1 Áádóó kʼad éí ni nichʼįʼ yáshtiʼ Joseph, akéeʼdi niʼdizhchínígíí. diné doo kééhatʼįnígi tiʼhooshníihgo niʼdizhchį́; aooʼ, tsʼídá íiyisíí tiʼhoozníihgo nimá nishchį́.

2 Áádóó Diyin Bóhólníihii díí kéyah ałdóʼ yidoosį́į́łgo nihaa didootʼááł nisin, háálá díí kéyah éí tsʼídá aláahdi ílínii átʼé, háálá ni dooleeł dóó náás naʼáłchíní danilį́į dooleełígíí dóó danikʼis bił dooleeł, háálá Israel biDiyin Ayóóʼátʼéii bibee hazʼáanii bikʼeh dahonółʼǫ́ǫ, ahoolʼáágóó nihaa áhályą́ą dooleeł.

3 Áádóó kʼad, Joseph, akéeʼdi niʼ dizhchínígíí, dóó tiʼhooshníihgo diné dóo kééhatʼįnídę́ę́ʼ chʼíniníłtíh, Diyin Bóhólníihii ahoolʼáágóó nikʼijídlíi dooleeł, háálá náás naʼáłchíní danilį́į dooleełígíí doo ałtso ndóoltsił da.

4 Háálá áko shooh, ni éí shitsʼą́ą́dóó hosínílį́į́ʼ; dóó Joseph yisnáahgo Egyptgóó abiʼdooltį́hę́ę éí bitsʼą́ą́dóó hosélį́įʼ. Áádóó Diyin Bóhólníihii Joseph yił ahaʼdeetʼánée éí tsʼídá ayóóʼadaátʼé.

5 Ákohgo, Joseph éí tʼáá aaníí dííshjį́ nihił yoołkáłígíí yiyiiłtsą́. Áádóó Diyin Bóhólníihii hoł ahaʼdeetʼą́ągo, hó hatsʼą́ą́dǫ́ǫ́ oochíłígíí bineestʼąʼ bitahdóó Bóhólníihii Diyin God dineʼé yáʼátʼéhígíí Israel bighan dooígíí néididoołjah, doo éí Messiah da, ndi tʼáá sahdii atsʼádookah, ákótʼée ndi, éí Diyin Bóhólníihii yił ahaʼdeetʼánée bééhodoonih éí Messiah kʼad dííshjį́įdi hoolzishdi bił ííshją́ą́ ádadoolnííł, beʼádziil bee, chahałheeł dóó ńléí adinídíinjįʼ chʼíidooʼish—aooʼ, chahałheeł doo yitʼį́į́dóó dóó dahoʼdisnáhąą biyiʼdę́ę́ʼ tʼáá nííkʼejįʼ chʼíbidiʼdootʼish.

6 Háálá Joseph tʼáá aaníí adííniid, kóníigo: diyingo ooʼííníí éí Diyin Bóhólníihii shiDiyin God łaʼ yidínóosééł, éí éiyá shitsʼą́ądoo oochíłígíí bineestʼąʼ yichʼįʼ diyingo ooʼíinii yaa halneʼii tsʼídá yáʼátʼéehii nilį́į dooleeł.

7 Aooʼ Joseph tʼáá aaníí ádííniid: Diyin Bóhólníihii kóshiłníiniʼ: diyingo ooʼíinii tsʼídá yáʼátʼéhii éí nitsʼą́ą́dóó oochíłígíí bineestʼąʼ bitahdóó łaʼ dínéesééł; dóó éí éiyá, nitsʼą́ą́dóó oochíłígíí bineestʼąʼ ayóó bił danilį́į dooleeł. Áádóó bee hazʼáanii łaʼ baa deeshłééł, nitsʼą́ą́dóó oochíłígíí bineestʼąʼ, bikʼis danilínii, bá ndoolnish, dóó éí éiyá tsʼídá bił yáʼadaátʼéeh dooleeł, índa naanishígíí éí danihizází bee bił ahadaʼdinishtʼánée bił béédahodoozįįł.

8 Áádóó bee hazʼáanii bichʼįʼ kódeeshłííł áko doo nááná ła naanish íídoolííł da, tʼáá hazhóʼó naanish baa diníʼánígíí tʼéiyá. Áádóó shíniʼ biyiʼ ayóó átʼáo baa ntséskees dooleeł; háálá shinaanish íídoolííł.

