I le Faatoaga o Ketesemane, na amata ai e Iesu Keriso ona tauaveina i Ona lava luga ia agasala a tagata uma o se vaega o Lana Togiola. Na faalataina e Iuta ia Iesu i taitai Iutaia. Ona faamasinoina ai lea e le tusa ai ma tulafono ia Iesu i luma o Kaiafa, o le faitaulaga sili, lea na aumaia ai ni tuuaiga pepelo e faasaga ia te Ia. O le taimi lea, na faafitia faatolu ai Peteru na te le iloa le Faaola ia i latou o e sa faailoaina o ia o se tasi o soo o Iesu Keriso.
Fai i le vasega e mafaufau i le tulaga lenei: O se alii talavou na ta’u atu i ai mai lava i lona talavou o lona tiute le faamisiona talai. I le avea ai o se talavou, sa ia iloaina lava e tatau ona faamisiona ae sa tauivi ma le tautino atu e alu. E sili lona fiafia i isi avanoa ma e popole o le a taofia o ia ona o le misiona mai le mauaina o na poto masani.
O a nisi tulaga e ono ese ai manaoga o alii talavou ma tamaitai talavou mai mea e finagalo ai le Tama Faalelagi latou te faia? (Lisi tali a tamaiti aoga i le laupapa.)
Aisea e faigata ai i nisi taimi ona fai mea ua tatou iloa e finaglo le Tama Faalelagi tatou te faia?
Valaaulia le vasega e vaavaai mo mataupu faavae i le Mataio 26:31–46 ia e mafai ona fesoasoani pe faigata ia i latou ona usitai i le finagalo o le Tama Faalelagi.
Faamanatu i le vasega e pei ona tusia i le Mataio 26:1–30, na talisua le Alii i le Paseka faatasi ma Ana Aposetolo ma faatuina le faamanatuga.
Valaaulia ni tamaiti aoga e feauauai i le faitauina leotele o le Mataio 26:31–35. Fai atu i le vasega e mulimuli i le faitauga, ma vaavaai po o le a le mea na valoia e Iesu o le a tupu i Ana Aposetolo.
O le a le mea na fetalai i ai Iesu o le a tupu i Aposetolo i lena po?
Faamatala o le talaaaga lea, o le upufaatausuaio lona uiga o le pauu po o le liliu ese po o le lafoai.
Na faapefea ona tali atu Peteru ma isi Aposetolo i le fetalaiga a le Faaola?
Valaaulia se tamaitiiti aoga e faitau leotele le Mataio 26:36–38. Fai i le vasega e mulimuli ai, ma vaavaai po o fea na o i ai Iesu ma Aposetolo ina ua uma le tausamiga o le Paseka. Valaaulia tagata aoga e lipoti mai mea latou te maua.
Fai i le vasega e sue i le Ata o le Tusi Paia,nu. 11, “Mauga o Olive” ma le nu. 12, “Faatoaga o Ketesemane” i le tusi paia o le King James a le Aupaia o Aso e gata ai. Faamatala o Ketesemane o se toga olive i luga o le Mauga o Olive i tuapa o Ierusalema ma o le igoa Ketesemane o lona uiga o le “soligavine.”
Ata
Mauga o Olive
Mauga o Olive
Ata
Faatoaga o Ketesemane
Faatoaga o Ketesemane
O a fasifuaitau i fuaiupu 36–38o faamatala mai ai lagona o Iesu a o Ia ulufale atu i Ketesemane?
Valaaulia se tagata e faitau leotele le Mataio 26:39, ma fai i le vasega e vaavaai pe o a mea na faia e Iesu ina ua “faaitiiti atu i luma” i le togalaau.
O a upu po o fasifuaitau i fuaiupu 37–39ua faamatala mai ai le avega faigata sa oo i ai Iesu?
O le a le mea na ole atu Iesu i le Tama e aveese mai ia te Ia?
Uu i luga se ipuinu. Faamatala o le ipu na faasino i ai le Faaola o se faatusa o le puapuaga oona sa ia oo i ai o se vaega o le Togiola. I Ketesemane, na amata ai e Iesu ona tauaveina i Ona lava luga ia agasala ma mafatiaga o tagata uma o le vaega o Lana taulaga sili togiola.
