1 Áádóó Christ anoonééłdę́ę́ʼ náádiidzá dóó bikéédę́ę́ʼ nihichʼįʼ ííshjání ádiʼdoolnííł, shaʼáłchíní dóó shikʼiské ayóó ánihííníshníinii; áádóó bizaad yee nihichʼįʼ hadoodzíhígíí bee hazʼáanii átʼéii doo éí bikʼeh oʼółʼį́į doo.

2 Háálá áko shooh, ánihidishní ląʼída áłkʼééʼ oochííł bił ahodoolzhishgo yiiłtsą́, dóó ayóó átʼáo daʼanaaʼ doo dóó shidineʼé saad ałchʼį adeiyiiʼnííł doo.

3 Áádóó Messiah doogáałgo biʼdizhchínígíí, dóó náá biʼdiilyáhígíí dóó nááhiiʼnaʼígíí, bee bééhózin dooígíí shidineʼé baa doolyééł; áádóó éí bijį́ʼ bąąhági ádaatʼínígíí bichʼįʼ ntsihodinídéél doo, éí ádabidiʼdooldįįł; Diyin yá yádaałtiʼii chʼídeineeskaad, áádóó Diyin yá naazínígíí, éí tsé yee ndeinisneʼ, dóó ndeisʼtseed; ákohgo Diyin yá naazínígíí łeeyiʼdę́ę́ʼ bidił hojoobaʼgo daachago Diyin God yídidootsʼį́į́ł éí bikʼijįʼ naazláa doo.

4 Ákohgo, tʼáá átʼé ádaa dadzódlíii, dóó bąąhági ádaatʼínígíí, éí bijį́įdi adabiʼdidoolkʼą́ą́ł, ní Diyin Tʼáá Ałtsoní bee Bóhólníihii, háálá tséhágod ndahalin doo.

5 Áádóó Diyin yá yádaałtiʼii, dóó Diyin yá naazínígíí ndeiłtseed, nahasdzáan ąą ádoonííłgo abidoołnah, ní Diyin Tʼáá Ałtsoní bee Bóhólníihii; dóó dził bikʼiidoozhosh, dóó níyoltsoh yooʼadabidoojih, dóó kin bikʼiideidoołdas, dóó ałtso dabidoołjish dóó dabidookʼą́ąłgo dadibah doo.

6 Áádóó daʼdiʼní, dóó ndaʼdilchʼil, dóó kéyah ndahaʼná, dóó tʼáá ałtso ałʼąą átʼéego dahódoołchxǫǫłígíí baa dahidookah, háálá Diyin Bóhólníihii báháchįʼígíí bikǫʼ bikʼijįʼ didooltłił, dóó tséhégod nidahalin doo, eí bijį́ baa hoolzhiizhdi ábidoołdįįł, ní Diyin Tʼáá Ałtsoní bee Bóhólníihii.

7 Yáá ayóó bikʼeʼ diniih, dóó shiiʼ sizíinii tsʼídá yéego tiʼhoonííh shidineʼé nidaaztseed yę́ę bąąh shíniʼgo biniinaa! Háálá shí, Nephi, éí yiiłtsą́, dóó Diyin Bóhólníihii binááł kʼasdą́ą́ shideʼáhoodzaa; ákótʼée ndi náʼooshkąąhgo sodiszin doo shiDiyin God bichʼį: Nee óʼoolʼįįłii éí tʼáá ákogi ádaatʼé.

8 Ákondi shooh, diyinkʼehgo deíkáahii éí Diyin yá yádaałtiʼii bizaad dayíistsʼą́ ʼígíí, éí doo atídoolníił da, ákondi Christ tʼahdii yéego yichʼįʼ dadéezʼį́į́ʼ, ádahodoonííł bee bééhózinii baa dahaasyáhígíí, azhą́ tʼáá áltsodę́ę́ʼ atídabiʼdilʼį́į ndi—áko shooh, éí éí doo dínóonééł da.

