1 Háálá Diyin Bóhólníihii éí Jacob yaa aʼáhí dínóozįįł, dóó Israel tʼahdii bił nilį́įgo yikʼididoolnih, dóó tʼáá bí bikéyahgi kééhatʼį́įgo íidoolííł; áko nahdééʼ doo béédahoʼdílzinígíí bíidookah, Jacob dineʼé yił tʼááłáʼí danilį́į doo.

2 Áádóó dine hákáʼ adoojahgo hakéyahjįʼ adahodooʼish; aooʼ, adahwiisʼáádę́ę́ʼ; dóó bikéyah baa dadeestʼáánéejįʼ nináhidookah. Dóó Israel bighandóó háájéʼígíí éí dabiidoołtsoł, dóó Diyin Bóhólníihii bikéyahgi naalʼaʼí dóó sánii áká ańdaajahígíí bá hazʼą́ą doo; dahásnááhą́ą yisnááh ándazhdoodlííł, dóó hachʼįʼ nidahwiiłnánáa binaatʼáanii dazhdooleeł.

3 Áádóó baa hodoolzhish éí bijį́įdi Diyin Bóhólníihii hááʼíyį́į́h neidoolééł, yínííł bitsʼą́ąjįʼ, dóó náhádzid bitsʼą́ąjįʼ, dóó bikʼéʼíyééʼgo nanilteʼę́ę bitsʼą́ąjįʼ.

4 Áádóó baa hodoolzhish éí bijį́įdi, Babylon dineʼé aláahgo binanitʼaʼí saad baa dííʼááł, dóó kódidííniił: Haitʼáo atídaniłʼínée niʼ kódzaa, kin haalʼá bitsʼádiʼnílidyę́ę ásdįįd!

5 Diyin Bóhólníihii éí bąąhági ádaatʼínígíí bigish, naatʼáanii danilínígíí bigish yitsʼą́ą́ʼ niyiiztiʼ.

6 Éí diné yichʼįʼ báháchįʼgo néíneeshxaal, hashké nízingo diné yikʼi naatʼááh nilį́į́ ńtʼę́ę́ʼ, atííłʼį́įgo, doo łaʼ ataʼ ííyáa da.

7 Nahasdzáán tʼáá átʼé bikááʼgóó hááʼáyį́į́h bee hooʼaʼ, dóó áhodiilzeeʼ; tʼáá hooshchʼįʼ adahozhniiʼtáál.

8 Aooʼ, chʼó yílʼáii nichʼį bił nidahoozhǫǫh, dóó índa Lebanongi gadtsoh deílʼáhígíí, ádaaní: Jó wóyahgo ániʼdiilyaago tsin deitsxʼeelí doo łaʼ nihikʼijįʼ doogááł da.

9 Chʼį́įdiitah bitłʼááhdę́ę́ʼ hodeesnaaʼgo nínáahgo nidááh doogááł; daneeznánée ná néidiiłjééʼ; áko ałʼąą dineʼé binanitʼaʼí tʼáá ałtso; aláahdi diné binaatʼáanii nidahaʼáádóó tʼáá ałtso nídidookah.

10 Éí tʼáá ałtso hadadoozih dóó ádandidooniił: Daʼ nihí ádaniitʼéhígi átʼéegoósh ni ałdóʼ doo nidziil da sínílį́į́ʼ? Daʼ nihí ádaniitʼéhígiísh ánítʼé sínílį́į́ʼ?

11 Bee ayóó ánítʼéii yę́ę jishchááʼ góyaa silį́į́ʼ; dilnih ádaanínée doo íítsʼaʼí da; chʼosh niyaa yííląąd, dóó nikʼéstiʼ.

12 Haashąʼ yitʼáo yáʼąąshdę́ę́ʼ chʼindiʼyoolghan, O Lucifer, hayoołkááł biyeʼ nílíinii! Daʼ niʼjįʼ andiʼyoolghango, áko ałʼąą dineʼé doo dabidziilgóó ádeinilaa!

13 Háálá nijéí biyiʼdi ádííníniid: yáʼąąsh góde hadeeshááł, bikááʼdóó nahashʼáhígíí Diyin God bisǫʼ biláahdi dah deeshʼááł; náhookǫs bitsį́į́jí, áłah nilíinii ałdóʼ bił naháshtą́ą doo;

14 Kʼos biláahdi hadeeshááł; Aláahdi Ayóó Átʼéii nahonishłin doo.

15 Ákondi chʼį́įdiitahjįʼ ándiʼyoolghą́ą́ł, áhoodzʼą́ booshkʼiizh goyaa.

16 Daniníłʼínígíí éí hazhóʼó hadanidoosił, dóó naa nitsídadookos, dóó ádadidooniił: Daʼ díí hastiin éí nahasdzáán nayiisnáʼą́ą átʼį́, éí bídahólníihii bił nidahazʼą́ą́góó nayiisghxan?