Valaaulia se tagata e faitau leotele le saunoaga lenei a Elder Jeffrey R. Holland o le Korama a Aposetolo e Toasefululua, o le sa faamalamalamaina mea na ole atu ai Iesu i le Tama ina ua Ia ole atu e aveese le ipu mai ia te Ia:
Ata
Elder Jeffrey R. Holland
O le mea moni, fai mai o Ia, ‘Afai e i ai se isi ala, e sili pe a ou ui i lena. Afai e i ai se isi ala — soo se isi lava ala — ou te talia ma le fiafia. … Peitai i le iuga, e lei aveesea le ipu”(“Aoao Atu, Folafola Atu, Faamalologa,” Ensign, Jan. 2003, 41).
Atonu e te manao e fautuaina atu e maka e le vasega le fasifuaitau “ae ui o lea aua le faia lo’u loto, a o lou finagalo”fuaiupu 39
E ui sa ole atu Iesu mo se ala e ese ai e faataunuu ai faamoemoega a le Tama, o le a le mea sa Ia faia e faataunuu ai le Togiola? (E ao i le vasega ona faailoa mai se upumoni e pei o lea: Na tuuina atu e Iesu Keriso Lona loto i le finagalo o le Tama e faataunuu ai le Togiola.
O le a se mea e mafai ona tatou aoao e uiga ia Iesu mai Lona naunautai e gauai atu i le finagalo o le Tama Faalelagi e ui o lona uiga o le a Ia onosaia se puapuaga tele ma iu ai i na maliu?
Tusi le faamatalaga lenei e lei maea i luga o le laupapa: Tatou te mulimuli i le faataitaiga a Iesu Keriso pe a tatou …
E faapefea ona e faamaeaina lenei faamatalaga e fua i mea sa tatou aoaoina mai le Mataio 26:39 (O le faaaogaina o upu a le vasega, faamaea le faamatalaga ina ia aumaia ai le upumoni lea: Tatou te mulimuli i le faataitaiga a Iesu Keriso pe a tatou filifili e gauai atu o tatou loto i le finagalo o le Tama Faalelagi.
Faamanatu i le vasega le tulaga o le alii talavou lea sa taufeto’i e fai se misiona, faapea foi isi tulaga o loo lisi i luga o le laupapa.
E mafai faapefea i le faataitaiga a le Faaola ona faamalolosia i tatou i nei tulaga?
Valaaulia le vasega e mafaufau i taimi e ui ina ese o latou manao mai le finagalo o le Tama Faalelagi, ae iu lava ina latou filifili e mulimuli i Lona finagalo. Fai i ni nai tagata e faasoa mai o latou aafiaga ma faamatala pe aisea na latou faia ai lena filifiliga ma pe o a ni o latou lagona i ai.
Fautuaina le vasega e faailoa mai se ala patino o le a latou mulimuli ai i le faataitaiga a Iesu Keriso e ala i le gauai atu o o latou loto i le finagalo o le Tama Faalelagi.
Valaaulia le vasega e toe iloilo le Mataio 26:37–38, ma vaavaai mo faatonuga a le Faaola ia Peteru, Iakopo, ma Ioane i Ketesemane.
O a faatonuga na tuu atu e Iesu ia Peteru, Iakopo, ma Ioane?
O le a sou manatu o le a le uiga o le faatonuga e “mataala faatasi ma au”? (fuaiupu 38).
Ina ia fesoasoani ia malamalama le vasega pe aisea e ono manaomia ai e soo le faatonuga a le Faaola ia mataala faatasi ma Ia, faamatala ina ua o mai ia soo i le faatoaga, sa latou “amata ona matua ofo, ma atuatuvale tele, ua muimui ai i o latou lava loto, i le fia iloa pe le o le Mesia lenei”(Faaliliuga a Iosefa Samita, Mareko 14:36 [i le faaopoopoga i le Tusi Paia]). O le faatonuina o Ona soo e mataala faatasi ma ia, sa lapataia e Iesu i latou ina ia nofouta aua o le a tofotofoina lo latou faatuatua ia te Ia.
Aisea o le a tau fesilisili atu ai le au soo pe o Iesu o le Mesia moni lea? (E toatele Iutaia e lei malamalama o le a puapuagatia le Mesia ma maliu ae sa latou manatu o le Mesia o le a faasaolotoina ia Iutaia e ala i le faatoilaloina o Roma.)