9 Ákondi Diyin Tʼáá Ákogi Átʼéii biYeʼ bichʼįʼ ííshją́ą́ ádidiʼdoolnííł; dóó nábidoołdzih, dóó ádahodiilzéeʼgo yił hólǫ́ǫ doo, táadi są́ náʼoogą́ą́ʼ ahoolzhiizh, dóó ląʼí da dį́įdi są́ náʼoogą́ą́ʼ diyinkʼehgo dahináago bił adahoolzhiizh.

10 Áádóó díí tʼáá ałtso bił adahooshzhiizhgo shidineʼé tsxį́įłgo bił hodoochxǫǫł; áko, azhą́ shiiʼ sizíinii yíkʼei tiʼhoonííh ndi, yiiłtsą́; ákohgo, bikʼí hodoolzhishgo shił bééhózin, éí doo ádiłʼdandlį́į́góó ninaʼádaʼdiitʼaah doo; áko, háálá ádaa dahaʼniih dóó bíighahí baa nijikai biniinaa áhodiʼdooldįįł éí dajoosbą́ą doo; háálá biʼiiníziinii yaa ádadeestʼą́ dóó chahałheełjí óʼoolʼįįł ńdeidiilá, adinídíinjí éí dooda, éí biniinaa chʼį́įdiitahgóóyaa ahizhdookah.

11 Háálá Diyin Bóhólníihii biʼIiʼ Sizį́ Diyinii doo tʼáá áłahjįʼ diné yíká análwoʼ da. Dóó Iiʼ Sizį́ Diyinii doo diné bił hólǫ́ǫ́góó tʼáá hoodíinaʼą́ ábidiʼdooldįįł, áko díí shiiʼ sizíinii tʼáá áyisíí yaa yínííł nilį́.

12 Áádóó Jew dineʼé, Jesus éí tʼáá aaníí Christ átʼį́, dishníigo baa haasdziih, Gentile dineʼé ałdóʼ bee nídabiʼdookąąłgo bił béédahodoozįįł, Jesus éí tʼáá aaníí Christ átʼį́, éí Hoolʼáágóó Diyin God nilíinii;

13 Áádóó Iiʼ Sizį́ Diyinii beʼadziilii yee, tʼáá háí shį́į́ daʼoodlánígíí yichʼįʼ ííshjání ádidiʼdoolnííł; aooʼ, tʼáá áłtso ałʼąą dineʼé dah deíkáahii, ałkʼéí danilíinii, bizaad ałʼąą ádaatʼéii, dóó tʼáá áłtso diné, nihokááʼ dineʼé baʼáłchíní bitahgóó bidaʼoodląʼ binahjįʼ ayóó átʼáo álílee yee naalnish, bee ééhózinii, dóó diyingo yee éʼéłʼį́ʼ.

14 Ákondi shooh, nihodoogáałjįʼ ayííłką́ągo Diyin bikʼeh áhodooníłígíí nihił ił ííshją́ą́ ashłééh; éí bijį́įdi yoołkáałgo Bóhólníihii Diyin God díí nihokááʼ dineʼé baʼáłchíní bitah áhodooníilii yeidoolééł.

15 Shílástsiiʼ dóó shikʼiské bílástsiiʼ doo daʼoosdląądgo, dóó Gentile dineʼé atídabííłʼįįdgo; aooʼ, Bóhólníihii Diyin God bikʼi dahashjéeʼgo, dóó yichʼą́ą́h yadaʼdiitłʼin, łeezh biyiʼjįʼ ayóó ádabiʼdiilyaa, áko ádabiʼdisdįįd, ákondi diyinkʼehgo deíkáígíí bizaad nahídóodzoh, dóó daʼoodlánígíí bisodizin dadidootsʼį́į́ł, áádóó doo daʼoosdląądyę́ę doo baa hodiyoonah da.

