1 Áádóó shí, Nephi, kʼad, shizhéʼé náás yaa nahasneʼę́ę baa yáshtiʼ, Joseph baa honeʼyę́ę, éí Egypt biyigóó biʼdisnáhą́ą.

2 Háálá áko shooh, tʼáá ałtso náás oochíłígíí yaa hoolneʼ. Áádóó náás yaa halneʼígíí yaa náʼiidzoh, doo ląʼída biláahdi ádaatʼée da. Áádóó nihí dóó nihaʼáłchíní dooleełígíí yaa yááłtiʼ; dóó béésh łitsoii tʼą́hí éí bikááʼ ndáháasdzoh.

3 Ákohgo, shizhéʼé ałtso Joseph náás yaa hoolneʼę́ę yaa yááłtiʼ bikʼijįʼ, Laman baʼáłchíni hágo yił ní, dóó biyeʼké, dóó bitsiʼké kóyidííniid: Áko shooh, shiyeʼké, dóó shitsiʼké, éí sheʼawééʼ alą́ąjįʼígíí, biyeʼké dóó bitsiʼké danohłįnii, shizaad éí tsʼídá dayisídoohtsʼį́į́ł nísin.

4 Háálá Bóhólníihii Diyin God éí ádííniid: íiyisíí shibee hazʼáanii bikʼeh dahonołʼį́įgo díí kéyahgi náás didookah, dóó íiyisíí doo shibee hazʼáanii bikʼeh dahonołʼį́į́góó shitsʼą́ąjįʼ kónhidiʼdoolnííł.

5 Ákondi shooh, shiyeʼké dóó shitsiʼké, tʼáhdoo łeeh shiʼdiilteehdą́ą́ʼ tʼáá hazhóʼó bee akʼihojídlínígíí łaʼ bee nihá sodideeszįįł; háálá áko shooh, yáʼátʼéehjígo bee nihidiʼneesdzą́ągo doo bitsʼáhidoohkah da.

6 Ákohgo, hóyéeʼjí nihikʼijįʼ Áko shooh haʼoodzíiʼgo, akʼihojídlí nihąąh ninishłé, áko hóyéeʼjí haʼoodzíʼígíí nahjįʼ nihá kódoolnííł dóó nibishchíinii baa ńdoolyééł.

7 Ákohgo, shee akʼihojídlį́ biniinaa Bóhólníihii Diyin God éí doo bíniʼdii ałtso ánihidoołdįįł da; ákohgo, nihí dóó nihilástsii ahoolʼáágóó yaa joobaʼ dooleeł.

8 Áádóó baa hoolzhiizh shizhéʼé ałtso Laman biyeʼké dóó bitsiʼké yichʼįʼ yááłtiʼ bikʼijįʼ, áádóó sháánohʼéésh níigo Lemuel biyeʼké dóó bitsiʼké bidáahjįʼ niitʼeezh.

9 Áádóó yichʼįʼ yááłtiʼ, kóníigo: Áko shooh, shiyeʼké dóó shitsiʼké, éí shiyeʼ naaki góneʼ naagháhígíí biyeʼké dóó bitsiʼké danohłį́į; áko shooh Laman biyeʼké dóó bitsiʼké sodizin bee bá haasdzíʼę́ę tʼáá éí éiyá bee nihikʼijinishdliih; ákohgo, doo ałtso nanihiʼdooltsił da; ndi nihoolzhiishdí nihílástsiiʼ bikʼihózhdoodliił.

10 Áádóó baa hoolzhiizh shizhéʼé ałtso yichʼįʼ yááłtiʼgo, Áko shooh, Ishmael biyeʼké yichʼįʼ yááłtiʼ, aooʼ, dóó tʼáá ałtso bighan hazʼą́ą́dóó.

11 Áádóó ałtso yichʼįʼ yááłtiʼ bikʼijįʼ, Sam yichʼįʼ háádzííʼ, kóníigo: Ni, dóó nílástsiiʼ bikʼihojídoodlííł; háálá Nephi kéyah shóidííłtʼeeł. Dóó nílástsiiʼígíí áájí bílástsiiʼígíí bił wóltaʼ; dóó nikʼisígi ánítʼée dooleeł, dóó nílástsiiʼígíí áájí bílástsiiʼígíí yił áhedaałtʼé; dóó níiníłkąąjįʼ nikʼihojídlíi dooleeł.

12 Áádóó baa hoolzhiizh shizhéʼé, Lehi, ałtso bighan hazʼąą dooleełígíí, bijéí biyiʼdóó íinízinii dóó Diyin Bóhólníihii biʼIiʼ Sizį́ Diyinii bił hólónii yikʼehgo yichʼįʼ yááłtiʼ bikʼijįʼ, są yiih yíyá. Áádóó baa hoolzhiizh náádiilyáá, dóó łeeh yiltįh.