9 Áádóó Moses Ayóóʼátʼéii dooleeł, éí nihá díneesééł nihidííniiniʼ, shidineʼé, yisdéidooʼish biniyé, O Israel bighandóó danohłíinii.

10 Áádóó Moses éí díneesééł, nidineʼé Egypt bikéyah biyiʼdóó chʼíidooʼish.

11 Ákondi diyingo ooʼíinii nitsʼą́ą́dóó oochíłígíí bineestʼąʼ bitahdóó laʼ díneesééł; dóó sheʼádziil baa deeshłéełgo nitsʼą́ą́dóó oochíłígíí bineestʼąʼ bitahjįʼ shizaad doolyééł—dóó Diyin Bóhólníihii ání, doo shizaad tʼéiyá da, ndi shizaad tʼáá íídą́ą́ʼ baa daheesyáhígíí, ałdóʼ déidoodląął.

12 Ákohgo, nitsʼą́ą́dóó oochíłígíí bineestʼąʼ ndaʼíidoozoh; dóó Judah bitsʼą́ą́dóó oochíłígíí bineestʼąʼ ndaʼíidiyóozoh, dóó nitsʼą́ą́dóó oochíłígíí bineestʼąʼ ńdaʼíidiyóozoh, dóó Judah bitsʼą́ą́dóó oochíłígíí bineestʼąʼ ńdeidíyoozohígíí ałdóʼ, éí ałhąąh dínóosééł, naʼnítin dóó tʼáá aanínígíí éí tʼóó ádaátʼé yididooniił dóó saad dahólónígíí niʼ kwíidoolííł, dóó nitsʼą́ą́dóó oochíłígíí bineestʼąʼ kʼé bitah hólǫ́ǫgo íidoolííł, dóó bizhéʼéyę́ę náasdi bideiyiłkáhígíí bił béédahodoozįįł, dóó bił ahadaʼdinishtʼánée ałdóʼ bił béédahodoozįįł, ní Diyin Bóhólníihii.

13 Áádóó doo bídziilyę́ę binahjįʼ bitsxeʼgo ádoolnííł, tʼáá ałtso shidineʼé bitahgóó shinaanish haalwod bijį́įdi, hashtʼeʼánihiʼdilnéeh dooleeł, O Israel bighandóó danohłíinii, ní Diyin Bóhólníihii.

14 Áádóó kótʼáo Joseph náásgóígíí yaa hoolneʼ, kóníigo: Áko shooh, Diyin Bóhólníihii diyingo ooʼíinii yikʼi hojidoodliił; dóó dadiyiilyééł danízinígíí éí ałtso niʼ kwíidoolííł; háálá díí ahaʼdeetʼáanii, Diyin Bóhólníihii bitsʼą́ądóó shóíséłtʼeʼígíí, éí shitsʼąądóó oochíłígíí bineestʼąʼ bitahdóó, ałtso beʼdoolnííł. Áko shooh, tʼáá aaníí éí shił bééhózin díí ahaʼdeetʼánígíí beʼdoolnííł.

15 Áádóó bízhiʼ éí, shízhiʼígíí bee yídóojiił; dóó bizhéʼédóʼ yił aheelyée doo. Áádóó shígi átʼée dooleeł; háálá díí tʼáadoo leʼé, Diyin Bóhólníihii bílaʼ yee neidoołtééł, éí Diyin Bóhólníihii bibee ádziil bee shidineʼé yisdéídoonił.

16 Aooʼ, kótʼáo Joseph náásgóóígíí yaa hoolneʼ: Díí éí tʼáá aaníí beʼdoolnííł nisin, Moses tʼáá aaníí doogááł hodooʼniid; háálá Diyin Bóhólníihii éí áshidííniid, ahoolʼáágóó naʼáłchíní danilį́į́į dooleełígíí baa áháshyąą dooleeł.

