1 Áádóó kʼad shí, Nephi, tʼáá kódíjįʼ Diyin bikʼeh áhodooníłígíí bee nihichʼįʼ haasdziih, shikʼiské ayóí ánihííníshʼnínii. Dóó tʼáá aaníí ádahodooníłígíí, doo ląʼí náházoh da; dóó shikʼis Jacob bizaad ałdóʼ doo ląʼí náházoh da.

2 Ákohgo, saad nahazohígíí éi shił tʼáá bíighah, tʼáá hazhóʼó Christ binaʼnitin tʼéiyá áłtsʼíísíhgo baa hadeeszih nisin; ákohgo, tʼáá bééhózínigo nihichʼįʼ hadeesdzih, tʼáá bééhózínigo Diyin bikʼeh áhodoonííł shił ííshją́ą́ʼ éʼélyaa yę́ę bikʼehgo.

3 Háálá shiiʼ sizíinii tʼáá bééhózínígo ádaʼalínígíí yaa bił hózhǫ́; háálá díigi átʼéego Bóhólníihii Diyin God nihokááʼ dineʼé baʼáłchíní yitahgóó naalnish. Háálá Bóhólníihii Diyin God beʼadinídíínii aa yiilé binahjįʼ akʼiʼdiitįįh; háálá nihokááʼ dineʼé akʼidadiʼdootį́į́ł biniyé, tʼáá bí bizaad yee yichʼįʼ yáłtiʼ.

4 Ákohgo, díí éí béénílnih doo éí Diyin Bóhólníihii Diyin yá yáłtiʼii shíł ííshją́ní áyílaayę́ę bee nichʼįʼ haasdzííʼ, éí Diyin God biDibé Yázhí tó yeiyidoosį́į́ł, éí nahasdzáán bibąąhági ádaatʼéii yá yooʼiidiyooʼááł.

5 Áádóó kʼad, Diyin God biDibé Yázhí, diyingo, tó bee bidiʼdoolzį́į́ł, diyinkʼehgo oodaał bee hazʼą́ yeʼdoolííł, O áko, nihíshąʼ, doo dahodíníílzinígíí, haitʼáo aláahgo tó bee alzį́į́h nihá siláa doo, aooʼ, tó bee ndi!

6 Áádóó kʼad, nánihídíshkid, shikʼiské ayóó ánihííníshʼnínii, haitʼáó éí Diyin God biDibé Yázhí tʼáá ałtso diyinkʼehgo oodááł bee hazʼánígíí yeʼiilaago tó bee bidiʼdoolzį́į́ł?

7 Dooísh nihił bééhózin da éí diyinígíí? Azhą́ shį́į́ hodísin ndi, nihokááʼ dineʼé baʼáłchíní yił ííshją́ą́ íʼdiilyaa, atsʼíseekʼehgo nihiTaaʼ nilíinii yichʼįʼ hojoobaʼgo íʼdiilyaa, dóó nihiTaaʼ nilíinii bibee hazʼáanii yikʼeh hółʼį́į dooleeł biniyé kótʼáo yichʼįʼ ííshją́ą́ íʼdiilyaa.

8 Ákohgo, tó bee biʼdoolzį́į́ʼ dóó bikʼijįʼ Iiʼ Sizį́ Diyinii hasbídí nahalingo bikʼih hooleʼ.

9 Áádóó nááná, éí nihokááʼ dineʼé baʼáłchíní bił ííshją́ą́ ályaa díí kʼéházdon atiinígíí, dóó áłtsʼóózígo yah ahóótʼiʼígíí, éí yinahjįʼ yah ahidookah, háálá tʼáá bí áłtsé hanááł ákóʼiilaa.

10 Áádóó nihokááʼ dineʼé baʼáłchíní kóyidííniid: shikééʼ deínóhkááh. Ákohgo, shikʼiské ayóí ánihííníshʼnínii, haash yitʼáo Jesus bikééʼ yiikah dooleeł, tʼáá hazhóʼó nihiTaaʼ nilíinii bibee hazʼáanii bikʼeh dahoniilʼį́įgo tʼéiyá?

11 Áádóó nihiTaaʼ nilíinii aní: Ádaańdaʼoohkąąh, ádaańdaʼoohkąąh, dóó shiYeʼ Ayóí ííníshʼníinii bízhiʼ binahjįʼ tó bee danihidiʼdoolzį́į́ł.

12 Áádóó ałdóʼ, Diyin biYeʼ biinééʼ disétsʼą́ąʼgo, ání: Háíshį́į́ shízhiʼ yinahjįʼ tó bee biʼdoolzį́ʼígíí, éí nihiTaaʼ nilíinii Iiʼ Sizį́ Diyinii yeidoolééł, shí sheiníláhígiʼ átʼáo; ákohgo, shikééʼ deínóhkááh, dóó nihinááł íishłaaígíí bikʼehgo ádaʼołʼį́.

13 Ákohgo, shikʼiské ayóó ánihíinishníini, tʼáá aaníí shił bééhózin Diyin biYeʼ bikééʼ wohááłgo, nihijéí bitłʼááhdę́ę́ bee ánóhtʼéegóó, Diyin God bidááhdóó naʼadloʼ dóó yoochʼííd tʼáágééd, ndi tʼáá aaníí ádadóhníigo, nihibąąhági ádaatʼéii baa ádaańdaʼoohkąąh, nihiTaaʼ nilíinii binááł Christ bízhiʼ ákʼidideeshtʼááł nohsingo, tó bee alzį́į́h binahjįʼ—aooʼ, bizaad ánínígíí bikʼehgo, nihiDiyin Bóhólníihii dóó nihiYisdáʼiiníiłii tó bee alzį́į́h góyaa bikééʼ adadohááł, áádóó índa, Iiʼ Sizį́ Diyinii nihaa doolyééł; aooʼ, áko índa kǫʼ dóó Iiʼ Sizį́ Diyinii bee nihiʼdiʼdoolzį́į́ł; dóó índa diyin yá ndaalʼaʼí nahalingo saad bee yáłtiʼ doo, áádóó Israel biDiyin Ayóóʼátʼéii baa dahohniihgo yéego bikáh adadooníi doo.

