1 Kʼad shí, Nephi, saad náházoyę́ę łahgo baa hadeesdzih, ei éí Isaiah yee haadzííʼ yę́ę. Háálá áko shooh, Isaiah ląʼígo yee haadzíʼę́ę shidineʼé łąʼí chʼééh yikʼi daʼdiitįįh; Jew dineʼé haitʼáó Diyin bikʼeh áhodooníłígíí doo bił béédahózin da.

2 Háálá shí, Nephi, haitʼáó Jew dineʼé ádaʼałʼínígíí doo łąʼí bee nanétʼą́ąʼda; háálá chahałheełjí ádaalʼíinii yaa naakai ńtʼę́ę́ʼ, áádóó doo yáʼáshxǫ́ǫ́jí yaa naakai ńtʼę́ę́ʼ.

3 Ákohgo, shidineʼé bichʼįʼ éʼéshłééh, tʼáá háí shį́į́ yídéeshtah nízinígíí bichʼįʼ kodóó náházooʼígíí, áko Diyin God yee nahwiiʼaahii bił béédahózin doo, éí ałʼąą dineʼé tʼáá átʼé bichʼįʼ kodoolnííł, éí yee haadzíʼę́ę́ bikʼehgo.

4 Ákohgo, daʼíísínółtsʼą́ą́ʼ, O shidineʼé, Israel bighandóó háájéʼígíí, shizaad deisółtsʼą́ą́ʼ; háála Isaiah bizaad bikʼidoohtʼįįhgo nihá ndanitłʼa, ákótʼée ndi Diyin bikʼehgo áhodooníłígíí bił dahólónígíí éiyá doo bá ndanitłʼa da. Ákondi Diyin bikʼeh áhodooníłígíí łaʼ bee nihił hashne, iiʼ sizíinii shiiʼ hólónígíí binahjįʼ; ákohgo Jerusalemdę́ę́ʼ shizhéʼé bił dahdiiʼáázhyę́ędą́ą́ʼ doo nánitłʼahgóó bikʼiʼdiitʼánééʼ bikʼehgo nihił ííshją́ą́ʼ éʼéshłééh; háálá áko shooh, tʼáá bééhózínígo shidineʼé bił hashneʼgo shiiʼ sizíinii yaa bił hózhǫ́, éí yinahjįʼ ídahwiidoołʼáál.

5 Aooʼ, shiiʼ sizíinii Isaiah bizaad yaa bił hózhǫ́, háálá shí Jerusalemdę́ę́ʼ níyá, áádóó áadi Jew dineʼé ádaʼałʼíinii shinááʼ bee yiiłtsą́, dóó Jew dineʼé Diyin yá yádaałtiʼii yaa dahalneʼę́ę yikʼidaʼdiitą́, dóó Jew dineʼé akʼidaʼdiitánígi átʼáo dahinánée doo nááná ła dineʼ kótʼéego bichʼįʼ haʼoodzííʼ da, tʼáá hazhóʼó Jew dineʼé nidabiʼdiʼneestą́ʼígíí átʼáo tʼéiyá.

6 Ákondi shooh, shí, Nephi, Jew dineʼé nidabidiʼneestą́ʼígi átʼáo doo shaʼáłchíní nanétą́ąʼ da; ákondi shooh, shí éí, tʼáá shí, Jerusalemdi kééhashtʼį́į́ ńtʼę́ę́ʼ, ákohgo kéyah binaagóó ádahootʼéhígíí shił bééhózin; dóó Diyin God yee nahwiiʼaahígíí shaʼáłchíní bił chʼíníʼą́, éí Jew dineʼé bitahgóó ádahóótʼįįd, áádóó shaʼáłchíní beiyílyá, éí tʼáá ałtso Isaiah yee haadzííʼyę́ę éí tʼáadoo náházo da.

7 Ákondi shooh, tʼáá shí Diyin bikʼehgo áhodooníłígíí baa hashneʼ doo, doo nanitłʼagóó bikʼiʼdiishtįįhígíí bikʼehgo, éí binahjįʼ diné doo łaʼ adoosih da; ákótʼée ndi, Isaiah bił ííshją́ą́ ádaalyaa yę́ę bidahoolyaago éí tʼáá aaníi átʼéego dineʼé bił béédahodoozįįł.

