Na molimau atu Iesu Keriso o Ioane le Papatiso na auina mai muamua e saunia le ala mo Ia, ma sa Ia folafola atu le malologa ia i latou uma o e o mai ia te ia. Sa tali atu Iesu i tuuaiga a le au Faresaio faapea o Lona mana e mai le tiapolo. Sa ia lapataia i latou mai le faia o tuuaiga pepelo ma le sailia o faailoga, ma sa ia aoao atu le faataoto i le fale tuufua.
Ua molimau atu Iesu Keriso o Ioane le Papatiso na muamua ona auina mai e saunia le ala mo Ia
Faaali atu i le vasega se ata o se leoleo, se fomai, ma Iesu Keriso.
Aisea e taua ai le iloa faapea o nei tagata o i latou moni lava ia ia faaali mai? E mafai faapefea ona e iloa o i latou lava ia ua faaali mai?
Faamatala i le taimi o le galuega faaletino a Keriso, e toatele sa saili ia iloa pe o Ia o Le ua faaali mai. Fai i le vasega e vaavaai mo upumoni ao latou suesueina le Mataio 11lea e mafai ona fesoasoani ia i latou e atinae ai a latou lava molimau pe o ai Iesu Keriso.
Faamatala na pue faapagotaina e le Tupu o Herota ma faafalepuipuia ia Ioane le Papatiso. Valaaulia se tamaitiiti aoga e faitau leotele le Mataio 11:2–3 Fai i le vasega e mulimuli ai, ma vaavaai mo le fesili na auina atu e Ioane i ona soo e fai ia Iesu.
O le a le mea na auina atu e Ioane ona soo e fesili ia Iesu?
Ta’u i ai o le fesili lenei o i lefuaiupu 3, na fai atu ai soo o Ioane ia Iesu pe o ia o le Mesia. Faamanatu i le vasega ua uma ona iloa e Ioane le Papatiso o Iesu o le Mesia (tagai Mataio 3:11, 13–14; Ioane 1:29–34).
Aisea e te manatu ai na auina atu e Ioane le Papatiso ona soo e sue mai pe o Iesu o le Mesia, a ua uma ona iloa e Ioane ia Iesu? (Sa manao o ia i ona soo ia maua a latou lava molimau ia Iesu keriso.)
Valaaulia se tamaitiiti aoga e faitau leotele le {Mataio 11:4–5. Fai atu i le vasega e mulimuli i le faitauga, ma vaavaai pe na faapefea ona tali atu e Iesu le la fesili.
Nai lo le na ona faamautu atu o Ia o le Mesia, o le a le mea na valaaulia e Iesu ia soo o Ioane le Papatiso e fai?
Atonu e te manao e faamatala semanu e faigofie lava ia Iesu ona ta’u atu i soo o Ioane o Ia o le Mesia. Nai lo lena, sa Ia valaaulia i la’ua e “faalogo ma vaai”(fuaiupu 4), pe mafaufau, Ana galuega ona toe foi lea i a Ioane le papatiso ma molimau i mea na latou faalogo ma vaai o loo faia e Iesu.
Na mafai faapefea ona fesoasoani le tali a Iesu i soo o Ioane e maua ai se molimau sili atu ona mamana i le Faaola nai lo le na ona ia ta’u atu ia i la’ua pe o ai o Ia?
O le a se mataupu faavae e mafai ona tatou aoaoina mai lenei tala e uiga i le ala e mafai ai ona faamalolosia la tatou molimau i le Faaola? (E ui ina mafai ona latou faaaogaina nisi upu, ae e tatau i tagata ona faailoa mai le upumoni lenei: A tatou saili e aoao ia Iesu keriso ma a o tatou molimau atu ia te Ia, e mafai ona faamalolosia a tatou lava molimau.
Valaaulia le vasega e tusi i lalo pe na faapefea ona latou iloaina e i latou lava o Iesu Keriso o le Alo o le Atua. Atonu e te manao e fai atu i ni nai tamaiti aoga e faamatala mai mea na latou tusia.