Valaaulia se tagata e faitau leotele le Mataio 26:40, ma vaavaai po o le a le mea na maua atu e Iesu nei Aposetolo e toatolu o fai a o tatalo o Ia. Valaaulia tagata aoga e lipoti mai mea ua latou mauaina. Faamatala o le Faaliliuga a Iosefa Samita o le Luka 22:45 o loo ta’u mai ai sa momoe le au soo, “aua ua tutumu i latou i le faanoanoa.”
Aisea na ono faatumulia ai le au Aposetolo i le faanoanoa?
Mata o a ni ou lagona pe ana e i ai i lo latou tulaga ma iloa ai ua e moe ae le mataala faatasi ma le Faaola?
Valaaulia se tagata aoga e faitau leotele le Mataio 26:41, ma fai atu i le vasega e vaavaai mo mea na fetalai atu Iesu i Ona soo e fai. Valaaulia le vasega e lipoti mai mea na latou maua.
O le a le mataupu faavae e mafai ona tatou aoao mai faatonuga a le Faaola i nei Aposetolo? (E tatau i le vasega ona faailoa mai se mataupu faavae e faapei o lea: Afai tatou te mataala ma tatalo e le aunoa, o le a tatou maua le malosi e teena ai tofotofoga.
O le a sou manatu i le uiga o le fasifuaitau “ua manao i ai le loto a o le tino ua vaivai”?fuaiupu 41 E faapefea la ona faatatau lenei mea i le teena o tofotofoga?
Toe manatu o le “mataala” o lona uiga o le ala, lemapu, po o le nofouta. E mafai faapefea e le mataala faaleagaga ma le tatalo ona fesoasoani ia i tatou e faatoilalo ai o tatou vaivaiga ma tetee atu i tofotofoga?
Valaaulia le vasega e mafaufau loloto pe na latou faamatuu atu i tofotofoga, faapei o Aposetolo i Ketesemane, ona sa latou le tatalo pe mataala. Fai i ai e mafaufau pe na faapefea ona aafia i latou i lena filifiliga. Valaaulia le vasega e mafaufau i taimi na latou teena ai faaosoosoga e ala i le tatalo ma le mataala.
O le a se mea sa fesoasoani ia te oe e ogatusa ai ma le mataala faaleagaga ma le tatalo?
Molimau atu e mafai ona tatou teena faaosoosoga pe a tatou mataala ma tatalo e le aunoa. Valaaulia le vasega e tusi i se fasipepa se mea e tasi o le a latou faia e mataala atili ai ma tatalo e le aunoa. Fautuaina i latou e o ma ave a latou pepa e faamanatu atu ai ia i latou la latou sini.
Otooto le Mataio 26:42–46 i le faamatala atu sa tatalo faatolu Iesu i le Faatoaga o Ketesemane. O taimi taitasi lava sa Ia faaali atu ai Lona naunau e usitai i le finagalo o Lona Tama.
Ua pue faapagotaina Iesu ma faamasinoina i luma o Kaiafa
Valaaulia se tagata e faitau leotele le saunoaga lea a Gerald N. Lund, o le na avea mulimuli ane ma se tasi o Fitugafulu:
Ata
Elder Gerald N. Lund
“Manatu [o Iesu Keriso] le Tagata e ona ia le mana, o lona malamalama, o lona mamalu o loo tu lelei ai le atulaulau, o le tagata a tulei saunoa ona i ai lea o le malosiaga, aniva, o fetu—a ua tu i luma o tagata amioleaga ma ua faamasinoina e i latou e pei e leai se aoga po o se taua!” (“Knowest Thou the Condescension of God?” i le Doctrines of the Book of Mormon: The 1991 Sperry Symposium, ed. Bruce A. Van Orden and Brent L. Top [1992], 86).
Tusi le Mataio 26:47–68 i luga o le laupapa. Fai i le vasega e aoao atu fuaiupu nei, ma vaavaai pe na faapefea e Iesu Keriso ona faaauau le gauai atu i le finagalo o Lona Tama tusa lava pe na faia ma le le tonu o Ia ma faamasinoina e tagata amioleaga. E fuafua i manaoga o lau vasega, e mafai ona e faitauina leotele nei fuaiupu o se vasega, vaevae le vasega i ni paga e faitau leotele ai fuaiupu, pe faatonu le vasega e faitau filemu.
