1 Ákótʼée ndi, éí yínííł ádaatʼéhę́ę kʼad tʼáá biʼoh doo, Zebulun dóó Naphtali dineʼé áłtsé yichʼįʼ nahwiisnááʼ, áádóó bikéedi doo chǫhooʼį́į́góó yichʼįʼ ninááhwiisnááʼ Galileedi kéédahatʼínígi Jordan biláahdi Tónteel Łichííʼídi.

2 Diné éí chahałheeł yiiʼ deíkááh yę́ę ayóó átʼéego adinídíingo dayiiłtsą́; anoonééł bikéyah góneʼ deíkáhígíí, bikʼidaʼ deezdláád.

3 Diné yíníłąąd, dóó ayóó bił dahóózhǫǫd—daʼneestʼánígíí átʼéego yaa bił dahóózhǫǫd, dóó diné naanisé ałtaadeiniih nahalingo yaa bił dahóózhǫǫd.

4 Háálá naaldlooshii bizéédeetání bidéʼátʼéhę́ę́ kʼíínítiʼ, dóó biwos bee nidaaz yę́ę, índa bichʼįʼ átíbíłʼínée bigish ałdóʼ.

5 Háálá tʼáá ałtso nidaabaahii daʼahigą́ągo doo ééhoozinóó ayóó íítsʼá, dóó biʼééʼ dił bee daneesmas; áko díí éí dookʼą́ą́ł dóó bee kǫʼ.

6 Háálá awééʼ nihá yizhchį́, ayeʼ nihaíltį́; nahatʼá bił hazʼą́ biwos bąąh siláa doo, áádóó díí ízhíʼ bee wójį́į doo, Ayóó Ánóolninii, Ánahaʼaií, Diyin God Ayóó Ábóodziilii, Hoolʼáágóó nihiTaaʼ Nilíinii, dóó Hózhǫ́ǫgo Yinantʼaʼí.

7 David dah sidáádóó, nahatʼá dóó hózhǫ́kʼeh doo ninítʼiʼ da, dóó yee hahodiilaa, binahjįʼ nahwiitʼaah doo, dóó tʼáá ákogi átʼéego yee nahoníʼą́, kodóó tʼáá ákótʼéego ahoolʼáa doo. Diyin Tʼáá Ałtsoní bee Bóhólníihii bibeʼadziilii yee.

8 Diyin Bóhólníihii éí Jacob yichʼįʼ haneʼ áyiilaa, áádóó Israel dineʼé yikʼi hooleʼ.

9 Díí diné tʼáá ałtso bił béédahózin dooleeł, Ephraim dineʼé áádóó Samaria kéédahatʼínígíí, éí ádaa deidzódlíigo áádóó bijéí dáátłʼisgo yee ádaaní:

10 Hashtłʼish dáástłʼisígíí naaʼadahaasdááz, ndi tsé hashtʼéédaalyaaígíí bee háádaʼdiitłʼį́į́ł; sycamores tsin naazkaadígíí kʼídeisneʼ, ndi deílʼá yę́ęgi gad kʼididoolyééł.

11 Díí bąągo Diyin Bóhólníihii éí aláahgo naatʼáanii Rezin bitsʼą́ą́jí danilíinii hakʼijįʼ yiʼdoołʼnih, hatsʼą́ą́jí danilínígíí ahíídooʼish;

12 Syria dineʼé alą́ąjįʼ áádóó Philistia dineʼé éí akéédę́ę́ʼ; áko éí bizééʼ ąą átʼéego Israel dineʼé adeidoołnah. Azhą́ díí tʼáá ałtso ákótʼée ndi tʼahdii hachʼįʼ báháchįʼ, ákondi tʼahdii hachʼįʼ dah doolnih.

13 Atíbíłʼį́į ndi diné tʼáadoo bichʼįʼ náhaaskai da, éí doodago Diyin Tʼáá Ałtsoní bee Bóhólníihii doo hadeinitáa da.

14 Díí bąągo tʼáá łaʼajį́ Diyin Bóhólníihii Israel bitsiitsʼiin áádóó bitseeʼ, índa tsin bitsʼádaozʼaʼ dóó tłʼoh kʼíídookał.

15 Ałkʼidą́ą́ʼ hastóíyę́ę, éí atsiitsʼiin nilį́, áádóó Diyin yá yáłtiʼii biyoochʼíidgo naʼnitinii, éí atseeʼ nilį́.

16 Háálá, naatʼáanii díí diné nidaʼiisíihgo yiih dayiiʼéésh, éí doo ákótʼéego akééʼ deíkáhígíí ádabiʼdisdįįd.

17 Diyin Bóhólníihii díí bąą hatsíłkéí doo yaa bił hózhǫ́ǫ da, áádóó áłchíní bizhéʼé ádaadinii dóó asdzání bąąh ádahasdįįdii doo yaa aʼáhi dínóozįįł da, háálá tʼááłáʼí jinítínígo tʼóó ádahozhdilʼį́ dóó bąąhági ádajitʼį́, índa tʼáá ádzaagóó yádajiłtiʼ. Azhą́ díí tʼáá ałtso ákótʼée ndi tʼahdii hachʼįʼ báháchįʼ, ákondi tʼahdii hachʼįʼ dah doolnih.

18 Háálá bąąhági ádaatʼéii kǫʼ nahalingo dookʼą́ął łeh; chʼil hoshí dóó chʼil deeníní iidiyiiłkʼą́ą́h, dóó tsintah dahodíłchʼilgóó yidahodinil dóó łid deigo hahaghááh.

19 Diyin Tʼáá Ałtsoní bee Bóhólníihii yéego báháchįʼgo niʼ hodííłkʼą́ąʼgo bee chahóółhéél, diné éí chizh nahalingo bee hodookʼą́ą́ł doo; diné éí bikʼis doo yísdéídóólóós da.

20 Áádóó nishʼnáájígo bigaan yíká dijih ndi tʼóó dichin bidíʼnóółhééł; áádóó nishtłʼajígo yee ííyą́ąʼ ndi doo yee hwiih dooleeł da; tʼáá ájíłtso tʼóó hagaan dazhdoolghał—

21 Manasseh, Ephraim; dóó Ephraim, Manasseh; tʼáá áłaʼ Judah dineʼé yitsʼáájí dooleeł. Azhą́ díí tʼáá ałtso ákótʼée ndi tʼahdii hachʼįʼ báháchįʼ, ákondi tʼahdii hachʼįʼ dah doolnih.