Otooto le Mataio 11:7–27 e ala i le faamalamalama atu faapea ina ua tuua e soo e toalua, sa ta’u atu e Iesu i le motu o tagata o Ioane le Papatiso o le perofeta na filifilia e saunia le ala mo le Mesia. Na tausalaina e Iesu i latou o e na teenaina Ioane le papatiso faapea foi i latou na vaaitino i le faamaoniga manino i le paia o le Alii ae na latou teena lava o Ia. (Manatua: O aoaoga a Iesu e uiga ia Ioane le Papatiso i fuaiupu nei o le a talanoaina auiliili i le lesona i leLuka 7:18–35).
Ona tuu atu lea e Iesu o se folafolaga ia i latou uma o e e taliaina o Ia o le Mesia. Ina ia fesoasoani i le vasega e toe iloilo le Mataio 11:28–30, valaaulia se tagata e faitau leotele ia fuaiupu nei ma fai i le vasega e mulimuli ai ma vaavaai mo mea ua valaaulia i tatou e le Alii e fai.
O le a le mea ua valaaulia i tatou e le Alii e fai? O le a le mea ua Ia folafola mai mo i tatou pe a faia? (A uma ona faasoa mai e le vasega a latou tali, tusi le upumoni lea i luga o le laupapa: Afai tatou te o mai ia Iesu Keriso, o le a Ia faamāmāina a tatou avega ma aumaia ia i tatou le malologa.)
E mafai faapefea e le malamalama i upumoni i lenei mau tauloto ona fesoasoani ia te oe i lenei tausaga?
Na aoai e Iesu Keriso ia le au Faresaio ona o a latou tuuaiga pepelo ma le sailia o faailoga
(Manatua: O mea o tutupu i le Mataio 12:1–21 o le a aoaoina i le loloto e sili atu i le lesona o i le Mareko 2–3.)
Otooto le Mataio 12:1–30 i le faamalamalama atu ina ua uma ona faamalolo e Iesu se tagata i le aso Sapati, sa amata e nisi o Faresaio ona saili e faaumatia o Ia. Ina ua Ia faamalolo i se tasi na ulutinoina e se temoni, sa latou taumafai e ta’useseina o Ia i luma o tagata i le tuuaia o Ia i le faia o na galuega i le mana o le tiapolo. Sa silafia e Iesu o latou mafaufauga ma sa tautino atu ai, e sese, o le tutulieseina o temoni sa Ia faapupula atu ai o Ia lava o le Mesia ma sa Ia faatuina le malo o le Atua. Fai i le vasega e faitau filemu le Mataio 12:30, ma vaavaai mo mea na aoao atu e Iesu ia i latou o e le auai faatasi ma Ia. Fai atu i tagata o le vasega e lipoti mai mea ua latou mauaina.
E tusa ai ma lefuaiupu 30, afai tatou te mananao e avea o se vaega o le malo o le Atua, o le a le mea e tatau ona tatou fai? (A o faasoa mai tali a le vasega, ia mautinoa e faamamafa le upumoni lenei: Afai tatou te mananao e avea o se vaega o le malo o le Atua, e tatau ona tatou matuai tautino atoa atu ia Iesu Keriso.
O a nisi o auala e mafai ona tatou faaali atu ai lo tatou tautino atu atoatoa ia Iesu Keriso?
Otooto leMataio 12:31–42i le faamatala atu na toe faamautuina foi e Iesu faapea o Ana galuega lelei o faamaoniga na o Ia e o le Atua ae le o le tiapolo. Na ia lapataia foi le au Faresaio o le a faamasinoina i latou e le Atua i a latou upu tautuua’i. Ona fesili lea o nisi o le au tusiupu ma le au Faresaio mo se faailoga, ma sa aoaiina i latou e Iesu mo le sailia o faailoga ma lo latou le vaai e sili atu o Ia nai se isi lava perofeta sa i ai po o se tupu foi i Isaraelu.
Ua aoao atu e Iesu le faataoto i le fale tuufua ma o i latou o e faia le finagalo o Lona Tama o le a faitaulia faatasi ma Lona aiga.
Fai i le vasega e mafaufau faapea o se tasi o a latou uo na fesili atu mo se fautuaga pe faapefea ona aloese mai le toe foi atu i se agasala sa ia taumafai e lafoai.
