1 Dashíínółtsʼą́ą́ʼ, Diyin yikʼeh yikééʼ yikahígíí. Tsé danółʼį́ bitsʼą́ą́dóó ánihiʼdiilyaaígíí, dóó ahoodzą́ biyiʼdę́ę́ʼ hanihiʼdoogeedii.

2 Abraham bichʼįʼ dadínóhʼį́į́ʼ, danihizhéʼé, dóó Sarah ałdóʼ bichʼįʼ, nihishchíinii; tʼáásáhígo bikáʼádííniid, dóó akʼihojidlíʼ bikʼijįʼ kwíishłaa.

3 Háálá Diyin Bóhólníihii Zion yididoołhił, háálá tʼáá ałtso bił hazʼą́ daalchǫʼii yididoołhił dóó diné doo kééhatʼínígi Eden nahalingo íidoolííł, dóó bidadzígai Diyin Bóhólníihii bidáʼákʼehgi átʼáo íidoolííł. Hózhǫ́ ił hózhǫ́ dóó atah dahózhǫ́ biiʼ hólǫ́ǫ doo, ahéeh hwiinidzin dóó iinééʼ biyiin biiʼ dahólǫ́ǫ doo.

4 Shidineʼé, dashíínółtsʼą́ą́; dóó dashidoohtsʼį́į́h, O, Shidineʼé dah deíkáahdi, háálá bee hazʼáanii shitsʼą́ą́dóó chʼídootʼááł, dóó shinahwiitʼaah hanályį́į́h áko diné bá ádinídíingo ádeeshłííł.

5 Shikʼehgo oodááł áyíídígóó silá; bee shiyisdáʼiildééh adahwiisʼáágóó kólyaa, dóó shigaan diné yá nahodooʼááł. Tónteeldi kédaayah shibaʼ nahazʼą́ą doo, dóó shigaan yadaʼdoolííł.

6 Yáʼąąshgóó dadóhʼįįh dóó nahasdzáán hóyahdigo danółʼį́; háálá yáʼąąsh łid nahalingo ádoodįįł, dóó nahasdzáán ééʼ nahalingo didoobah; dóó éí yikááʼ kéédahatʼínígíí ákótʼáo dinóonééł. Ákondi shibee yisdáʼiildééh éí hoolʼáágóó hólǫ́ǫ dooleeł, dóó shí diyinkʼeh oodááł eí doo nahjįʼ kódoolníił da.

7 Dahshíínółtsʼą́ą́ʼ, Diyinkʼeh oodááł béédahonohsinii, Diné bijéí biyiʼ shibee hazʼáanii biiʼ náházo, tʼáadoo diné nihikʼideediiʼaahgo béédaałdzidí, dóó ałdóʼ danihódziihgo tʼáadoo béédaałdzidí.

8 Háálá chʼosh ałchozhii ééʼ nahalingo dabidoołchosh, dóó chʼosh aghaaʼ nahalingo dabidoołchosh. Ákondi hoolʼáágóó shidiyin yikʼehgo deíkáahii dooleeł, dóó shiyisdáʼiildééh oochííłjįʼ dóó oochííł biiʼ hoolzhish.

9 Chʼéénídzííd, chʼéénídzííd! Adziilii ádąąh ninílé, O Diyin Bóhólníihii bigaan; Ałkʼidą́ą́ʼ dayółkaahyę́ęgi átʼáo chʼéénídzííd. Daʼ Rahab kʼííníkalii, dóó tłʼiishtso atíyiilaayę́ę ánítʼį́?

10 Daʼ tónteel yíłtsei áyiilaii ánítʼį́, tó daditáanii, tó ditáanii bee nináʼílyéii bee chʼíʼíldeeʼ?

11 Éí bąą, Diyin Bóhólníihii yá nináʼnídláii nídookah, Ziondi dahataałgo nídookah dóó bitsiitsʼiin bikáaʼgi hoolʼáágóó íiyisíí ił hózhǫ́ dóó hodílzin dahodooleeł; dóó baa hózhoonii dóó íiyisíí ił hózhǫ́ ndeididooleeł; yínííł dóó téʼéʼį́, achah da ádin dooleeł.

