1 Ákondi, shooh, nihodoogáałjįʼ ayííłką́ągo, éí doodago Gentile dineʼé biyoołkáałdi—aooʼ, shooh Gentile dineʼé dóó Jew dineʼé, díí tʼáá áłah díí kéyahʼjįʼ ndahidookah dóó nááná łaʼ kédaayah yikááʼ dahólóonii, aooʼ, tʼáá ałtso nahasdzáán bikááʼgóó ałdóʼ, áko shooh, éí bąąhági ádaatʼéii dóó tʼáá ałtso doo yáʼádaashóonii yee tsiʼnaakai doo—

2 Áádóó áajįʼ ayííłką́ągo Diyin Tʼáá Ałtsoní bee Bóhólníihii haa doogááł; iiʼniʼ dóó nahasdzáán hidiisnááʼgo, dóó ayóó íidootsʼį́į́ł, dóó nahałtin bił níyol doo, níyoltsoh bee, dóó kǫʼ ágháánii haa didookʼaał.

3 Áádóó tʼáá ałtso ałʼąą dineʼé Zion yił daʼahóbáahii, dóó yichʼįʼ nidahwiiłnáanii, éí tłʼéeʼgo nijiizyeel nahalin doo; aooʼ, Diné dichin nilíinii neiyeełgo ashą́ nízin ndi, chʼénádziʼgo biiʼ sizíinii doo biiʼ siláhí da doo; éí doodaiiʼ diné dibááʼ nilíinii neiyeełgo eeshdlą́ą́ʼ nízin ndi, chʼénádzidgo tʼah dibááʼ biʼniiłhxį́į doo, dóó biiʼ sizíinii tʼah dichin nízin doo; aooʼ, hááłá tʼáá ałtso ałʼąą dineʼé Dził Zion yikʼijįʼ daʼahigánígíí ákódaatʼée doo.

4 Háálá áko shooh, tʼáá ánółtso bąąhági ádaahtʼínígíí niʼkódaołééh dóó baa ááh danoohsįįh, háálá hadadidoołwosh, dóó daahcha doo; aooʼ; tsiʼ dah wohkah ndi tódiłhił doo bikʼee da; nidaʼnohtʼih ndi tó tsiʼnaʼiiłáhígíí doo bikʼee da.

5 Háálá áko shooh, Diyin Bóhólníihii yéego nihiʼiiłhaazh. Háálá áko shooh, danoołchʼiil; dóó Diyin yá yádaałtiʼii doo danoozį́įh da; dóó nihinaatʼáanii, dóó diyingo daʼooʼíinii nihitsʼąą nídoolʼį́į́ʼ bąąhági ádaatʼínígíí biniinaa.

6 Áádóó baa hodoolzhish Bóhólníihii Diyin God saad naaltsoos biyiʼgo nihaidooʼááł, áádóó daʼiiłhaazh yę́ę éí bizaad ádaatʼé dooleeł.

7 Áádóó áko shooh éí naaltsoos bidáʼdeeshjééʼ doo; dóó éí naaltsoos nahasdzáán ályaadę́ę́ʼ dóó nahoníyáajįʼ Diyin God bitsʼą́ą́dę́ę́ʼ ił ííshją́ą́ ályaii biyiʼ siláa doo.

8 Ákohgo, éí bidáʼdeeshjéʼígíí biniinaa, bidáʼdeeshjéʼígíí dineʼé tsiʼnaakai dóó bíighahí baa naʼaldeeh bijį́įdi doo baa dootʼááł da. Ákohgo, naaltsoos bitsʼąą naatʼáa doo.

9 Ákondi naaltsoos hastiin łaʼ baa dootʼááł, dóó saad naaltsoos biyiʼdę́ę́ʼ ííshjání íidoolííł, éí łeeyiʼ daʼałhoshígíí da bizaad, áádóó éí saad dabikáʼígíí nááná łaʼ yeidoonił;

10 Ákondi éí saad bidáʼdeeshjéʼígíí doo ííshją́ą́ ádoolníił da, dóó doo naaltsoos háiida yeidooʼááł da. Háálá éí naaltsoos Diyin God beʼadziil bee bidáʼdidooljah, éí ił ííshją́ą́ ályaii naaltsoos bidáʼdooljéʼígíí biyiʼ dóó Diyin Bóhólníihii áníigo índa; ííshjání ádoolnííł, háálá áko shooh, nahasdzáán hadilyaadę́ę́ʼ dóó nihoniyáajįʼ ádahoonííłígíí nihił ííshją́ą́ ádoolnííł.

