1 Áádóó kʼad, áko shooh, shikʼiské, Iiʼ Sizį́ Diyinii íinízinígíí bikʼehgo; nihichʼįʼ yááłtiʼ; ákohgo, tʼáá aaníí bikʼehgo áhodooníiłgo shił bééhózin.

2 Áádóó naaltsoos biyiʼdóó hahasdzooígíí nihokááʼ dineʼé baʼáłchíní tʼáá íiyisíí bił danilį́į dooleeł, dóó nihílástsiiʼ tʼáá íiyisíí bá átʼé, éí Israel bighandóó háájééh chʼéékaiígíí.

3 Háálá áhodoonííł éí bijį́įdi sodizin, doo Diyin Bóhólníihii bichʼįʼ hádahdiilyaaígíí, łaʼ kóníigo nááná ła yichʼįʼ hadoodzih: Áko shooh, Shí, Shí éí Diyin Bóhólníihii bá áshtʼį́; áádóó łaʼ ánáádidooniił: Shí, Shí éí Diyin Bóhólníihii bá áshtʼį́; díigi átʼáo sodizin ádayiilaaígíí hadahásdziih, dóó doo éí Diyin Bóhólníihii bichʼįʼ da—

4 Áádóó saad ahídeitʼááh doo; dóó bipriest danilínígíí saad ahídeitʼááh doo, dóó yéédahósinígíí yee ndaʼnitin doo, dóó Iiʼ Sizį́ Diyinii nahjįʼ kódeiyiilaa, éí bee hadaʼiidzihii átʼé.

5 Áádóó Diyin God bibeʼadziilii nahjįʼ kódeiyiilaa, Israel biDiyin Ayóó Átʼéii, dóó diné kódeidíínííd: Danihíítsółtsʼą́ą́ʼ, dóó nihinahatʼaʼ dadohtsʼį́į́h; háálá áko shooh díí jį́ Diyin God doo hólóǫ da, háálá Diyin Bóhólníihii dóó Nináʼnídláii éí binaanish tʼáá íídą́ą́ʼ áyiilaa, dóó nihokááʼ dineʼé bibeʼadziilii yee nílá;

6 Áko shooh, shinahatʼaʼ deiyíísínółtsʼą́ą́; Diyin Bóhólníihii bílaʼ álílee yee áyiilaa daaníigo, tʼáadoo deinohdlání; háálá díí jį́ doo álílee yiDiyin God nilį́į da; binaanish éí tʼáá íídą́ą́ʼ áyiilaa.

7 Áooʼ dóó tʼóó ahayóí kódaaníi doo: Daʼohsą́, daʼohdlą́, dóó nihił dahoneenih, háálá yiską́ągo éí dadíníiʼnééł; dóó éí niha yáʼátʼééh doo.

8 Áádóó ałdóʼ tʼóó ahayóí kódaaníi doo: Daʼohsą́, daʼohdlą́, dóó nihił dahoneenih, ákondi, Diyin God bee dááłdzid—tʼįįhdígo bąąhági átʼéii baa naahkaigo bił tʼáá áko; aooʼ, tʼįįhdígo danihiyoochʼííd, háiida binaʼohłoʼgo tʼáá áko, nihinaagóó dabighanígíí bá hadahoyohgééd; díí tʼáadoo átʼéhí da; díí tʼáá átʼé baa nahkai, háálá yiską́ągo éí dadíníiʼnééł; dóó nihikʼéhástʼahgo, Diyin God tʼáá díkwíhídi nánihididoołtsxis, dóó bikééʼdi Diyin God bił hazʼą́ądi yisdánáhidiikah.

9 Aooʼ, ląʼí da kótʼáo nidaʼnitin doo, tʼóó ádaatʼéego dóó bee ádaahodzódlíigo dóó tʼáá ádzaagóó naʼnitin bee, dóó bijéí yee ádaa dahaʼniihgo, dóó tsʼídá atłʼáahdi bindaʼnitin yee dahwééʼaahígíí Diyin Bóhólníihii yitsʼąą ndeiniłʼin doo; dóó bindaanish chahałheeł biyiʼdi ádeiłʼį́į doo.

10 Áádóó Diyin yá naazíinii bidił łeeyiʼdę́ę́ʼ bikʼijįʼ daacha doo.

11 Aooʼ, tʼáá átʼéé ńtʼééʼ yitsʼákai; ndaʼídiishchxǫʼ.

12 Ádaahodzódlí biniinaa, dóó doo tʼáá aaníigo ndaʼnitinígíí, dóó doo tʼáá aaníigo nidahaʼáhígíí biniinaa bisodizin ałtso dááchxǫʼ, dóó bisodizin tʼóó ádaa dahaʼniih daazlį́į́ʼ; ádaa dahaʼniihígíí biniinaa ayóó bił dahatsoh daazlį́į́ʼ.

