1 Áádóó kʼad, Jacob, nichʼįʼ yáshtiʼ: diné doo kééhatʼínígi tiʼhooshníihgo yoołkááłdą́ą́ʼ áłtsé niʼdizhchį́. Áádóó áko shooh, áłchíní nílį́įgo ląʼí da tiʼhooʼnííh dóó yínííł biyiʼ nisíníyá, nikʼiské bá ńdahachįįhgo biniinaa.

2 Ákótʼée ndi, Jacob, diné doo kééhatʼínígi áłtsé niʼdizhchį́į, Diyin God beʼayóó átʼéii nił bééhózin; dóó tiʼhwiisíníniiʼígíí nikáʼadoolwołgo ná bee yidoolzį́į́ł.

3 Ákohgo, niyiʼ sizíinii bikʼihojídoodlííł, dóó nikʼis, Nephi, tʼáadoo átʼéhígóó bił nighan doo; dóó niDiyin God bá nanilnishgo ándoołkááł. Éí bąą, ná Nináʼnídláii tʼáá ákogi átʼéii biniinaa, yisdáandoodlóosgo shił bééhózin; háálá nahasdzáán yikááʼ níyáadi nihokááʼ dineʼé bee yisdáʼiildéehii éí dooleełgo yiniłtsą́.

4 Áádóó tʼahdii tsíłkéí nílį́įgo beʼayóóʼ átʼéii yiniłtsą́; ákohgo, bitsʼíís hólǫ́ǫgo diné neidínóotįįłígi átʼáo ni ałdóʼ nikʼihozhdoodliił; háálá Iiʼ Sizį́ Diyinii, adą́ą́dą́ą́ʼ, díí jį́, dóó ahoolʼáágóó tʼáá átʼéhę́ęgi átʼé. Áádóó Adam asihígíí binahjįʼ diné asihdę́ę́ʼ bá hashtʼenáhoolyaa, dóó yisdáʼiildééh tʼáá nííkʼeh hazlį́į́ʼ.

5 Áádóó diné yáʼátʼéehii dóó doo yáʼáshóonii bił béédahózin bíighahgo ndabidiʼneestą́ą́ʼ. Áádóó diné bee hazʼáanii beiyílyá. Áádóó asiihígíí bee hazʼáanii doo tʼóó baa didootʼáał da; éí doodago, bee hazʼáanii diné bichʼįʼ dáʼdílkał. Aooʼ, nahasdzáán bibee hazʼáanii bikʼehgo éí Diyin God bichʼįʼ dáʼdeelkaal; dóó ałdóʼ, iiʼ sizíinii bibee hazʼáaniikʼehgo yáʼátʼéehii bitah ádajídin, dóó ahoolʼáágóó bichʼįʼ nidahwiiʼnáa doo.

6 Ákohgo, nináʼílyáhígíí éí Ayóó átʼéii Messiah bibeʼadziil dóó biníkááh góneʼ hazlį́į́ʼ; háálá bí éiyá, ajoobaʼ dóó tʼáá aaníinii biyiʼ hadeezbin.

7 Áko shooh, bí éiyá nináʼádeetʼąągo bąąhági átʼéii yá tiʼhoozniiʼ, bee hazʼáanii biniyéhígíí yíighahgo nináʼnídlá, tʼáá ałtso bijéí dóó biiʼ sizʼíinii yínííł nilínígíí bá; dóó doo náánáłaʼ díí bee hazʼáanii bíighahgo nináʼídláhá da.

8 Ákohgo, díí tsʼídá íiyisíí aláahdi nihokááʼ dineʼé bee bił hodoonihígíí átʼé, háálá bił bééhodoozįįł tsʼídá tʼáá háiida Diyin God bił hazʼą́ą́ góneʼ doo yah adoogáał da, tʼáá hazhóʼó Ayóó Átʼéii Messiah biyáʼátʼéehii, dóó beʼajoobaʼ, dóó bidiyingo joobaʼ binahjįʼ tʼéiyá, bí éí beʼiinaʼ atsʼíískʼehgo niʼ níínílá, dóó Iiʼ Sizį́ Diyinii bibeeʼadziil binahjįʼ nínéidiidlá, háálá daneeznánígíí náádahiidooʼnaałgo íidoolííł, bí áłtsé náádidoodáałgo.

