1 Yíiyá doo yáʼátʼééhgóó nidahatʼá yee hadahazdzíiʼgo yee ndahazʼánígíí, éí bikʼeʼáyééʼii ndeyízóóhgo há haideidileʼ;

2 Baa dahojoobaʼígíí bee bíkáʼadoowołígíí yąąh deiʼį́, dóó shidineʼé badahojoobáʼígíí yee ádaatʼéhę́ę yitsʼą́ą́ʼ nahjįʼ kódeileʼ, asdzání bąąh ádahasdįįdii éí atídeiłʼį́į doo, áádóó áłchíní bizhéʼé ádaadinii yee daʼniʼįįh dooleeł!

3 Áádóó doo sohodééʼįįd da beiníłką́ągo, dóó nízaadę́ę́ʼ ádahasdįįdgo haash dadoohnííł? Háí shąʼ nihíká adoolwołgo bichʼįʼ adahidínóóhchééł? Bee ádaa deidzinóhdlínée háadishąʼ nidahidoohłééł?

4 Shí doo nihíká aashwodgóó awáalyahí bichʼįʼ yaa ádanohtʼée doo, dóó nidaaztseedígíí biyaa ádahidoohtłish. Azhą́ díí tʼáá ałtso ákótʼée ndi tʼahdii hachʼįʼ báháchįʼ, ákondi tʼahdii hachʼįʼ dah doolnih.

5 O Assyrian dineʼé, éí gish bee sháháchįʼii nilį́, dóó tsihał dahdeiyootʼį́įhígíí éí yee dabidziilgo tsʼídá ayóó átʼéego báháchįʼii átʼé.

6 Tʼóó ádaʼahiʼdilʼíinii dineʼé bichʼįʼ hodeeshʼaał, dóó diné bichʼįʼ sháháchįʼii bichʼįʼ hodeeshʼaałgo binichxǫ́ʼí bighahizhdooʼnił, áádóó bíká nijilzheehígíí, daʼnítiingóó nahoditsʼǫʼgo bikʼinizhdoogááł.

7 Áko łą́ʼí ndi doo ákótʼáo yaa nitseekees da, bijéí ndi doo tʼáá kʼad ákótʼéego bidiisnááʼ da; ndi bijéí biyiʼdééʼ íinízingo éí yidooghą́ą́ł dóó ałʼąą dineʼé ałtsʼéidínoołkał.

8 Háálá ání: Shitsíłkéíísh tʼáá átʼé aláahdí naatʼáanii danilį́?

9 Calnoísh Carchemishgi átʼé? Hamathísh Arpadgi átʼé? Samariaísh Damascusgi átʼé?

10 Tʼóó bedaʼalyaaígíí bił nahazʼą́ ádáhoolyaagóó, éí tʼóó bedaʼalyaago yichʼįʼ nidaahaałáhígíí Jerusalem dóó Samaria bee dahólónígíí biláahgi ádaatʼé;

11 Samaria dóó tʼóó bee bedaʼalyaaígíí íishłaaígi átʼáółsh, Jerusalem dóó tʼóó bee bedaʼalyaaígíí bináłtʼéego ádoolnííł?

12 Ákohgo áhodoonííł éí Diyin Bóhólníihii Dził Ziondi dóó Jerusalemgi binaanish tʼáá ałtso áyiilaago, Assyria aláahdi binaatʼáanii bijéí yee ádeidzódlíi dóó ayóó átʼáo yee hádítʼéi atídeeshłííł.

13 Háálá ání: Shílaʼ bee shidziilii dóó bee honisáanii bikʼehgo ásdzaa; háálá hóyáanii nishłį́; áádóó dineʼé bił hadahwiisdzo yę́ę nahjįʼ kóshłaa, dóó binaalyéhé daʼílíinii bighaháshʼnil, dóó ákǫ́ǫ́ kéédahatʼíinii bikʼeh díshdlį́į́ʼ diné ayóó naabaahii nahalingo.

14 Áádóó atʼoh biyiʼ ayęęzhii bikʼízhníyá nahalingo diné yee daʼatʼíinii nídiinil; áádóó diné éí ayęęzhii dáádziʼígíí áłah ííléhígi átʼéego nihokááʼ dineʼé tʼáá átʼé ahąʼ ádeeshłííł; doo ndi bitʼaʼ nideiyiiłnáa da, éí doodaiiʼ doo bizééʼ ąą ádeilééh da, áko doo ádaaníi da.

15 Tséniłísh ahiʼdiłkaałii yichʼįʼ ádaa dzódlíi doo? Bee achʼiishí eiísh Diné achʼiishígíí yilááhdi ádidiʼdoolnííł? Ákótʼéego tsihałísh tsin dahyootįłígíí yichʼįʼ dah nahatʼeʼ doo, éí doodaiiʼ ákótʼéego tsinhał halááh ádiʼdoolniił doo tsin ádílʼį́į́hgóó!

