Bybelfoto’s

Bybelfoto’s

Bybelfoto’s

Inleiding
Hierdie foto’s van belangrike plekke beeld die landstreke uit waar Jesus gewandel het, waar die Bybelse profete geleef en onderrig het en waar baie skriftuurgebeure plaasgevind het.
Oorsig
Onderstaande kaart toon die ligging van die foto’s in hierdie gedeelte. Op die volgende bladsye word elke genommerde foto vergesel van ’n kort beskrywing van die ligging. Betekenisvolle skriftuurlike gebeure van daardie area word dan gelys saam met die skriftuurverwysings sodat u kan weet waar om meer te lees oor daardie gebeure.
1. Nylrivier en Egipte
Plantegroei op die walle van die Nylrivier. Op ’n plek soos hierdie het Moses se moeder haar babaseun versteek. In die agtergrond is die woestyngebiede wat die meeste van Egipte uitmaak.
2. Berg Sinai (Horeb) en die Sinaiwoestyn
Daar is verskeie moontlike liggings vir Berg Sinai. Een van die tradisionele liggings is Jebel Musa (Berg van Moses), hier in beeld.
3. Woestyn van Judéa
Die woestyn van Judéa is geleë oos van Jerusalem en daal af na die Dooie See.
4. Kades-Barnéa
Hierdie is ’n noord-oostelike uitsig van die groot woestynvallei (ook genoem ’n wadi) waar Kades-Barnéa geleë is. Die stroom wat hier vloei gedurende die reënseisoen maak dit ’n goed-benatte en vrugbare plek in die Sinwoestyn.
5. Grafte van die Patriarge
Hierdie gebou, een van die mees bekendes in die Heilige Land, is opgerig in Hebron deur Koning Herodes bo-op die tradisionele terrein van die grot van Magpéla, wat deur Abraham gekoop is vir ’n familiebegraafplek (Gén. 23).
6. Heuwelland van Judéa
Die heuwelland van Judéa is omtrent 56 kilometer lank en 27 kilometer breed. Meeste van die land is klipperig en moeilik om te bewerk. Die heuwels word deur valleie opgebreek waarvan die land redelik vrugbaar is. Die vroegste Israeliete het in hierdie heuwels gewoon, en dit gebruik as beskerming teen invallers.
7. Betlehem
Hierdie foto toon klipperige heuwels en skaapherdervelde in die voorgrond, met die moderne stad Betlehem in die agtergrond.
8. Jerusalem
Noordwaartse uitsig oor Jerusalem. In die middel van die foto is ’n Moslem heiligdom met ’n goudbeslane koepel, genaamd die Koepel van die Rots. In antieke tye het die Jode in die tempel wat daar geleë was, aanbid. Die mure naby die Koepel van die Rots omring die ou stad Jerusalem. Aan die regterkant van die muur is die Kidron-vallei. Heel regs, buite die foto, is die Olyfberg. Aan die noordekant, anderkant die Koepel van die Rots, is ’n moontlike ligging van Gólgota, of Plek van die Hoofskedel.
9. Tempel van Herodes
Hierdie foto toon ’n model van die tempel van Herodes (1:50 skaal) soos wat dit vermoedelik was in 67 n.C. Die muur om die tempelkompleks omring die Heilige wat die Allerheiligste, die heilige plek, en die drie groot howe bevat.
10. Trappe na die Tempel
Die tempelgebied was in verskillende howe verdeel, en die buitenste howe was op die laagste vlak geleë. Die tempelgangers het deur verskeie hekke ingegaan, insluitend dié wat opwaarts gegaan het vanaf hierdie trappe na die buitenste howe en dan na die binneste howe. Duisende mense het hierdie trappe bestyg deur die jare, insluitend die Seun van God. Toe die leër van Titus hierdie tempel in 70 n.C. vernietig het, was die trappe bedek met rommel. Hulle is in die 1970s deur argeoloë ontbloot gedurende uitgrawings van ’n gedeelte van die ou stad Jerusalem.
11. Olyfberg
Uitsig ooswaarts na die Olyfberg. Die gebou in die voorgrond dui ’n moontlike ligging aan van die Tuin van Getsémané. Op 24 Oktober 1841 het Ouderling Orson Hyde van die Kworum van die Twaalf Apostels die Olyfberg opgestap en ’n profetiese gebed van toewyding gedoen vir die terugkeer van die kinders van Abraham en die bou van die tempel.
12. Tuin van Getsémané
Hierdie foto van ’n ou olyfboom is geneem op ’n plek waar, volgens oorlewering, die Tuin van Getsémané geleë was. Die Saligmaker het hier naby gebid nadat Hy die bo-kamer verlaat het op die aand van sy verloëning.
13. Gólgota
Hierdie rotswand, wat soos ’n skedel lyk, is net buitekant Jerusalem se Damaskuspoort (Joh. 19:17, 20). Dit is ’n moontlike ligging van Gólgota, waar die Kruisiging plaasgevind het.
14. Tuingraf
Moontlike terrein van die tuingraf van Josef van Arimathéa. Sommige moderne profete het gevoel dat die Saligmaker se liggaam in die graf wat hier getoon word, geplaas is.
15. Jérigo
Hierdie foto toon plantegroei in hedendaagse Jérigo. In antieke tye was dit ’n ommuurde stad in die vallei van die Jordaanrivier, 252 meter onder seespieël. Dit is ’n ryk landbougebied waar dadelpalms en sitrusboorde floreer. In die agtergrond is die tradisionele Berg van Versoeking (Matt. 4:1–11).
16. Silo
In hierdie westelike uitsig is die ruïnes van die antieke stad Silo net links van die middel.
17. Sigem
