1 Ákondi, shooh, nihodoogáałjįʼ ayííłką́ągo, doodago Gentile dineʼé biyoołkáałdi—aooʼ, shooh Gentile dineʼé dóó Jew dineʼé, díí tʼáá ałah díí kéyahʼjįʼ ndahidookah dóó nááná łaʼ kédaayah yikááʼ dahólóonii, aooʼ, tʼáá ałtso nahasdzáán bikááʼgóó ałdóʼ, áko shooh, éí bąąhágiʼ ádaatʼéii dóó tʼáá ałtso doo yáʼádaashoonii yee tsiʼnaakai doo—

2 Áádóó áajįʼ ayíłką́ągo Diyin Tʼáá Ałtsoní bee Bóhólníihii haa doogááł; iiʼniʼ dóó nahasdzáán hidiisnááʼgo, dóó ayóó íidootsʼį́į́ł, dóó nahałtin bił níyol doo, níyoltsoh bee, dóó kǫʼ ágháánii haa didookʼaał.

3 Áádóó tʼáá ałtso ałʼąą dineʼé Zion yił daʼahóbáahii, dóó yichʼįʼ nidahwiiłnáanii, éí tłʼéeʼgo nijiizyeel nahalin doo; aooʼ, Diné dichin nilíinii neiyeełgo ashą́ nízin ndi, chʼénádziʼgo biiʼ sizíinii doo biiʼ siláhí da doo; éí doodaiiʼ diné dibááʼ nilíinii neiyeełgo eeshdlą́ą́ʼ nízin ndi, chʼénádzidgo tʼah dibááʼ biʼniiłhxį́į doo, dóó biiʼ sizíinii tʼah dichin nizin doo; aooʼ, hááłá tʼáá ałtso ałʼąą dineʼé Dził Zion yikʼijįʼ daʼahigánígíí ákódaatʼée doo.

4 Háálá áko shooh, tʼáá ánółtso bąąhágiʼ ádaahtʼínígíí niʼkódaołééh dóó baa ááh danoohsįįh, háálá hadadidoołwosh, dóó daahcha doo; aooʼ; tsiʼdahwohkah ndi tódiłhił doo bikʼee da; nidaʼnohtʼih ndi tó tsiʼnaʼiiłáhígíí doo bikʼee da.

5 Háálá áko shooh, Diyin Bóhólníihii yéego nihiʼiiłhaazh. Háálá áko shooh, danoołchʼiil; dóó Diyin yá yádaałtiʼii doo danoozį́įh da; dóó nihinaatʼáanii, dóó diyingo daʼooʼíinii nihitsʼąą nídoolʼį́į́ʼ bąąhági ádaatʼínígíí biniinaa.

6 Áádóó baa hodoolzhish Bóhólníihii Diyin God saad naaltsoos biyiʼgo nihaidooʼááł, áádóó daʼiiłhaazh yę́ę éí bizaad ádaatʼé dooleeł.

7 Áádóó áko shooh éí naaltsoos bidáʼdeeshjééʼ doo; dóó éí naaltsoos nahasdzáán alyáádę́ę́ʼ dóó nahoníyáajįʼ Diyin God bitsʼą́ą́déé ił ííshją́ą́ ályaii biyiʼ siláa doo.

8 Ákohgo, éí bidáʼdeeshjéʼígíí biniinaa, bidáʼdeeshjéʼígíí dineʼé tsiʼnaakai dóó bííghahí baa naʼaldeeh bijį́įdi doo baadootʼááł da. Ákohgo, naaltsoos bitsʼąąnaatʼáa doo.

9 Ákondi naaltsoos hastįį łaʼ baadootʼááł, dóó saad naaltsoos biyiʼdééʼ ííshjání íídoolííł, éí łeeyiʼ daʼałhoshígíí da bizaad, áádóó éí saad dabikáʼígíí nááná łaʼ yeidoonił;

10 Ákondi éí saad bidáʼdeeshjéʼígíí doo ííshją́ą́ ádoolnííł da, dóó doo naaltsoos háida yeidooʼááł da. Háálá éí naaltsoos Diyin God beʼadziil bee bidáʼdidooljah, éí ił ííshją́ą́ ályaii naaltsoos bidáʼdooljéʼígíí biyiʼ doo Diyin Bóhólníihii áníigo índa; ííshjání ádoolnííł, háálá áko shooh, nahasdzáán hadilyaadééʼ dóó nihoniyáajįʼ ádahoonííłígíí nihił ííshą́ą́ ádoolnííł.

11 Áádóó éí bijį́įdi naaltsoos bidádeeshjéʼę́ę́ biyiʼdę́ę́ saad dahooghangóó daóltaʼ dooleeł; dóó Christ bibeʼadziilii bee daóltaʼ doo; dóó nihokááʼ dineʼé baʼáłchíní díí tʼáá ałtso bił ííshjáá ádadoolnííł tʼáá níléídę́ę́ʼ ákótʼéego hoolzhish, dóó éí nihoníyáajįʼ tʼáá ákótʼée doo.