9 Ákohgo, Diyin God yichʼįʼ áłtsé neestʼąʼ nilį́, háálá bí éiyá nihokááʼ dineʼé baʼáłchíní tʼáá ałtso yá náʼookąąhii nilį́į dooleeł; dóó tʼáá háiida oosdląądígíí éí, yisdádoogááł.

10 Áádóó nihokááʼ dineʼé tʼáá ałtso yá náʼookąąhígíí biniinaa, nihokááʼ dineʼé tʼáá ałtso Diyin God yidááhdóó nínáhidookah; ákohgo, yidááhdóó naazį́įgo, tʼáá aaníinii dóó diyingo hałtʼéí biyiʼ hólǫ́nígíí binahjįʼ yá nahodiyooʼááł. Ákohgo, bee hazʼáanii bikʼehgo ánihwiitʼaahii Diyin Ayóó átʼéii niinílá, háiida bee hazʼáanii kʼíinítiʼgo éí yikʼee tiʼhwiidoonih, éí tiʼhooʼníhígíí ił hózhóonii bitsʼą́ąjígo ályaa, bąąhági átʼéii bikʼé nináʼílyáhígíí éí díí bee hazʼáanii yikʼehgo naalnish.

11 Háálá tsʼídá tʼáá ákótʼée doo, tʼáá ałtsoní bitsʼą́ąjígíí dahólǫ́. Díí doo ákótʼéégóó, diné doo kééhatʼínígi áłtsé shá yizhchíinii, Dinékʼehgo oodááł doo ńdidoolyéeł da, índa, bąąhá ádaátʼéii, dóó hodiyinii, dóó tiʼhooʼnííh, índa yáʼátʼéehii dóó doo yáʼáshóonii. Ákohgo, tʼáá ałtso tʼááłáʼígo ádoolnííł; ákohgo, tʼááłáʼígo éí doo hináa da dooleeł ńtʼę́ę́ʼ; iiná dóó anoonééł bąąh ádin dooleeł ńtʼę́ę́ʼ, índa doołdził dóó doo doołdziłgóó bąąh ádin dooleeł, dóó ił hózhǫ́ dóó tiʼhooʼnííh, índa ééhózinii dóó doo ééhózinii ałdóʼ bąąh ádin dooleeł ńtʼę́ę́ʼ.

12 Ákohgo, tʼáadoo biniyéhígo ályaa doo ńtʼę́ę́ʼ; éí bąą ályaaí éí tsʼídá tʼáadoo biniyéhé da dooleeł ńtʼę́ę́ʼ. Ákohgo, díí éí Diyin God bibee ééhózinii dóó biʼahoolʼá biniyéii tʼáadoo biniyéhé da doo ńtʼę́ę́ʼ, dóó ałdóʼ bibee adziil, dóó biʼaa aʼááh hasin, dóó Diyin God bibee ánihwiitʼaahii biniyéhé.

13 Áádóó bee hazʼáanii ádin doohniidgo, éií bąąhági átʼéii ałdóʼ ádin didoohniił. Bąąhági átʼéii ádin doohniidgo, Diyinkʼehgo oodááł ałdóʼ ádin didoohniił. Áádóó yáʼátʼééh ádingo éí bee ił hózhóonii ałdóʼ ádin dooleeł. Áádóó yáʼátʼéehii índa bee ił hózhóonii ádingo éí achʼįʼ nahwiiʼná índa tiʼhooʼnííh ałdóʼ ádin dooleeł. Dóó díí ádaadingo éí Diyin God ałdóʼ ádin. Dóó Diyin God doo hólǫ́ǫ́góó nihí ałdóʼ doo honiidlǫ́ǫ da, éí doodago nahasdzáán ałdóʼ doo hólǫ́ǫ da; háálá tʼáadoo leʼé tʼáadoo ádaalyaa da doo ńtʼę́ę́ʼ, tʼáadoo leʼé nayiiłnáa dooleełígíí; éí doodago nabiʼdilnáa dooleełígíí ádin doo ńtʼę́ę́ʼ; ákohgo, tʼáadoo leʼé tʼáá ałtso ásdįįd dooleeł ńtʼę́ę́ʼ.