O le a se fautuaga e te tuu atu i lau uo e fesoasoani ai ia te ia e teena le faaosoosoga?
Faamatala atu o le Mataio 12:43–45 o loo i ai se faataoto e uiga i se agaga leaga sa tulieseina mai se tagata. Valaaulia le vasega e vaavaai mo se mataupu faavae i lenei faataoto e mafai ona fesoasoani i la latou uo e faatoilaloina le faaosoosoga. Valaaulia se tagata aoga e faitau leotele le Mataio 12:43–44, ma fai i le vasega e vaavaai mo mea na faia e le agaga leaga ina ua uma ona tuliese mai le tagata.
O le a le mea na faia e le agaga leaga ina ua leai se malologa e maua i se mea?
O a upu e faamatala ai le tulaga o le “fale,” po o le tagata, ina ua toe foi mai le agaga leaga?
Valaaulia se isi tagata e faitau leotele le Mataio 12:45ma fai i le vasega e vaavaai mo mea na faia e le agaga leaga ina ua tau atu i le “fale,” po o le tagata, o tuufua. Fai atu i tagata o le vasega e lipoti mai mea ua latou mauaina.
Ina ua uma ona ia tuliesea le temoni, o le a le mea na lei faia e le tagata i le faataoto na afua ai ona toe foi mai le agaga leaga? (Na te lei suitulagaina le leaga i ni mafaufauga, lagona, upu, ma ni taga amiotonu.)
E mafai faapefea i le aafiaga o le tagata i lenei faataoto ona faapei o se tasi e salamo i le agasala ma taumafai e teena faaosoosoga?
A uma ona tali mai le vasega, valaaulia se tagata aoga e faitau leotele le saunoaga lenei mai ia Peresitene Spencer W. Kimball:
Ata
Peresitene Spencer W. Kimball
“I le lafoaia o le agasala e le mafai e se tasi ona na onamoomoomo ni tulaga lelei sili atu. E tatau ia te ia ona faia. …
“ … O mea sa ia nopiai ai ma tosina i ai o ia ma tumu ai ona mafaufauga ua te’a atu, ae e lei i ai lava ni mea lelei e faatumu ai mea ua gaogao. O le avanoa lea o Satani”(The Miracle of Forgiveness [1969], 171–72; faaopoopo le faamamafa).
O le a le mataupu faavae e mafai ona tatou aoao mai i lenei faataoto e mafai ona fesoasoani ia i tatou e iloa ai pe faapefea ona teena pea ia faatosinaga leaga pe a uma ona tatou aveesea mai o tatou olaga? (E mafai e le vasega ona faaaoga upu eseese, ae e tatau ona latou faailoa mai ia le mataupu faavae lenei: E mafai ona tatou tetee atu i faatosinaga leaga pe a uma ona aveesea mai o tatou olaga e ala i le suia i le amiotonu.
Ina ia fesoasoani i le vasega ia malamalama i lenei upumoni, fai i se tasi e faitau leotele le faamatalaga lea. Fai i le vasega e faalogologo pe aisea e le lava ai le na ona tafiese o le agasala mai o tatou olaga.
“E le lava le na ona taumafai e teena le leaga pe tafiese le agasala mai lou olaga. E tatau ona faatumu lou olaga i le amiotonu ma punouai i gaoioiga e maua ai le mana faaleagaga. …
“O le usiusitai atoatoa e aumaia ai le mana atoa o le talalelei i lou olaga, e aofia ai le malosi faateleina e faatoilalo ai ou vaivaiga. O lenei usiusitai e aofia ai gaoioiga atonu e te le i manatu i ai muamua o se vaega o le salamo, e pei o le auai i sauniga, totogiina o le sefuluai, tuuina atu o auaunaga, ma le faamagalo atu i isi(Faamaoni i le Faatuatua: O se Tusitaiala o le Talalelei [2004], 135).
A tatou salamo, o a ni mea e mafai ona tatou faia e faatutumu ai o tatou olaga i le amiotonu ina ia tatou le toe foi atu ai i le agasala? (E mafai ona e valaaulia se tagata e lisi ia tali i luga o le laupapa.)
