Nephi Binaaltsoos Naakiígíí

1 Áádóó kʼad áhoodzaa shí, Nephi, shikʼiské ałtso nanétą́ą́ dóó bikʼijiʼ, nihizhéʼé, Lehi, ałdóʼ ląʼígo yee yichʼįʼ yááłtiʼ, dóó yił chʼíníʼą́, dóó haitʼáo Diyin Bóhóníihii ayóó ádaatʼéii bá áyiiláaéí ei Jerusalem bikéyahdę́ę́ʼ chʼíbiniʼeezhígíí, yaa nináhásneʼ.

2 Áádóó tónteel yikááʼgi akʼijįʼ daazlį́ʼę́ę, yee yichʼįʼ yááłtiʼ dóó Diyin God baa joozbaʼgo yisdábííʼeezhę́ę, áko tʼáadoo tónteel adabíisnaʼígíí yee yichʼįʼ yááłtiʼ.

3 Áádóó kéyah aadeetʼą́ bidéétiʼgi ałdóʼ yee yichʼįʼ yááłtiʼ, éí shódayoostʼeʼ—haitʼáo Diyin Bóhólníihii tsxį́į́łgo Jerusalem bikéyahdę́ę́ʼ bitsʼánóhnééh nihiłnínígíí yee nihaa joozbaʼ.

4 Háálá, áko shooh, kózhdííniid, ił ííshją́ą́ eʼelʼį́ yiiłtsą́, biyiʼ Jerusalem táoshchxoʼgo shił bééhoozin; dóó tʼahdii Jerusalemdi neiíkaigo nihí ałdóʼ anihiʼdisdįįd doo ńtʼę́ę́ʼ.

5 Ákondi, kózhdííniid, tiʼdahwiiʼnii ndi, kéyah aadeetʼą́ shódeisiiltʼeʼ, éí kéyah tʼáá ałtso kédaayah biláahdi bihónínígíí átʼé; éí kéyah Bóhólníihii Diyin God yee shił ahaʼdeetʼánígíí tsʼídá shaʼáłchíní bikéyah doolééł. Aooʼ, Diyin Bóhólníihii díí kéyah yee shił ahaʼdeetʼą́, dóó ahoolʼáágóó shaʼáłchíní, dóó tʼáá háíshį́į́ Diyin Bóhólníihii bilaʼyee kédaayahdę́ę́ʼ chʼíyiizhʼeezhígíí ałdóʼ daabí doo.

6 Ákohgo, shí, Lehi, Iiʼ Sizį́ Diyinii shiiʼ hólonígíí bikʼehgo Diyin bikʼeh áhodooníłígíí baa hashneʼ, tʼáá háida doo díí kéyah yaadookah da tʼáá hazhóʼó Diyin Bóhólníihii yaa dabiniʼeezhgo tʼéiyá.

7 Ákohgo, díí kéyah yilzį́į́ʼ tʼáá háíshį́į́ yaa yił dooʼashígíí bá. Áádóó bee hazʼáanii yaa yiizláhígíí yikʼehgo yá ndaalnishgo, éí kéyahgi tʼáá nííkʼe dahiináa doo; ákohgo, tsʼídá doo biʼdisnáada doo; éí ákódzaago éí, bąąhági átʼéii yaa naaskaiígíí biniinaa doo; áko bąąhági átʼéii ląʼí hazlįįgo éí kéyah niʼ hóyéeʼgo bá haʼdoodzih, ákondi Diyinkʼehgo deiyikáhígíí éí ahoolʼáágóó bá bikʼihojídlíi doo.

8 Áádóó áko shooh, éí baahódzą́ągo díí kéyah nááná łá dadineʼé áłtsé bitsʼą́ą́ʼ nanilʼin doo; háálá Áko shooh, ląʼída dadineʼé kéyah yikááʼgo haʼdidoobį́į́ł, éí bąą doo łaʼ haa didootʼááłgo hazʼą́ą doo.