8 Ákohgo, nihokááʼ dineʼé badaʼáłchíní bił danilį́, áádóó éí doo ádahodooníił da nízinígíí, éí íiyisíí bichʼįʼ haasdziih, dóó saadígíí shidineʼé tʼéiyá bágo ádeeshłííł; háálá shił bééhoozingo díí tʼáá íiyisíí bił danilį́į doo nihodoogáałjįʼ ayííłką́ągo; háálá éí beiníłką́ą́ góneʼ yikʼidaʼdiitą́ą doo; ákohgo, bá yáʼátʼééh doogo náházoh.

9 Áádóó bąąhági átʼéii biniinaa Jew dineʼé bitahgóó tʼááłáʼí oochíiłgo ádabiʼdisdįįd, ałdóʼ baʼátʼeʼ binahjįʼ ałkééʼ oochíiłgo ádabiʼdisdįįd; áko tʼáadoo łaʼ ádabiʼdisdįįd da Diyin Bóhólníihii yá yádaałtiʼii yaa hadahaasdzíiʼgo índa.

10 Ákohgo, dahodoochǫǫłígíí hoł hóóneʼ, shizhéʼé Jerusalemdóó dah diiyá bikééʼdóó; ákótʼée ndi, bijéí deistłʼis; áádóó Diyin bikʼehgo áhodoonííł shił ííshją́ą́ ályaaígíí bikʼehgo nidabiʼdistseed, tʼáá hazhóʼó Babylongóó dabiʼdisnáhígíí tʼéiyá chʼéékai.

11 Áádóó kʼad diyingo iiʼ sizíinii shiiʼ hólónígíí biniinaa díí bee haasdziih. Azhą́ dabiʼdishnááh ndi nináhidookah áádóó Jerusalemdi kéyah baa nidahidoolyééł; ákohgo, dabiʼdishchínéejįʼ baa ndahididooltʼááł.

12 Ákondi, shooh, anaaʼ hatah hólǫ́ǫ dooleeł, dóó daʼahijigą́ągo baa haneʼ doo; dóó beiníłką́ągo nihiTaaʼ Tʼáá Éí Tʼéiyá Bá Yizhchíinii níyáago, aooʼ, éí nahasdzáán dóó yáʼąąsh yiTaaʼ nilį́, atsʼíís bee hólǫ́ǫgo bichʼįʼ ííshjání ádidiʼdoolnííł, áko shooh, bikʼos kʼídaazʼá, dóó bijéí daastłʼis, dóó bąąhági átʼéii yaa naakaiígíí biniinaa yóóʼadeididooʼááł.

13 Áko shooh, tsin ałnáosʼáí bikáajįʼ deidiyoołhééł; dóó tsé niʼootséél góneʼ niiltį́ dóó tááʼ yiską́ągo anoonééłdę́ę́ʼ náádidoodááł; áádóó tʼáá ałtso bízhiʼ deiyoodlánígíí éí Diyin God bił hazʼą́ądi yisdádookah. Ákohgo, shiiʼ sizíinii ayóó bił hózhǫ́ Diyin bikʼeh áhodooníłígíí baa hashneʼgo, háálá éí bijį́ yiiłtsą́, dóó shijéí bízhiʼ diyinígíí yaa haniih.

14 Áádóó áko shooh áhodoonííł Messiah anoonééłdę́ę́ʼ náádiidzáago, dóó bidineʼé yichʼįʼ ííshjání áʼdiilyaago, dóó bízhiʼ deyoosdląądgo, áko shooh, Jerusalem náádoolchxǫǫł áko yíí Diyin God dóó bidineʼé bisodizin yikʼijįʼ nidaabaahígíí ábidiʼní.

15 Ákohgo, Jew dineʼé tʼáá ałtso ałʼąą dineʼé bitahgóó daʼníłtsʼą́ąjigo ałtsʼádahidínóolkał; aooʼ, dóó Babylon ałdóʼ doolchxǫǫł; ákohgo, Jew dineʼé nááná łaʼ dineʼé ałdóʼ daʼníłtsʼą́ąjigo ałtsʼádabidínóolkał.

