1 Áádóó kʼad, íídą́ą́ʼ Jacob shidineʼé ląʼí da saad yee yichʼįʼ hanáánáádzííʼ; ákótʼée ndi díí tʼéiyá ńdoodzohgo íishłaa, háálá náházooígíí éí shił tʼáá áko.

2 Áádóó kʼad shí, Nephi, Isaiah bizaad tʼáá ląʼígo ninááhásóóh, háálá bizaad shiiʼ sizíinii tsʼídá tʼáá íiyisíí yaa bił nizhóní. Háálá bizaad shidineʼé beełtʼéego ádeeshłííł, dóó díí tʼáá ałtso shaʼáłchíní bichʼįʼ kódeeshłííł, hááłá sháNináʼnídláii tʼáá aaníigo yiyiiłtsą́, shí yiiłtsánígi átʼáo.

3 Áádóó shikʼis, Jacob, ałdóʼ tʼáá aaníigo yiyiiłtsą́ shí yiiłtsánígi átʼáo; ákohgo, bí bizaad shaʼáłchíní bichʼįʼ kódeeshłííł áko shizaad tʼáá ádaanínígíí bił béédahodoozįįł. Ákohgo, táaʼgo hadahadziihígíí binahjįʼ, Diyin God ádííniid, shizaad hashtʼedeeshłííł. Ákótʼée ndi, Diyin God ląʼí da daʼooʼíinii ayiisʼaʼ, dóó bizaadígíí tʼáá átʼé tʼáá aaníigo bééhodoozįįł.

4 Áko shooh, Christ tʼáá aaníí doogáałgo shidineʼé bił béédahodoozįįł éí shiiʼ sizíinii tʼáá íiyisíí bił nizhóní; díí biniinaa Moses bibee hazʼáanii beiyílyá; dóó tʼáá ałtso Diyin God nahasdzáán ályaa dóó hóshdę́ę́ʼ, nihokááʼ dineʼé beiyílyáhígíí beełtʼée doo biniyé.

5 Áádóó ałdóʼ Diyin Bóhólníihii danihizází yił ahadaʼdeestʼánée shiiʼsízíinii tʼáá íiyisíí yaa bił hózhǫ́; aooʼ, bibee ajoobaʼ, bináhwiitʼaahii, dóó bibeʼadziil, dóó biʼaa aʼááh hasin ayóó átʼáo dóó ahoolʼáágóó binahatʼá anoonééłdééʼ yisdánéikaigo shiiʼ sizíinii tʼáá íiyisíí yaa bił hózhǫ́.

6 Áádóó Christ éí doogááł éí doodago éí dineʼé tʼáá ałtso tiʼdahodoonih díí éí shidineʼé bił ííshją́ą́ áshłéehgo shiiʼ sizíinii tʼáá íiyisíí yaa bił hózhǫ́.

7 Háálá Christ doo hólǫ́ǫ́góó éí Diyin God ałdóʼ doo hółǫ́ǫ da; Áádóó Diyin God doo hólǫ́ǫ́góó nihí ałdóʼ doo hóniidlǫ́ǫ da, háálá tʼáá áłtsoní éí doo ádaalyaa da ńtʼééʼ. Ákondi Diyin God éí hólǫ́, dóó éí éí Christ nilį́, áádóó bí áníigo tʼáá aaníí doogááł.

8 Áádóó kʼad Isaiah bizaad łaʼ náhásóóh, shidineʼé díí saad deiyiiłtsánígíí tʼáá ałtso dineʼé yaa bił dahodoozhǫǫł dóó bijéí haʼdaʼólnííh doo. Kʼad ni dóó tʼáá ałtso dineʼé díí saad bidanołtʼéego ádaʼdoołnééh.