12 Shi éí áshtʼį́; aooʼ, naa áháshyáanii nishłį́. Áko shooh, háísh ánítʼį́, Diné bééníldzid, dadootsaałii dóó nihokááʼ dineʼé, háísh chʼil nahalingo ábidiʼdoolnííł?

13 Áádóó Diyin Bóhólníihii áhwiilaaígíísh baazhdiyoonah, yáʼąąsh ahééhiníkaadgo áyiilaii, dóó nahasdzáán bee bidziilii áyiilaa, dóó tʼáá akwííjį́ náldzid, háálá akʼijįʼnilíinii bá háchįʼígíí biniinaa, adiʼyoołhééł hashtʼeʼ ádólzinii nahalingo? Áádóó háadish éí akʼijįʼnilíinii biʼáháchįʼ?

14 Biʼdisnahígíí tsxį́įłgo, bidiʼdoochił, dóó ahoodzą́ą́ góyaa doo dadootsaał da, éí doodago bibááh doo ádoodįįł da.

15 Ákondi niBóhólníihii Diyin God nishłį́, tónteel yilkʼol ayóó íítsʼaʼígíí; Diyin Tʼáá Ałtsoní bee Bóhólníihii éí shízhiʼ.

16 Áádóó shizaad nizééʼ biih yílá, shílaʼ bee chahaʼohgo nikʼidahdiishniiʼ, yáʼąąsh nahazʼą́ądi nidahideeshłééł dóó nahasdzáán bee bidziil hadideeshłííł, dóó Zion kóbidishní: Áko shooh, shidineʼé danohłį́.

17 O Jerusalem, chʼéénídzííd, chʼéénídzííd, yiizįįh, Diyin Bóhólníihii bílaʼ báháchįʼ bee bąąh haʼíízhahí daʼoodlą́ąʼii—bąąh haʼíízhahí hoditsxis bąąh yisgiso bitłʼááshjání bił íínídlą́ą́ʼ—

18 Áádóó biyáázhké tʼáá áłtso niyiishchíinii doo łaʼ boolóos da dóó; tʼáá ałtso biyáázhké yineesáanii, doo łaʼ bílaʼ yiyiiłtsood da.

19 Díidí ayeʼ naakigo yaa níʼáázh, háishąʼ hąąh bíniʼ doo—ádahasdįįd dóó hóóchxǫ́, dóó dichin yiih yíkai dóó béésh hał ndaʼastseed—dóó háí lá haʼíínílníigo ándoolííł?

20 Niyeʼké bił chʼaa dahazlį́į́ʼ, tʼáá hazhóʼó díí naakigo tʼéiyá; atiin tʼáá átʼé yilą́ąjįʼ shitéézh; dóola daʼałchinii naneesdiz yiiʼ naaghá nahalingo, Diyin Bóhólníihii biʼáháchįʼ biiʼ hadadeezbin, Diyin God hashkéego.

21 Éí bąą tiʼdanihiʼdiilyei, dóó doo tódiłhił bee, nihił dahoniidoi, áko díí kʼad dadoohtsʼį́į́h.

22 Diyin Bóhólníihii ání, Diyin Bóhólníihii dóó nihiDiyin God díí dineʼé biniyéí yá náʼookąąh; Áko shooh, sháháchįʼ bąąh haʼíízhahí bitłʼááh shijaaʼii, nílaʼ daditsxsii dahyookááłii nahjįʼ kwíishłaa; doo éí náádíídlį́į́ł da.

23 Ákondi atídanihiłʼíinii bílákʼe deeshłééł; éí niiʼ sizíinii kwíidííniid: Báhátixis diitʼash biniyé, yaa ádiiʼnííł—dóó yikááʼ chʼídookahgo nihitsʼíís niʼ dóó atʼiingi ndanoolá.

24 Chʼéénídzííd, chʼéénídzííd, O Zion, adziil aʼdílnééh; O Jerusalem, ééʼ danizhónígíí biih daókááh, kintah hodílzinii; doo bąąh náhineeshgizhii dóó doo bąąh daachinii doo łaʼ naadoogááł da.

25 Łeezh tahdóó ádígáád; O Jerusalem, ńdiidááh, ńdaahi nikʼos bee beʼastłʼónígíí ádąąh naoʼáád, O Zion bitsiʼ biʼdisnáhígíí.