13 Baadahojoobaʼí yee deiniʼįįhígíí yinahjįʼ bisodizin bá hooghan baa dadzodlíigo hadadiilyaa; Baadahojoobaʼí biʼééʼ yee deiniʼííhgo yinahjįʼ daʼílį́įgo ééʼ naazhjééʼ; áádóó baʼátʼeʼ ádaadinée dóó bijéí biyiʼdi baadahojoobʼígíí yichʼįʼ ndahwiiłná, háálá ádaa dadzódlíigo bił dahastsohígíí biniinaa.

14 Bikʼos daniłdzil dóó yadaniilʼą́; aooʼ, dóó háálá ádaahodzidlí, dóó tsʼnaʼaldeeh, dóó aláahgo woolchʼį́į́d baa naʼaldeeh, dóó ałjiłee baa naʼaldeeh biniinaa, ałtso yóó aheeskai tʼáá hazhóʼó tʼáá díkwíhí tʼéiyá chʼéédzííʼ; éí Diyin Christ hojooba ídlį́ yee yikééʼ dah diikai; azhą́ ákótʼée ndi, biʼdootʼíshgo, ndaʼiisííh háálá nihokááʼ dineʼé binahatʼa bee ndabidiʼneestą́ʼígíí biniinaa.

15 O bił éédahózinii, dóó daʼííłtaʼii, dóó daʼatʼíinii, bijéí biyiʼdi ádaa dadzódlíigo bił dahatsohígíí, dóóʼ tʼáá áłtso tʼóó ádaatʼéii yee nadaʼnitinígíí, dóó tʼáá átʼé ałhaaʼdilyé yaa naakaiígíí, dóó Diyin Bóhólníihii diyingo bikééʼ oodááł ndayiiłchxǫígíí, yíiyá, yíiyá, yíiyá bił dahólǫ́ǫ doo, ní Bóhólníihii Diyin God Ayóó Ábóodziilii, háálá chʼį́įdiitahgóóyaa ádabiʼdiyooltłʼił!

16 Yíiyá tʼáá ákǫ́ǫ́ ádaatʼíinii tʼáadoo biniyéhígóó nahjįʼ kódeileʼ dóó yáʼátʼéehii yikʼijįʼ daazlį́įʼii, dóó ádin éí doo bą́ą́h ílíní da daanínígíí! Áko áajįʼ iidoołkááł Bóhólníihii Diyin God nihokááʼ dineʼé tsxį́įłgo yaa doogááł; dóó éí yoołkáałdi bąąhági ádaatʼéii yee neestʼą́ągo ábidiʼdooldįįł.

17 Ákondi shooh, nihokááʼ dineʼé doo yáʼáshóonii dóó aláahgo woolchʼį́į́d yaa naakaiígíí yaa ńdaʼooskango tʼéiyá doo ádabidiʼdooldįįł da, Diyin Tʼáá Ałtsoní bee Bóhólníihii kóní.

18 Ákondi shooh, sodizin bá hooghan bidziil dóó aláahgo woolchʼídígíí, tʼáá átʼé nahadzáán beʼałjił nilínii, niʼjįʼ ahiihnídoozhosh, dóó ayóó átʼáo ahiihnídoołdas.

19 Háálá biʼiiníziinii bił hazʼą́ yisdił dooleeł, dóó áájí daʼatahígíí bił hahozhnííłchaad nahalingo ndaʼjookąąhgo, éí doodago éí biʼiiníziinii bibéésh daʼahólzhaʼí hoolʼáágóó yee hweʼdaʼdootłʼóół, dóó bił niʼjizʼtsih nahalingo bádahodoochįįł, áádóó dínóonééł;

20 Háálá áko shooh, áadi yoołkáałgo biʼiiníziinii nihokááʼ dineʼé bijéí biyiʼdi hahodinóółcháł, dóó yáʼátʼéehii yikʼijįʼ bádahachįʼgo íidoolííł.

21 Áádóó łaʼ éí áhodeeszéeʼgo íidoolííł, dóó atsʼíís yidineilnanígíí yee yiʼdiʼdooloh, dóó ádadidooniił: Zion hazʼą́ądi tʼáá áłtsojįʼ yáʼáhootʼééh; aooʼ, Zion ałʼąą nootʼį́į́ł, tʼáá átʼé hózhóoní—áko biʼiiníziinii éí biiʼ naazíinii yinaʼazloʼ, dóó hazhooʼígo chʼįįdiitahgóóyaa ahodooʼish.