16 Áádóó daʼníłtsʼą́ąjigo ałtsʼádabiʼdínóolkaadgo, dóó Bóhólníihii Diyin God nááná łaʼ dineʼé yee atíhóola, ląʼídi są́ náʼoogą́ąʼgo, aooʼ, tʼáá ałkééʼ iiʼhááʼayoochííłdę́ę́ʼ hoolzhishgo Christ, Diyin God biYeʼ, dóó bąąhági átʼéii bikʼé nináʼílyáhígíí, éí ahoolʼáágóó dineʼé tʼáá átʼé bá—áko éí Christ dayoosdląądígíí beiníłką́ą́di, dóó bízhiʼ binahjįʼ nihiTaaʼ nilíinii deidósin; bijéí dóó bílaʼ, hadaałtʼégóó dóó doo daachingóó, yee hoojoobaʼ ádaaníi doo, áko doo nááná łaʼ Messiah hádeidéézʼį́į́ʼ da doo, ákohgo, áajįʼ ayííłką́ągo éí díí íiyisíí dayoodlą́ą dooleeł.

17 Áádóó Diyin Bóhólníihii naaki aleeh góneʼ tʼáá bí bílaʼ yee áłah ánéidoodlééł bidineʼé yóóʼaheeskai dóó nahjįʼ kó daadzaaígíí. Ákohgo, diyingo naʼanish ayóó átʼéii dóó baa ááh hwiinidzin nihokááʼ dineʼé baʼáłchíní bitahgóó kwíidoolííł.

18 Ákohgo, saad yee yichʼįʼ hadoodzihígíí éí akéeʼdi yoołkáałdi bandahodooʼááł, Messiah tʼááʼaníníí, yóóʼadeideezʼánée bił béédahodooʼzįįł biniyé bił ííshją́ą́ ályaa; áádóó Messiah doo łaʼ náadoogááłgóó hádeidéézʼį́į́ʼ da doo, háálá doo łaʼ náádoogááł da, tʼáá hazhóʼó diné yeʼdidoolohgo Messiah tʼóó ádilʼínígíí tʼéiyá; háálá Messiah tʼááłáʼígo tʼéiyá Diyin yá yádaałtiʼii yaa dahalneʼ; dóó éí Messiah Jew dineʼé doo deidínóózį́į́ł da.

19 Háálá Diyin yá yádaałtiʼii ádaaníigo éí, shizhéʼé Jerusalemdę́ę́ʼ dah diiyá yéédą́ą́ʼhastą́ądi neeznádiin nááhaigo Messiah doogááł; áádóó Diyin Yá Yádaałtiʼí dóó Diyin God yá naalʼaʼí ádaaníigo, Jesus Christ, Diyin God biYeʼ nilį́įgo, bízhiʼ dooleeł.

20 Áádóó kʼad, shikʼiské, tʼáá bééhózínígo haasdzííʼ, doo bee adoohsihgóó, Áko Bóhólníihii Diyin God hináago Israel dineʼé Egypt kéyahdę́ę́ʼ chʼííníʼeezhgo, áádóó Moses ałʼąą dineʼé tłʼiishtsoh naʼałtseedii dabishhashgo diyin adziil yee náyííłdzííʼ; éí tłʼiishtsoh hachʼįʼ dahyidiiłtį́ éí tʼóó bikʼídazhdooghał biniyé, áádóó diyin adziil hainíláago tsé nízhdííłhałgo tó hááná; aooʼ, áko shooh díí tʼáá aaníigo ádíshní, dóó Bóhólníihii Diyin God hiná, doo nááná łaʼ yáʼąąsh biyaa ázhiʼ niilyáa da tʼáá hazhóʼó Jesus Christ, baa haasdzíʼígíí tʼéiyá, binajįʼ diné yisdádoogááł.

21 Ákohgo, díí biniinaa Bóhólníihii Diyin God yee shił ahaʼdeetʼą́ díí náhásóhígíí baa áháyą́ dóó náásgóó choidooʼįįłgo sinil doo, dóó shílástiiʼ baa dooʼnił, ałkééʼ náʼoochíiłgo, áko Joseph diyingo ałhaʼdeetʼánée bohodoolnííł, áko bílástsiiʼ doo anáábidiʼdooldįįł da nahasdzáán tʼáá hináágóó.

22 Ákohgo, díí ałkééʼ náʼoochíiłgo bił hoolzhish doo nahasdzáán tʼáá hináago; áádóó Diyin God íinízinígíí dóó bił yáʼátʼéhígíí bikʼehgo ádoonííł. dóó ałʼąą dineʼé díí saad nídaháasdzo dah deiyíleehígíí éí bikʼehgo bá nidahodootʼááł.

