1 Éí bijį́įdi, asdzání tsostsʼid yiltʼéego, diné tʼááłáʼíígíí deidoołtsołgo, ádadidoonííł, Tʼáá nihí nihichʼiyąʼ deiidą́ą doo, áádóó tʼáá nihí nihiʼééʼ bee háádadiitʼįįh doo; tʼáá hazhóʼó nízhiʼ tʼéiyá bee danihiʼdójíi doo, áko bee nihá nahatʼiʼígíí nihitsʼádiníʼaah.

2 Éí bijį́įdi, Diyin Bóhólníihii bitsʼą́ą́dóó haníísáanii ayóó ánóolninii áádóó ayóó átʼéii átʼée doo; áádóó Israel dineʼé yisdádahineezhchą́ąʼii kéyah bitsʼą́ą́dóó aneestʼąʼ tʼáá íiyisí bá yáʼátʼéeh doo índa ayóó ádanóolnin doo.

3 Áádóó baa hodoolzhish, Ziondi tʼahdii nidaakaiígíí dóó Jerusalemgi tʼahdii kéédahatʼínígíí diyin daolyée doo, áádóó tʼáá ałtso Jerusalemgi dahiinanígíí bitah házhí bikʼeʼeschį́į doo.

4 Diyin Bóhólníihii iiʼ sizíinii biʼánihwiitʼaahii dóó iiʼ sizíinii bihaʼdiiłkʼą́ąhii bee Zion bichʼéʼéké chin yąąh tánéízgizgo, áádóó Jerusalemgi dineʼé bitahdóó bidił yąąh neyíłdeeʼgo.

5 Áádóó Diyin Bóhólníihii éí dził Zion tʼáá ałtso bikááʼgóó, áádóó áłah nídaʼadleeh, kʼos dóó łid bikʼi dah oojołgo iʼiiʼaah áádóó tłʼéeʼgo éí kǫʼ bee adinídíin bee bitsaʼdinílíídgo íídooleeł; áko tʼáá ałtso Zion biʼayóó átʼéii éí hachʼą́ą́ sizį́į doo.

6 Áádóó jį́įgo náhoniigahígíí biniyé chahaʼoh holǫ́ǫ doo, índa nídadiyołígíí áádóó indahoniiłtį́hígíí biniyé biyaa iʼniichééh doo, índa bineʼ naʼadzį́į doo.