9 Ákohgo, shí, Lehi, ahaʼdeetʼą́ shóíséłtʼeʼ, áko Bóhólníihii Diyin God háíshį́į́ Jerusalem bikéyahdóó chʼíidooʼishígíí tʼáá ákónééhiiʼ bibee hazʼáanii yikʼeh dahółʼį́įgo, díí kéyah yikááʼ tʼáá ałtsoní yáʼátʼéehgo báʼáánííł doo; dóó tʼáá ałtso ałʼąą dadineʼé bitsʼąą nabidiʼnilʼin doo, áko díí kéyah tʼáá bítʼéí daabí dooleeł. Áádóó bibee hazʼáanii tʼáá yikʼeh dahółʼį́įgo tʼéiyá díí kéyah bikááʼgóó bikʼidahojídlíi doo, dóó tʼáá háida doo atídabiłʼį́į da doo, dóó kéyah baa deetʼanée doo bighadeidootʼáał da; dóó ahoolʼáágóó doo átʼéhígóó kéédahatʼį́į doo.

10 Ákondi shooh, doo daʼóodlą́ daazlį́į́ʼ baa hoolzhiizhgo, Diyin Bóhólníihii bilákʼeedóó ayóó átʼéego bikʼidajisdliʼgo—nahasdzáán ályaagi bił béédahózingo; dóó nihokááʼ dineʼé tʼáá ałtso, nahasdzáán ályaadę́ę́ʼ Diyin Bóhólníihii ayóó ádaatʼéii dóó ayóó ádanoolninii yínaashnishę́ę bił béédahózingo; ádziil baaheesyáago oodląʼ yinahjįʼ tʼáá ałtsoní ádeiiłʼį́ daazʼlį́į́go; hodeeyáádę́ę́ʼ bee hazʼáanii tʼáá ałtso bee dahólǫ́ǫgo, dóó biyáʼátʼéeh doo ninítʼiʼii binahjįʼ díí kéyah bee ahaʼdeetʼą́ ílíinii baa yítʼeezhgo—Jóʼ, ádíshní, háadishį́į́ bikʼíiníłkąągo Israel biDiyin Ayóó Átʼéii, tʼáá aaníí Messiah nilį́į, báNináʼnídláii dóó dabiDiyin God doo deiniizį́įgo, jóʼ, tʼáá ákótʼáo bándahwiistʼáanii bikʼijį́ siláa doo.

11 Aooʼ, ałʼąą dineʼé yeiidiyooʼish, dóó ádziil yeiidiyoolééł, dóó kéyah daabíhę́ę yighaidiyooʼnił, dóó daʼníłtsʼą́ąjigo áłtsʼádeidinóolkał dóó atídeidoolííł.

12 Aooʼ, tʼáá ałkééʼ oochííł bikʼeh ákweʼé ndaʼahiltsééd doo, dóó tʼáá íiyisíí atídahoʼdidoolnííł; ákohgo, shiyeʼké, nihí béédaałniih doo nisin; aooʼ, áko shizaad deiyisínółtsʼą́ąʼ doo.

13 O chʼéédadoohdził; yéego awoshdę́ę́ʼ chʼéédanohdzííd, aooʼ, azhą chʼį́įdiitahdę́ę́ʼ chʼéédanohdzííd, dóó béésh daʼahólzhaʼí bááházidígíí bee nihedaʼestłʼónígíí nahjįʼ ádąądaoháád, éí béésh daʼahólzhaʼí nihokááʼ dineʼé baʼáłchíní bee bedaʼastłʼǫ́, áko bee dawótąʼgo ahoolʼáágóó tiʼhooʼnííh dóó yééʼ biyiʼgóó dabiʼdisnahgo ahitʼéésh.

14 Chʼéédanohdzííd! dóó łeeshtahdóó ńdoohjééh, dóó nihishchíinii bitah hoditłídgo bizaad deiyisínółtsʼą́ą́ʼ, bitsʼíís hodíínaʼgo łeezh sikʼaz dóó doo iitsʼaʼgóó biyiʼjįʼ kódaałééhígíí, éí áádę́ę́ʼ doo nináʼiildéeh da; tʼáá díkwíhí náánéískánígo tʼáá ałtso nahasdzáán biyiʼgóó nideeshdłeeł.

15 Ákondi shooh, Diyin Bóhólníihii chʼį́įdiitahdę́ę́ʼ shiiʼ sizíinii níneidiidlá, biʼayóóʼátʼéii yiiłtsą, dóó beʼayóóʼóʼóʼní ahoolʼáágóó bighaan yee ádíshóltąʼ.

