1 Áádóó kʼad, Jacob, nichʼįʼ yáshtiʼ: diné doo kééhatʼįnígi tiʼhooshníihgo yoołkááłdą́ą́ʼ áłtsé ńdizhchį́. Áádóó áko shooh, áłchíní nílį́įgo ląʼída tiʼhooʼnííh dóó yínííł biyiʼ nisíníyá, nikʼiské bá ńdahachįįhgo biniinaa.

2 Ákótʼée ndi, Jacob, diné doo kééhatʼínígi áłtsé niʼdizhchį́į, Diyin God beʼayóóʼátʼéii nił bééhózin; dóó tiʼhwiisíníniiʼígíí nikáʼadoolwołgo ná bee yidoolzį́į́ł.

3 Ákohgo, niyi sizíinii bikʼihojídoodlííł, dóó nikʼis, Nephi, tʼáadoo átʼéhígóó bił nighan doo; dóó niDiyin God bá nanilnishgo ándoołkááł. Éí bąą, ná Nináʼnídláii tʼáá ákogi átʼéii biniinaa, yisdáandoodlóosgo shił bééhózin; háálá nahasdzáán yikááʼ níyáadi nihokááʼ dineʼé bee yisdáʼiildéehii éí dooleełgo yiniłtsą.

4 Áádóó tʼahdii tsíłkéí nílį́įgo beʼayóóʼ átʼéii yiniłtsą; ákohgo, bitsʼíís hólǫ́ǫgo diné neineez-tąʼígi átʼáo ni ałdóʼ nikʼihozhdoodliił; háálá Iiʼ Sizį́ Diyinii, adąądą́ą́ʼ, dííjį́, dóó ahoolʼáágóó tʼáá átʼéhę́ęgi átʼé. Áádóó Adam asihígíí binahjįʼ diné ashihdééʼ bá hashteʼnáhoolyaa, dóó yisdááʼiildééh tʼáá nííkʼe hazlį́į́ʼ.

5 Áádóó diné yáʼátʼéehii dóó doo yáʼáshónii bił béédahózin bíighahgo ndabidiʼneestą́ą́ʼ. Áádóó diné bee hazʼáanii beilyá. Áádóó asiihígíí doo bee hazʼáanii tʼóó baadidootʼááł da; éí doodago, bee hazʼáanii diné bichʼįʼ dáʼdiłkał. Aooʼ, nahasdzáán bibee hazʼáanii bikʼehgo éí Diyin God bichʼįʼ dáʼdeelkaal; dóó ałdóʼ, iiʼ sizíinii bibee hazʼáaniikʼehgo yáʼátʼéehii bitah ádajídin, dóó ahoolʼáágóó bichʼįʼ ndawiiʼnáa doo.

6 Ákohgo, nináʼílyáhígíí éí Ayóóʼátʼéii Messiah bibeʼadziil dóó biníkááh góneʼ hazlį́į́ʼ; háálá bí éiyá, ajoobaʼ dóó tʼáá aaníinii biyiʼ hadeezbin.

7 Áko shooh, bí éiyá nináʼádeetʼąągo bąąhági átʼéii yá tiʼhoozniiʼ, bee hazʼáanii biniyéhígíí yíighahgo nináʼnídlá, tʼáá ałtso bijéí dóó biiʼ sizʼíinii yínííł nilínígíí bá; dóó doo náánáłaʼ díí bee hazʼáanii bíighahgo nináʼídláhá da.

8 Ákohgo, díí tsʼídá íyisí aláahdi nihokááʼ dineʼé bee bił hodoonihígíí átʼé, háálá bił bééhodoozįįł tsʼídá tʼáá háiida Diyin God bił hazʼą́ą góneʼ doo yah adoogáał da, tʼáá hazhóʼó Ayóóʼátʼéii Messiah biyáʼátʼéehii, dóó beʼajoobaʼ, dóó bidiyingo joobaʼ binahjįʼ tʼéiyá, bí éí beʼiinaʼ átsʼíískʼehgo niʼ níínílá, dóó Iiʼ Sizį́ Diyinii bibeeʼadziil binahjįʼ nínéidiidlá, háálá daneeznánígíí náádahiidooʼnaałgo íidoolííł, bí áłtsé náádidoodáałgo.