16 Háálá ábidiʼdooldįįłyę́ę łeeyiʼdę́ę́ʼ hachʼįʼ hadadoodzih, dóó éí bizaad łeezh dah yigááł biyiʼdę́ę́ʼ dadidootsʼį́į́ł, áádóó bízhiʼ bééhózinígi átʼé; áko Bóhólníihii Diyin God adziilii yee doolééł, áko hazhóóʼígo yaa hadoodzih, łeeyiʼdę́ę́ʼ nahalingo; áádóó bízhíʼ łeezh dahijoł biyiʼdę́ę́ʼ hazhóóʼígo dadidootsʼį́į́ł.

17 Háálá Bóhólníihii Diyin God kóní: Éí bitahgóó ádahodooníłígíí nídeiyídóozoh, áádóó éí ndahídóódzoh dóó naaltsoos biyiʼjįʼ bidáʼdidooljah, dóó doo daʼoodlą́ą́góó dah diikaiyę́ę doo baa dootʼááł da, háálá ei éí Diyin God bídeetʼiʼígíí hadeinitáago nideiyiiłchxǫǫh.

18 Ákohgo, ádaasdįįdígíí tʼáadoo hodíínaʼí áhoʼdisdįįd; áádóó bááhádzidgo dahdeikáhígíí éí nééstʼąʼ beʼazóól nahalingo nahjįʼ kódahoʼdilyaa—aooʼ, Bóhólníihii Diyin God kóní: tʼáá hooschʼįʼ txsį́į́łgo, ádoonííł—

19 Áádóó baa hodoolzhish, doo daʼoosdląądgóó dah diikaiyę́ę Gentile dineʼé bílaʼ bee atídabidiʼdoolnííł.

20 Áádóó Gentile dineʼé ádaa dadzódlíii yee ádadootʼį́, yee ńdadigoʼ, háálá ayóó bąąhági ádaatʼį́įgo nidabiníłtłʼah, tʼóó ahayóí sodizin ałʼąą átʼaó ádayiilaa; áko, Diyin God beʼadziil dóó biʼálílee ádaatʼée yąąh nideiyiłhaał, dóó tʼáá bí yídahoołʼą́ʼígíí yee ndaʼádinitin, áko yee daʼatʼį́ dóó baa dahojoobaʼígíí yee yiniiʼjįʼ yídeidiniyish.

21 Áádóó tʼóó ahayóí sodizin dah deíkáahgo ádayiilaa áko binahjįʼ oolchʼį́į́d, dóó ahináádiijah, dóó ajoodlá hazlį́į́ʼ.

22 Áádóó ałdóʼ tłʼééʼjí naalchiʼii doo yáʼátʼéehii nideiniłʼingo bindaanishígíí dahazlį́į́ʼ, ałkʼidą́ą́ʼ ahoodzaa yę́ęgi átʼáo, biʼiiníziinii óʼoolʼįįłgi átʼáo, háálá díí tʼaa ałtso haidiilaa; aooʼ, naʼatsʼeed, dóó chahałheełjí óʼoolʼįįł haidiilaa; aooʼ, dóó chʼiltłʼóół bikʼos bindaaztʼiʼgo yooʼish; hoolʼáágóó bitłʼóół ditsʼidii bee beʼáztłʼǫ́ dooleeł.

23 Háálá áko shooh, shikʼiské ayóó ííníshʼníinii, áko ánihidishní Bóhólníihii Diyin God doo chahałheełji óʼoolʼįįł yee naalnish da.

24 Nihokááʼ dineʼé bá yáʼátʼéhígíí tʼéiyá yá ííłʼį́; háálá nihokááʼ dineʼé ayóó áyóʼní, áko diné tʼáá ałtso bichʼįʼ nináhidookah biniyé beʼiinaʼ ndi nínéídiníʼą́. Ákohgo, biyisdáʼiildééh doo ndadidoołééł da doo łaʼ yididoonííł da.

25 Áko shooh, łaʼísh yichʼįʼ dilwosh, kóníigo: Yíwohjįʼ shitsʼą́ąjįʼ deinóhkááh? Áko shooh, Dooda, nihidishní; ákondi ání: Nahasdzáán nidaneesʼą́ą́dę́ę́ʼ tʼáá ánohtʼé shaa hokááh, abeʼ dóó tsésná bitłʼizh, béeso tʼáágééd dóó doo bą́ą́h ílínígóó nidahołniih.