11 Áádóó éí bijį́įdi naaltsoos bidádeeshjéʼę́ę́ biyiʼdę́ę́ʼ saad dahooghangóó daóltaʼ dooleeł; dóó Christ bibeʼadziilii bee daóltaʼ doo; dóó nihokááʼ dineʼé baʼáłchíní díí tʼáá ałtso bił ííshją́ą́ ádadoolnííł tʼáá ńléídę́ę́ʼ ákótʼéego hoolzhish, dóó éí nihoníyáajįʼ tʼáá ákótʼée doo.

12 Ákohgo, éí bijį́įdi naaltsoos diné baa yááłtiʼ yę́ę baa dootʼááł, naaltsoos nihokááʼ dineʼé bitsʼąą nanilʼingo doo yikʼí dadooghał da, doo łaʼ deidoołtsééł da, tʼáá hazhóʼó tááʼ daʼooʼíinii danilínígíí tʼéiyá Diyin God bibeʼadziil yee deidínóółʼįįł, naaltsoos beiyítʼánéé; dóó éí naaltsoos tʼáá aaníí átʼéhígíí dóó dabiyiʼígíí yaa dahodoolnih.

13 Áádóó doo nááná łaʼ deidoołtsééł da, Diyin God íinízingo tʼéiyá tʼáá díkwíí deidoołtséél, éí tʼáá aaníí átʼéhígíí biʼoodląʼ yee nihokááʼ dineʼé baʼáłchíní yił dahodoolnih; háálá Bóhólníihii Diyin God ádííniid daʼoodlání bizaad anoonééłdę́ę́ʼ haʼoodzííʼ nahalin doo.

14 Ákohgo, Bóhólníihii Diyin God naaltsoos biyiʼdę́ę́ʼ saadígíí nihaidooleeł; áádóó ląʼí daʼooʼíinii danilínígíí hadahadziihgo bił yáʼátʼéhígíí átʼáo bizaad niidooleeł; áko yíiyá háí shį́į́ Diyin God bizaad doo yinízinígíí!

15 Ákondi shooh, baa hodoolzhishgo Bóhólníihii Diyin God naaltsoos yeidooʼáłígíí íididooniił: Díí saad doo bidaʼdeeshjéʼígíí ndiijááh dóó nááná łaʼ baa dííjih, éí diné ííłtaʼii baa dííjih, kódidííniił: Díí yíníłtaʼ, naanáóshkąąh, áádóó diné ííłtaʼii ádidooniił: Naaltsoos shaadííʼááł, áádóó yídéeshtah.

16 Áádóó kʼad, nihokááʼ dineʼé bił dahatsohígíí dóó daʼatʼínígíí biniinaa kódaaníi doo, dóó Diyin God éí doo baa haniih biniyé da.

17 Áádóó diné ádidooniił: Naaltsoos doo deeshʼáal da, háálá bidaʼdeeshjééʼ.

18 Áádóó diné ííłtaʼii ádidooniił: Yííníshtaʼgo doo bíighah da.

19 Ákohgo áhodooníiłii éí, Bóhólníihii Diyin God naaltsoos dóó saadígíí diné doo ííłtaʼii yaa neidoojih; dóó diné doo ííłtaʼii ádidooniił: Shí éí doo ííłtaʼii da.

20 Áádóó Bóhólníihii Diyin God ábididooniił: Daʼííłtaʼii doo deidóółtah da, háálá éí doo deinizin da, dóó shinaanish tʼáá shí ádeeshłííł; ákohgo saad naaníjaaʼígíí yídííłtah.

21 Bidádaʼdeeshjéʼígíí éí doo bididíílchił da, háálá éí tʼáá shí íiniizį́įʼgo índa nihichʼįʼ ąą ádeeshłííł; háálá nihokááʼ dineʼé baʼáłchíní bił ííshjání adeeshłííł tʼáá shí shinaanish ashłééhgo bíneeshʼą́.

22 Ákohgo, saad yíníłtaʼ nidííniidyę́ę yííníłtaʼgo, dóó daʼooʼíinii danilínígíí bee nihił ahaʼdinishtʼánée chóiséłtʼeʼgo, ákogo índa naaltsoos bidándiʼdooljah, dóó shinahjįʼ nídidííłʼį́į́ł, áko saad tʼahdoo yiniłtaʼígíí éí hashtʼeʼndeeshnił, tʼáá shí íiniizį́įʼgo índa nihokááʼ dineʼé baʼáłchíní tʼáá átʼé bił ííshjání ádeeshłííł.

23 Háálá áko shooh, Diyin God nishłį́; dóó álíleekʼehgo Diyin God nishłį́; dóó nihokááʼ dineʼé bichʼįʼ ííshjání ádiʼdeeshnííł háálá adą́ą́dą́ą́ʼ, díí jį́ dóó hoolʼáágóó doo łahgo ánááshnííł da, dóó nihokááʼ dineʼé baʼáłchíní doo bił naashnish da tʼáá hazhóʼí biʼoodląʼ binahjįʼ tʼéiyá.