14 Áádóó kʼad, shiyeʼké, díí bitsʼą́ą́dóó ndiʼdoohłééł dóó bikʼidadiʼdootį́į́ł biniyé nihił hashneʼ; háálá Diyin God éí hólǫ́, dóó tʼáá ałtsoní áyiilaa, yáʼąąsh dóó nahasdzáán tʼáá áłah, dóó tʼáá ałtso biyiʼ hólǫ́nígíí, tʼáadoo leʼé naʼiiłnáanii dóó tʼáadoo leʼé nahaʼnáanii.

15 Áádóó ahoolʼáágóó bí biniyéii bílaʼáshdlaʼii niilyáhígii ádoolnííł, áłtsé nihizhéʼé dóó nihimá áyiilaago, índa naaldlooshii daʼałchiní dóó hódah ndaatʼaʼí, dóó tʼáá ałtsoní ályaaígíí, biniinaa ałtsʼąąhjígíí hólǫ́; tsin bineestʼąʼ doo doodį́įłii índa tsin bee iináanii bineestʼąʼ ałdóʼ ałtsʼąąhjí nilíní; łaʼ éí łikan dóó łaʼ éí díchʼííʼ.

16 Ákohgo, Bóhólníihii Diyin God diné tʼáá bí íinízingo éʼéłʼį́įgo áyiilaa. Éí bąą, diné tʼáá bí bíhólníihgo éʼéłʼį́į dooleełgo éí doo bohónéedzą́ą da tʼáá hazhóʼó ałtsʼą́ąjįʼ átʼéhígíí łaʼ yídánoolníigo tʼéiyá nahaʼná.

17 Áádóó shí, Lehi, yííłtaʼígíí binahjįʼ, íínísingo éí, naʼíisdzooígíí bikʼehgo, Diyin God yá naalʼaʼí łaʼ yáʼąąshdę́ę́ʼ adáátłizhgo; ákohgo, éí biʼiiníziinii silį́į́ʼ, dóó Diyin God bidááhdóó doo yáʼáshóonii yíká átʼį́į́go hahoolzhiizh.

18 Áádóó yáʼąąshdę́ę́ʼ adáátłizhígíí biniinaa, ahoolʼáágóó tiʼhooʼnííh silį́į́ʼ, dóó tʼáá ałtso nihokááʼ dineʼé ałdóʼ tiʼdahojoonííh dooleeł nízin. Ákohgo, éí tłʼiish sání, biʼiiníziinii nilį́, tʼáá ałtso naʼadloʼ yizhéʼé nilíinii, ákohgo, éí Eve kóyidííniid: Tsin bineestʼąʼ doo doodį́įł da haʼnínée niyą́, háálá doo dadíítsxaał da, háálá Diyin God biníłtʼée doo, yáʼátʼéehii dóó doo yáʼádaatʼéhígíí nił bééhózin dooleeł.

19 Áádóó Adam dóó Eve tsin bineestʼąʼ doo doodį́įłii yiyííyą́ąʼgo índa dáʼákʼeh Edendóó chʼíbidiʼneelchą́ą́ʼ, nihokááʼ bikáaʼgi kʼééʼdídlééh dooleeł biniyé.

20 Áádóó baʼáłchíní hodeezlį́į́ʼ; aooʼ, tʼáá ałtso nahasdzáán bikáaʼgi hooghan nahazʼánígíí bitsʼą́ą́dóó hazlį́į́ʼ ndi.

21 Áádóó Diyin God íinízinígíí binahjįʼ, nihokááʼ dineʼé baʼáłchíní tʼáá nízaagóó dahináago áyiilaa, áko tʼáá nahasdzáán bikáaʼgi dahináago ádaa ńdaʼdookąął; ákohgo, ndabidiʼnitaahgo bił hooʼaʼ dóó beʼiinaʼígíí nízaagóó dinaʼgo ályaa, háálá Bóhólníihii Diyin God nihokááʼ dineʼé baʼáłchíní bee hazʼáanii yeiníláhígíí yikʼeh dahółʼį́į́ dooleeł biniyé tʼáá ałtso nihokááʼ dineʼé ádaa ńdaʼdookąął biniyé yichʼįʼ haadzííʼ; háálá tʼáá ałtso nihokááʼ dineʼé yóóʼ aheeskaiígíí yił ííshją́ą́ áyiilaa, tsʼídá áłtsé bishchíinii asiihígíí biniinaa,

22 Áádóó kʼad, áko shooh, Adam doo asiihgóó doo bąąhági átʼéii yiih yítłizh da doo ńtʼę́ę́ʼ, ndi dáʼákʼeh Edendi tʼahdii naagháa doo ńtʼę́ę́ʼ. Áádóó tʼáadoo leʼé ádaalyaahą́ą, tʼáá ádaalyaahą́ągi ádaatʼée doo ńtʼę́ę́ʼ; dóó ahoolʼáágóó, doo ninítʼiʼ da doo ńtʼę́ę́ʼ.

