1 Áko shooh, áhoodzaa shí, Nephi, łą́ądi Bóhólníihii shiDiyin God bichʼįʼ yichá, shínaaí bá háchįʼígíí biniinaa.

2 Ákondi shooh, tʼóó yíwohda shichʼįʼ bá háchįʼ, wónaasdóó dashidiyoołhééłgo yíkándeiʼá.

3 Aooʼ, shidááh yáłtiʼ daazlį́į́ʼ, kódaaníigo: Nihitsilí nihikʼi naatʼáanii deeshłeeł nízingo ntsékees; dóó łą́ągo biniinaa tiʼdahwisiiʼniiʼ; ákohgo, tį́ʼ kʼad dahodiyiilyééł, bizaad éí doo bikʼee tiʼnáádahwiidiiʼnih da doo. Háálá áko shooh, doo éí nahaʼáanii ádadiilníił da; jó éí nihí nihaadeetʼaą́, alą́ąjįʼ neitʼaashígíí, díí dineʼé bikʼi naahaʼáanii niidlį́.

4 Kʼad shí tʼáá ałtso saad yee shikʼijįʼ hahasdzíʼę́ę díidí béésh tʼąhí doo bikááʼ áshłééh da. Ákondi tʼáá kóníłtsogo ádishní, dashidiyoołhééłgo shíká ndeezʼą́.

5 Áádóó baa hoolzhiizh Diyin Bóhólníihii shił hoolneʼ, shí, Nephi, dóó tʼáá háiida ádeinízinígíí ałdóʼ, nihínaaí bitsʼą́ądóó diné doo kééhatʼiní góneʼ dah didoohnééł nihidóóniid.

6 Ákohgo, baa hoolzhiizh shí, Nephi, sheʼesdzáán dóó shaʼáłchíní dóó Zoram ałdóʼ, dóó beʼesdzáá dóó baʼáłchíní, índa Sam, shínaaí nilíinii, dóó beʼesdzáá dóó baʼáłchíní dóó Jacob dóó Joseph, shitsilíké, dóó shilahké ałdóʼ, dóó háíshį́į́ shídóʼ, danízinígíí. Áádóó tʼáá ałtso shił dahdiikaiígíí éí Diyin God kóhodoonííł nínígíí dóó diyingo ííshją́ą́ áyiilaa deidoodląąłígíí tʼéiyá ádáátʼį́; ákohgo, shizaad deidiiztsʼą́ą́ʼ.

7 Áádóó nihiníbaal dóó chodeidiilʼįįłígíí, doo kééhatʼínígóó yiiʼnéełgo tʼóó ahayóí danihiiską́. Áádóó yiiʼnéełgo ląʼída danihiiską́ągo índa, nihiníbaal ndasiiʼnil.

8 Áádóó shidineʼé éí niniiʼnánígi, Nephi bee deiyídíijiił dadííniid; ákohgo, Nephi, hoolyéego yee deiyízhiʼ.

9 Áádóó tʼáá ałtso shił naakaiígíí, Nephi bidineʼé deiniilyée dooleeł, dadííniid.

10 Áádóó tʼáá ałtsojįʼ Diyin Bóhólníihii yee nahwiisʼáanii, dóó bibee hazʼáanii dóó yee hahaadzihii bídaniitaahgo bikʼeh dahoniilʼį́į́ ńtʼę́ę́ʼ, díí éí Moses bibee hazʼáanii bikʼehgo.

11 Áádóó Diyin Bóhólníihii éí nihił hólǫ́ǫ́ ńtʼę́ę́ʼ; dóó tʼáá íiyisíí náásdeekai; háálá kʼǫ́ǫ́ʼ kʼéédadiilyéehgo tsʼídá ląʼígo ńdaʼniltʼį́į́h ńtʼééʼ. Áádóó dibé dóó tłʼízí, dóó béégashii ádaatʼéii índa naaldlooshii ałʼąą ádaátʼééłíí, nihee dahazlį́į́ʼ.

