1 Jacob éí Nephi yikʼis nilįįgo, Nephi bidineʼé saad yee yichʼįʼ haadzííʼ:

2 Áko shooh, shikʼisoo ayóó íínishʼníinii, Shí, Jacob, éí Diyin God shíkáʼádííniid, dóó Diyinjí bikʼehgo éʼélʼį́ bee shiʼdoolzį́į́ʼ, dóó shikʼis Nephi yee shíísį́į́ʼ, éí aláahgo naatʼáanii éí doodago nihaa áhályą́ nilį́įgo danółʼį́, dóó nihichʼą́ą́h naagháají badaʼíínóhłí, Áko shooh shí éí tʼóó ahayóidi tʼáadoo leʼé bee nihichʼįʼ yéíłtiʼ.

3 Ákótʼée ndi, nihichʼįʼ yánáánáshtiʼ; háálá nihiiʼ naazíinii tsʼídá yáʼátʼéehii bá nisin. Aooʼ, ayóo nihá shiʼdiiłʼá; dóó nihí tʼáá ałkʼidą́ą́ʼ ákótʼéego nihił bééhózin. Háálá hááhgóóshį́į́ bee nihichʼįʼ yánáshtih; dóó shizhéʼé bizaadígíí bee nanihinétą́ą́ʼ; dóó tʼáá ałtsoní ńdaháasdzoígíí bee nihichʼįʼ yéíłtiʼ, ńléí nahasdzáán ályaadę́ę́ʼ.

4 Áádóó kʼad, Áko shooh, shí tʼáadoo leʼé dahólóonii, dóó náasjįʼ dahodooleełii, nihichʼįʼ baa yáshtiʼ; ákohgo, Isaiah bizaad nihichʼįʼ yídéeshtah. Áádóó éí saadígíí shikʼis bee nihichʼįʼ hadeesdzih nízinée díidí éí ádaatʼé. Áádóó nihizhą́ ilínígíí bíká nihichʼįʼ yáshtiʼ, áko nihiDiyin God bízhiʼ bíhwiidoołʼááł dóó bee baa dahohniih doo.

5 Áádóó kʼad, saad yídéeshtahígíí Isaiah ńléí Israel bighandóó háájéʼígíí yaa haadzííʼ yę́ę éiyá ádaatʼé; ákohgo, bee daʼádinółʼį́, háálá Israel bighandóó haojééʼ. Áádóó tʼóó ahayóí tʼáadoo leʼé Isaiah yee haadzíʼígíí éiyá bee daʼádinółʼį́, Israel bighandóó haojééʼígíí biniinaa.

6 Áádóó kʼad, díidí saadígíí: Bóhólníihii Diyin God kóní: Jóʼákon, shílaʼ Gentile dineʼé bichʼįʼ dah dideeshnih, dóó diné bikʼehgo oodáłígíí bá dah deestsos; dóó niyeʼké bigaan yee dayójááh, dóó nitsiʼké biwos yee dayółjiid dooleeł.

7 Áádóó aláago naatʼáanii daʼbizhéʼégo, dóó asdzání naatʼáanii daʼbimáago baa ádahalyą́ą doo; niʼjįʼ nihichʼįʼ yaa ádádoonííł, dóó nihichʼįʼ hajoobá dadinóozįįł; dóó Diyin Bóhólníihii nishłínígíí bił béédahodoozįįł; háálá shibaʼ ádaatʼéii doo yádadinóozįįł da.

8 Áádóó kʼad shí, Jacob, díidí saadígíí baa hadeesdzíh nisin. Háálá áko shooh, Diyin Bóhólníihii shił ííshją́ą́ áyiilaa ńléí Jerusalemdi nidaakaiyę́ę, nihí niikaidę́ę́ʼ, nidabiʼdiztseed dóó dabiʼdisnáago adabiʼdiishjaaʼ.

9 Ákótʼée ndi, Diyin Bóhólníihii nináhidookahígíí shichʼįʼ ííshją́ą́ áyiilaa. Áádóó Bóhólníihii Diyin God, Israel biDiyin Ayóó Átʼéii, tʼáá bí bitsʼíís hólǫ́ǫgo yichʼįʼ ííshjání ádiʼdoolnííł; dóó tʼáá bí ííshjání ádiʼdiilyaa dóó bikʼijįʼ yikʼídaʼdoołtsxas dóó tsin ałnáozʼá bikʼijįʼ yił idaʼdoołkał, Diyin yá naalʼaʼí yee shichʼį haadzíʼę́ę bikʼehgo.