Nai lo le faatonuina o le vasega e faitau leMataio 26:47–68, e mafai ona e faaalia ni vaega o vitio nei mai le The Life of Jesus Christ Bible Videos: (1) “Ua Puapuagatia le Faaola i Ketesemane” (time code 5:53–8:30), lea e faaalia ai Iesu Keriso o faalataina e Iuta ma pue faapagotaina, ma le (2) “Ua Faamasinoina Iesu i luma o Kaiafa, Ua Faafiti Peteru na te Le Iloa o Ia” (time code 0:00–1:40), lea e faaali mai ai Iesu o faamasinoina e Kaiafa, sasa, ma tuufeanu i ai. O loo maua nei vitio i luga o LDS.org.
A uma ua lava se taimi, fai atu fesili nei:
Na faapefea ona faagauai atu Iesu Keriso i le finagalo o le Tama Faalelagi tusa pe na taulimaina ma le le tonu o Ia ma faamasinoina e tagata amioleaga?
Valaaulia se tamaitiiti aoga e faitau leotele le Mataio 26:53. Fai i le vasega e mulimuli ai, ma vaavaai pe o le a le fetalaiga a Iesu i le mea semanu e mafai lava ona Ia faia i nei mea na tutupu.
O le a se mea sa mafai lava e le Faaola ona fai?
Nai lo le ole atu mo se lekeona o agelu po o se isi lava mana faalelagi e laveaiina o Ia, o le a le mea sa faia e Iesu?
O le a se mea o aoao mai ia te oe i lenei mea e uiga i le naunautai o le Faaola e faia le finagalo o le Tama Faalelagi e ui lava i tulaga na i ai?
E ui na i ai ia Iesu Keriso le mana e faaumatia ai tagata na fepo ia te Ia ma tuufeanu ia te Ia, ae sa Ia mafatia ma onosai ma le naunautai (tagai 1 Nifae 19:9). E lei iloa e taitai ma fitafita o le mana e le iu o Iesu sa mafai ona to mai, pe ana faapea e finagalo le Tama Na te faia lena mea.
Ta’u i ai e pei ona tusia i le fuaiupu 56, o le valoaga a le Faaola faapea o le a liliu ese le au Aposetolo mai ia te ia, ua faataunuuina. Peitai, o lea liliu ese sa na o sina taimi.
Otooto le Mataio 26:69–75 e ala i le faamatala a o faamasinoina Iesu ina ua uma ona puefaapagotaina o Ia, sa faafitia faatolu e Peteru na te le iloa o Ia. (Manatua: O le faafitia e Peteru o le a toe auiliiliina atili i le lesona i le Luka 22.)
Molimau atu i upumoni na faailoa mai i le lesona lenei.
Tala ma Faamatalaga o Talaaga
Mataio 26:39. “Ae Aua Le Faia Lo’u Loto, ae o Lou Finagalo”
Sa faamalamalama mai e Elder Jeffrey R. Holland o le Korama a Aposetolo e Toasefululua:
“Afai e mafai ona e tuua se aoaoga tautoga e tasi mo au tagata aoga e tali atu i le taulaga lemafaatusalia a le Faaola mo i latou, lana togisala mo a latou soligatulafono,lona faanoanoaga mo a latou agasala, tuua mo i latou le manaomia e usitai —ma ua’i atu i itula o taimi faigata e filifilia ai ‘le finagalo o le Tama’ [3 Ne. 11:11], po o le a lava le tau. Latou te le faia lena mea i taimi uma, pe sili atu nai lo le mea e mafai e oe ma au ona fai, ae e ao ona avea lena mea ma a latou sini; lea foi e ao ona avea ma o latou faamoemoega. “O le mea sa foliga mai sa sili ona naunau Keriso e faamamafa mai e uiga i Lana misiona—i tua atu o uiga mama patino ma tua atu o lauga mananaia ma e oo lava i tua atu o le faamalologa, o le, sa Ia tuuina atu Lona loto i le finagalo o le Tama” (“Teaching, Preaching, Healing,” Liahona, Ian. 2003, 41).