17 Áádóó Diyin Bóhólníihii ádííniid: Mosesgi átʼéhígíí éí dínéesééł; áádóó bigish yee bídziilgo ádeeshłííł; dóó shibee hazʼáanii baa deeshłééł dóó nááyidíyóozoh. Ákondi éí doo hazhóʼó yáłtiʼgóó ádeeshłííł, háálá doo ayóó yáłtiʼ da dooleeł, índa doo éí ayóó saad yee yáłtiʼ dago ádeeshłííł. Ndi tʼáá shílaʼ bee, shibee hazʼáanii bá nááhídéesoh; dóó bá yáłtiʼii éí bá ádeeshłííł.

18 Áádóó Diyin Bóhólníihii ałdóʼ áshidííniid: Nitsʼąądóó oochíłígíí bineestʼąʼ łaʼ biyaahwiideeshʼaał; dóó bá yáłtiʼii éí hólǫ́ǫgo ádeeshłííł. Áádóó shí, áko shooh, sheʼádziil bąąh ndeeshłéełii nitsʼąądóó oochíłígíí bineestʼąʼ ńdaʼiidzohyę́ę néidzoh dooleeł biniyé, dóó nitsʼąądóó oochíłígíí bineestʼąʼ yichʼįʼ naʼazogo ádeeshłííł; áádóó nitsʼąądóó oochíłígíí łaʼ yáłtiʼii nilį́į́įgo yaa halneʼ dooleeł.

19 Áádóó saadíí éiyá néidíyóozohígíí éí, shintsékees beełtʼéego saad aláahdi ádaatʼé nízingo náasdi nitsʼąądóó oochíłígíí bineestʼąʼ bichʼįʼ íidoolííł. Áádóó náasdi nitsʼąądóó oochíłígíí bineestʼąʼ łeeyiʼdóó yichʼįʼ cháyiʼ yádaałtiʼ dooleeł; háálá beʼoodląʼ éí shił bééhózin.

20 Áádóó niʼdóó yéego yádaałtiʼ dooleeł; índa bikʼis ádaandaʼookąąh deiłníi dooleeł, azhą bitaʼ tʼóó ahayóí są náʼoogą́ą́ʼ ndi. Áádóó baa hodoolzhish dabizaad doo nanitłʼahgóó bikʼiʼdiitįįhígíí, bikʼehgo áhodoonííł.

21 Bedaʼoodląʼ dahólónígíí biniinaa bizaad náasdi shizééʼdóó bikʼiké éí nitsʼąądóó óchíłígíí bineestʼąʼ deididootsʼį́į́ł; dóó shizaad dayoodlánígíí beʼoodląʼ binahjįʼ ayóó dabídziilgo ádadeeshłííł, binahjįʼ ałkʼidą́ą́ʼ danihizází bił ahadaʼdinishtʼánée yéédadoolnih.

22 Áádóó kʼad áko shooh, shiyeʼ Joseph, díigi átʼáo ałkʼidą́ą́ʼ shizhéʼéyę́ę, Diyin bikʼeh áhodooníłígíí yee shił hoolneʼ.

23 Ákohgo, díí bee ahaʼdeetʼą́ biniinaa nikʼihojidlí; háálá naʼáłchíní danilį́įdooleełígíí doo ndooltsił da, háálá saad naaltsoos biyiʼígíí éí deidoodląął.

24 Áádóó tʼááłáʼí ayóo bídziilgo bitahdóó yidoozįįł, ląʼígo yáʼátʼéehii íidoolííł, bizaad dóó binaanish bee, Diyin God bibee naʼanishí nilį́įgo, tʼáá íiyisíí beʼoodląʼ bídziilgo, naanish doo ájóleʼii íidoolííł, dóó Diyin God binááł Ayóóʼátʼéii íidoolííł, binahjįʼ Israel bighan dooígíí danilíinii, dóó nikʼisóó baʼáłchíní danilį́į dooleełígíí bichʼįʼ, ląʼída tʼáadoo leʼé doo béédahózinée ninéidoodlééł.

25 Áádóó kʼad, nikʼihojidlį́, Joseph. Áko shooh, tʼahdii éí áníłtsʼíísíyeeʼ, ákohgo nikʼis, Nephi bizaad yísíníłtsʼą́ąʼ doo, dóó díí saad ninááł bee haasdzíʼígíí bikʼehgo ná beʼdoolnííł. Nizhéʼé kʼadę́ę náádiilyéhígíí bizaad béénílniih. Amen.