13 Áádóó baa hoolzhiizh náábiʼdiilyá tʼáadoo díkwíida yiłkaahí, Laman dóó Lemuel dóó Ishmael biyeʼké Diyin Bóhólníihii hahaasdzíʼígíí biniinaa shichʼįʼ bá dahóóchįįd.

14 Háálá shí, Nephi, bizaadígíí bikʼehgo, éí bichʼįʼ yáníłtiʼ shidiʼníigo biniinaa bichʼįʼ yááłtiʼ; háálá ląʼígo bichʼįʼ yéíłtiʼ, dóó shizhéʼé ałdóʼ, tʼáhdoo náádiilyéhę́ędą́ą́ʼ yichʼįʼ yááłtiʼ; ląʼída ádííniidígíí éí nááná łaʼ shibéésh tʼąhí bikááʼ haneʼígíí bikááʼ nááháasdzo; háálá shidineʼé bitahgóó ádahóótʼįįdígíí éí náánáłahjí shibéésh tʼąhí bikááʼ nááháasdzo.

15 Áádóó díídí shiiʼ sizíinii biyiʼdóó íinisinígíí, dóó Diyin bizaad bee akʼedaʼashchínígíí béésh łitsoii tʼą́hí biyiʼ bee bikʼeʼeshchínígíí, díí bikááʼ nááhásóóh. Háálá shiiʼ sizíinii Diyin bizaad bee akʼedaʼashchínígíí tʼáá íiyisíí bił nizhóní, dóó shijéí bee tʼáá íiyisíí baa ntséskees, dóó shaʼáłchíní yitsʼąądóó ídahwiidoołʼááł dóó yee dínóosééł biniyé nááhásóóh.

16 Áko shooh, shiiʼ sizíinii Diyin Bóhólníihii bitʼáadoo leʼé tʼáá íiyisíí yaa bił hózhǫ́; dóó tʼáadoo leʼé yiiłtsą́née dóó disétsʼąʼę́ę shijéí bee áłahjįʼ baa ntséskees.

17 Ákótʼée ndi, azhą́ Diyin Bóhólníihii biyáʼátʼéehii ayóóʼátʼéii ndi, binaanish tʼáá íiyisíí ayóó átʼé dóó nizhónígo shił ííshją́ áyiilaa ndi, shijéí yichahgo dilwosh: O dooládóʼ diné hojoobaʼ átʼéii nishłį́į da! Aooʼ, atsʼíseekʼehgo nisinígíí biniinaa shijéí tʼáá íiyisíí yínííł silį́į́ʼ; bąąhági átʼéii baa niséyáhígíí biniinaa shiiʼ sizíinii tʼáá íiyisíí yínííł nízin.

18 Tsistłʼáséyah, háálá hoʼdinitaah dóó bąąhági átʼéii doo bínísdzilígíí biniinaa.

19 Áádóó shił hódoozhǫǫł nisingo, shijéí shibąąhági átʼéii biniinaa diʼníi łeh; ákótʼée ndi; ákótʼée ndi, baʼííselįʼígíí éí shił bééhasin.

20 ShiDiyin God yeeʼ shíká análwoʼ, diné doo kééhatʼįnígi tiʼhooshníihgo áádę́ę́ʼ chʼishinílóóz; dóó tónteel bikáaʼgi shíká eelwod.

21 Beʼayóó óʼóʼní yeeʼ shiiʼ haidééłbįįd, azhą shitsʼíís tsʼídá ałtso néidiilá.

22 Sheʼanaaʼ yikʼeh deesdlį́į́ʼ, shidááhdę́ę́ʼ bitah dahoditsízgo áyiilaa.

23 Áko shooh, jį́įgo yishchágo yidiiztsʼą́ą́ʼ, dóó tłʼéeʼgo binahjįʼ ééhózin shił ííshjání ííłʼį́į ńtʼę́ę́ʼ.

24 Áádóó jį́įgo éí tʼáá íiyisíí bichʼįʼ sodiszin; aooʼ, yáʼąąshgóó shinééʼ bee hodiitsʼaʼgo sodiszin; dóó Diyin yá ndaalʼaʼí shichʼįʼ adahaaskai dóó ndashineeztą́ą́ʼ.

25 Áádóó biʼIiʼ Sizį́ Diyinii bitʼaʼ bikááʼ shitsʼíís hólǫ́ǫgo dził ayóó ádaátʼéhígíí bighą́ą́ʼgóó shił haazhʼáázh. Áádóó shinááʼ bee tʼáadoo leʼé ayóó ádaatʼéii nééłʼį́į́ʼ, aooʼ, diné yidoołtséłígíí éí doo yíneelʼáanii ndi; díí bąą éí doo bikááʼ ádíílíił da shiʼdooʼniid.

