1 Amoz biyeʼ, Isaiah, éí Judah kéyah dóó Jerusalem kin haalʼá áhootʼéí diyingo bił ííshją́ą́ ályaaígíí bee hoł hóóneʼ:

2 Áádóó baa hodoolzhish nihodoogáałjįʼ ayííłką́ągo, Diyin Bóhólníihii bighan éí dził bighą́ą́ʼdi ádoolnííł, áádóó dah daaskʼidígíí biláahdi ayóó átʼéego ádoolnííł, dóó ałʼąą dineʼé tʼáá átʼé áajįʼ íílį́į doo.

3 Áádóó diné tʼóó ahayóí kódaaníigo deíkáah doo, Sołtʼįʼ, haaʼíshąʼ Diyin Bóhólníihii bidził bighą́ą́ʼgóó diikah, Jacob biDiyin God bighanjįʼ hahidiikah; dóó Diyin God átʼéii yínanihidinóółtį́į́ł, áádóó bikʼehgo daʼnítiingóó deíníikááh dooleeł, háálá Ziondóó bee hazʼáanii bee hahatʼéehgo Jerusalemdóó Diyin Bóhólníihii bizaad hahwiileeh doo.

4 Áádóó Bóhólníihii dineʼé tʼóó ahayóí yá nahodiiʼaah doo, dóó yichʼahodooshkeeł: áádóó béésh hał háádahidootsiłgo bee nihwiildlaadí ádadoolnííł, índa tsiikʼidétáán háádahidootsiłgo bee tsin bee higéshí ádadoolnííł; ałʼąą dineʼé éí béésh hał doo yee daʼahigą́ą da doo, áádóó anaaʼ doo yínáádahoołʼaah da doo.

5 O Jacob bighandóó haojéʼígíí, hágo dóó Diyin Bóhólníihii bibee adinídíín biyiʼ deinííkááh dooleeł; aooʼ, hágo, háálá tʼáá ánółtso yóóʼahisookai, tʼáá ánółtso bibąąhági ádaatʼéii bichʼįʼ ahisookai.

6 Éí bąą, O Diyin Bóhólníihii, nidineʼé Jacob bighandóó haojéʼígíí yóóʼadííníʼą́, háálá haʼaʼaahdę́ę́ʼ, doo tʼáá aaníí ádaatʼéii hwiiʼhadadeezbin, dóó Philistine dineʼé nahalingo náásgóó áhodoonííł yaa halneʼii áhodilʼíinii deidiiztsʼą́ą́, dóó diné tʼáá ádzaagóó nidaakaiígíí baʼáłchíní yił daʼahótąʼ.

7 Bikéyahgi tʼáá íiyisí béésh łigaii áádóó béésh óola yee daʼatʼį́; áádóó yee daʼatʼínígíí doo ndahaaztʼiʼ da; bikéyahgóó doo chohooʼį́į́góó łį́į́ʼ deílʼá; bitsindaabąąs bijáád naakiígíí ałdóʼ tʼáadoo bee néelą́ʼí da.

8 Bikéyahgóó ałdóʼ bedaʼalyaii tʼóó ádahayói; tʼáá bílaʼ yee ádayiilaaígíí yichʼįʼ ndahałá; éí tʼáá bílázhoozh yee ádayiilaa.

9 Áádóó diné tʼáá bitaʼígi ádaatʼéii doo yaa ádooníił da, índa diné ayóó ádaatʼéii doo hojoobaʼ íinízin da doo, éí bąą, doo banídiʼdííʼááł da.

10 O tsiʼ nidaahkai, tsénííʼ góneʼ adoohkahgo, dóó łeeyiʼ nídadidoohtʼį́į́ł, háálá Diyin Bóhólníihii bikʼeʼíyéʼii dóó biʼayóó átʼéii atínihidoolííł.

11 Áádóó baa hodoolzhish éí yoołkáałdi diné bibee ádaa dahodzódlí ánoolninii hojoobaʼí ádabidiʼdoolnííł, áádóó ayóó átʼéego ádaa deidzódlinii niʼjįʼ kódadoolnííł, índa Diyin Bóhólníihii tʼéiyá ayóó átʼée dooleeł.

12 Áko Diyin Tʼáá Ałtsoní bee Bóhólníihii tʼáá ałtso diné yaa doogááł beiníłką́ągo, aooʼ, tʼáá ałtso dineʼé, aooʼ, ádaa dahojiniihii áádóó ádaa dahodzódlíii índa ayóó ádajítʼé ídazhdólzinii tʼáá ádzíłtso hojoobaʼí ádahwidiʼdoolnííł.

13 Aooʼ, Diyin Bóhólníihii beiníłką́ądi tʼáá ałtso Lebanondi gad yílʼáadi doogááł, háálá ádaa dadzódlíii dóó ádaa dahaʼniih; dóó Bashangi chéchil yílʼáadi tʼáá ájítʼé;

14 Áádóó dził aghádadeezʼahígíí bikááʼdi tʼáá átʼé, áádóó yáádaalkʼidígíí bikááʼdi tʼáá átʼé, dóó ałʼąą dineʼé dah deíkááh ádaa dadzódlíii, dóó tʼáá ałtso ałʼąą dineʼé bitahgóó.

15 Áádóó yadaʼiiʼáago bikááʼdi tʼáá átʼé, áádóó tsé binaa ahéédaʼastłʼinígíí bikááʼdi;

16 Áádóó tónteel bikááʼ tsín naaʼeeł tʼáá átʼé, áádóó Tarshish bitsin naaʼeeł tʼáá átʼé, áádóó ndaashchʼąąʼgo bił danilíinii tʼáá átʼé bikʼi.

17 Áádóó diné ádaa dzódlíi yaa ádoolnííł; dóó diné ádaa dadzódlíii éí aʼoh ádadoolnííł; dóó beiníłką́ądi Diyin Bóhólníihii tʼéiyá ayóó átʼée doo.

18 Áádóó tʼóó bedaʼalyaaígííyę́ę tsʼídá tʼáá ałtso yóóʼiidooghas.

19 Áádóó tsé biʼáán góneʼ dóó nahasdzáán bitséʼáán góneʼ ahidookah, háálá Diyin Bóhólníihii bikʼeʼéyéʼii bikʼi hodooleeł, dóó bibee óhólníihii ayóó átʼéii atidabidoolííł, adziil yee yiizįʼgo kéyah yéego yidooghał.

20 Éí bijį́įdi diné éí habéésh łigaii bedaʼalyaa, áádóó habéésh óola bedaʼalyaaí, bichʼįʼ nidahojiłáa doo biniyé ádá ádajiilaayę́ę, éí naʼazísí dóó jaaʼabaní bichʼįʼ adahizhdoołkał;

21 Áko tsé ndahaazdláád, dóó tsé dadeeshzhah biyíʼ góneʼ adajiijeeh doo, háálá Diyin Bóhólníihii bikʼeʼéyééʼii yéédadooldzííł dóó bee ayóó átʼéii bitsʼádiʼnílíidgo atídabidoolííł, nahasdzáán tʼóó báhádzidgo tsxííłgo neidiyoołhxą́ą́łgo.

22 Diné bíchį́į́h yee háá háyoołígíí tʼáadoo bichʼįʼ choʼdaʼíínółʼíní; háálá haʼátʼéegoshąʼ haʼahódlíigo haa nitsáhákees?