9 Ákohgo, Diyin God yichʼįʼ áłtsé neestʼąʼ nilį́, háálá bí éiyá nihokááʼ dineʼé baʼáłchíní tʼáá ałtso yá náʼookąąhii nilį́į dooleeł; dóó tʼáá háiida oosdląądígíí éí, yisdádoogááł.

10 Áádóó nihokááʼ dineʼé tʼáá ałtso yá náʼookąąhígíí biniinaa, nihokááʼ dineʼé tʼáá ałtso Diyin God yidááhdóó nínáhidookah; ákohgo, yidááhdóó naazį́įgo, tʼáá aaníinii dóó diyingo hałtʼéí biyiʼ hólǫ́nígíí binahjįʼ yá nahodiyooʼááł. Ákohgo, bee hazʼáanii bikʼehgo ánihwiitʼaahii Diyi Ayóóʼátʼéii niinílá, háiida bee hazʼáanii kʼíinítiʼgo éí yikʼee tiʼhwiidoonih, éí tiʼhooʼníhígíí ił hózhóonii bitsʼą́ąjígo ályaa, bąąhági átʼéii bikʼé nináʼílyáhígíí éí díí bee hazʼáanii yikʼehgo naalnish.

11 Háálá tsʼídá tʼáá ákótʼée doo, tʼáá ałtsoní bitsʼą́ąjígíí dahólǫ́. Díí doo ákótʼéégóó, diné doo kééhatʼinígi áłtsé shá yizhchíinii, Dinékʼehgo oodááł doo ńdidoolyéeł da, índa, bąąhá ádaátʼéii, dóó hodiyinii, dóó tiʼhooʼnííh, índa yáʼátʼéehii dóó doo yáʼáshóonii. Ákohgo, tʼáá ałtso tʼááłáʼígo ádoolnííł; ákohgo, tʼááłáʼígo éí doo hináa da dooleeł ńtʼę́ę́ʼ; iiná dóó ánoonééł bąąh ádin dooleeł ńtʼę́ę́ʼ, índa doołdził dóó doo doołdziłgóó bąąh ádin dooleeł, dóó ił hózhǫ́ dóó tiʼhooʼnííh, índa ééhózinii dóó doo ééhózinii ałdóʼ bąąh ádin dooleeł ńtʼę́ę́ʼ.

12 Ákohgo, tʼáadoo biniyéhígo ályaa doo ńtʼę́ę́ʼ; éí bąą ályaaí éí tsʼídá tʼáadoo biniyéhé da dooleeł ńtʼę́ę́ʼ. Ákohgo, díí éí Diyin God bibee ééhózinii dóó biʼahoolʼá biniyéii tʼáadoo biniyéhé da doo ńtʼę́ę́ʼ, dóó ałdóʼ bibee ádziil, dóó biʼaʼááh hasin, dóó Diyin God bibee ánihwiitʼaahii biniyéhé.

13 Áádóó bee hazʼáanii ádin doohniidgo, éií bąąhági átʼéii ałdóʼ ádin didoohniił. Bąąhági átʼéii ádin doohniidgo, Diyinkʼehgo oodaał ałdóʼ ádin didoohniił. Áádóó yáʼátʼééh ádingo éí bee ił hózhóonii ałdóʼ ádin dooleeł. Áádóó yáʼátʼéehii índa bee ił hózhóonii ádingo éí achʼįʼ nahwiiʼná índa tiʼhooʼnííh ałdóʼ ádin dooleeł. Dóó díí ádaadingo éí Diyin God ałdóʼ ádin. Dóó Diyin God doo hólǫ́ǫ́góó nihí ałdóʼ doo honiidlǫ́ǫ da, éí doodago nahasdzáán ałdóʼ doo hólǫ́ǫ da; háálá tʼáadoo leʼé tʼáadoo ádaalyaa da doo ńtʼę́ę́ʼ, tʼáadoo leʼé nayiiłnáa dooleełígíí; éí doodago nabiʼdilnáa dooleełígíí ádin doo ńtʼę́ę́ʼ; ákohgo, tʼáadoo leʼé tʼáá ałtso ásdįįd dooleeł ńtʼę́ę́ʼ.