26 Áko shooh, łaʼísh daʼoodlání áłah nídaadleehgóó bitsʼáhóhkááh nihidííniid, éí doodago sodizin bá dahooghandę́ę́ʼ? Áko shooh, Dooda, nihidishní.

27 Bi bee yisdáʼiildééh dooísh łaʼ doo ndadidoolééł da yiłní? Áko shooh Dooda nihidishní; ákondi diné tʼáá ałtso tʼáá nííkʼeh yaa yilé; dóó bidineʼé tʼáá ałtso dineʼé ádaa ńdaʼoohkąąh yidííniid.

28 Áko shooh, Diyin Bóhólníihiiísh ádiinííd doo tʼáá háiida bibee yáʼátʼéehii néídidoolééł da? Áko shooh, Dooda, nihidishní; ákondi diné tʼáá ałtso tʼáá aheełtʼéego bá silá, doo łaʼ bichʼįʼ baa hóchįʼ da.

29 Diyin bizaad ndeigizgo yee daʼatʼínígíí ádin doo ní; háálá, áko shooh, Diyin bizaad ndeigizgo nidaʼnitin dóó yee ádaa dazódlíigo béédahoʼdílzin, yee daʼdootʼįįł dóó nihokááʼgo shaa haniih doo danizin; ndi Zion bá yáʼátʼéhígíí doo yíká ádaatʼį́į da.

30 Áko shooh, Diyin Bóhólníihii díí doo yee hasʼą́ą da; ákohgo, Bóhólníihii Diyin God ání, diyingo ayóóʼóʼóʼní tʼáá ałtso diné bee dahólǫ́ǫ doo, diyingo ayóóʼóʼóʼní éí íiyisíí ayóóʼóʼóʼní átʼé. Diyingo ayóóʼóʼóʼní doo bee dahólǫ́ǫ́góó doo daʼjílį́į da. Ákohgo, diyingo ayóóʼóʼóʼní bee dahólǫ́ǫgo Ziongi naalnishii doo atídooníiłgo yee nahasʼą́ą da.

31 Ákondi Ziongi naalnishii éí Zion yá naalnish doo; háálá béeso yíká nidaalnishgo éiyá yóó ádabidiʼdoolnííł.

32 Áádóó nááná, Bóhólníihii Diyin God áníigo dineʼé doo nidaʼałtseed da doo; dóó doo dabiyoochʼíid da doo; dóó doo daʼniʼįįh da doo; dóó Bóhólníihii biDiyin God bízhiʼ doo yee nidaʼadziih da doo; doo daʼoołchʼį́į́da doo; ajoodlá hwee ádaadin doo; doo saad ahídeitʼááh da doo; doo ałhaadaʼdilyée da doo; díí tʼáá átʼé doo ádajiłʼį́į da doo; háálá kódaatʼínígíí yóó ádabidiʼdoolnííł.

33 Díí bąąhági ádaatʼéii doo Diyin Bóhólníihii bitsʼą́ą́dę́ę́ʼ da; háálá nihokááʼ dineʼé baʼáłchíní yitah yáʼátʼéehii ííłʼį́; dóó tʼáá ałtso tʼáá bééhózínígo nihokááʼ dineʼé baʼáłchíní yá éʼéłʼį́ʼ; áko tʼáá ałtso hágo shaa hohkááh yiłní dóó yáʼátʼéehii ńdadoołé; baa níyáahígíí doo yíwohjįʼ yididooniił da; daalzhinii dóó daalgaii, ąąh shijééʼ dóó tʼáá binéʼ naakaii, hastóí dóó sáanii, dóó doo daʼoodlánígíí yénálniih, dóó Diyin God díí tʼáá ałtso bił tʼáá aheełtʼé, Jew dineʼé dóó Gentile dineʼé tʼáá áłah.