16 Áádóó Diyin Bóhólníihii bibee hazʼáanii dóó bibee ánihwiitʼaahii bikʼeh dahonołʼį́įgo béédaałniih dooleeł nisin; áko shooh, hahoolzhiizh doo wóshdę́ę́ʼ díí shiiʼ sizíinii yąąh bíniʼ ńtʼę́ę́ʼ.

17 Náhodiʼnaahgo tʼáá íiyisíí shijéí yínííł nádleeh, háálá násdzid, háálá nihijéí daastłʼisígíí biniinaa Bóhólníihii nihiDiyin God bibá háchįʼ dah tʼáá átʼé nihikʼijįʼ kwíidoolííł, ahoolʼáágóó áłtsʼánihidooʼnił dóó doo honohłǫ́ǫ́góó ánihidoohłííł.

18 Éí doodago, éí bikʼeh dahóyéeʼii díkwíidishį́į́ są náʼoogą́ąʼjįʼ nihikʼijįʼ kwíidoolííł; anaʼí bibééshał bee atínihidiʼdoolnííł, dóó dichin biih doohkah, dóó danihiʼjoodláá doo, dóó biʼiiníziinii íinizinígíí dóó nihisnago nahíʼeesh doo.

19 O shiyeʼké, áko díidí doo nihił áhodooníił da dooleełę́ę nisin, tʼóó Diyin Bóhólníihii aláahdi diné ayóó óʼóʼnínii dóó aláahdi bił nilíinii danohłį́į dooleełę́ę nisin. Ákondi shooh, íinízinígíí ádoolnííł; háálá bidahootʼááł ahoolʼáágóó Diyinkʼehgo ádaatʼé.

20 Áádóó bí éí ádííniid: Shibee hazʼáanii bikʼeh dahonohłʼį́įgo éí díí kéyah biyiʼ náás yáʼátʼéehgo didookah; ndi wónáásdóó shibee hazʼáanii doo bikʼeh dahonohłʼį́į́góó éí doo shił honohłǫ́ǫ da dooleeł.

21 Áádóó kʼad shiiʼ sizíinii bee nihaa shił hózhǫ́ǫ doo, dóó nihiniinaa shijéí bił hózhǫ́ǫgo naashidiʼdoolyééł, áko doo tiʼhooʼnííh dóó yínííł bee łeeh shidiʼdooltéeł da, shiyeʼké, łeeshtahdóó daohsįįh, dóó hastóí daohłeeh, dóó nihijéí dóó nihintsékees bee tʼááłáʼí daahłéehgo daołdził, tʼáá ałtsoní bee tʼááłáʼí daohłeeh, áko doo nihiʼdidoolnááh da.

22 Áko doo nichxǫ́ǫ́ʼígo nihá hadoodzih da; dóó ałdóʼ, Diyin God tʼáá ákogi óʼoolʼįįłii doo bá háchįʼ nihikʼijįʼ kwíídoolííłgóó, nanihidoołtsił da, aooʼ, atsʼíís dóó ayiʼsizį́ tʼáá áłah ahoolʼáágóó doochxǫǫł.

23 Shiyeʼké, chʼéédanohdzííd; Diyinkʼehgo oodááł binaadééʼ bee hadadohʼnééh. Béésh daʼahólzhaʼii nahalingo bee nihidaʼastłʼónígíí ádąąhdaahgáád, dóó chahałheełdę́ę́ʼ chʼínóhkááh, dóó łeeshtahdóó daoohsįįh.

24 Nihikʼis kʼad tʼáadoo bikʼijįʼ nohłíní, ayóóʼadaátʼéii ląʼída yiyiiłtsą́, dóó Jerusalemdóó dah diikaidą́ą́ʼ Diyin God bibee hazʼáanii yikʼeh hółʼį́įgo hoolzhiizh; dóó Diyin God bibee naʼanishí nilį́įgo, kéyah bee ahaʼdeetʼą́ądi nihiníʼeezhgó; háálá doo bí binahjįʼgóó éí, diné doo kééhatʼinígi dichin nihííghą́ą́ʼ ńtʼę́ę́ʼ; ákótʼée ndi, bizééʼ náhʼááh ńtʼę́ę́ʼ; aooʼ, dóó nihí nihiniinaa tʼáá íiyisíí yínííł yikʼee tiʼhoozniiʼ.