22 Áádóó áko shooh, łaʼ éí yoochʼííd yee yinaʼaloʼgo yóóʼayiiʼéésh, dóó chʼį́įdiitah ádin yił ní; dóó ííłní: Doo éí biʼiiníziinii nishłį́į da, biʼiiníziinii éí adin—dóó kótʼáo hazhóóʼígo yijeeh nánítʼáahgo yił halneʼ, áajįʼ bibéésh daʼahólzhaʼí tʼóó baaihígíí yee yidoołtsoł, éí bitsʼą́ą́dóó doo hááʼiildééh da.

23 Aooʼ, anoonééł, dóó chʼį́įdiitah dabótąʼ; dóó anoonééł, dóó chʼį́įdiitah, dóó biʼiiníziinii, dóó tʼáá átʼé dabiʼdótąʼígíí Diyin God bikááʼ dahʼasdáhí yidááhdóó deidoozįįł, dóó naanish ádayiilaayę́ę bikʼehgo bándahoodootʼááł, éí áádóó bá hashtʼeʼ dahoolyaa góneʼ ahidookah, łeetsoii dookʼą́ą́łgo dah sikaad, éí hoolʼáágóó tiʼhooʼnííh átʼé.

24 Ákohgo, yíiyá Ziondi ahoodiilzeeʼgo sidáhígíí!

25 Yíiyá háiida díí yee nidilghaashígíí: Tʼáá áłtsojįʼ yáʼáhootʼééh!

26 Aooʼ, yíiyá diné binaʼnitin yíístsʼą́ʼígíí, dóó Diyin God bibeʼadziil dóó Iiʼ Sizį́ Diyinii aayílyé doo yoodlánígíí!

27 Aooʼ yíiyá kódaanínígíí: Tʼáá íídą́ą́ʼ nihaílyá, dóó doo łaʼ náádaniziní da!

28 Áádóó áko, yíiyá Diyin God bitʼáá aaníinii biniinaa áháchįʼ yee daditsxiz! Háálá áko shooh, háiida tsé yikááʼ aztłʼinígíí éí yaa bił hózhǫ́ǫ doo; áádóó háiida séí yikááʼ aztłʼinígíí bitah hoditłidgo ahiihnídoozhosh.

29 Yíiyá háiida kónínígíí: Diyin God bizaad nihaílyá, dóó doo éí Diyin God bizaad łaʼ náádaniidzin da, háálá tʼáá íídą́ą́ʼ bíighahgo nihaílyá!

30 Háálá áko shooh, Bóhólníihii Diyin God aní: Nihokááʼ dineʼé baʼáłchíní tʼáá ałkééʼ saad baa hashʼaah dooleeł, bee nahazʼą́ ałkéeʼ baa hishłée doo, ałchʼį́dígo kweʼé dóó ałchʼį́dígo áadi; dóó shizaad deidiitsʼą́ʼígíí bikʼihojidoodliił, dóó shinaʼnitin deiyíístsʼą́ʼígíí, háálá bee hodzáanii yídahwiidoołʼááł; háiida baʼílyáhígíí bił nilį́įgo ląʼígo bichʼįʼ kónáádeeshdlííł; dóó kʼad doo łaʼ náádaniidzin da, daanínígíí éí azhą́ baa dahaasyáa ndi tʼóó bitsʼą́ą́ʼ náádidooʼnił.

31 Háídá nihokááʼ dineʼé yaʼólíigo, éí doodago diné bibeʼadziilii yaʼólíigo, éí doodago diné binaʼnitin yíístsʼą́ą́ʼgo hóyéeʼgo bá haʼdoodzih, tʼáá hazhóʼó diné binaʼnitin Iiʼ Sizį́ Diyinii bibeʼadziilee bikʼehgo beílyáago tʼéiyá.

32 Diyin God Tʼáá Ałtsoní bee Bóhólníihii ání, Yíiyá Gentile dineʼé danohłíinii! Bóhólníihii Diyin God ání, Tʼáá ákwíí jį́ bichʼįʼ dah deeshnih ndi, doo dashínízin da; ákótʼée ndi, ádaa ńdaʼooskąądgo dóó shichʼįʼ nináhaskaigo tʼéiyá; bichʼįʼ ááh dínéesįįł, háálá bichʼįʼ dahdeeshnihgo iʼiiʼaah, Diyin God Tʼáá Ałtsoní bee Bóhólníihii ání.