10 Áádóó Israel biDiyin Ayóó Átʼéii yikʼijįʼ bijéí deinéestłʼis dóó bikʼos daniłdzilgo ádayiilaa, jó ákon, Israel biDiyin Ayóó Átʼéii biʼánihwiitʼaah bikáaʼjįʼ kódoolnííł. Áádóó baa yiníłką́ądi éí yikʼee ka nidookah dóó atídabidiʼdoolnííł.

11 Ákohgo, áajigo dóó kojigo nanéeskaad bikʼijįʼ, háálá Diyin yá naalʼaʼí kóníineʼ, tʼóó ahayóí bitsʼíís yee tíʼdahoonííh, dóó doo nidabiʼdooltsxił da, daʼoodlánígíí bisodizin biniinaa; daʼníłtsʼą́ąjigo ałtsʼádadinóolkał, dóó ka nidookah dóó dabiʼjoodlá; ákótʼée ndi, Diyin Bóhólníihii baa dajoobaʼ doo, áko báNináʼnídláii bíniʼ yee bił béédahoozingo, kéyahgi baa dahodeestʼánéejįʼ ałhąʼándadoolnííł.

12 Áádóó Gentile dineʼé bee bikʼidahozhdoodliił, éí Diyin yá yáłtiʼii yaa naʼíízoh; háálá áko shooh, ádaa ńdaʼooskango dóó Zion doo yikʼijįʼ ndaabaahgóó, dóó sodizin ayóó átʼéii dóó aláahgo woolchʼį́dígíí doo yíhidiikaigóó, yisdááhidooʼnił; háálá Bóhólníihii Diyin God baʼáłchíní yee yił ahaʼdeetʼánée yeʼdoolííł; dóó díí bíká Diyin yá yáłtiʼii díidí náyíizoh.

13 Ákohgo, Zion dóó Diyin Bóhólníihii bidineʼé yił ahaʼdeestʼánée yikʼijįʼ nídaabaahígíí bikeeʼ bąąhdóó łeezh deidoołnał; dóó Diyin Bóhólníihii bidineʼé doo baa yádanízin da doo. Háálá Diyin Bóhólníihii bidineʼé bibaʼ nidaakaiígíí ádaatʼį́; háálá Messiah doogáłígíí tʼahdíí yibaʼnaakai.

14 Áádóó áko shooh, Diyin yá yáłtiʼí bizaad bikʼehgo, Messiah tʼáá bí naaki góneʼ yikʼándoodááłgo yindoolnish; ákohgo, tʼáá bí beʼadziil dóó ayóóʼátʼéego yichʼįʼ ííshjání ádiʼdoolnííł, ńléí bedaʼanaʼí neidoołtsíłjįʼ, éí baa yiníłką́ądi dabiidoodląął; dóó daboodlánígíí éí doo łaʼ yidiyoołhééł da.

15 Áádóó doo daboodlánígíí éí baa náádidoolyééł, tʼáá áłah kǫʼ bee, dóó yéego nahałtin bee, dóó niʼ ndáhaʼnáago bee, dóó adił háágoʼgo bee, dóó naałniih bee, dóó dichin aghą́ bee. Dóó Diyin Bóhólníihii éí Diyin God nilį́įgo bił béédahodoozį́į́ł, Israel biDiyin Ayóó Átʼéii.

16 Daʼ bitsxeʼgo iisxį́į bighádooltééł, éí doodago bee hazʼáanii yikʼeh dahółʼíigo dabiʼdisnahígíí bitsʼą́ą́ʼ chʼéédooltʼeeł?

17 Ákondi Diyin Bóhólníihii kóníiniʼ: Azhą́ bitsxeʼígíí deisnáhę́ę bigháádooʼnił, dóó bááhádzidii yikʼélzheeʼ yę́ę yisdáádootʼish; háálá Diyin God Ayóóʼábóodziil bidineʼé yił ahaʼdeetʼánée yisdéiidooʼish. Háálá Diyin Bóhólníihii kóníiniʼ: Shí nił ałchʼįʼ daʼdeeztsihígíí éí bił ałchʼįʼ daʼdideestsih—

18 Áádóó yaa kódanihósinígíí éí tʼáá bí dabitsįʼígíí bee bidiyeesį́į́ł; dóó tʼáá bí bidił bił dahodínóołdoh wáin łikanígíí ádabiiłʼį́į́hgi átʼáo; dóó ałtso bitsʼíís dahólónígíí shí, Diyin Bóhólníihii nihiYisdáʼiiníiłii dóó niháNináʼnídláii nishłį́įgo bił béédahodoozį́į́ł, Jacob biDiyin Ayóó Ábóodziilii.