25 Áádóó nihiniinaa tiʼhooʼnííh yiih náádoogááł nisingo, tʼáá íiyisíí bá binásdzid dóó shitah hoditłid; háálá áko shooh, nihikʼi bíhólnííh dóó nihikʼi bídziil nohsingo bee haodzííʼ; ndi shił bééhózingo doo nihikʼi bíhólnííh dóó nihikʼi bídziil da dóó doo éí yíká átʼį́į da, ndi Diyin God dilzingo bikáʼáhátʼį́, dóó ahoolʼáágóó ił hózhóonii nihá yíká átʼį́.

26 Áádóó bikʼijįʼ yááłtiʼ doo nanitłʼahígíí tʼéiyá yee nihichʼįʼ yáłtiʼgo. Saad bikʼeʼeshchʼíiʼii yee nihichʼįʼ yáłtiʼ; dóó nihichʼįʼ bá háchįʼ dohní; ákondi shooh, saad bikʼeʼeshchʼíiʼii yee nihichʼįʼ yááłtiʼígíí éí Diyin God bizaad bibee ádziil bikʼeʼeshchʼíʼígíí, biyiʼ hólǫ́nígíí átʼé; dóó áháchįʼ bidohnínígíí éí tʼáá aaníinii, éí bikʼehgo Diyin God biyiʼ hólónígíí átʼé, éí doo tʼą́ą́ʼ kóyóleʼgóó, nihibąąhági átʼéii yaa hoolneʼ.

27 Áádóó Diyin God bibee ádziil bił hólǫ́ǫ doo, tsʼídá bikʼeh honołʼį́ nihididooniił. Ákondi shooh, doo bí bíniikʼeh da, ndi Diyin Bóhólníihii biʼIiʼ Sizį́ Diyinii éiyá biyiʼ hólǫnígíí átʼį́, bizééʼ ąą áyiilaago éiyá doo ałchʼįʼ ánéidlééhgóó yááłtiʼ.

28 Áádóó kʼad shiyeʼké, Laman, dóó ałdóʼ Lemuel dóó Sam, dóó Ishmael biyeʼké ałdóʼ shiyeʼké danohłį́, Áko shooh, Nephi bizaad deisínółtsʼą́ąʼgo doo dínóohnéeł da. Áádóó tʼáá deiyísínółtsʼą́ąʼgo shibee akʼihojídlí, aooʼ, áłtséhígíí bee nihikʼijideeshdliił.

29 Ákondi doo deiyísínółtsʼą́ąʼgóó áłtsé shibee akʼihojídlį́ náádideeshdlééł, aooʼ, azhą shi akʼihojídlį́, dóó áájí bikʼidooleeł.

30 Áádóó kʼad, Zoram, nichʼįʼ yáshtiʼ: Áko shooh, Laban bá naalnishí nílį́; ákótʼée ndi, Jerusalem bikéyah biyiʼdę́ę́ʼ chʼíniʼdeedlóóz, dóó shiyeʼ, Nephi, tʼáá aaníí ahoolʼáágóó bikʼis nílį́įgo shił bééhózin.

31 Ákohgo, iinídlánígíí biniinaa naʼáłchíní áájí baʼáłchíní yił bikʼihojídoodlííł, áko díí kéyah bikááʼ nízaadgóó yáʼátʼéehgo yikááʼ dahináa dooleeł; dóó ahoolʼáágóó díí kéyah bikáaʼgi, tsʼídá doo atíbidoolíłí da dóó doo baa ńdootʼįįłí da, tʼáá hazhóʼó bąąhági átʼéii bitah hazlį́įʼgo tʼéiyá.

32 Ákohgo, Diyin Bóhólníihii bibee hazʼáanii bikʼeh dahonołʼíigo, Diyin Bóhólníihii díí kéyah yiyíísį́į́ʼ áko naʼáłchíní dóó shíyeʼ baʼáłchíní tʼáá hasihgo yikááʼ kéédahatʼį́į doo.