Wóltaʼii 16
Isaiah Diyin Bóhólníihii yiyiiłtsą́—Isaiah bibąąhági ádaatʼéii bee baa niʼdeetʼą́—Diyin bikʼeh áhodooníiłii yaa halneʼ doogo bikʼihodiiniiʼ—Christ binaʼnitin Jew dineʼé nahjįʼ kódayiilaa yę́ę yaa hoolneʼ—Łaʼ bitsʼą́ą́dóó deíkáhą́ą nídookah. Isaiah 6 bił ahąąh nidííniłgo dínííłʼįįł. Jesus bidiʼdoochííłjįʼ 559–545 B.C. yihahgo ádahóótʼįįd.
1 Éí yihahígíí biyiʼ aláahgo naatʼáanii Uzziah daaztsą́ągo, Diyin Bóhólníihii éí bikááʼdóó nahatʼáii, hódahdóó ayóó deʼátʼéii yikááʼ dah sidáago yiiłtsą́; áádóó biʼéénééz diyin bighan biiʼ sidíkaad silį́į́ʼ.
2 Bideígi Diyin God bidiyingo nidaalʼaʼí seraphim wolyéii; tʼááłáʼí nítínígo bitʼaʼ dahastą́ą́h; bitʼaʼ naakigo éí biniiʼjįʼ bikʼídaastiʼ, bikeeʼjįʼ ałdóʼ naakigo bikʼídaastiʼ, áádóó naakigo éí yee nidaatʼaʼ.
3 Dóó ahidiníłnáago ałchʼįʼ ádaaníigo kódaaní, Diyin Tʼáá Ałtsoní bee Bóhólníihii éí diyin, diyin, diyin nilį́; nihokááʼgóó tʼáá átʼé yee ayóó átʼéii hólǫ́.
4 Dóó hadadeeshghaazhígíí biinééʼ dadiistsʼą́ąʼgo chʼéʼétiingi bitłʼááhdóó haatłʼinígíí hideesʼnááʼ, áádóó éí kin łid biiʼ hadéébįįd.
5 Ákohgo ádíshní, Yíí shichʼįʼ anáhóótʼiʼ silį́į́ʼ! Háálá, shí sheʼiinaʼ yíłchǫʼ; háálá diné tʼóó baaʼihgo yáłtiʼii nishłį́; áádóó diné tʼóó baaʼihgo yádaałtiʼii bitah kééhashtʼį́; índa Aláahgo Naatʼáanii, Diyin Tʼáá Ałtsoní bee Bóhólníihii nilíinii yiiłtsą́.
6 Áko diyingo naalʼaʼí seraphim wolyéii łaʼ sheiyítʼaʼ, bikááʼ nááʼiiniihí bikááʼdóó tsííd łaʼ tsííd bee naajaahí yee néidiiʼá dóó bílaʼ yee dahyooʼáał;
7 Dóó shizábąąhgi niiníʼą́ągo ání: Jó, díí nizábąąhgi bíhidééłnáaʼgo; ádił niʼiyínílzíiʼii nahjįʼ kólyaa, índa nibąąhági átʼéii nitsʼádeetʼą́.
8 Áádóó ałdóʼ Diyin Bóhólníihii biinééʼ disétsʼą́ąʼgo, ání, Háí lá deeshʼaał lá, índa háí lá ákǫ́ǫ́ nihá doogááł lá? Áko ádíshní, Kǫ́ǫ́ sézį́; shidíłʼaah.
9 Dóó áshidííniid: Nílááh ákǫ́ǫ́ dínáahgo díí dineʼé bił dahólneʼgo ábidiní—Tʼáá aaníí dadidoohtsʼį́į́ł ndi, tsʼídá doo bikʼidadiʼdoohtį́įł da, áádóó tʼáá aaníí daahʼį́į dooleeł ndi, tsʼídá doo deidoołtsééł da.
10 Díí dineʼé bijéí daneelkʼahgo, áádóó bijééhdaakałgo ánílééh, índa dabiniiłchʼííł—éí doodaiiʼ dabinááʼ yee daʼiidoołtsééł, áádóó dabijaaʼ yee dadiʼdootsʼį́į́ł, índa dabijéí yee akʼidadiʼdootį́į́ł, áko shichʼįʼ ninádookahgo náádabidideeshłááł.
11 Áko ádíshní: Diyin Bóhólníihii, haanízahjįʼ shąʼ kóhootʼée doo? Áádóó ńtʼę́ę́ʼ áshidííniid: Kin hadaasʼáii ałtso dahóóchǫʼgo doo naagháhí da hazlį́įʼjįʼ, áádóó kin biiʼ dahooghan yę́ęgóó doo naagháhí da silį́įʼjįʼ lą́ą áádóó kéyahgóó tʼáá átʼéé ńtʼééʼ doo siláhí nasʼą́ąjįʼ lą́ą;
12 Áádóó Diyin Bóhólníihii éí doo deeghánígóó diné iidínóołkałgo, kéyah yóóʼadahideestʼáanii tʼóó ahayóí doo.
13 Ákondi diné neeznáago ahááʼnilgo tʼááłáʼí bidooʼnilígíí tʼéiyá bíighahgo yidzííʼ, éí nináhidookah, ndi éí ałdóʼ ánáábidiʼdooldįįł; chéchʼil nahalingo, dóó chéchʼil nitłʼizí biiʼ siléii biiʼ hólǫ́ǫgo, áádóó bitʼąąʼ yildeeʼgo, éí diyingo náásgóó bílástsiiʼ biiʼ siléíí danilį́į doo.