1 Áádóó kʼad, áko shooh, shikʼiské, Iiʼ Sizį́ Diyinii íinízinígíí bikʼehgo; nihichʼįʼ yááłtiʼ; ákohgo, tʼáá aaníí bikʼehgo áhodoonííłgo shił bééhózin.

2 Áádóó naaltsoos biyiʼdóó hahasdzooígíí nihokááʼ dineʼé baʼáłchíní tʼáá íyísii bił danilį́į dooleeł, dóó nihilástsíí tʼáá íyísii bá átʼé, éí Israel bighandóó háájééh chʼeekaiígíí.

3 Háálá áhodoonííł éí bijį́į́di sodizin, doo Diyin Bóhólníihii bichʼįʼ hádahdiilyaaígíí, łaʼ kóníigo nááná ła yichʼįʼ hadoodzih: Áko shooh, Shí, Shí éí Diyin Bóhólníihii bá ashtʼį́; áádóó łaʼ ánáádidooniił: Shí, Shí éí Diyin Bóhólníihii bá ashtʼį́; díígiʼ átʼáo sodizin ádahyiilaaígíí hadahásdziih, dóó doo éí Diyin Bóhólníihii bichʼįʼ da—

4 Áádóó saad ahídeitʼááh doo; dóó bipriest danilínígíí saad ahídeitʼááh doo, dóó yéédahósinígíí yee ndaʼnitin doo, dóó Iiʼ Sizį́ Diyinii nahjįʼ kódeiyilaa, éí bee hadaʼiidzihii átʼé.

5 Áádóó Diyin God bibeʼadziilii nahjįʼkódeiyilaa, Israel biDiyin Ayóóʼátʼéii, dóó diné kódeidíínííd: Danihíítsółtsʼą́ą́ʼ, dóó nihinahatʼaʼ dadohtsʼį́į́h; háálá áko shooh dííjʼį Diyin God doo hólóǫ da, háálá Diyin Bóhólníihii dóó Nináʼnídláii éí binaanish tʼáá íídą́ą́ʼ áyiilaa, dóó nihokááʼ dineʼé bibeʼadziilii yee nílá;

6 Áko shooh, shinahatʼaʼ deiyisínółtsʼą́ą́; Diyin Bóhólníihii bilaʼ álílee yee áyilaa daaníigo, tʼáadoo deinohdlání; háálá dįįjį́ doo álílee yiDiyin God nilį́į da; binaanish éí tʼáá íídą́ą́ʼ áyiilaa.

7 Áooʼ dóó tʼóó ahoyóí kódaaníi doo: Daʼohsą́, daʼohdlą́, dóó nihił dahoneenih, háálá yiską́ągo éí dadínííʼnééł; dóó éí niha yáʼátʼééh doo.

8 Áádóó ałdóʼ tʼóó ahoyóí kódaaníi doo: Daʼohsą́, daʼohdlą́, dóó nihił dahoneenih, ákondi, Diyin God bee dááłdzid—tʼįįhdígo bąąhágiʼ átʼéii baa naahkaigo bił tʼáá áko; aooʼ, tʼįįhdígo danihiyoochʼííd, háida binaʼohłoʼgo tʼáá áko, nihinaagóó dabighanígíí bá hadahoyohgééd; díí tʼáadoo átʼéhí da; díí tʼáá átʼé baa nahkai, háálá yiską́ągo éí dadínííʼnééł; dóó nihikʼéhástʼahgo, Diyin God tʼáá díkwíhídi nánihididoołtsxis, dóó bikééʼdi Diyin God bił hazʼáadi yisdánáhidiikah.

9 Aooʼ, ląʼída kótʼáó nidaʼnitin doo, tʼóó ádaatʼéego dóó bee ádaahodzódlíigo dóó tʼáá ádzaagóó naʼnitin bee, dóó bijéí yee ádaadahaʼniihgo, dóó tsʼídá atłʼáahdi bindaʼnitin yee dahwééʼaahígíí Diyin Bóhólníihii yitsʼąą ndeiniłʼin doo; dóó bindaanish chahałheeł biyiʼdi ádeiłʼį́į doo.

10 Áádóó Diyin yá naazíinii bidił łeeyiʼ déé bikʼijįʼ daacha doo.

11 Aooʼ, tʼáá átʼée ńtʼę́ę́ʼ yitsʼákai; ndaʼídiishchxǫʼ.

12 Ádaahodzódlí biniinaa, dóó doo tʼáá aníigo ndaʼnitinígíí, dóó doo tʼáá aníigo ndahaʼáhígíí biniinaa bisodizin ałtso dááchxǫʼ, dóó bisodizin tʼóó ádaadahaʼniih daazlį́į́ʼ; ádaadahaʼniihígíí biniinaa ayóó bił dahatsoh daazlį́į́ʼ.