23 Háálá tsʼídá yéego bindeilnishgo ndaʼiidzoh, nihaʼáłchíní, áádóó nihikʼiské ałdóʼ bá laanaa daniidzingo Christ deidoodląął, dóó Diyin God yił kʼé náádaʼahididooʼniił biniyé; háálá nihił béédahózin tʼáá ałtso bee ádeitʼįįdígíí, bikééʼdóó bibee ajoobaʼ bee yisdádiikah.

24 Áádóó, azhą́ Christ deiniidlą́ą ndi, Moses bibee hazʼáanii bikʼeh dahoniilʼį́, áádóó Christ yéego bikééʼ nisiidzį́įgo bichʼįʼ dadíníitʼį́į́ʼ, ńléí bee hazʼáanii ałtso bohoolyaajįʼ.

25 Háálá, háálá díí biniyé bee hazʼáanii niilyá; ákohgo éí bee hazʼáanii nahjįʼ kódeilyaa, áádóó daʼiiniidlánígíí biniinaa Christ bee dahiniiʼná dasiidlį́į́ʼ; ákondi éí bee hazʼáanii bikʼedahoniilʼį́ háálá bee hazʼáanii ádaatʼé.

26 Áádóó Christ baa yádeiiltiʼ, Christ baa nihił dahózhǫ́, dóó Christ baa dahwiilneʼ, dóó Diyin bikʼeh áhodooníiłgo Christ doogááł dadiiʼní, áádóó nihił ííshją́ą́ ádaalyaaígíí baa nídaʼíidzóóh, áko nihaʼáłchíní bił béédahózin dooleeł háí lá yichʼįʼ dadeezʼį́įgo bibąąhági ádaatʼéii baa ndahididootʼááł.

27 Ákohgo, bee hazʼáanii baa yádeiiltiʼígíí éí haʼátʼáo nahjįʼ kólyaaígíí nihaʼáłchíní bił béédahózin doo; dóó éí, haitʼéégo bee hazʼáanii nahjįʼ kólyaaígíí bił béédahoozįįdgo, Christ bee iinánígíí yichʼįʼ dadéezʼį́į́ʼ doo, dóó bił béédahózin doo éí biniyé bee hazʼáanii niilyá. Áádóó Christ bibee hazʼáanii bohoolyaago, bijéí doo yichʼįʼ deidoołtłʼis da, díí bee hazʼáanii yóóʼádoolníiłgo.

28 Áádóó kʼad áko shooh, shidineʼé, éí bikʼos danitłʼiz dineʼé danohłį́; ákohgo, tʼáá bééhózínígo nihichʼįʼ haasdzííʼ, doo adoosihgóó. Áádóó saad bee haasdzíʼígíí nihikʼijįʼ tʼáá aaníigo haʼoodzííʼ átʼé; háálá diné yáʼátʼéhígíí bee ndínóotįįłgo tʼáá bíighah; yáʼátʼéehgo oodááłjí éí Christ joodlą́ą doo dóó doo nahjįʼ kwizhdoolííł da; háálá nahjįʼ kwijilaago Diyin yá yádaaltiʼii dóó dyin bibee hazʼáanii ałdóʼ nahjįʼ kwijilaa doo.

29 Áádóó kʼad áko shooh, bee nihichʼįʼ yáshtiʼ tʼáá ákótʼéego oodááł éí Christ joodlą́ą doo; dóó doo nahjįʼ kółʼíígóó; dóó Christ éí Israel biDiyin Ayóó Átʼéii átʼé; ákohgo tʼáá átʼé nihiyiʼ sizíinii, bee aniitʼéhígíí, nihíniʼ dóó tʼáá átʼé niheʼadziil bee bichʼįʼ yaa ádadoohnííł dóó deinohdlą́ą doo; áádóó kóhdzaago doo haitʼáo da nahjįʼ kónihidiʼdoolníił da.

30 Áádóó, biniyeii hólǫ́ǫgo, Diyin God bá ádaahtʼį́ dóó bibee óʼoolʼįįł bikʼeh dahoniłʼį́ ńléí Moses bibee hazʼáanii beílyáhígíí bohoolyaajįʼ índa.