12 Áádóó shí, Nephi, béésh łitsoii tʼą́hí bikááʼ haneʼ nááháasdzoyę́ę ałdóʼ níʼą́; dóó tʼáadoo leʼé nímazgo, biyiʼ dah atsihí, bikʼehgo niiʼnánée, Diyin Bóhólníihii bílaʼ yee, shizhéʼé yá áyiilaahąą ałdóʼ níʼą́ naʼíisdzoyę́ę bikʼehgo.

13 Áádóó baa hoolzhiizh tʼáá íiyisíí náásiideekai, dóó nihidineʼé ląʼída silį́į́ʼ díí kéyah bikáaʼgi.

14 Áádóó shí, Nephi, Laban bibééshał ńdiitą́, dóó bikʼehgo bééshał ląʼída béédahiilyaa, Laman dineʼé daosyeʼígíí baa ayidahwiidlihgo biniinaa; háálá shí dóó shaʼáłchíní dóó shidineʼé dabiʼdiʼnínígíí deijoołáhígíí shił bééhózingo biniinaa.

15 Áádóó shidineʼé, kin álʼínígíí bee nanétą́ą́ʼ, dóó tʼáá ałtso tsin, dóó béésh ditʼóódígíí, dóó béésh łichíiʼii, índa béésh łitsoii, dóó béésh óola, dóó béésh łigaii, índa tʼáá ałtso béésh daʼílíinii ałʼąą ádaátʼéhígíí, bee naʼanishígíí dóó álʼínígíí bee nanétą́ą́ʼ: Háálá díí éí tʼóó ádahayóí dahólǫ́.

16 Áádóó shí, Nephi, diyin bighan łaʼ ííshłaa; dóó Solomon bidiyin bighan áyiilaahą́ą bikʼehgo ííshłaa ákondi tʼáadoo leʼé daʼílínígíí tʼéiyá áłchʼį́į́dígo bee ííshłaa; áko, díí kéyah bikáaʼgi ákódaatʼéhígíí tʼáá ádingo biniinaa, ákohgo, Solomon bidiyin bighan ádoolníiłgo doo bihónéedząą da. Ákondi ályaaígi éí Solomon bidiyin bighan áyiilaayę́ę nahalin; dóó tsʼídá nizhónígo binaʼazhnishgo hadilyaa.

17 Áádóó baa hoolzhiizh shí, Nephi, shidineʼé ayóó naanish deiyiichį́į́hgo yídahołą́ą́h, dóó ayílá bee ayóó ndaalnish daazlį́į́ʼ.

18 Áádóó baa hoolzhiizh aláahdi nihinaatʼáanii dííleeł dashiłníí ńtʼę́ę́ʼ. Ndi shí, Nephi, éí doo aláahdi naatʼáanii bee dahodooleeł da nisin ńtʼę́ę́ʼ; ákótʼée ndi, tʼáá bííníshghahígi átʼáo biká eeshwod.

19 Áádóó áko shooh, Diyin Bóhólníihii saad yee haadzíʼę́ę, shínaaí binaatʼáanii dóó binaʼnítiní dííleeł nínée, éí bohoolyaa. Ákohgo, dadiyilyééł daaníijįʼ ahoolzhiizhgo, Diyin Bóhólníihii bibee hazʼáanii yee haadzíʼę́ę bikʼehgo tʼáá aaníí shikʼiské binaatʼáanii dóó binaʼnitiní sélį́į́ʼ.

20 Ákohgo, Diyin Bóhólníihii saad yee shichʼįʼ haadzíʼę́ę éí beʼelyaa, éí kóníigo: Háálá nizaad doo dayiistsʼą́ąʼgóó éí Diyin Bóhólníihii bitsʼą́ądóó nahjįʼ kódoolnííł. Áádóó áko shooh, tʼáá aaníí bitsʼą́ądóó nahjįʼ kóbiʼdiilyaa.

