1 Amoz biyeʼ, Isaiah, éí Judah kéyah dóó Jerusalem kin haalʼá áhootʼéí diyingo bił ííshją́ą́ ályaaígíí bee hoł hóóneʼ:

2 Áádóó baa hodoolzhish nihodoogáałjįʼ ayííłką́ągo, Diyin Bóhólníihii bighan éí dził bighą́ą́ʼdi ádoolnííł, áádóó dah daaskʼidígíí biláahdi ayóó átʼéego ádoolnííł, dóó ałʼąą dineʼé tʼáá átʼé áajįʼ íílį́į doo.

3 Áádóó diné tʼóó ahayóí kódaaníigo deíkáah doo, Sołtʼįʼ, haaʼíshąʼ Diyin Bóhólníihii bidził bighą́ą́ʼgóó diikah, Jacob biDiyin God bighanjįʼ hahidiikah; dóó Diyin God átʼéii yínanihidinóółtį́į́ł, áádóó bikʼehgo daʼnítiingóó deíníikááh dooleeł, háálá Ziondóó bee hazʼáanii bee hahatʼéehgo Jerusalemdóó Diyin Bóhólníihii bizaad hahwiileeh doo.

4 Áádóó Bóhólníihii dineʼé tʼóó ahayóí yá nahodiiʼaah doo, dóó yichʼahodooshkeeł: áádóó béésh hał háádahidootsiłgo bee nihwiildlaadí ádadoolnííł, índa tsiikʼidétáán háádahidootsiłgo bee tsin bee higéshí ádadoolnííł; ałʼąą dineʼé éí béésh hał doo yee daʼahigą́ą da doo, áádóó anaaʼ doo yínáádahoołʼaah da doo.

5 O Jacob bighandóó haojéʼígíí, hágo dóó Diyin Bóhólníihii bibee adinídíín biyiʼ deinííkááh dooleeł; aooʼ, hágo, háálá tʼáá ánółtso yóóʼahisookai, tʼáá ánółtso bibąąhági ádaatʼéii bichʼįʼ ahisookai.

6 Éí bąą, O Diyin Bóhólníihii, nidineʼé Jacob bighandóó haojéʼígíí yóóʼadííníʼą́, háálá haʼaʼaahdę́ę́ʼ, doo tʼáá aaníí ádaatʼéii hwiiʼhadadeezbin, dóó Philistia dineʼé nahalingo náásgóó áhodoonííł yaa halneʼii áhodilʼíinii deidiiztsʼą́ą́, dóó diné tʼáá azaago nidaakaihígíí baʼáłchíní yił daʼahótąʼ.

7 Bikéyahgi tʼáá íiyisí béésh łigaii áádóó béésh óola yee daʼatʼį́; áádóó yee daʼatʼínígíí doo ndahaaztʼiʼ da; bikéyahgóó doo chohooʼį́į́góó łį́į́ʼ deílʼá; bitsindaabąąs bijáád naakiígíí ałdóʼ tʼáadoo bee néelą́ʼí da.

8 Bikéyahgóó ałdóʼ beʼdaʼalyaii tʼóó ádahayóí; tʼáá bílaʼ yee adayilaahígíí yichʼįʼ ndahałá; éí tʼáá bílázhoozh yee ádayiilaa.

9 Áádóó diné tʼáá bitaʼígi ádaatʼéii doo yaaʼádooniił da, índa diné ayóó ádaatʼéii doo hojoobaʼ íínízin da doo, éí bąą, doo banídiʼdííʼááł da.

10 O tsiʼndaahkai, tsénííʼ góneʼ adoohkahgo, dóó łeeyiʼ nídadidoohtʼį́į́ł, háálá Diyin Bóhólníihii bikʼeʼíyéʼii dóó biʼayóó átʼéii atínihidoolííł.

11 Áádóó baa hodoolzhish éí yoołkáałdi diné bibee ádaa dahodzódliʼ ánoolninii hojoobaʼí ádabidiʼdoolnííł, áádóó aóó átʼéego ádaa deidzódlinii niʼjįʼ kódadoolnííł, índa Diyin Bóhólníihii tʼéiyá ayóó átʼée dooleeł.

12 Áko Diyin Tʼáá Ałtsoní bee Bóhólníihii tʼáá ałtso diné yaa doogááł beiiníłką́ągo, aooʼ, tʼáá ałtso dineʼé, aooʼ, ádaa dahojiʼniihii áádóó ádaa dahodzódlii índa ayóó ádajítʼé ídazhdólzinii tʼáá ádzíłtso hojoobaʼí ádahwidiʼdoolnííł.

13 Aooʼ, Diyin Bóhólníihii beiiníłką́ądi tʼáá ałtso Lebanondi gad yílʼáadi doogááł, háálá ádaa dadzódlíi dóó ádaa dahaniih; dóó Bashangi chéchil yílʼáadi tʼáá ájítʼé;

14 Áádóó dził aghádadeezʼahígíí bikááʼdi tʼáá átʼé, áádóó yáádaalkʼidígíí bikááʼdi tʼáá átʼé, dóó ałʼąą dineʼé dah deikááh ádaa dadzódlíi, dóó tʼáá ałtso ałʼąą dineʼé bitahgóó.

15 Áádóó yadaʼiiʼáago bikááʼdi tʼáá átʼé, áádóó tsé binaa ahéédaʼastłʼinígíí bikááʼdi;

16 Áádóó tónteel bikááʼ tsín naaʼeeł tʼáá átʼé, áádóó Tarshish bitsin naaʼeeł tʼáá átʼé, áádóó ndaashchʼąąʼgo bił daʼnílíínii tʼáá átʼé bikʼih.

17 Áádóó diné ádaadzoodlí yaaʼádoolnííł; dóó diné ádaadazódlíí éí aʼoh ádadoolnííł; dóó beiiníłką́ądi Diyin Bóhólníihii tʼéiyá ayóó átʼée doo.

18 Áádóó tóó beʼdaʼalyaaígííyę́ę tsiʼídá tʼáá ałtso yóóʼiidooghás.

19 Áádóó tsé biʼáán góneʼ dóó nahasdzáán bitséʼáán góneʼ ahidookah, háálá Diyin Bóhólníihii bikʼeʼéyéʼii bikʼi hodooleeł, dóó bibee óhólníihii ayóóʼátʼéii atidabidoolííł, adziil yee yiizįʼgo kʼeyah yéego yidooghał.

20 Éí bíjį́įdi diné éí habéésh łigaii beʼdaʼalyaa, áádóó habéésh óola beʼdaʼalyaaí, bichʼįʼ nidahojiłáa doo biniyé ádá ádajiilaa yę́ę, éí naʼazísí dóó jaaʼabaní bichʼįʼ adaahazhdoołkał;

21 Áko tsé ndahaazdláád, dóó tsé dadeeshzhah biyíʼ góneʼ adajiijeeh doo, háálá Diyin Bóhólníihii bikʼeʼéyééʼii yéédadooldzííł dóó bee ayóó átʼéii bitsʼádiʼnílíidgo atʼídabiʼdoolííł, nahasdzáán tʼóó báhádzidgo tsxííłgo neidiyoołhxą́ą́łgo.

22 Diné bichį́į́h yee háá háyoołígíí tʼáadoo bichʼįʼ choʼdaʼíínółʼíní; háálá haʼátʼéegoshąʼ haʼahódlíigo haa nitsáhákees?