1 Ákohgo, Diyin Bóhólníihii bizaad áshidííniid: Naaltsoos yisdisí ntsaaígíí nídiiʼaah dóó bee akʼeʼalchíhí bee Maher-shalal-hash-baz átʼéii bikááʼ anílééh.

2 Áádóó Uriah priest nilíinii dóó Jeberechiah biyeʼ, Zechariah, oodlání ooʼíinii shá ńdoodzohgo nídiinil.

3 Áádóó asdzání Diyin yá halneʼii nilį́įgo baa níyá; áádóó jooltsąądgo ashkii yishchį́. Áko Diyin Bóhólníihii áshidííniid, Maher-shalal-hash-baz bee yidíízhiił.

4 Háálá áko shooh, awééʼ éí, Shizhéʼé, dóó Shimá saad tʼahdoo yee haadziihgóó, Assyria dineʼé aláahdi binaatʼáanii binááł Damascus bee daʼílíinii dóó Samaria binaalyehé ałtso adahidoogééł.

5 Diyin Bóhólníihii ánááshidooʼniidgo, ání:

6 Díí dineʼé éí Shiloahgi tó hazhóóʼógo hadaazlínígíí doo deinízingóó, áádóó Rezin dóó Remaliah biyeʼ yaa bił dahóózhǫǫd;

7 Kʼad díí bąą, áko shooh, Diyin Bóhólníihii éí tooh nílínígíí yee atíhodoolíiłgo yichʼįʼ deʼiidíneesʼąąd, éí bidziil dóó yíląąd, éí Assyria dineʼé aláahdi binaatʼáanii áádóó tʼáá ałtso yee ayóó átʼéii átʼé, éí tó bá nidaʼazʼáágóó dóó tó bá daʼítłʼíngóó bilááh adahídoonah.

8 Áádóó Judah kéyahgóó adahizdoołhałgo tó akʼos bidínóolʼąął nahalingo, O Immanuel, áádóó nikéyahgi tʼáá átʼé bitʼaʼ yee yikʼíidoołtih.

9 O dineʼé, ahíhohkááh, áádóó nihitah doo éédahodoozįįł da, nidahisoołtǫʼ nahalin doo; kéyah nidahoneesʼą́ą́dę́ę́ʼ daʼíísínółtsʼą́ą́ʼ, hashtʼeʼádadołnééh, áádóó nihitah doo éédahidoozįįł da, nidahisoołtǫʼ nahalin doo; hashtʼeʼádadołnééh, áádóó nihitah doo éédahidoozįįł da, nidahisoołtǫʼ nahalin doo.

10 Azhą́ʼ ahił nidahoháa ndi, éí doo nídoodleełí da; nihizaad bee yádaałtiʼ ndi, doo bóhodoolníił da; Diyin God éí nihił hólǫ́.

11 Háálá Diyin Bóhólníihii ayóó átʼéego adziilii yee shichʼįʼ haadzíiʼgo, díí diné ádaatʼínígíí tʼáadoo bikééʼ yínáłí, áádóó ání:

12 Diné binahatʼaʼ yee ádaʼahidiʼnínígíí tʼáadoo baa yádaałtiʼí, diné binahatʼaʼ; ndi yikʼee bił daayéʼígíí tʼáadoo bikʼee nił yéʼí, éí doodaiiʼ tʼáadoo náníldzidí.

13 Diyin Tʼáá Ałtsoní bee Bóhólníihii tʼéiyá díínísin; bíniʼdii tʼáá bí tʼéiyá bikʼee nił yééʼ, dóó bíniʼdii tʼáá bí tʼéiyá bééníldzid.

14 Áádóó hodiyingo hazʼą́ągi nilį́į dooleeł; ákondi Israel dineʼé tʼáá áłah bichʼįʼ tsé bikʼą́ą́h ńdiltałii dóó tsé achʼą́ą́h siʼáanii nahalin doo. Áádóó Jerusalemgi kéédahatʼínígíí bá nidootʼááł dóó biʼdiʼdooltsooł.

15 Áádóó tʼóó ahayóí chą́ą́h dadidoogoh dóó naaʼahinidééh doo, kʼídahastǫʼ nahalingo, áádóó bá nidootʼááł, yisnááh daazlį́į́ʼ doo.

16 Sháʼnaazíinii bitah tʼáá aaníinii béʼítłʼó dóó bee hazʼáanii bidáʼdiníłjeeh.

17 Áádóó Diyin Bóhólníihii nayíníshłíigo, éí Jacob bighandóó haojéʼígíí yitsʼąą biniiʼ neiniłʼinii hádíshʼį́įʼ doo.

18 Áko shooh, Diyin Tʼáá Ałtsoní bee Bóhólníihii Dził Zion bighą́ąʼdi kééhatʼíinii, éí Diyin Bóhólníihii shí dóó áłchíní sheinínilígíí Israel dineʼé bitahgi bee éédahózinii dóó Diyin bee óʼoolʼįįłii daniidlį́.

19 Áádóó ádanihidííniidgo: Níłchʼi doo yáʼádaashóonii, dóó níłchʼi biʼiiníziinii yee yádaałtiʼii yíká ádaahtʼį́į doo—diné Diyin God yíká ádaahtʼį́įgo, dahnídahidiikaiígíísh nideídíłkid doo?

20 Bee hazʼáanii dóó tʼáá aaníinii yee ádaatʼéhígíí; díí saad doo yikʼeh yádaałtiʼgóó, biniinaanígíí éí bee adinídíín biyiʼ ádaadin.

21 Áádóó bichʼįʼ nidahwiiʼná dóó dichin danilį́įgo nidaakai doo; áádóó baa hodoolzhish éí dichin biʼniighą́ągo ádá dahodoolchįįł, aláahdi binanitʼaʼí áádóó dabiDiyin God dayódziihgóó chʼééh yótʼááhgóó dadéezʼį́į́ʼ doo.

22 Áádóó niʼjįʼ dadéezʼį́į́ʼ doo áádóó áko shooh achʼįʼ nahwiiʼná, índa chahałheeł, yínííł bikʼeʼíyéeʼii bee chahałheełgo deidoołtsééł, áko éí ayóó átʼéego chahałheełígíí góneʼ abidíʼnoolkał.