tʼáá ałtso béésh daʼílíinii ałʼąą ádaátʼéhígíí, bee naʼanishígíí dóó álʼínígíí bee nanétą́ą́ʼ: Háálá díí éí tʼóó ádahayóí dahólǫ́.

16 Áádóó shí, Nephi, diyin bighan łaʼ íishłaa; dóó Solomon bidiyin bighan áyiilaahą́ą bikʼehgo íishłaa ákondi tʼáadoo leʼé daʼílínígíí tʼéiyá áłchʼį́į́dígo bee íishłaa; áko, díí kéyah bikáaʼgi ákódaatʼéhígíí tʼáá ádingo biniinaa, ákohgo, Solomon bidiyin bighan ádoolníiłgo doo bihónéedząą da. Ákondi ályaaígi éí Solomon bidiyin bighan áyiilaayę́ę nahalin; dóó tsʼídá nizhónígo binaʼazhnishgo hadilyaa.

17 Áádóó baa hoolzhiizh shí, Nephi, shidineʼé ayóó naanish deiyiichįįhgo yídahoołʼą́ą́ʼ, dóó tʼáá bílaʼ yee ayóo nidaalnish daazlį́į́ʼ.

18 Áádóó baa hoolzhiizh aláahdi nihinaatʼáanii dííleeł dashiłníí ńtʼę́ę́ʼ. Ndi shí, Nephi, éí doo aláahdi naatʼáanii bee dahodooleeł da nisin ńtʼę́ę́ʼ; ákótʼée ndi, tʼáá bííníshghahígi átʼáo bíká eeshwod.

19 Áádóó áko shooh, Diyin Bóhólníihii saad yee haadzíʼę́ę, shínaaí binaatʼáanii dóó binaʼnitiní dííleeł nínée, éí bohoolyaa. Ákohgo, dadiyiilyééł daaníijįʼ ahoolzhiizhgo, Diyin Bóhólníihii bibee hazʼáanii yee haadzíʼę́ę bikʼehgo tʼáá aaníí shikʼiské binaatʼáanii dóó binaʼnitiní sélį́į́ʼ.

20 Ákohgo, Diyin Bóhólníihii saad yee shichʼįʼ haadzíʼę́ę éí beʼelyaa, éí kóníigo: Háálá nizaad doo dayíistsʼą́ʼgo éí Diyin Bóhólníihii bitsʼą́ą́dóó nahjįʼ kódoolnííł. Áádóó áko shooh, tʼáá aaníí bitsʼą́ą́dóó nahjįʼ kóbiʼdiilyaa.

21 Áádóó hóyéeʼgo haʼoodzíʼígíí yikʼijįʼ kwíyiilaa, aooʼ, tsʼídá bikʼéʼíyéʼígíí, tsiʼnaakaiígíí biniinaa. Háálá áko shooh, bijéí bikʼijįʼ deineestłʼis, áko bááshzhiní nahalingo bitsįʼ yishtłizh daazlį́į́ʼ; ákohgo, nigháiidę́ę́ʼ daalgai ńtʼę́ę́ʼ, dóó tsʼídá danizhóní dóó bá ádahwiinítʼį́į ńtʼę́ę́ʼ, áko shidineʼé doo bidá dadinóolniił da Bóhólníihii Diyin God bikágí daadiłhiłgo áyiilaa.

22 Áádóó Bóhólníihii Diyin God kóníiniʼ: Nidineʼé tʼóó badaaʼihgo yaa nitsídaakeesgo ádeeshłííł, tʼáá hazhóʼó doo yáʼátʼéehii yaa naakaiígíí yaa ńdaʼooskango tʼéiyá.

23 Áádóó háiida bílástsiiʼ ahoolchííłgóó bílástsiiʼ yił ahihidiikáii hóyéeʼjí bá hadaʼdoodzih; tʼáá ákótʼáo bee bá hadaʼdoodzih. Áádóó Diyin Bóhólníihii éí yee haadzííʼ, dóó éí áhoodzaa.

24 Áádóó hóyéeʼgo bá haʼoodzíʼígíí biniinaa dineʼé tʼóó bił dahóyéʼígíí daazłį́į́ʼ, ayóo atídaʼałʼį́ dóó ayóo ndahagiz, dóó diné doo kééhatʼínígi naaldlooshii daʼałchinígíí yíká ádaatʼį́.

25 Áádóó Bóhólníihii Diyin God áshidííniid: naʼáłchíní náás ahoolchííłgóó atídeiłʼį́įgo, yee shé niná dahalnííh biniiyé; dóó kwinzahjįʼ doo shéédaałniihgóó, dóó doo shizaad deísínółtsʼą́ą́ʼgóó, atídabiłʼį́įgo ádabidoołdįįł.

26 Áádóó baa hoolzhiizh shí, Nephi, éí Jacob dóó Joseph yiisį́į́ʼ, áko shidineʼé bikéyah bikááʼgóó priest dóó naʼnitiní danilį́į dooleeł.

27 Áádóó baa hoolzhiizh ił dahozhǫ́ǫ́jí bikʼehgo kéédahwiniitʼį́ ńtʼę́ę́ʼ.

28 Áádóó tádiin nááhaidą́ą́ʼ nihí ńléí Jerusalemdę́ę́ʼ dah diikai.

29 Áádóó shí, Nephi, shibéésh tʼą́hí íishłaaígíí, bikááʼ shidineʼé, kónzahgóó baa naʼiisóóh.

30 Áádóó baa hoolzhiizh Bóhólníihii Diyin God áshidííniid: béésh tʼą́hí łaʼ ánáádanidleʼ; dóó shił yáʼádaatʼéehgo néshʼinii ląʼígo bikááʼ nidahidíizoh, éí shidineʼé bíká adoolwoł.

31 Ákohgo, shí, Nephi, Diyin Bóhólníihii bibee hazʼáanii bikʼeh hwiideeshʼįįłgo, dah diiyá dóó béésh tʼą́hí ádeeshłaago díidí bikááʼ náházoh.

32 Áádóó Diyin God bił yáʼátʼéhígíí éiyá náházoh. Áádóó shidineʼé Diyin God bitsʼą́ą́dę́ę́ʼígíí bił yáʼádaatʼéehgo éiyá díidi béésh tʼą́hí bikááʼ náhádzooígíí bił danilį́į doo.

33 Áádóó shidineʼé binákééʼ haneʼígíí hazhóʼó shił bééhodoozįįł danízinígíí nááná łaʼ shibéésh tʼą́hí ndeidoołkah.

34 Áádóó kóníłtsogo baa haasdziih, dízdiin nááhai, dóó nihí tʼááʼ íídą́ą́ʼ daʼahiigą́ą́ʼ dóó nihikʼiské bił saad ałchʼįʼ adahéeʼnil.