13 Baadahojoobaʼí yee deiniʼįįhígíí yinahjiʼ bisodizin báhooghan baa dadzodlíigo hadadiilyaa; Baadahojoobaʼí biʼééʼ yee deiniʼííhgo yinahjįʼ daʼílį́įgo ééʼ naazhjééʼ; áádóó baʼátʼeʼ ádaadinyę́ę dóó bijéí biyidi baadahojoobʼígíí yichʼįʼ ndahwiiłná, háálá ádaadadzódlígo bił dahastsohígíí biniinaa.

14 Bikʼos daniłdzil dóó yadaniilʼą́; aooʼ, dóó háálá ádaahodzidlí, dóó tsʼnaʼaldeeh, dóó aláahgo woolchʼį́į́d baa naʼaldeeh, dóó ałjiłee baa naʼaldeeh biniinaa, ałtso yóó aheeskai tʼááhazhoʼó tʼáádikwíhí tʼéiyá chʼéédzííʼ; éí Diyin Christ hojooba ídlį́ yee yikééʼ dahdiikai; azhą́ ákótʼée ndi, biʼdootʼíshgo, ndaʼiisííh háálá nihokááʼ dineʼé binahatʼa bee ndabidineestą́ʼígíí biniinaa.

15 O bił éédahózinii, dóó daʼííłtaʼii, dóó daʼatʼíinii, bijéí biyiʼdi ádaadadzódlíigo bił dahatsohígíí, dóóʼ tʼáá áłtso tʼóó ádaatʼéii yee nadaʼnitinígíí, dóó tʼáá átʼé ałhaaʼdilyé yaa naakaiígíí, dóó Diyin Bóhólníihii diyingo bikééʼ oodááł ndayiiłchxǫígíí, yííyá, yííyá, yííyá bił dahólǫ́ǫ doo, ní Bóhólníihii Diyin God Ayóóʼábóodziilii, háálá chʼį́įdiitahgóóyaa adabiʼdiyooltłʼił!

16 Yííyá tʼáá ákǫ́ǫ́ ádaatʼíinii tʼáadoo biniyéhégóó nahjįʼ kódeileʼ dóó yáʼátʼéehii yikʼijįʼ daazlį́įʼii, dóó ádin éí doo bąąhíliní da daanínígíí! Áko áajįʼ iidoołkááł Bóhólníihii Diyin God nihokááʼ dineʼé tsxį́į́łgo yaa doogááł; dóó éí yoołkáałdi bąąhágiʼ ádaatʼéii yee neestʼą́ągo abiʼdidoodįįł.

17 Ákondi shooh, nihokááʼ dineʼé doo yáʼáshóonii dóó aláahgo woolchʼį́į́d yaanaakaiígíí yaa ńdaʼooskango tʼéiyá doo ádabiʼdidooldįįł da, Diyin Tʼáá Ałtsoní bee Bóhólníihii kóní.

18 Ákondi shooh, sodizin báhooghan bidziil dóó aláahgo woolchʼídígíí, tʼáá átʼé nahadzáán beʼałjił nilínii, niʼjįʼ ahiihnídoozhoosh, dóó ayóó átʼáo ahiihnídoołdas.

19 Háálá biʼiiníziinii bił hazʼą́ yisdił dooleeł, dóó áájí daʼatʼahígíí bił hahozhnííłchaad nahalingo ndaʼjookąąhgo, doodago éí biʼiiníziinii bibéésh daʼahólzhaʼí hoolʼáágóó yee hweʼdaʼdootłʼóół, dóó bił niʼjizʼtsih nahalingo bádahodoochįįł, áádóó dínóonééł;

20 Háálá áko shooh, áadi yoołkáałgo biʼiiníziinii nihokááʼ dineʼé bijéí biyiʼdi hahodinóółcháł, dóó yáʼátʼéehii yikʼijįʼ bádahachįʼgo íídoolííł.

21 Áádóó łaʼ éí áhodeeszééʼgo íídooleeł, dóó atsʼíís yidineilnanígíí yee yiʼdiʼdooloh, dóó ádadidooniił: Zion hazʼą́ądi tʼáá áłtsojįʼ yáʼáhootʼééh; aooʼ, Zion ałʼąąnóótʼį́į́ł, tʼáá átʼé hózhóoní—áko biʼiiníziinii éí biiʼ naazíinii yinaʼazloʼ, dóó hazhooʼígo chʼįįdiitahgóóyaa ahodooʼish.