12 Ákohgo, éí bijį́įdi naaltsoos diné baa yááłtiʼ yę́ę baadootʼááł, naaltsoos nihokááʼ dineʼé bitsʼąą nanilingo doo yikʼídadooghaał da, doo łaʼ deidoołtsééł da, tʼáá hazhóʼó táá daʼooíinii danilínígíí tʼéiyá Diyin God bibeʼadziil yee deidínóółʼįįł, naaltsoos beiyítʼánéé; dóó éí naaltsoos tʼáá aaníí átʼéhígíí dóó dabiyiʼígíí yaa dahodoolnih.

13 Áádóó doo nááná łaʼ deidoołtsééł da, Diyin God íínizingo tʼéiyá tʼáá dikwíí deidoołtséél, éí tʼáá aaníí átʼéhígíí biʼoodlaʼ yee nihokááʼ dineʼé baʼáłchíní yił dahodoolnih; háálá Bóhólníihii Diyin God ádííniid daʼoodlání bizaad anoonééłdééʼ haʼoodzííh nahalin doo.

14 Ákohgo, Bóhólníihii Diyin God naaltsoos biyiʼdę́ę́ʼ saadígíí nihaidooleeł; áádóó laʼí daʼooʼíinii danilínígíí hadahadzihgo bił yáʼátʼéhígíí átʼáo bizaad niidooleeł; áko yííʼyá háíshį́į́ Diyin God bizaad doo yinízinígíí!

15 Ákondi shooh, baa hodoolzhishgo Bóhólníihii Diyin God naaltsoos yeidooááłígíí íídidooniił: díí saad doo bidádeesshjéʼígíí ndiijááh dóó nááná łaʼ baa dííjih, éí diné ííłtaʼii baa dííjih, kódidííniił: Díí yíníłta, naanáóshkʼąąh, áádóó diné ííłtaʼii ádidooniił: Naaltsoos shaadííʼaał, áádóó yídééshtaʼ.

16 Áádóó kʼad, nihokááʼ dineʼé bił dahatsohígíí dóó daʼatʼínígíí biniinaa kódaaníi doo, dóó doo éí Diyin God baa haaniih biniyé da.

17 Áádóó diné ádidoonííł: Naaltsoos doodeeshʼáál da, háálá bidáʼdeeshjééʼ.

18 Áádóó diné ííłtaʼii ádidoonííł: Yííníshtaʼgo doo bííghah da.

19 Ákohgo áhodooníłii éí, Bóhólníihii Diyin God naaltsoos dóó saadígíí diné doo ííłtaʼii yaa neidoojih; dóó diné doo ííłtaʼii ádidooniił: Shí éí doo ííłtaʼii da.

20 Áádóó Bóhóníihii Diyin God ábididoonił: Daʼííłtaʼii doo deidóółtah da, háálá éí doo deinizin da, dóó shinaanish tʼáá shí ádeeshlííł; ákohgo saad naaníjaaʼígíí yídííłtah.

21 Bidáʼdaʼdeeshjéʼígíí éí doo bididíílchił da, háálá éí tʼáá shí ííniizį́įhgo índa nihichʼįʼ ąą ádeeshłííł; háálá nihokááʼ dineʼé baʼáłchíní bił ííshjání adeeshłííł tʼáá shí shinaanish ashłééhgo bíneeshʼą́.

22 Ákohgo, saad yíníłtaʼ nidííniidyę́ę yííníłtaʼgo, dóó daʼooʼíinii danilínígíí bee nihił ahaʼdinishtʼánéé chóiséłtʼeʼgo, ákogo índa naaltsoos bidándiʼdooljah, dóó shinahjįʼ nídidííłʼį́į́ł, áko saad tʼáhdoo yiniłtaʼígíí éí hastʼeʼndeeshnił, tʼáá shí ííniizį́įhgo índa nihokááʼ dineʼé baʼáłchíní tʼáá átʼé bił ííshjání ádeeshłííł.

23 Háálá áko shooh, Diyin God nishłʼį́; dóó álíleekʼehgo Diyin God nishłʼį́; dóó nihokááʼ dineʼé bichʼįʼ ííshjání ádiʼdeeshnííł háálá adą́ą́ʼdą́ą́ʼ, dííjį́ dóó hoolʼáágóó doo łahgo ánááshnííł da, dóó nihokááʼ dineʼé baʼáłchíní doo bił naashnish da tʼáá hozhoʼí biʼoodląʼ binahjiʼ tʼéiyá.