24 Áádóó ánááhodooʼnííł Diyin Bóhólníihii saad yeiníʼánígíí yiyííłtaʼgo áyididooniił:

25 Azhą́ ákótʼée ndi díí diné tʼóó ádaaníigo shichʼįʼ hadahaasdzííʼ, áádóó bidaaʼ yee shaa dahaniih, ndi bijéí yee shitsʼádadineesdlį́į́ʼ, dóó yee shéédaaldzidígíí éí nihokááʼ dineʼé binaʼnitin bitsʼą́ą́dóó yitihígíí átʼé.

26 Éí bąą, díí dineʼé bitahgóó diyingo naʼanish ayóó átʼéii ádeeshłííł, aooʼ, diyingo naʼanish ayóó átʼéii dóó baa aʼááh hasinii, áko bił éédahózinii bibee hódzą́ dóó daʼííłtaʼii ádadoodįįł, dóó bidiné nitsídaakeesii yee akʼidaʼdiitʼánée bitsʼą́ą́ʼ nídidoolʼį́į́ł.

27 Áádóó yíiyá binahatʼaʼ tsʼídá atłʼáahdi Diyin Bóhólníihii yitsʼąą ndeiniłʼinii! Áko hondaanish chahałheeł biyiʼ ádajiłʼį́; áádóó ádaaní: Háísh nihooʼį́, dóó háísh nihééhósin? Áádóó ałdóʼ ádaaní: Tʼáá aaníí, yaa nihínííł dininígíí éí hashtłʼish łeetsʼaaʼ ííłʼíní nahalingo beełtʼé. Ákondi shooh, bił ííshją́ą́ ádeeshłííł ní: Diyin Tʼáá Ałtsoní bee Bóhólníihii, éí bindaanish tʼáá átʼé shił bééhózin. Áko naanish ájiilaaígíí ádidooniił, dooísh áshiinilaa da? Éí doodago tʼáadoo leʼé ályaaígíí hashtʼebiilaaígíí íididooniił, bí tʼáadoo yikʼiʼdiitą́ą da?

28 Ákondi shooh, Diyin Tʼáá Ałtsoní bee Bóhólníihii ání: Nihokááʼ dineʼé baʼáłchíní tʼóó hóníshgháníjįʼ ahoolzhishgo bił ííshjání ádeeshłííł dóó Lebanongi ayóó nídaʼniłtʼį́į́h dooleeł; índa ayóó nídaʼniłtʼį́įhgo tsin bee hodíłchʼil nahalin doo.

29 Áádóó éí yoołkáałdi bijéédaahkałii éí naaltsoos biyiʼdę́ę́ʼ saad deididootsʼį́į́ł, dóó doo daʼooʼínígíí binaaʼ yee doo ééhozindę́ę́ʼ dóó chahałheełdę́ę́ʼ daʼiidoołtsééł.

30 Áádóó Diyinkʼehgo dahinánígíí ałdóʼ ląʼí doo, doo Diyin Bóhólníihii baa bił dahózhǫ́ǫ doo, dóó diné baa dahojoobáʼígíí éí Israel biDiyin Ayóó Átʼéii yaa bił dahózhǫ́ǫ doo.

31 Tʼáá aaníí Diyin Bóhólníihii hináago tʼóó bááhádzid nilíinii ábidiʼdooldįįłgo deidoołtsééł, áádóó tʼáá ádzaagóó ánidahałtʼiʼígíí abidiʼdoolkʼą́ą́ł, dóó tʼáá áłtso bąąhági ádaatʼéii yíká dadéezʼį́ʼígíí nahjįʼ kódadoolnííł;

32 Áádóó háiida diné ánínígíí saad yikʼijįʼ yisʼą́ągo, áádóó daʼnídítį́į́hgi hachʼahodooshkeełígíí bá nidazhdooʼááł, dóó tʼáá ákogi ádaatʼíinii tʼáadoo biniyéhígóó nahjįʼ kódeileʼ.

33 Éí bąą, Diyin Bóhólníihii, Abraham yá nináʼídlaii ání, Jacob bighandóó háájéʼígíí yaa yáłtįʼígóó ání: kʼad Jacob doo baa yáhódóósįįł da, tsídeesyizgo biniiʼ doo yiidoogah da.

34 Ákondi baʼáłchíní yiyiiłtsą́ągo, shílaʼ bee íishłaaígíí, éí bitahgi, shízhiʼ deididoosįįł, áádóó Jacob biDiyin Ayóó Átʼéii deididoosįįł, dóó Israel biDiyin God yaa ááh dadinóozįįł.

35 Áádóó ałdóʼ diyinjí oodááł daʼasihígíí akʼidaʼdidootį́į́ł, áádóó saad dahółónígíí naʼnitin yáʼátʼéehii nídeididoolééł.