1 Áádóó baa hoolzhiizh Judah dineʼé aláahdi binaatʼáanii, Uzziah biyeʼ, Jotham éí biyeʼ Ahaz bíyoołkááłyę́ędą́ą́ʼ Syria dineʼé aláahdi binaatʼáanii Rezin índa Israel dineʼé aláahdi binaatʼáanii Remaliah biyeʼ Pekah éí Jerusalem yichʼįʼ anaaʼ dahodoohłeeł biniyé ákóde níná, ndi tʼáadoo yikʼehdeesdlį́įʼ da.

2 Áádóó David bitsʼą́ą́dóó náás ahoolchíiłii bił hóóneʼgo áhodooʼniid: Syria dineʼé éí Ephraim dineʼé yił ałchʼodaasniʼ. Áádóó tsin yílʼáii biníyol átʼéego Ahaz dóó hodineʼé hajéí dahideesnááʼ.

3 Áádóó Diyin Bóhólníihii éí Isaiah áyidííniid, Ni áádóó niyeʼ Shearjashub bił kʼad nílááh Ahaz tó dahsiyį́į́dóó tó háálínígíí diné daʼiigis bichʼįʼ atiinígi bidááh nohʼaash;

4 Áádóó ábididííniił, Ádaa áhólyą́, áádóó áhodiilzééh; Syria dineʼé aláahdi binaatʼáanii Rezin áádóó bidineʼé índa Remaliah biyeʼ éí chizh nideekʼą́ą́h nahalingo, díí naakigo atseeʼ bánáháchįįhígíí biniinaa tʼáadoo nił yéʼí áádóó tʼáadoo nijéí baa ninááhákaʼí.

5 Syria dineʼé áádóó Ephraim dineʼé índa Remaliah biyeʼ nilíinii ahił chʼodaasniʼgo doo yáʼáshónígóó ná nidahazʼą́ągo, ádaaní:

6 Sołtįʼ, Judah dineʼé baatįįh diikahgo bił yééʼ ádahodiilnííł, binaatʼáanii ałkééʼ sinilígíí dadiiłchxʼǫǫł, yaʼ, áko Tabeal biyeʼ, éí aláahdi naatʼáanii ádadiilníiłgo Judah kéyah biyiʼ aláahdi naatʼáanii dooleeł.

7 Díí Bóhólníihii Diyin God yee haadzííʼ: Doo yídaneelʼą́ą da, índa doo bikʼe áhodoonííł da.

8 Damascus kin haalʼáii éí Syria dineʼé yinantʼaʼí nilį́ áádóó Damascus binanitʼaʼí éí Rezin, áádóó hastádiindóó biʼaan ashdlaʼ nááhaijįʼ Ephraim dineʼé tabidíʼnóolkałgo doo łáʼí dineʼé nídoodleeł da.

9 Áádóó Samaria kin haalʼáii éí Ephraim dineʼé yinantʼaʼí nilį́, áádóó Samaria binanitʼaʼí éí Remaliah biyeʼ. Doo iinídlą́ą́góó tʼáá aaníí doo níníłdzil da doo.

10 Nááʼáłdóʼ, Diyin Bóhólníihii éí Ahaz yichʼįʼ hanáánáádzíiʼgo, ííłní:

11 Bóhólníihii niDiyin God bitsʼą́ą́dóó bee ééhózinii bííníkeed; hóyahdóó, éí doodaiiʼ yáʼ nahazʼą́ądi.

12 Ákondi Ahaz ázhdííniid, Diyin Bóhólníihii doo nabídídéeshkił da, dóó doo nabídínéeshtah da.

13 Dóó ánáázhdooniid, O David baʼáłchíní, daʼíísínółtsʼą́ą́ʼ; diné nabídanohtaahígíísh tʼįįhdígo átʼéego baa nitsídaahkees, ákondiísh shiDiyin God ałdóʼ nabídínóóhtah?