14 Ákondi, shooh, shikʼiské ayóó ánihíinishníini, ákó Diyin biYeʼ biinééʼ shichʼįʼ haadzíiʼgo, kóní: Nibąąhági ádaatʼéii baa náiisíníkango, áádóó nihiTaaʼ nilíinii binááł bibee hazʼáanii bikʼeh honishʼį́į́ dooleeł díníniidgo; tó bee niʼdoolzį́į́ʼgo, dóó kǫʼ dóó Iiʼ Sizį́ Diyinii bee niʼdiʼdoolzį́į́ʼgo, dóó nááná łaʼ saad ániidígíí bee yáníłtiʼgo, aooʼ, índa Diyin yá ndaalʼaʼí nahalingo saad bee yáníłtiʼ doo, dóó díí bikééʼdę́ę́ʼ shitsʼą́ą́jí sínílį́įgo, tʼáadoo shééhosinísįįdjígo tʼéiyá ná yáʼatʼéeh dooleeł ńtʼę́ę́ʼ.

15 Áádóó nihiTaaʼ nilíinii biinééʼ disétsʼą́ą́ʼ, kóníigo, Ayóó iinishʼíi bizaad tʼááʼaanii dóó baʼódlíhígíí atʼé. Tʼáá háida nihoníyáajįʼ bee daʼiináanii yee bidziilgo, éí yisdáńdoodááł.

16 Áádóó kʼad, shikʼiské ayóó ánihíinishníini, díí éí shił bééhózin diné nihoníyáajįʼ bee daʼiináanii yee bidziilgo, Diyin God hináanii biYeʼ yee sizínígíí yikééʼ yigáałgo tʼéiyá, yisdáńdoodááł.

17 Ákohgo, tʼáadoo leʼé bee nihił hweeshneʼę́ę ádoałééh éí nihiDiyin Bóhólníihii dóó niháNináʼnídláii íídoołíłgo yiiłtsą́; háálá, díí biniyé shił ííshją́ą́ ádaalyaa, áko yah adoohááł góneʼ nihił béédahodoozįįł. Háálá bee yah ahóótʼiʼígíí éiyá ádaanáʼoohkąąh dóó tó bee alzį́į́h, dóó índa kǫʼ dóó Iiʼ Sizį́ Diyinii bee nihibąąhági ádaatʼéii nahjįʼ kódoolnííł.

18 Áádóó áko áłtsʼóózígo yah ahóótʼiʼ dóó áłtsʼóózígo honítʼiʼ bikááʼ yínááł éí éiyá hoolʼáágóó iiná bichʼįʼ ahóótʼiʼ; aooʼ, dáńdítį́į́hgi yah ííniyá; nihiTaaʼ nilíinii dóó biYeʼ bibee hazʼáanii beʼiinlaa; dóó Iiʼ Sizį́ Diyinii éí neyílyá, éí éiyá nihiTaaʼ nilíinii dóó biYeʼ yaa halneʼ, díí ahaʼdeetʼánígíí biʼhódoołnííłgo áyílaa, ákoneʼ ahóótʼiʼ yah ííniyáago éí naadoolyééł.

19 Áádóó kʼad, shikʼis ayóó óoshníi, nanihídíshkid, díí áłtsʼóózígo yah ahóótʼiʼ dóó áłtsʼóózígo honítʼiʼ bikááʼ dahdiníyáago, daʼ tʼáá ałtsoóísh beʼóohłaa? Áko shooh, ándishníigo éí, Ndagaʼ; háálá doo éí kónízáhájįʼ ninooyáa da tʼáá hazhóʼó Christ bizaad bee nihidziilgo deinohdlą́ągo tʼéiyá, dóó éí bidziilgo yisdáʼiiníiłii tʼáá ałtso yee ajoobaʼ baʼjoolíi doo.

20 Ákohgo, Christ yéego adaahtʼį́įgo deinohdlą́, haʼahóní bee ádaanohtʼéego, Diyin God dóó nihokááʼ dineʼé tʼáá ałtso ayóó ádeiínóhníigo, náás deínóhkááh. Ákohgo, náás deínółzííł, Christ bizaad ádiihdahonííł, dóó nihoníyáajįʼ haʼólnínígíí, Áko shooh, éí nihiTaaʼ nilíinii kóní: Hoolʼáágóó iiná nihí dooleeł.

21 Áádóó kʼad, áko shooh, shikʼiské ayóó ánihíinishníinii, díí bikʼehgo oodaał; áádóó náánáłahgo éí doo yah ahóótʼiʼ da índa doo éí náánáłaʼ ázhiʼ yáʼąąsh biyaagi Diyin God bił hazʼą́ądi nihokááʼ diné yee yisdánídoodááł da. Dóó kʼad, áko shooh, díí éí Christ binaʼnitin átʼé, áko tʼáá díí tʼéiyá tʼáá aaníí nihiTaaʼ nilíinii, dóó biYeʼ, dóó Iiʼ Sizį́ Diyinii binaʼnitin átʼé, éí tʼááłáʼí Diyin danilį́, éí doo bee nohonítʼiʼ da. Amen.