Die antieke ligging van Sigem. In die voorgrond is Berg Gerísim, en in die agtergrond is Berg Ebal. Sigem is tussen hierdie twee berge geleë.
18. Dotan in Samaría
Dotan word gekenmerk deur riwwe en valleie. Dit is goeie weiveld. Toe die Israeliete hulle hier gevestig het, is die streek aan Manasse gegee.
19. Cesaréa en die Vlakte van Saron na Karmel
Noordwaartse uitsig oor die antieke seehawe van Cesaréa en die Vlakte van Saron. Aan die bokant van die foto kan die Karmelbergreeks gesien word.
20. Joppe
Noord-westelike uitsig oor die hawestad Joppe.
21. Jísreël Vallei
Suid-westelike uitsig van die top van Berg Tabor na ’n gedeelte van Jísreël-vallei, ook bekend as die Vlakte van Esdraelon. Alhoewel die Jísreël-vallei dikwels beskou word as een groot vallei, is dit eintlik ’n reeks van valleie wat die Vlakte van Akko met die Jordaanvallei en die See van Galiléa-streek met mekaar verbind. Die vallei van Megíddo, byvoorbeeld, is in die westelike gedeelte van hierdie vallei. Die Jísreël-vallei was die hoofroete deur die Heilige Land en tussen die Middellandse See aan die weste en die Jordaanvallei aan die ooste.
22. Berg Tabor
Noordwestelike uitsig na Berg Tabor. Die laagland om Berg Tabor is deel van die Jísreël-vallei. Násaret lê in die heuwels naby Berg Tabor.
23. See van Galiléa en die Berg van Saligsprekinge
Die suidwestelike uitsig oor die noordweste hoek van die See van Galiléa, ’n varswater meer. Die heuwel in die middel voorgrond is die tradisionele ligging van die Berg van Saligsprekinge. Kapérnaüm is na links, buite die foto. Tibérias is verder suid langs die westelike kus.
24. Kapérnaüm
Kapérnaüm, geleë aan die noordelike oewer van die See van Galiléa, was die middelpunt van Jesus se bediening in Galiléa (Matt. 9:1–2; Mark. 2:1–5). ’n Belangrike en florerende vissers- en handelsmiddelpunt, dit was die tuiste van nie-Jode sowel as Jode. Die bevolking van die eerste eeu het waarskynlik nooit 1,000 mense oorskry nie. Kapérnaüm was geleë op die kruispad van belangrike handelsroetes met vrugbare landbougrond. Romeinse soldate het badhuise en bergingsplekke hier opgerig. Ten spyte van die talle wonderwerke wat hier verrig is, het die mense in die algemeen die Saligmaker se bediening verwerp. Jesus het daarom die stad vervloek (Matt. 11:20, 23–24). Mettertyd het Kapérnaüm in onbruik verval en is steeds onbewoond.
25. Jordaanrivier
Die Jordaanrivier begin noord van die See van Galiléa, vloei daarin, en stroom verder suid na die Dooie See. Hierdie foto is geneem naby die rivier se uitvloei van die See van Galiléa.
26. Cesaréa-Filíppi
Cesaréa-Filíppi is geleë aan die voet van Berg Hermon. Hierdie fontein is een van die bronwaters van die Jordaanrivier. Herodes Filippus, wat hierdie area regeer het, het ’n stad hier gebou ter ere van Caesar (sy keiser) en homself; die stad is voorheen Panias genoem, en word vandag Banias sowel as Cesaréa-Filíppi genoem.
27. Násaret
Hierdie uitsig oor die moderne stad Násaret kyk suidwaarts, Násaret was ’n klein dorpie in Bybelse tye.
28. Dan
Die antieke stad Dan was Lesem (Jos. 19:47) of Lais (Rigt. 18:7, 14) genoem voor die Israeliete die land in besit geneem het. Die fonteine wat by hierdie terrein geleë is, tesame met die fonteine by Cesaréa-Filíppi, is die hoofbronne van die Jordaanrivier. Jeróbeam se tempelterrein word hier getoon.
29. Athene
Hierdie foto, geneem van die Areópagus (Mars se Heuwel), toon die Akropolis van Athene, ligging van heilige plekke van verskeie heidense gode. Athene was die antieke Griekse hoofstad van Attika en in Nuwe Testamentiese tye was dit in die Romeinse provinsie van Acháje. Dit was vernoem ter ere van die heidense Griekse godin Athene. Teen Nuwe Testamentiese tye het Athene meeste van sy eertydse prag en praal verloor, maar het nog steeds beelde en monumente van gode en godinne bevat, insluitende die “Onbekende God” (Hand. 17:23).
30. Korinthe
Korinthe was die hoofstad van die Romeinse provinsie van Acháje. Dit was geleë op die landengte wat die Peloponnesos met die vasteland van Griekeland verbind het, met ’n hawe aan beide die oostelike en westelike kante. Dit was ’n hawestad van rykdom en invloed.
31. Éfese
Die ruïnes van die Griekse teater by Éfese, waar die Apostel Paulus gepreek het. Gedurende Nuwe Testamentiese tye was Éfese dwarsdeur die bekende wêreld bekend vir sy wonderlike tempel wat ter ere van die heidense Romeinse godin Diana gebou was. Tans in ’n vervalle toestand, was Éfese eens die hoofstad van die Romeinse provinsie van Asië en ’n groot handelsentrum. Die silwersmede van die stad het ’n florerende besigheid gehad in die handel van beeldjies van Diana.
32. Eiland van Patmos
Patmos, ’n eiland in die Egeïese See waarheen Johannes verban is (Openb. 1:9). Volgens oorlewering het hy daar in die marmersteengroewe gewerk.