14 Áádóó kʼad, shiyeʼké, díí bitsʼą́ądóó ndiʼdoohłééł dóó bikʼidadiʼdootį́į́ł biniyé nihił hashneʼ; háálá Diyin God éí hólǫ́, dóó tʼáá ałtsoní áyiilaa, yáʼąąsh dóó nahasdzáán tʼáá áłah, dóó tʼáá ałtso biyiʼ hólǫ́nígíí, tʼáadoo leʼé naʼiiłnáanii dóó tʼáadoo leʼé nahaʼnáanii.

15 Áádóó ahoolʼáágóó bí biniyéii bílaʼáshdlaʼii niilyáhígii ádoolnííł, áłtsé nihizhéʼé dóó nihimá áyiilaago, índa naaldlooshii daʼałchiní dóó hódah ndaatʼaʼí, dóó tʼáá ałtsoní ályaaígíí, biniinaa ałtsʼąąhjígíí hólǫ́; tsin bineestʼąʼ doo doodį́įłii índa tsin bee iináanii bineestʼą́ ałdóʼ ałtsʼąąhjí nilíní; łaʼ éí łikan dóó łaʼ éí díchʼííʼ.

16 Ákohgo, Bóhólníihii Diyin God diné tʼáá bí íinízingo éʼéłʼį́įgo áyiilaa. Éí bąą, diné tʼáá bí bíhólníihgo éʼéłʼį́į dooleełgo éí doo bohónéedzą́ą da tʼáá hazhóʼó ałtsʼą́ąjįʼ átʼéhígíí łaʼ yídánoolníigo tʼéiyá nahaʼná.

17 Áádóó shí, Lehi, yííłtaʼígíí binahjįʼ, íinisingo éí, naʼíisdzooígíí bikʼehgo, Diyin God yá naalʼaʼí łaʼ yáʼąąshdę́ę́ʼ adáátłizhgo; ákohgo, éí biʼiiníziinii silį́į́ʼ, dóó Diyin God bidááhdóó doo yáʼáshóonii yíká átʼį́į́go hahoolzhiizh.

18 Áádóó yáʼąąshdę́ę́ʼ adáátłizhígíí biniinaa, ahoolʼáágóó tiʼhooʼnííh silį́į́ʼ, dóó tʼáá ałtso nihokááʼ dineʼé ałdóʼ tiʼdahojoonííh dooleeł nízin. Ákohgo, éí tłʼiish sání, biʼiiníziinii nilį́, tʼáá ałtso naʼadloʼ yizhéʼé nilíinii, ákohgo, éí Eve kóyidííniid: Tsin bineestʼąʼ doo doodį́įł da haʼnínée niyą́, háálá doo dadíítsxaał da, háálá Diyin God biníłtʼée doo, yáʼátʼéehii dóó doo yáʼádaatʼééhígíí nił bééhózin dooleeł.

19 Áádóó Adam dóó Eve tsin bineestʼąʼ doo doodį́į́łii yiyííyą́ąʼgo índa dáʼákʼeh Edendóó chʼíbidiʼneelchą́ą́ʼ, nihokááʼ bikáaʼgi kʼéédídléeh dooleeł biniyé.

20 Áádóó baʼáłchíní hodeezlį́į́ʼ; aooʼ, tʼáá ałtso nahasdzáán bikáaʼgi hooghan nahazʼánígíí bitsʼą́ą́dóó hazlį́į́ʼ ndi.

21 Áádóó Diyin God íinízinígíí binahjįʼ, nihokááʼ dineʼé baʼáłchíní tʼáá nízaagóó dahináago áyiilaa, áko da tʼah nahasdzáán bikáaʼgi dahináago ádaańdaʼdookąął; ákohgo, ndabidiʼnitaahgo bił hooʼaʼ dóó beʼiinaʼígíí nízaagóó dinaʼgo ályaa, háálá Bóhólníihii Diyin God nihokááʼ dineʼé baʼáłchíní bee hazʼáanii yeiníláhígíí yikʼeh dahółʼį́į́ dooleeł biniyé tʼáá ałtso nihokááʼ dineʼé ádaańdaʼdookąął biniyé yichʼįʼ haadzííʼ; háálá tʼáá ałtso nihokááʼ dineʼé yóóʼ aheeskaiígíí yił ííshją́ áyiilaa, tsʼídá áłtsé bishchíinii asiihígíí biniinaa,

22 Áádóó kʼad, áko shooh, Adam doo asiihgóó doo bąąhágiʼ átʼéii yiih yítłizh da ńtʼę́ę́ʼ, ndi dáʼákʼeh Edendi tʼahdii naagháa doo ńtʼę́ę́ʼ. Áádóó tʼáadoo leʼé ádaalyaahąą, tʼáá ádaalyaahąągi ádaatʼée doo ńtʼę́ę́ʼ; dóó ahoolʼáágóó, doo nińtʼiʼ da doo ńtʼę́ę́ʼ.