24 Áádóó ánááhodooʼnííł Diyin Bóhólníihii saad yeiníʼánígíí yiyíłtahgo áyididooniił:

25 Ázha ákótʼée ndi díí diné tʼóó adaaníigo shichʼįʼ hadahadzih, áádóó bidaaʼ yee shaa dahaniih, ndi bijéí yee shitsʼádadineesdlį́į́ʼ, dóó yee shéédaaldzidígíí éí nihokááʼ diné binaʼnitin bitsʼą́ą́dóó yitihígíí átʼé.

26 Éí bąą, díí dineʼé bitahgóó diyingo naʼanish ayóóʼátʼéii ádeeshłííł, aooʼ, diyingo naʼanish ayóóʼátʼéii dóó baa aʼááh hasinii, áko bił éédahozinii bibee hódzą́ dóó daʼííłtaʼii ádadoodįįł, dóó bidiné nitsídaakeesii yee akʼidaʼdiʼtʼáanę́ę́ʼ bitsʼą́ą́ʼ nídidoolʼį́į́ł.

27 Áádóó yííyá binahatʼaʼ tsʼídá atłʼááhdi Diyin Bóhólníihii yitsʼąą ndeiniłʼinii! Áko hondaanish chahałheeł biyiʼ ádajiłʼį́; áádóó ádaaní: Háísh nihooʼį́, dóó háísh nihééhósin? Áádóó ałdóʼ ádaaní: Tʼáá aaníí, yaa nihínííł dininígíí éí hashtłʼish łeetsʼaaʼ ííłʼíní nahalingo beełtʼé. Ákondi shooh, bił ííshją́ą́ ádeeshłííł ní: Diyin Tʼáá Ałtsoní bee Bóhólníihii, éí bindaanish tʼáá átʼé shił bééhózin. Áko naanish ájiilaiígíí ádidoonííł, dooísh áshiinilaa da? Doodago tʼáadoo leʼé ílyaahígíí hashtʼebiilaiígíí ídidooniił, bí tʼáadoo yikʼiʼdiitą́ąh da?

28 Ákondi shooh, Diyin Tʼáá Ałtsoní bee Bóhólníihii ání: Nihokááʼ dineʼé baʼáłchíní tʼóó hóníshgháníjįʼ ahoolzhishgo bił ííshjání ádeeshłííł dóó Lebanongi ayóó nidaʼntʼį́į́h dooleeł; índa ayóó nidaʼntʼį́į́hgóó tsin bee hodíłchʼil nahalin doo.

29 Áádóó éí yoołkáałdi bijéédaahkałii éí naaltsoos biyiʼdę́ę́ʼ saad deididootsʼį́į́ł, dóó doo daʼooʼínígíí binaaʼ yee doo ééhozindę́ę́ʼ dóó chahałheeł dę́ę́ʼ daʼiidoołtsééł.

30 Áádóó Diyinkʼehgo dahiinánígíí ałdóʼ ląʼí doo, doo Diyin Bóhólníihii baa bił dahózhǫ́ǫ doo, dóó diné baa dahojoobáʼígíí éí Israel biDiyin Ayóóʼátʼéii yaa bił dahózhǫ́ǫ doo.

31 Tʼáá aaníí Diyin Bóhólníihii hiináago tʼóó bááhádzid nilíinii ábiʼdidooldį́į́łgo deidoołtsééł, áádóó tʼáá ádzaagóó ándahałtʼiʼígíí ábiʼdiʼdoolkʼą́ą́ł, dóó tʼáá áłtso bąąhági ádaatʼéii yikádadeezʼį́ʼígíí nahjįʼ kódadoolnííł;

32 Áádóó háida diné ánínígíí saad yikʼijįʼ yisʼą́ągo, áádóó daʼnídítį́į́hgi hachʼahodooshkeełígíí bándazhdooʼááł, dóó tʼáá ákogi ádaatʼíinii tʼáadoo biniyéhégóó nahjįʼ kódeileʼ.

33 Éí bąą, Diyin Bóhólníihii, Abraham yá nináʼídlaii ání, Jacob bighandóó háájéʼígíí yaa yáłtįʼígóó ání: kʼad Jacob doo baa yáhódóósįįł da, tsídeesyizgo biniiʼ doo yiidoogah da.

34 Ákondi baʼáłchíní yiyiiłtsą́ągo, shilaʼ bee iishłaʼígíí, éí bitahʼgi, shízhiʼ deididoosįįł, áádóó Jacob biDiyin Ayóóʼátʼéii deididoosįįł, dóó Israel biDiyin God yaa ááh dadinóozįįł.

35 Áádóó ałdóʼ diyinjí oodaał daʼasihígíí akʼidaʼdidootį́į́ł, áádóó saad dahółónígíí naʼnitin yáʼátʼéehii nídeididoolééł.