14 Díí bąą, Diyin Bóhólníihii tʼáá bí bee ééhózinii nihił ííshjání íidoolííł—Áko shooh, chʼikę́ę́h tʼah doo diné bee haleehii iʼdíʼnóoltsąąłgo, ashkii yidoołchííł, áádóó Immanuel yee yídóozhiił.

15 Mandigíyaa áádóó tsésʼná bitłʼizh yee dinooyééł, áko doo yáʼáshóóníí náhjįʼ kwííłʼį́į doo áádóó yáʼátʼéehii yídíníilnáá doo.

16 Háálá awééʼ tʼáá íídą́ą́ʼ bił bééhózin doo yáʼáshóóníí náhjįʼ kwííłʼį́į doo áádóó yáʼátʼéehii yídíníilnáá doo, áko kéyah tʼóó jiiníłáhą́ą aláahdi binaatʼáanii nidiltʼéego yitsʼą́ąjigo dahdidooʼash.

17 Diyin Bóhólníihii éí ni dóó nidineʼé, dóó nizhéʼé baʼáłchíní náás ahoolchíiłii tiʼhooʼnííh yikʼijįʼ kwíidoolííł, éí Assyria dineʼé aláahdi binaatʼáanii yee. Ephraim bidineʼé Judah bidineʼé yitsʼákai yéédą́ą́ʼ tsʼídá bilááh átʼéego átíhoʼdoolííł.

18 Áádóó baa hodoolzhish éí bijį́įdi Diyin Bóhólníihii Egypt kéyah tʼáá ałtsogóó tséʼédǫ́ʼii dóó Assyria kéyahdóó tsésʼná yíká ídiʼdoosoł.

19 Áádóó ndahidookah, áádóó doo naʼadáhí góyaa, áádóó tsé biiʼ nídahasdzą́ą́góó, áádóó chʼil dóó hoshi tʼáá ałtso deílʼáágóó, índa dahootsogóó háádadoolyįh.

20 Tʼáá éí yoołkáałdi Diyin Bóhólníihii bá dadeeshnishii dághaaʼ bee yilzhéhé yee yidoohsheh, tooh nílį́ bilááhdę́ę́ʼ nidaakaiígíí, Assyria dineʼé aláahdi binaatʼáanii yee, dóó tsiighá, dóó akeeʼ bitáshtłʼoh, índa dághaaʼ dóʼ ałtso doolzhééh.

21 Áádóó baa hodoolzhish éí bijį́įdi diné łaʼ béégashii tʼááłáʼí binááhai dóó dibé naakigo yaa naʼałtsoʼ doo;

22 Áádóó baa hodoolzhish, ląʼí abeʼ bitsʼą́ą́dóó mandigíyaa yiyą́ą doo; háálá kéyahgi diné chʼéédzíʼígíí tʼáá ájíłtso géeso dóó tsésʼná bitłʼizh dajiyą́ą doo.

23 Áádóó baa hodoolzhish éí bijį́įdi, tʼáá dádaʼakʼehígi, béésh łigaii dimíilgo chʼil nidaʼatłʼoʼii daʼílíini bitsáskʼehgi chʼil hoshí dóó chʼil deeníní dahodooleeł.

24 Kéyah tʼáá átʼé bikááʼ chʼil hoshí áádóó chʼil deeníní dahólǫ́ǫgo, biniinaa ałtį́į́ʼ áádóó kʼaaʼ bee dahólóonii áadi nidahidookah.

25 Áádóó deílkʼidgóó tʼáá ałtso ałtsʼą́ą́ʼ deeníní bee nidahagodgo, chʼil hoshí áádóó chʼil deeníní tʼóó báhádzidgo deílʼáago biniinaa doo ákǫ́ǫ́ naʼaldeeh da doo; ndi béégashii ákǫ́ǫ́ bidaʼdoolnih, dóó dibé da ákǫ́ǫ́ nidaakai doo.