E mafai faapefea i le faia o nei mea ona aumaia le mana sili atu faaleagaga i o tatou olaga ma mafai ai e i tatou ona faatoilalo ia faatosinaga leaga?
Molimau atu o le faatutumuina o o tatou olaga i le amiotonu o le a tatou maua ai le mana e sili atu e teena ai le leaga. Fautuaina le vasega e mafaufau loloto pe mafai faapefea ona latou faatutumuina o latou olaga i le amiotonu tele atu ma mulimuli i musumusuga latou te maua a o latou mafaufau loloto.
Otooto le vaega o totoe o le Mataio 12i le faamatala atu a o aoao atu Iesu, sa ta’u atu e se tasi ia te Ia sa i ai ni tagata o Lona aiga sa fia talanoa ia te Ia. Ona aoao atu lea e le Alii faapea o i latou uma o e faia le finagalo o le Tama e faitaulia faatasi ma Lona aiga.
Ina ia fesoasoani i le vasega e tauloto le Mataio 11:28–30, valaaulia le vasega e fatufatu ni taga e mafai ona suitulaga i upu po o fasifuaitau i fuaiupu taitasi ona tauloto lea o le fuaitau a o faatino ia taga. Ia faataitai e le vasega ona taulotoina i le amataga o le vasega mo ni nai aso seia oo ina mafai ona latou taulotoina.
Tala ma Faamatalaga o Talaaga
Mataio 11:11. “O le aupito itiiti i le malo o le lagi, e sili lea ia te ia”
Na faamalamalama e le Perofeta o Iosefa Samita o se tasi o ala e malamalama ai i le Mataio 11:11 o le vaai atu i ai o se mau faasino ia Iesu Keriso lava Ia:
“O ai na faasino i ai Iesu faapea o le aupito itiiti? O Iesu na vaavaai atu i ai o le aupito itiiti i le malo o le Atua, ma [foliga mai] e aupito faatauvaa i la latou talitonuga o se perofeta; e faapei ona Ia fetalai ’O Le ua manatu faapea e aupito itiiti ia te outou e sili atu nai lo Ioane—o A’u lava lea’” (Aoaoga a Peresitene o le Ekalesia: Iosefa Samita [2007], 82).
Na faamatala e le Perofeta o Iosefa Samita pe faapefea ona faia e se tasi le agasala o le upuleaga i le Agaga Paia.
“E tatau ona ia maua le Agaga Paia, tatalaina le lagi ia te ia, ma iloa le Atua, ona toe agasala lea e faasaga ia te ia. A uma ona agasala le tagata i le Agaga Paia, e leai se salamo mo ia. E tatau ona ia faapea mai e le o susulu mai le la, a o la e vaai i ai; e tatau ona ia faafitia Iesu Keriso ae o la sa tatala mai le lagi ia te ia, ma faafitia le ata o le faaolataga ae o la e pupula ona mata i lona moni; ma e amata mai i lena taimi ua avea o ia ma se fili” (i le History of the Church, 6:314).
O nisi taimi e popole ai tagata aoga e uiga i le agasala o le upuvale e faasaga pe faafitia foi le Agaga Paia. Na aoao mai Peresitene Spencer W. Kimball:
“O le agasala e faasaga i le Agaga Paia e manaomia ai se malamalamaaga e faapea, ua iloa lelei le faigata i tagata masani ona faia se agasala faapea” (The Miracle of Forgiveness [1969], 123).
Na faamatala e Elder James E. Talmage o le Korama a Aposetolo e Toasefululua le mafuaaga na lapataia ai e Iesu le au Faresaio e uiga i le agasala e le mafaamagaloina o i le Mataio 12:31–32:
“Na alofa mutimutivale Iesu i Lona faamautinoa atu faapea o upu e faia faasaga ia te Ia lava o se Tagata, e ono faamagaloina; ae o le tautala e faasaga i le pule o loo Ia umia, ma aemaise o le faasino atu o lena mana ma le pule ia Satani, e toetoe lava o le upuleaga faasaga i le Agaga Paia, aua o lea agasala e le mafai ona faamagaloina’(Jesus the Christ, 3rd ed. [1916], 269).