1 Ákondi shooh, áadi tʼóó ahayóí dooleeł—áajįʼ ahoolzhiizhgo shinaanish ayóóʼátʼéii bitahgóó bee naashnishgo, háálá nihokááʼ dineʼé baʼáłchíní bił ahadaʼdinishtʼánée béédadeeshnih, háálá kʼad naaki góneʼ nínáádideeshnih shidineʼé Israel bighandóó háájéʼígíí danilínígíí ahąąh ánáádeeshdlííł.

2 Áádóó ałdóʼ, nił ahaʼdinishtʼánée béédeeshnih, Nephi, índa nizhéʼé ałdóʼ, éí naʼáłchíní dooígíí béédeeshnih; áko, naʼáłchíní dooleełígíí bizaad éí náasdi náánóoséłígíí tʼáá shí shizééʼdę́ę́ʼ bee bichʼįʼ hadeesdzih; áádóó tʼáá ałtso nahasdzáán bikááʼgóó, shizaad deididootsʼį́į́ł, éí shidineʼé, Israel bighan dooleełígíí bá siláa dooleeł.

3 Áádóó shizaad náás didoohtsʼį́į́łígíí biniinaa—tʼóó ahayóí Gentile dineʼé kódaaníi dooleeł: Diyin God Bizaad! Diyin God Bizaad! Diyin God Bizaad łaʼ nihee dahólǫ́; dóó Diyin God Bizaad doo łaʼ náhodoodleeł da.

4 Ákondi Bóhólníihii Diyin God kóní: O doo ádahalyánígíí, Diyin God Bizaad łaʼ hwee dahólǫ́ǫ doo, dóó éí Jew dineʼé bitsʼą́ą́dę́ę́ʼ haadooltsʼił, ałkʼidą́ą́ʼ shidineʼé bił ahaʼdinishtʼánée. Dóó Diyin God Bizaad Jew dineʼé bitsʼą́ą́dę́ę́ʼ ńdeidiiʼánígíísh yichʼįʼ ahééh danízin? Aooʼ, Gentile dineʼé háísh ááłdeiiłní? Yéédaalniih daatsʼí hojoobáʼ ádáádzaayę́ę, dóó yindaashnish, dóó Jews tiʼdahoozniiʼ yę́ę, dóó shichʼį hadaʼólnóó, Gentile dineʼé yisdádahidookah biniyé?

5 O Gentile dineʼé danohłį́į, Jew dineʼéésh béédaałniih, ałkʼidą́ą́ʼ shidineʼé bił ahadaʼdinishtʼánée? Ndayeeʼ; doo yáʼátʼéehgo bá hadasohziih, dóó dajiinohłáa ńtʼę́ę́ʼ, dóó tʼáadoo shonídeisołtʼeʼ da. Ákondi shooh, díidí tʼáá ałtso nihikʼijįʼ ńdadoodleeł; háálá shí Diyin Bóhólníihii doo shidineʼé beisénah da.

6 Doo áhołyą́nii, éí kódohníi dooleeł, Diyin God Bizaad, Diyin God Bizaad łaʼ nihee hólǫ́, dóó Diyin God Bizaad doo łaʼ náániidzin da. Daʼ Diyin God Bizaadísh nihee hólǫ́ǫ dooleeł Jew dineʼé tʼáá gééd?

7 Dooísh nihił bééhózin da éí dineʼé dah deínéhígíí doo tʼááłáʼí da? Dooísh nihił bééhózin da éí shí, Bóhólníihii nihiDiyin God nishłį́į, nihokááʼ dineʼé ałtso íishłaa, dóó shí éí bénáshniih tónteeldi kéyah yikááʼ dineʼé kéédahatʼínígíí éí bénáshniih; dóó shí éí wódahdi yáʼąąsh dóó wóyahdi nahasdzáán bee shíhólnííh; aooʼ, índa nihokááʼ dineʼé baʼáłchíní dóó tʼáá ałtso kédaayahgóó, diné badaʼáłchíní éí shizaad deididootsʼį́į́ł?