23 Áádóó baʼáłchíní ádin doo ńtʼę́ę́ʼ; ákohgo doo asiihgo bił hazʼąą doo ńtʼę́ę́ʼ, ił hózhǫ́ bee ádin, háálá tiʼhooʼnííh doo bił bééhózin da, dóó yáʼátʼéhii doo ííłʼį́į da ńtʼę́ę́ʼ, háálá bąąhágiʼ átʼéii doo bił bééhózin da.

24 Ákondi shooh, tʼáá ałtso bił bééhózinii beʼééhózinii binahjįʼ tʼáá ałtsoní ádaalyaa.

25 Adam asihgo oochííł dóó anoonééł hazlį́į́ʼ; dóó diné daatsiʼ bił dahodoozhǫǫł.

26 Áádóó Messiah doochíiłjįʼ ayííłką́ągo doogááł, áko nihokááʼ dineʼé baʼáłchíní asdzihígíí bitsʼą́ą́dóó yisdánéídooʼnił. Áádóó adáátłizh yá yikʼé ninaʼídláago biniinaa ahoolʼáágóó tʼáá bí bídahólníihgo deíkááh daazlį́į́ʼ, yáʼátʼéhii dóó doo yáʼáshǫnii bił béédahózin dóó tʼáá bí bídahólníih dóó tʼáadoo kojígo yinááł dabiʼdíʼníní, tʼáá hazhóʼó nihoníyáadi, bee hazʼáanii bikʼehgo tʼéiyá hanááhodootʼááł, Diyin God bee hazʼáanii niyiizláii bikʼehgo.

27 Ákohgo, diné éí atsʼíseekʼehgo tʼáá bí íinízingo éʼéłʼį́; dóó tʼáá ałtsoní diné yee átʼéhígíí bąąh niilyá. Áádóó tʼáá bí bídahólnííhgóó tʼáá nííkʼe naʼadáh dóó hoolʼáágóó iiná néiididoolééł, diné tʼáá ałtso yá Ataʼsizíinii Ayóóʼátʼéii éí binahjįʼ, éí doodago ąąh astį́ dóó anoonééł néiididoolééł, biʼiiníziinii bibee ádziil dóó yee hótąʼ dooleełígíí bikʼehgo; háálá bí átʼéhígiʼ átʼáo nihokááʼ dineʼé tʼáá ałtso bichʼįʼ ndahwiiʼnáa dooleeł nízin.

28 Áádóó kʼad, shiyeʼké, Ataʼsizíinii Ayóóʼátʼéii bichʼįʼ dadínóhʼį́į́ʼ doo nisin, dóó bibee hazʼáanii ayóó ádaatʼéii bikʼeh dahonołʼį́; dóó bizaad deinohdlą́, dóó hoolʼáágóó iiná deidoołtsół, Diyin biʼIiʼ Sizį́ Diyinii íínízinígíí bikʼehgo;

29 Áádóó ahoolʼáágóó anoonééł woołtsóód lágo, atsʼíís iinízin dóó doo yáʼáshóonii biiʼ hólǫ́nígíí bikʼehgo, chʼį́įdii biʼiiníziinii éiyá yinahjįʼ bídziilgo hótąʼ yileeh, chʼį́įdiitahgóó yah hodoolóós, háálá tʼáá bí bił hazʼąądi nihinaatʼáanii nilį́į dooleeł.

30 Tʼáá anółtso díí áłchʼį́į́dígo saad bee nihichʼįʼ haasdzííʼ, shiyeʼké, nahasdzáán bikáaʼgi nashiʼdinitaahą́ą́ kʼadę́ę ałtso iiłkáahgo; dóó yáʼátʼéehii ńdiilá, Diyin yá yáłtiʼii bizaad bikʼehgo. Áádóó doo łaʼ biniyé áshtʼį́į da tʼáá hazhóʼó nihiiʼ naazíinii yáʼátʼéehgo hoolʼáágóó bił hazʼąą dooleełígíí tʼéiyá. Amen.