17 Áádóó eiísh nihokááʼgóó diné doo kééhatʼį́į́góó áyiilaa, áádóó kin hadaasʼáágóó íísdįįd, dóó awáalyahí doo tʼáá kʼad yééyiniłniiʼ da?

18 Ałʼąą dineʼé aláahgo binanitʼaʼí danilíinii, aooʼ, tʼáá ałtso, ayóó átʼéego haadadilyaago, tʼááłáʼí nítínígo baa dahodeestʼą́ą́ góneʼ naazhjééʼ.

19 Ákondi nijishchááʼdę́ę́ʼ handiʼyoolghan tsin bitsʼáozʼá doo nidzinígíí nahalingo, béésh hał bee nidahoʼdistseedę́ę́ʼ chʼéékaiʼígíí, tsé biʼáán góyaa adahaazhtłizh; daaztsáanii tʼóó bikʼi naʼaldeeh nahalingo.

20 Nidineʼé dóó nikéyah atíinilaaígíí, biniinaa doo bił yóóʼándiʼdoolníił da; bąąhági adáátʼíinii baʼáłchíní hoolʼáágóó doo chʼínáádabiʼdootʼáał da.

21 Báʼáłchíní nidootsiłgo bá hastʼehalnééh dabizhéʼé bąąhági ádaatʼínígíí biniinaa, doo náádidoojah da, áádóó kéyah doo bá hoolǫ́ǫ da doo, éí doodago nihokááʼgóó doo kin nínáádeidooníił da.

22 Háálá bikʼijįʼ nídideeshdááł, ní Diyin Tʼáá Ałtsoní bee Bóhólníihii, áádóó Babylondóó, diné chʼéékaiígíí, dóó ayeʼké, dóó tsíłkéí, ałtso áhodeeshdįįł, ní Diyin Bóhólníihii.

23 Tsídii ałdóʼ bá hazʼą́ągo ádééshlííł, dóó tó dah naazyį́į doo; béʼéʼzhóóʼ bee chʼíhwidiyeesho, ní Diyin Tʼáá Ałtsoní bee Bóhólníihii.

24 Diyin Tʼáá Ałtsoní bee Bóhólníihii haadzíiʼgo, ání: Tʼáá ákótʼeego baa nitsísíkééz, éí tʼáá ákohoodoonííł; dóó bee nahoséʼánée, éí tʼáá ákótʼée doo—

25 Éí Assyrian dineʼé shikéyahgi deeshʼish, áádóó shidziłghą́ąʼdi hakʼi nideeshaał; dóó hazéédéetánée nahjįʼ kódoonííł, dóó achʼįʼ nahwiiʼná hawos bikááʼdóó nahjįʼ kódoonííł.

26 Díí biniyé kótʼáo nihokááʼgóó nahastʼą́; áádóó díí álaʼígíí ałʼąą dineʼé tʼáá ałtso yikʼijįʼ dah doolnih.

27 Háálá Diyin Tʼáá Ałtsoní bee Bóhólníihii yinahazʼánée, háishąʼ yidoołchxǫǫł? Bílaʼ yee yikʼi dah doolnih, háishąʼ tʼą́ą́ʼ kwiidoolííł?

28 Aláahdi naatʼáanii Ahaz ádingo yihahą́ą́dą́ą́ʼ éí kótʼéego hóyééʼ ńtʼę́ę́ʼ.

29 Palestina dineʼé, bitsihał yee nánihidííłhalyę́ę kʼéʼéltǫʼ; éí tʼáadoo baa nihił dahózhóní, háálá naʼashǫʼii báhádzidii bikétłʼóól bitsʼą́ą́dóó tłʼiish naʼałtseedii hadínóotʼį́į́ł, dóó naʼashǫʼii báhádzidii naatʼaʼí bineestʼąʼ átʼée doo.

30 Áádóó baa dahojoobáʼígíí áłtsé bá ndahaazchíinii daʼdooyííł, áádóó bichʼįʼ ánídahaztʼįʼii tʼáá hasiihgo ndánjah doo; bikétłʼóól danilíinii dichin bee nideestsił, dóó chʼéékaiʼígíí yidooghą́ą́ł.

31 O dáńdítį́hí, hadílgháásh, kin haalʼáii nílíinii; nicha; Palestina dineʼé, tʼáá ánółtso teisoohkai; háálá náhookǫsdę́ę́ʼ łid dah yigááł doo, áko baa hoolzhiizhgo doo łaʼ chʼídoogáłí da.

32 Áko ałʼąą dineʼé bá dahalneʼé haʼátʼíí yee hoł hodoolnih? Éí Diyin Bóhólníihii Zion háídiilaa, áádóó ákwii bidineʼé hojoobaʼ ádaatʼéii yadaʼólíi doo.