1 Áádóó kʼad, áko shooh, shikʼiské ayóó ánihííníshʼníinii, yah ahóótʼiʼ góneʼ yah ooyáago bikéédóó háʼátʼíí lá ánaadééshdlííł daatsʼí noozį́į́ʼ díí shį́į́ nihijéí biyiʼdi tʼáá íyísii baa ntsísookééz. Ákondi, shooh, haʼátʼíí éí biniyé díí nijéí biyiʼdi baa nitsohkéés?

2 Doóísh béédaałniih da Iiʼ Sizį́ Diyinii nihaílyá dóó bikʼijįʼ Diyin yá ndaalʼaʼí nahalingo saad bee yádaałtiʼ dooleeł nihidííniid neʼ? Dóó kʼad, haash yitʼáo éí Diyin yá ndaalʼaʼí nahalingo saad bee yádaałtiʼ dooleeł tʼáá hazhóʼó Iiʼ Sizį́ Diyinii nihił hólǫ́ǫgo tʼéiyá?

3 Diyin Yá Ndaalʼaʼí Iiʼ Sizį́ Diyinii bibee ádziilii yee yádaałtiʼ; ákohgo, Christ bizaad ndaałkaah. Ákohgo, ánhidishní, Christ bizaad yéego bikʼedaʼdoohtįįh; háálá áko shooh, Christ bizaad éí tʼáá áłtso ádoołiłígíí yee nihił hodoolnih.

4 Ákohgo, kʼad díidí saad bee haasdzííʼ dóó bikʼijįʼ, doo bikʼidaʼdoohtąągóó, éí tʼáá nihí doo ndaʼídółkidgóó biniinaa atʼée doo, dóó doo dáádílkał ńdanoołtsʼin da; ákohgo, adinídíín doo biyiʼ góneʼ yah nihiʼdidoodłóós da, ndi tʼóó chahałheeł biyiʼ ánihidiʼdooldįįł.

5 Háálá áko shooh, anáánhidishní éí yah ahóótʼiʼ góneʼ yah ooyáago, dóó Iiʼ Sizį́ Diyinii nihaílyáago, tʼááałtso ádoołíłígíí éí nihił ííshjání íidoolííł.

6 Áko shooh, díí Christ binaʼnítin atʼé, dóó doo nááná łaʼ binaʼnítin nihaa náádoolyééł da bitsʼíís yee nihichʼįʼ ííshjání iʼdiilyaago índa. Áádóó bitsʼíís yee nihichʼįʼ ííshją́ą́ íʼdiilyaago, yee nihichʼįʼ hadoodzihígíí éí bikʼeh dahodoołʼįįł.

7 Áádóó kʼad shí, Nephi, tʼáá ákódígo bee hadeesdzih, háálá Iiʼ Sizį́ Diyinii éí kʼadí shił ní; dóó tʼóó baa yínííł niizį́į́ háálá nihokááʼ dineʼé éí tsʼídá doo daʼoodlą́ą da, dóó bąąhági átʼéii tʼéiyá yaa naakai, dóó tsʼídá doo bił éédahózin da, dóó bikʼos daniłdzil; íhooʼaah doo hadeinítáa da, dóó agháahgo íhooʼaah doo yikʼidaʼdiitʼįįh da, azhą́ tʼáá ííshjání bichʼįʼ kólyaa ndi, azhą́ saadígíí tʼáá ííshjání ndi.

8 Áádóó kʼad, shikʼiské ayóó ánihííníshʼníinii, tʼahdii nihijéí biyiʼdi ntsídaahkeesgo shił bééhózin; dóó díí bee nihichʼįʼ hadeesdzihígíí éí baa yínííł nisin. Háálá Iiʼ Sizį́ Diyinii yísínółtsʼą́ągo éí diné sodizin choiyoołʼį́įgo yee neinitin, áko sodizin choidííłʼįįłgo nił bééhózin doo; háálá iiʼ sizíinii doo yáʼáshóonii éí diné sodidoolzįįłgo doo yee neinitin da, ndi tʼáadoo sodílziní yił níigo neinitin.

9 Ákondi shooh, ánhidishní tsʼídá áłahjįʼ sodadołzin, dóó doo nihaanidahidookał da; áko Diyin Bóhólníihii tʼáá dooleʼé tsʼídá doo bá ádoołíił da tsʼídá áłtsé Christ bízhiʼ binahjįʼ nihiTaaʼ nilíinii bichʼįʼ sodoołzingo tʼéiyá, áko ádoołíłígíí éí bichʼįʼ yee nihiidoosį́į́ł, áko ádoołíłígíí nihiyiʼ sizíinii bá yáʼátʼéeh dooleeł.