26 O índa, ayóó ádaatʼéii yiiłtsąą ndi, dóó Diyin Bóhólníihii beʼajoobaʼ tʼáá íiyisíí ląʼígo yee nihokááʼ dineʼé baʼáłchíní yaa níyáa ndi, haʼátʼíísh éí biniyé shijéí yicha doo dóó shiiʼ sizíinii yínííł yiiʼ naagháa dooleeł, dóó shitsʼíís doo bidziil da yileeh, dóó sheʼadziil niʼ kwáániił dooleeł, díí tiʼhooshníhígíí biniinaa?

27 Áádóó haʼátʼíísh biniyé shitsʼíís biniinaa bąąhági átʼéii bá hoséłʼą́ą doo? Aooʼ, haʼátʼíísh biniyé bąąhági átʼéii bichʼįʼ kónéíshtʼįįh, binahjįʼ doo yáʼáshóonii shijéí biyiʼdi bá hoséłʼą́ shił hodeesyeelę́ę yidoołchxǫǫł dóó shitsʼíís dóó shiiʼ sizíinii atíidoolííł? Haʼátʼíísh biniyé shikʼijįʼ danilínígíí bichʼįʼ shá háchįʼ?

28 Chʼéénídzííd, shiiʼ sizíinii! Tʼáadoo bąąhági átʼéii bee niʼkwínítʼéhé. tʼáá íyisii nił hózhǫ́, O shijéí, áádóó shiiʼ sizíinii beʼenaʼí bá hoołʼaah lágo.

29 Tʼáadoo shikʼijįʼ danilínígíí biniinaa nánááháchįįhí. Tiʼhooshníhígíí biniinaa tʼáadoo sheʼedziil niʼ kwíínísiní.

30 Tʼáá íiyisíí nił hózhǫ́, O shijéí, dóó Diyin Bóhólníihii bichʼįʼ naʼooshkąąh, dóó kódíníigo: Diyin Bóhólníihii, ahoolʼáágóó naa hashniih dooleeł; shiiʼ sizíinii naa bił hózhǫ́ǫ dooleeł, shiDiyin God, shitseʼ bee yisdáʼiildéehii nilíinii.

31 O Diyin Bóhólníihii, shiiʼ sizíinii yisdánáníłteeh? Sheʼenaʼí bílákʼeedóó, yisdánáshidííłtéłísh? Bąąhági átʼéii hólǫ́ǫgo bikʼee shitah hoditsxizgoish áshidíílííł?

32 Chʼį́įdiitah biyah atiin góneʼ tʼáá áłahjįʼ shá dáʼdeelkaal dooleeł, háálá shijéí dóó shiiʼ sizíinii yínííł nilį́įgo biniinaa! O Diyin Bóhólníihii, tʼáá shǫǫdí, niyáʼátʼéehii bee honítʼiʼgi shidáʼdóółkaał lágo, háálá tééh góyaa yisháał dooleeł, háálá hodilkǫǫhgo kʼihoneezlá tʼéiyá bikááʼ yisháał dooleeł.

33 O Diyin Bóhólníihii, tʼáá shǫǫdí, niyáʼátʼéehii éénééz shikíníłtʼih! O Diyin Bóhólníihii, tʼáá shǫǫdí, sheʼanaaʼ adashiłʼíinii bił chʼídeeshwołgo shá áhólééh! Tʼáá shǫǫdí tʼáá shitsiijįʼ atiin kʼéhózdongo shá ánílééh! Tʼáadoo leʼé shidínóołtłʼahígíí, tʼáadoo shidáahgi nihíʼaahí—ndi shiląąjįʼ shá hashtʼehwiinísin, dóó tʼáadoo shidáahgi tʼáadoo leʼé nihíléhé, ndi sheʼanaaʼí adashiłʼíinii éí tʼáadoo leʼé bidáahgi nihínííł.

34 O Diyin Bóhólníihii, ni éí naʼííníshłí, dóó ahoolʼáágóó éí naʼííníshłíi dooleeł. Nihokááʼ dineʼé éí doo baʼííníshłíi da; háálá tʼáá háiida nihokááʼ dineʼé yaʼólíhígíí éí hóyéeʼgo haʼoodzííʼ yiih doogáałgo shił bééhózin. Aooʼ, hóyéeʼgo haʼoodzííʼ biishdoogááł tʼáá háíshį́į́ nihokááʼ dineʼé yaʼólíhígíí éí doodago nihokááʼ dineʼé bibee ádziil yaa joozlíʼígíí.

35 Aooʼ, tʼáá aaníí shił bééhózin, Diyin God tʼáá jííkʼe tʼáá háiida biʼdókeedígíí yaʼdoolééł. Aooʼ, shiDiyin God éí shaʼ doolééł, doo yáʼátʼéehii biká ádííníshkeedgóó; díí bąą hodiitsʼaʼgo nichʼįʼ sodiszin dooleeł; aooʼ, nichʼįʼ deeshcha, shiDiyin God, Diyinkʼehgo shitsé niłziłii. Áko shooh, ahoolʼáágóó shisodizin diitsʼaʼ dooleeł, shitsé niłziłii dóó ahoolʼáágóó shiDiyin God nílíinii. Amen.