1 Áádóó kʼad shí, Nephi, shidineʼé bitahgóó bee naʼneestąʼígíí éí doo ałtso náhásóóh da; doo ndi ayóó akʼeʼeshchíi da, yáshtiʼígíí átʼéego; háálá diné Iiʼ Sizį́ Diyinii bibeʼaziilii yee yádaałtiʼgo éí Iiʼ Sizį́ Diyinii nihokááʼ dineʼé baʼáłchíní bijéí biyiʼdi yił ííshją́ą́ ádeileʼ.

2 Ákondi shooh, tʼóó ahayóí éí Iiʼ Sizį́ Diyinii yikʼijįʼ bijéí nídeiniłtłʼís, éí biniinaa doo biiʼ bá hazʼą́ą da; ákohgo, ląʼí da nááháasdzooígíí doo tʼáá aaníinii ádaatʼée da danízingo nahjįʼ kódeileʼ.

3 Ákondi shí, Nephi, nááházooʼígíí éí tʼáá shí nááházo, dóó alááhgo ílíinii ádaatʼé nisin, dóó shidineʼé éí íiyisíí bá átʼé nisin. Háálá tʼáá ákwíí jį́ bá sodiszin, dóó tʼáá ákwíí tłʼééʼ shitsʼiiʼáál bikáaʼgi shinákʼeeshtoʼ baa atínídinishdleeh, hó hwiniinaa; dóó oodląʼ bee shiDiyin God náoshkąąhgo bichʼįʼ sodiszin, dóó baa náʼooshkąąhígíí yididootsʼį́įłgo éí shił bééhózin.

4 Áádóó shił bééhózin Bóhólníihii Diyin God shisodizinígíí shidineʼé yáʼátʼééhjí yikahgo yee yidoosį́į́ł. Dóó saad doo dabidziilgóó náházohyę́ę bichʼįʼ dabidziilgo ádadoolnííł; háálá binahjįʼ yáʼátʼéehii ádeidoolííł; dóó dabizhéʼéyę́ę yindahodoosįįłgo bił ííshją́ą́ ádadoolnííł; dóó Jesus yaa yáłtiʼ, dóó éí deiyoodląągo ádeidoolííł, dóó nihoníyáajįʼ haʼólnínígíí, éí iiná doo ninítʼíʼígíí átʼé.

5 Áádóó bąąhági átʼéii tʼóó bahadzidgo yikʼijįʼ yáłtiʼ, saad tʼáá aaníí tʼáá ííshjánígíí bikʼehgo; ákohgo, diné saad náházooʼígíí doo yikʼee báháchįʼ da dooleeł tʼáá hazhóʼó chʼį́įdii biʼiiníziinii biiʼ hólǫ́ǫgo tʼéiyá.

6 Tʼáá bééhózinígíí ayóó baa shił hózhǫ́; tʼáá aaníinii ayóó baa shił hózhǫ́; shiJesus ayóó baa shił hózhǫ́, háálá chʼį́įdiitahdę́ę́ʼ shiiʼ sizíinii yisdáhyííłtį́.

7 Shidineʼé diyingo ayóóʼóʼóʼní bee ayóó ííníshʼní, dóó Christ tʼáá íiyisíí yinishdląągo ląʼí da iiʼ naazíinii bąąhági átʼéii tsʼídá bąąh ádaadingo biʼánihwiitʼaah-bikááʼdahʼasdáhídi bił ahíideeshkah.

8 Jew dineʼé diyingo ayóóʼóʼóʼní bee ayóó ííníshʼní—Jew dineʼé ááhdishní, háálá éí éiyá bitsʼą́ą́dóó hosélį́į́ʼ.

9 Shí ałdóʼ Gentile dineʼé diyingo ayóóʼóʼóʼní bee ayóó ííníshʼní. Ákondi shooh, ádin díí doo bee haʼíínishníi da tʼáá hazhóʼó Christ yił kʼé nídaʼahidooniidgo tʼéiyá, dóó áłtsʼóózígo yah ahóótʼiʼ góneʼ yahahídookááh, áádóó kʼéházdon atiin yikááʼ deíkááh doo éí hoolʼáágóó iiná bichʼįʼ ahóótʼiʼ, dóó bá nahootʼą́ bijį́įjįʼdíí atiin yikááʼ náásgóó deíkááh doo.

10 Áádóó kʼad, shikʼiské ayóó ánihííníshʼníinii, dóó Jew dineʼé ałdóʼ, dóó nahasdzáán nidaneesʼą́ą́dę́ę́ʼ tʼáá ánóhtʼé, díidí saad deisínółtsą́ą́ʼ dóó Christ deinohdlą́; díidí saad doo déinohdlą́ą́dą́ą́ʼ Christ déinohdlą́. Dóó Christ déinohdlą́ą́góó díidí saad déidoohdląął, hááłá éí Christ bizaad ádaatʼé, dóó éí éiyá shaayiizlá; dóó éí nihokááʼ dineʼé tʼáá ałtso yáʼátʼééh oodááłjí yee neinitin.

11 Áádóó doo Christ bizaad ádaatʼéégóó, baa ntsídaahkees—háálá Christ adziilii dóó ayóó átʼéii binahjįʼ, bizaad átʼéego, nihił ííshją́ą́ íidoolííł, nihoníyáadi; dóó, ni dóó shí éí biʼánihwiitʼaah hazʼą́ą́dóó ałchʼįʼ yidiidzįįł; dóó díí náhidíízoh shidííniidígíí nił bééhodoozįįł, azhą́ doo bíneeshʼą́ą da ndi.

12 Áádóó aTʼaa nilíinii bichʼįʼ sodiszin Christ bízhiʼ binahjįʼ, niidląʼí éí doodago daatsʼí tʼáá áníiltso, ayóó átʼéii ayííłką́ąjįʼ ahoolzhiizhgo bił hazʼą́ądi yisdánáhidiikah.

13 Áádóó kʼad, shikʼiské ayóó ánihííníshʼníinii, tʼáá anołtso Israel bighandóó háájéʼígíí, dóó tʼáá ánóhtʼé nahasdzáán nidaneesʼą́ą́dę́ę́ʼígíí, łeeyiʼdę́ę́ʼ iinééʼ yéego diitsʼaʼ nahalingo nihichʼįʼ hadeesdzih: ayóó áhootʼé ayííłką́ąjįʼínda Hágoóneeʼ nihidííniid doo.

14 Áádóó nihí Diyin God biyáʼátʼéehii doo danohsinígíí, dóó Jew dineʼé bizaad, dóó shí shizaad, doo nihił danilínígíí, dóó Diyin God biDibé Yázhí bizaad yee hadoodzihígíí ałdóʼ, áko shooh, ahoolʼáágóó hágoóneeʼ nihidishníi dooleeł, háálá ńléí áajįʼ ayííłką́ągo éí díí saad, nihikʼijįʼ ninádootʼááł.

15 Háálá nahasdzáán bikáaʼgi bikʼeh áhoshłaaígíí, nihwiitʼaahdi nihikʼijįʼ nástʼą́ą doo; háálá Diyin Bóhólníihii ákóshidííniid, áko biʼdeeshłííł. Amen.