16 Díí bąą Diyin Bóhólníihii, Diyin Tʼáá Ałtsoní bee Bóhólníihii, éí daneeskʼahą́hígíí átsʼiiní yitah doołnih; yee baa haʼniihii yiyaa hodidoonił kǫʼgi átʼáo dookʼą́ął doo.

17 Áádóó Israel bibee adinídíinii kǫʼ nilį́į dooleeł, áádóó biDiyin Ayóó Átʼéii kǫʼ dahnidinood nilį́, áádóó bichʼil deeníní dóó bichʼil hoshí tʼáá łaʼóo jį́ adíídeez doo;

18 Áádóó tsintʼah bee ayóó áhonóolninii, dóó dahootsogóó, tʼáá áłah iiʼ sizíinii dóó atsʼíís iididoołkʼą́ą́ł; anaaʼgo dah naatʼaʼí dahyootį́łígíí bíniʼ ásdįį́d nahalin doo.

19 Áko bitsin deilʼáhą́ą tʼáá díkwíí chʼéédzííʼ doo; éí áłchíní yázhí ndi yídóołtah.

20 Áádóó baa hodoolzhish éí beiníłką́ądi Israel daadzíʼígíí, dóó Jacob baʼáłchíní yisdáhineezhchą́ʼígíí, diné atídabiilaaígíí doo baa ninaadadóótʼį́į́ł da, ndi Diyin Bóhólníihii éí Israel biDiyin Ayóó Átʼéii, tʼáá aaníinii yaa dadzólíi doo.

21 Daadzíʼígíí, éí Jacob bidineʼé chʼéékáígíí, éí Diyin God Ayóó Ábóodziilii, yichʼįʼ nináhidookah.

22 Háálá azhą́ nidineʼé Israel tónteel bąąhgóó séígi ánéelą́ą́ʼ, ndi chʼéékáígíí nináhidookah; bee áhoʼdooldįįłgo haʼoodzííʼyę́ę diyinkʼehgo oodááł bee hózhǫ́ náhásdlį́į́ʼ doo.

23 Háálá Diyin God Tʼáá Ałtsoní bee Bóhólníihii náásgóó áhoʼdoołdįįłii, ádahwíísáágóó yee nahoníʼą́.

24 Díí bąą, Diyin God Tʼáá Ałtsoní bee Bóhólníihii ání: O shidineʼé Ziongi kééhohtʼíinii, tʼáadoo Assyrian béídaałdzidí; tsin yee nánhididoołhał, dóó bitsinhał nihichʼįʼ dahyididootʼį́į́ł Egypt atíyiilaaígíí átʼéego.

25 Háálá tsʼídá tʼóó kónízáhíjįʼ, sháháchįʼii niʼ kódééshłííł, dóó sháháchįʼgo bee atínihideeshłíłígíí ałdóʼ.

26 Áádóó Diyin Tʼáá Ałtsoní bee Bóhólníihii hahodínóółchał tséʼ Oreb siʼánígi Midian dineʼé íísdįįdígi átʼéego; dóó Egyptdi tónteel bitsihał yichʼįʼ dahatsihgo ałtsʼą́ą́ʼjįʼ háánaʼ yę́ęgi átʼáo.

27 Áádóó baa hodoolzhish éí beiníłką́ądi biwos bee nidaaz yę́ę nahjįʼ kódoolnííł, dóó naaldlooshii bizéédeetání bidéʼátʼéhę́ę nikʼos yąąh neidiʼdootį́į́ł, dóó bidéʼ átʼéhę́ę doolchxǫǫł akʼah bee hoʼdoolzį́į́ʼę́ę binahjįʼ.

28 Aiathgi níyá, dóó tʼáá náás Migrongóó; Michmashgi bitsinaabąąs deiyiisįʼ.

29 Haʼnaa niʼníná; Gebagi dabiiłkaahgo; Ramath násdzííd; Gibeahdééʼ diné Saul dahyiitʼeʼ.

30 Hadíłgháásh, O Gallim bichʼeʼé nílíinii; Laishgóó hodiitsʼaʼgóó, O Anathoth baa áhí hweenidziní.

31 Madmenah nahjį́ʼ kólyaa; Gebimgi kéédahatʼíinii ałhííkaigo dahdiijééʼ.

32 Nobgi sidáago bee adooʼááł; Jerusalemdi dah yiskʼid, Zion bichʼéʼé dah yiskʼid bee wójí, éí yichʼįʼ bílaʼ yidínóołjoł.

33 Áko shooh, Diyin Bóhólníihii, Diyin Tʼáá Ałtsoní bee Bóhólníihii tsin bitsʼáozʼaʼ ayaa nahałhizgo yiyiikaał doo; alááh daazʼáii ałtso yidoołdah; ádaa deidzódlíi baa dahojoobáʼígo ábidiʼdoolnííł.

34 Áádóó tsin bee hodíłchʼilgóó tsénił yee hodoołdah, dóó Lebanon Diyin ayóó ábóodziilii naa abidoodził.