21 Áádóó hóyéego haʼoodzíʼígíí yikʼijįʼ kwíyiilaa, aooʼ, tsʼídá bikʼéʼíyéʼígíí, tsiʼnaakaiígíí biniinaa. Háálá áko shooh, bijéí bikʼijįʼ deineestłʼis, áko bááshzhiní nahalingo bitsʼįʼ yishtłizh daazlį́į́ʼ; ákohgo, nigháiidę́ę́ʼ daalgahí yeeʼ ńtʼę́ę́ʼ, dóó tsʼídá danizhóní dóó bá ádahwiinítʼį́į ńtʼę́ę́ʼ, áko shidineʼé doo bidá dadinóolniił da Bóhólníihii Diyin God bikáhgí daadiłhiłgo áyiilaa.

22 Áádóó Bóhólníihii Diyin God kóníiniʼ: nidineʼé tʼóó badaaʼihgo yaa nitsídaakeesgo ádeeshłííł, tʼáá hazhóʼó doo yáʼátʼéehii yaa naakaiígíí yaa ńdaʼooskango tʼéiyá.

23 Áádóó háida bílástsiiʼ ahoolchííłgóó bílástsiiʼ yił ahihidiikáii hóyéeʼjí bá hadaʼdoodzih; táá ákótʼáo bee bá hadaʼdoodzih. Áádóó Diyin Bóhólníihii éí yee haadzííʼ, dóó éí áhoodzaa.

24 Áádóó hóyéego bá haʼoodzíʼígíí biniinaa dineʼé tʼóó bił dahóyéʼígíí daazłį́į́ʼ, ayóo atídaʼałʼį́ dóó ayóo ndahagiz, dóó diné doo kééhatʼínígi naaldlooshii daʼałchinígíí haadaatʼį́.

25 Áádóó Bóhólníihii Diyin God áshídííniid: naʼáłchíní náás ahoolchííłgóó atídeiłʼį́įgo, yee shé niná dahalnííh biniiyé; dóó kwinzahjįʼ doo shéédaałniihgóó, dóó doo shizaad deiyíhsółtsʼą́ą́góó, atídabiłʼį́įgo ádabidoołdįįł.

26 Áádóó baa hoolzhiizh shí, Nephi, éí Jacob dóó Joseph yiisį́į́ʼ, áko shidineʼé bikéyah bikááʼgóó priest dóó naʼnitiní danilį́į dooleeł.

27 Áádóó baa hoolzhiizh ił dahozhǫ́ǫ́jí bikʼehgo keedahwiniitʼí ńtʼę́ę́ʼ.

28 Áádóó tádiin nááhaidą́ą́ʼ nihí ńléí Jerusalemdę́ę́ʼ dah diikai.

29 Áádóó shí, Nephi, shibéésh tʼąhí íishłaaígíí, bikááʼ shidineʼé, kónzahgóó baa naʼiisóóh.

30 Áádóó baa hoolzhiizh Bóhólníihii Diyin God áshidííniid: béésh tʼąhí łaʼ ánáádanidleʼ; dóó shił yáʼádaatʼéehgo néshʼinii ląʼígo bikááʼ nidahidíizoh, éí shidineʼé biká adoolwoł.

31 Ákohgo, shí, Nephi, Diyin Bóhólníihii bibee hazʼáanii bikʼeh hwiideeshʼííłgo, dah diiyá dóó béésh tʼąhí ádeeshłaago díidí bikááʼ náházoh.

32 Áádóó Diyin God bił yáʼátʼéhígíí éiyá náházoh. Áádóó shidineʼé Diyin God bitsʼą́ą́dééʼígíí bił yáʼádaatʼéehgo éiyá díidi béésh tʼąhí bikááʼ náhádzooígíí bił danilį́į doo.

33 Áádóó shidineʼé binákééʼ haneʼígíí hazhóʼó shił béédhodoozįįł danízinígíí nááná łaʼ shibéésh tʼąhí ndeidoołkah.

34 Áádóó kóníłtsogo baa haasdziih, dízdiin nááhai, dóó nihí tʼááʼ íídą́ą́ʼ daʼahiigą́ą́ʼ dóó nihikʼiské bił saad ałchʼįʼ adahéeʼnil.