Wóltaʼii 7
Jacob tʼahdii Isaiah yiyiʼdóó yółtaʼ: Isaiah Messiah yá yáłtiʼ—Messiah bił ééhózinii bizaad dahyoolééł doolééł—akʼidaʼiiłtsxáasii bííshgháán yichʼįʼ kwíidoolííł—doo éí didoołhił da—Isaiah 50 bił ahąąh nidííniłgo dínííłʼįįł. Jesus bidiʼdoochííłjįʼ 559–545 B.C. yihahgo ádahóótʼįįd.
1 Aooʼ, háálá Diyin Bóhólníihii kóníiniʼ: Yóóʼísh ánhidííʼą́, éí doodagoísh hoolʼáágóó nahjįʼkonihiishłaa? Háálá Diyin Bóhólníihii kóníiniʼ: Háadish nimá ałtsʼáʼítʼáázh binaaltsoos biígíí siłtsooz? Háísh tʼóó baa nihidiníʼą́, éí doodago háísh shąąh hadeisʼáí bichʼįʼ nánihiséyéłniiʼ? Aooʼ, háísh bichʼįʼ nánihiséyéłniiʼ? Áko shooh, nihibąąhági átʼéii baa naahkaiígíí biniinaa nidaʼádiyoołniiʼ, dóó daʼsoohsihígíí biniinaa nihimá nahjįʼ kólyaa.
2 Ákohgo, níyáago, diné ádin ńtʼę́ę́ʼ, háká ádííniidgo, aooʼ, ádin tʼáadoo haadzíʼí da. O Israel bighandóó danohłíinii, shílaʼ bee nináʼdeeshdléełgoísh doo yíneelʼą́ą da, éí doodago adziilii bee áká adeeshwołígíísh shee ádin? Áko shooh, hoshishkéedi tónteel yíłtseigo ííshʼįįh, bitooh danilínígíí diné doo kééhatʼínígóó ííshʼįįh dóó biłóóʼ halchingo ííshʼįįh háálá tó nááltseiʼ, dibááʼ biniinaa ádin dooleeł.
3 Yáʼąąsh diłhiłgo bikʼestih, dóó tłʼoh azis béstiʼgo.
4 Bóhólníihii Diyin God ayóó bił ééhózinii bizaad sheinílá, áko baa hoolzhiizh góneʼ saad bee bichʼįʼ hadeesdzihgo shił bééhózin; O Israel bighandóó danohłíinii. Chʼééh diníyáago abínídą́ą́ʼ áádóó nááʼábínígo chʼéésiisíidgo. Ídahoołʼą́ąʼii biyátiʼ aʼdiitsʼaʼígi átʼéego adiistsʼaʼgo ánáshiilʼįįh.
5 Bóhólníihii Diyin God shijaaʼ ąą áyiilaa, dóó doo akʼijįʼ nishłį́į da, dóó doo nátʼą́ą́ kwíísdzaa da.
6 Adiłtsxisii shíígháán bichʼįʼ kwíishłaa, dóó shiniitsįʼ tsiighá hayiníshii bichʼįʼ kwíishłaa, baa yáhásin dóó akʼihidijeeh tʼáadoo shiniiʼ bitsʼąą nídéłʼį́į́ʼ da.
7 Háálá Bóhólníihii Diyin God shíkáʼ adoolwoł, áko doo shididoołhił da. Áko shiniiʼísh béésh diłhiłii nahalingo íishłaa, dóó shił bééhózin doo baa yánísin da doo.
8 Áádóó Diyin Bóhólníihii áyíídígóó naaghá, dóó shá sizį́. Háí lá shił ahigą́ą doo? Ahił siizį́į dooleeł. Háí lá shitsʼą́ą́jí nilį́? Bíniʼdi áháníjįʼ shíighah niighááh, dóó shizééʼ beʼadziil bee náhodideestsʼį́į́ł.
9 Háálá Bóhólníihii Diyin God shíkáʼadoolwoł. Áádóó tʼáá ałtsoní shikʼídahaʼáhígíí, jó ákon, ééʼ nahalingo tʼáá átʼé dadidoobah, dóó chʼosh ałchozhii dabidooyį́į́ł.
10 Háísh nihitah Diyin Bóhólníihii yináldzid, éí bá naalʼaʼí biinééʼ yikʼeh hółʼį́, chahałheeł yiiʼ naaghá dóó adinídíín bee ádin.
11 Áko shooh tʼáá ánółtso déédaʼdołjahii, tsííd bináztʼiʼ ádayósinii, nihikǫʼ bibee adínídíín bee wohkah dóó tsííd dadoołtłaaígíí ałdóʼ. Díí shilákʼeedóó nihaadeeshłééł yínííł bee dínóóhjah.