23 Áádóó baʼáłchíní ádin doo ńtʼę́ę́ʼ; ákohgo doo asiihgo bił hazʼą́ą doo ńtʼę́ę́ʼ, ił hózhǫ́ bee ádin, háálá tiʼhooʼnííh doo bił bééhózin da, dóó yáʼátʼéhii doo ííłʼį́į da ńtʼę́ę́ʼ, háálá bąąhági átʼéii doo bił bééhózin da.

24 Ákondi shooh, tʼáá ałtso bił bééhózinii beʼééhózinii binahjįʼ tʼáá ałtsoní ádaalyaa.

25 Adam asiihgo oochííł dóó anoonééł hazlį́į́ʼ; dóó diné daatsʼí bił dahodoozhǫǫł.

26 Áádóó Messiah doochíiłjįʼ ayííłką́ągo doogááł, áko nihokááʼ dineʼé baʼáłchíní asdzihígíí bitsʼą́ą́dóó yisdánéídooʼnił. Áádóó adáátłizh yá yikʼé nináʼídláago biniinaa ahoolʼáágóó tʼáá bí bídahólníihgo deiíkááh daazlį́į́ʼ, yáʼátʼéehii dóó doo yáʼáshóonii bił béédahózin dóó tʼáá bí bídahólnííh dóó tʼáadoo kojígo yinááł dabiʼdíʼníní, tʼáá hazhóʼó nihoníyáadi, bee hazʼáanii bikʼehgo tʼéiyá hanááhodootʼááł, Diyin God bibee hazʼáanii niyiizláii bikʼehgo.

27 Ákohgo, diné éí tsʼísee kʼehgo tʼáá bí íinízingo éʼéłʼį́; dóó tʼáá ałtsoní diné yee átʼéhígíí bąąh niilyá. Áádóó tʼáá bí bídahólnííhgóó tʼáá nííkʼeh naʼadáh dóó hoolʼáágóó iiná néiididoolééł, diné tʼáá ałtso yá Ataʼsizíinii Ayóó Átʼéii éí binahjįʼ, éí doodago ąąh astį́ dóó anoonééł néiididoolééł, biʼiiníziinii bibee adziil dóó yee hótąʼ dooleełígíí bikʼehgo; háálá bí átʼéhígi átʼáo nihokááʼ dineʼé tʼáá ałtso bichʼįʼ nidahwiiʼnáa dooleeł nízin.

28 Áádóó kʼad, shiyeʼké, Ataʼsizíinii Ayóó Átʼéii bichʼįʼ dadínóhʼį́į́ʼ doo nisin, dóó bibee hazʼáanii ayóó ádaatʼéii bikʼeh dahonołʼį́; dóó bizaad deinohdlą́, dóó hoolʼáágóó iiná deidoołtsół, Diyin biʼIiʼ Sizį́ Diyinii íinízinígíí bikʼehgo;

29 Áádóó ahoolʼáágóó anoonééł woołtsóód lágo, atsʼíís iinízin dóó doo yáʼáshóonii biiʼ hólǫ́nígíí bikʼehgo, chʼį́įdii biʼiiníziinii éiyá yinahjįʼ bidziilgo hótąʼ yileeh, chʼį́įdiitahgóó yah hodoolóós, háálá tʼáá bí bił hazʼą́ądi nihinaatʼáanii nilį́į dooleeł.

30 Tʼáá ánółtso díí áłchʼį́į́dígo saad bee nihichʼįʼ haasdzííʼ, shiyeʼké, nahasdzáán bikáaʼgi nashiʼdinitaahą́ą́ kʼadę́ę ałtso iiłkáahgo; dóó yáʼátʼéehii ńdiilá, Diyin yá yáłtiʼii bizaad bikʼehgo. Áádóó doo łaʼ biniyé áshtʼį́į da tʼáá hazhóʼó nihiiʼ naazíinii yáʼátʼéehgo hoolʼáágóó bił hazʼą́ą dooleełígíí tʼéiyá. Amen.