1 Áádóó kʼad áko shooh, shikʼiské ayóó ánhooshníinii, nihichʼįʼ hadeesdzih; háálá shí, Nephi, tʼáá káhii laʼ kwíídínóósįįł Gentile dineʼé biláahdi diyinkʼehgo yishááł. Háála áko shooh, Diyin God bibee hazʼáanii dadíínóhsingo tʼéiyá doo ánhiʼdiʼdooldįįł da; dóó saad bee haʼoodzíʼígíí biniinaa tʼáadoo Gentile dineʼé tʼáá átʼé ábiʼdisdįįd danohsiní.

2 Háálá áko shooh, kónhidishní tʼáá ląʼída Gentile dineʼé ádaańdaʼooskanígíí éiyá Diyin Bóhólníihii yił ahadaʼdeestʼáanii danilį́į́ dooleeł; dóó tʼáá ląʼída Jew dineʼé tʼáadoo beʼiiná łahgo ándayidlaago éí nahjįʼ kóbiʼdiʼdoolnííł; háálá Diyin Bóhólníihii doo łaʼ yił ahaʼdeetą́ą da tʼáá hazhóʼó beʼiiná łahgo ándayidlaago dóó Diyin biYeʼ dayoosdląągo tʼéiyá, háálá éí Israel biDiyin Ayóóʼátʼéii nilį́.

3 Áádóó kʼad, nááná łaʼ Diyin bikʼeh áhodoonííłgo Jew dineʼé dóó Gentile dineʼé bidadeetʼiʼígíí bee nihił hashneʼ. Háálá naaltsoos baa haasdzíʼę́ę haatʼą́ą́dóó bikʼijįʼ, Gentile dineʼé díí naháasdzóh bichʼįʼ kódoolnííł, dóó Diyin Bóhólníihii bichʼįʼ bidándiʼdooljah, tʼóó ahayóí éiyá saad náhaasdzoh yę́ę deidoodląął; dóó nihílástsiiʼ chʼéézííhígíí yaa deidootʼááł.

4 Áádóó áádóó nihílástsiiʼ chʼéékaiígíí nihaa éédahodoosįįł, haitʼáo Jerusalem biiʼdę́ę́ʼ chʼíniikai, dóó Jew dineʼé eíí yitsʼąądóó dahazlį́į́ʼ.

5 Áádóó Jesus Christ binahatʼá bee yisdáʼiildéehii bitahgóó bee naʼnitin dooleeł; ákohgo, dabizhéʼéyę́ę yíndahídoołʼááł áádóó Jesus Christ ałdóʼ yaa yíndahídoołʼááł, háálá éí biteʼázíní bitah dahólǫ́ǫ ńtʼę́ę́ʼ.

6 Áádóó índa bił dahódoozhǫǫł; háálá Diyin God bílákʼeedóó éí bee bikʼidahojisdliʼígíí bił béédahodoozįįł; dóó binákʼee bee chahałhééłyę́ę nahjįʼ kódoonííł; dóó doo laʼí bitah są́ naʼoogą́ą́h da doo, tʼáá hazhóʼó dineʼé niłtólʼí dóó bá adahwiinítʼį́į́ doo.

7 Áádóó baa hodoolzhish Jew dineʼé daʼníłtsʼą́ąjigo áłtsʼádaneeskadígíí éí ałdóʼ Christ deiyoodlą́ągo hahodoolzhish; dóó ałdóʼ dóó kéyah yikááʼgi ahínáhidookah; dóó tʼóó ahayóí Christ dayoodláagóóéí ałdóʼ diné bá adahwiinítʼį́ dadooleeł.

8 Áádóó baa hodoolzhish Bóhólníihii Diyin God tʼáá áłtso áłʼąą dineʼé, kʼé deiłníinii, dabizaadkʼehjí, dóó diné bitahgóó binaanish heidoołwoł, nahasdzáán bikááʼgóó bidineʼé bee háádidoolnííł biniyé.

9 Áádóó Bóhólníihii Diyin God diyin yikʼehgo ííná yinaahjíʼ baa dahoojoobáígíí yá nahodooʼááł, áádóó nahasdzáán bikááʼgóó Diyinkʼehgo dahiinánígíí aheełtʼéego yá hadoodzih; tsihał nahalingo bizééʼdę́ę́ʼ hóyéeʼgo nahasdzáán atʼíídoolííł, áádóó biyol yee ałdóʼ bąąhági ádaatʼínígíí íidoołdįįł.

10 Háálá tsxį́į́łgo bikʼí hodoolzhish Bóhólníihii Diyin God ayóó átʼáo diné ałtsʼéídoonił, dóó bąąhági ádaatʼínígíí neidoołtsxił; dóó bidineʼé yisdeidoonił, aooʼ, azhą́ ákótʼée ndi bąąhági ádaatʼínígíí kǫʼ yee íidooldįįł.

11 Áádóó diyinkʼehgo oodááł yee hadítʼée doo, áádóó oodląʼ baʼahódlíigo yee neilǫʼ doo.

12 Áádóó maʼiitsoh ałdóʼ dibé yázhí yił kééhatʼį́į doo, áádóó náshdóítsoh łikizhii tłʼízí yázhí yighah sitʼį́į doo, índa béégashii yáázh, dóó náshdóítsoh bitsiijįʼ ditłʼooígíí biyázhí dóó alį́į́ʼ neeskʼahii yił shijééʼ doo, áádóó áłchíní booʼish doo.

13 Áádóó béégashii áádóó shash tʼááłáhígi ałchozh doo; áádóó dabiyázhí tʼááłáhígi naazhjééʼ doo; índa náshdóítsoh bitsiijįʼ ditłʼooígíí éí béégashii nahalingo ałchozh doo.

14 Áádóó awééʼ tʼahdii ałtʼoʼígíí éí tłʼiish baházidii beʼáʼáangi naanée doo, índa awééʼ iʼdíítʼóódígíí éí naʼashǫʼii baházidii beʼáʼáan yikʼi déesniiʼ doo.

15 Tʼáá átʼéé ńtʼę́ę́ʼ shidził dahodiyingóó doo atídaʼahidilʼį́į da doo dóó doo nidaʼahiiltseed da doo, nahasdzáán bikááʼgóó Diyin Bóhólníihii bééhoʼdílzin doo, tónteel tó bił diilkǫʼ nahalinígiʼ átʼáó.

16 Ákohgo, áłʼąą dineʼé tʼáá ałtso binichxǫʼí béédahodoozįįł; aooʼ, nihokááʼ dineʼé baʼáłchíní tʼáá áłtsoní bił béédahodoozįįł.

17 Doo nanilʼiní da háálá tʼáá ałtso béédahodoozįįł; chahałheełjí doo óʼoolʼįįł da háálá adindíin biyiʼjįʼ ííshją́ą́ ádadoolnííł; nihokááʼgi doo bidáʼastłʼóní da háálá tʼáá ałtsoní kʼídaastʼah.

18 Ákohgo, tʼáá ałtsoní nihokááʼ dineʼé baʼáłchíní bił ííshją́ą́ ádaalyaayę́ę éí nihoniyáadi bił ííshjání ándadoolnííł; dóó Chʼį́įdii nihokááʼ dineʼé baʼáłchíní bijéí yee bikʼi bidziilyę́ę ádoodįįł, bił hoolzhish doo. Dóó kʼad, shikʼiské ayóó ánhooshníinii, díí kójįʼ shizaad ałtso bee ádííniid doo.