8 Ákohgo saad honohłǫ́, shizaad ląʼígo náádadidoohtsʼíłígíí biniinaa? Doósh nihił béédahózin da éí naakigo ałʼąą átʼáo dineʼé dahʼyinéłígíí éí shí Diyin God tʼáá aaníí nishłį́įgo yee ooʼíínii danilį́, shí éí łaʼ dah yinéhígíí bénáshniih tʼáá łahjí dah deínéhígíí bénáshniih? Éí bąą, tʼáá ałtso kédaayahgo éí tʼáá aheełtʼéego bichʼįʼ yáshtiʼ. Dóó naakidę́ę́ʼ kéyah ahiih yínáago éí beʼoodląʼ tʼáá anínígíí ałdóʼ aheełtʼéego ahiih dookaah.

9 Áádóó díí áshʼínígíí laʼída bił ííshją́ą́ ádeeshłííł éí shí adą́ą́ʼdą́ą́ʼ, dííjį́ dóó hoolʼáágóó doo łahgo ánááshnííł da; dóó shizaad náásgóó bee yáshtiʼ doo tʼáá shí íinisinii bikʼehgo. Dóó tʼáałáʼí saad bee haasdzíiʼígíí biniinaa doo naaná łaʼ bee hanáádeesdzih dashíínohniní; háálá shinaanish tʼáhdoo ałtso áshłééh da; azhą́ nihokááʼ dineʼé bił nihoníyáajįʼ ndi, azhą́ ńléídę́ę́ʼ dóó ahoolʼáágóó ndi.

10 Ákohgo, Diyin God bizaad nihee dahólǫ́ǫgo biniinaa tʼáadoo tʼáá átʼé shizaad biiʼ holǫ́ danohsiní; áádóó doo łaʼ biih náádoodzoh da tʼáadoo danohsiní.

11 Háálá nihokááʼ dineʼé tʼáá ałtso ánihidishní, tʼáá áłah haʼaʼaah, dóó eʼeʼaah, dóó náhookǫs, dóó shádiʼááhjigo, dóó tónteel bikááʼ kéédahatʼínígíí, éí saad bee bichʼįʼ yáshtiʼígíí ńdeidiyoozoh; naaltsoos nidahaaszohígíí biyiʼdóó nihokááʼ dineʼé bá nahodeeshʼááł, diné tʼáá ałtso naanish ádayiilaayę́ę bikʼehgo, éí nidahaaszohígíí binahjįʼ.

12 Háálá áko shooh, Jew dineʼé bichʼįʼ hadeesdzih dóó ńdeidíyóozoh; dóó Nephi dineʼé ałdóʼ bichʼįʼ hadeesdzih dóó ńdeidíyóozoh; dóó Israel bighandóó haajeehgíí bichʼįʼ hadeesdzih, daʼníłtsʼą́ą́ʼgóó ahéʼeezh yę́ę, ałdóʼ bichʼįʼ hadeesdzih dóó ńdeidíyóozoh; dóó nihokááʼ dineʼé tʼáá ałtso ałdóʼ bichʼįʼ hadeesdzih dóó ńdeidíyóozoh.

13 Áádóó baa hodoolzhish Jew dineʼé Nephi dineʼé bizaad shódeidoołtʼeeł, dóó Nephi dineʼé Jew dineʼé bizaad shódeidoołtʼeeł; dóó Nephi dineʼé dóó Jew dineʼé Israel dineʼé yóóʼeekaiígíí bizaad shódeidoołtʼeeł; dóó Israel dineʼé yóóʼeekaiígíí Nephi dineʼé dóó Jew dineʼé bizaad shódeidoołtʼeeł.

14 Áádóó baa hodoolzhish shidineʼé, éiyá Israel bighandóó háájéhígíí, bighandi nínáhidookah kéyah baa dahideestʼándi; dóó shizaad ałdóʼ tʼááʼłáʼíʼjįʼ ahąʼándoolnííł. Dóó tʼáá háiida shizaad dóó shidineʼé, Israel bighandóó háájéhígíí yikʼíjįʼ danilíigo, Diyin God nishłínígíí bił ííshjání ádeeshłííł, dóó Abraham bił ahaʼdinishtʼánée, éí ahoolʼáágóó baʼáłchíní bénáshniih doo.