22 Áádóó áko shooh, łaʼ éí yoochʼiid yee yinaʼaloʼgo yóóʼayiʼéésh, dóó chʼį́įdiitah adin yił ní; dóó ííłní: Doo éí biʼiiníziinii nishłį́į da, biʼiiníziinii éí adin—dóó kótʼáó hazhóóʼígo yijeeh nánítʼááhgo yił halneʼ, áajįʼ bibéésh daʼahólzhaʼí tʼóó baaihígíí yee yidoołtsoł, éí bitsʼą́ądóó doo hááʼiildééh da.

23 Aooʼ, anoonééł, dóó chʼį́įdiitah dabótąʼ; dóó anoonééł, dóó chʼį́įdiitah, dóó biʼiiníziinii, dóó tʼáá átʼé dabiʼdótąʼígíí Diyin God bikááʼ dahʼasdáhí yidááhdóó deidoozįįł, dóó naanish ádayiilaayę́ę bikʼehgo bándahoodootʼááł, éí áádóó báhashtʼe dahoolyaa góneʼ ahidookah, łeetsoii dookʼą́ą́łgo dahsikaad, éí hoolʼáágóó tiʼhooʼniih átʼé.

24 Ákohgo, yííyá Ziondi ahoodiilzeeʼgo sidáhígíí!

25 Yííyá háida díí yee nidilghaashígíí: Tʼáá áłtsojįʼ yáʼáhootʼééh!

26 Aooʼ, yííyá diné binaʼnitin yíístsʼą́ʼígíí, dóó Diyin God bibeʼadziil dóó Iiʼ Sizį́ Diyinii aayílyé doo yoodlánígíí!

27 Aooʼ yííyá kódaanínígíí: Tʼáá íídą́ą́ʼ nihailyá, dóó doo łaʼ náádaniziní da!

28 Áádóó áko, yííyá Diyin God bitʼááʼaníinii biniinaa áháchįʼ yee daditsiz! Háálá áko shooh, háida tsé yikááʼaztłʼinígíí éí yaa bił hózhǫ́ǫ doo; áádóó háida séí yikááʼ aztłʼinígíí bitʼah hoditłidgo ahiihńdoozhoosh.

29 Yííyá háida kónínígíí: Diyin God bizaad nihailyá, dóó doo éí Diyin God bizaad łaʼ náádanidzin da, háálá tʼáá íídą́ą́ʼ bííghahgo nihailyá!

30 Háálá áko shooh, Bóhólníihii Diyin God aní: Nihokááʼ dineʼé baʼáłchíní tʼáá ałkééʼ saad baa hashʼaah dooleeł, bee nahazʼą́ ałkéeʼ baa hishłéé doo, ałchʼį́dígo kweʼé dóó ałchʼį́dígo áadi; dóó shizaad deidiitsʼą́ʼígíí bikʼihojidoodliił, dóó shinaʼnitin deiyíístsʼą́ʼígíí, háálá bee hodzáanii yídahwiidoołʼááł; háida baʼílyáhígíí bił nilį́įgo ląʼígo bichʼįʼ kónáádeeshdlííł; dóó kʼad doo łaʼ náádaniidzin da, daanínígíí éí ázhą́ baa dahaasyáa ndi tʼóó bitsʼą́ą́ʼ náádidoonił.

31 Háídá nihokááʼ dineʼé yaʼólíigo, doodago diné bibeʼadziilii yaʼólíigo, doodago diné binaʼnitin yíístsʼą́ą́ʼgo hóyéeʼgo báhaʼdoodzih, tʼáá hazhóʼó diné binaʼnitin Iiʼ Sizį́ Diyinii bibeʼadziilee bikʼehgo beiyilyáago tʼéiyá.

32 Diyin God Tʼáá Ałtsoní bee Bóhólníihii ání, Yííyá Gentile dineʼé danohłíinii! Bóhólníihii Diyin God ání, Tʼáá ákwííjį́ bichʼįʼ dah deeshnih ndi, doo dashínízin da; ákótʼée ndi, adaańdaʼooskąądgo dóó shichʼįʼ nináhaskaigo tʼéiyá; bichʼįʼ ááh dínéesįįł, háálá bichʼįʼ dahdeeshnihgo iʼiiʼaah, Diyin God Tʼáá Ałtsoní bee Bóhólníihii ání.