1 Ioane

Folasaga

Na valaaulia e Ioane tagata o le Ekalesia e saili e mafuta faatasi ma le Tama ma le Alo. Na ia faamamafa atu le tatau ona tausia o poloaiga a le Atua e faaali atu ai lo tatou alolofa ia te Ia. Na faamanatu atu foi e Ioane i tagata o le Ekalesia e alolofa atu i isi.

Fautuaga mo le Aoaoina Atu

1 Ioane 1–5

Ua faamalamalama mai e Ioane le taua o le tausia o poloaiga ma le alofa atu o le tasi i le isi

Vaevae tagata aoga i ni paga. Tusi le upu liliuese i luga o le laupapa. Valaaulia tagata aoga e faliu atu i a latou paga ma faamalamalama puupuu atu i ai le uiga o le liliuese. Ona valaaulia lea o se tamaitiiti aoga e sau i le laupapa e tusi ai le uiga o le liliuese. O le faauigaga e tatau ona faailoa ai o le liliuese o lona uiga o le liliuese mai le upumoni (tagai Taiala i Tusitusiga Paia, “Liliuese,” scriptures.lds.org).

Faamalamalama atu, na tusi e le Aposetolo o Ioane le tusi a 1 Ioane i se taimi na faamatauina ai e le liliuese le Ekalesia. I lenei tusi, na lapataia ai e Ioane le Au Paia e uiga i anetikeriso (tagai 1 Ioane 2:18–26; 4:3). O se anetikeriso o “soo se tasi po o soo se mea e faaaoao pepelo i le fuafuaga moni o le talalelei o le olataga ma tetee faaaliali pe faalilolilo ia Keriso” ma le pule ma aoaoga a Ana auauna filifilia (Taiala i Tusitusiga Paia, “Anetikeriso,” scriptures.lds.org). O nisi o anetikeriso i vaitaimi o Ioane na aoao atu e faapea, sa le’i i ai se tino faaletino o Iesu Keriso a o i ai i le lalolagi ae sa na ona foliga mai o se tagata faaletino.

Valaaulia se tamaitiiti aoga e faitau leotele le 1 Ioane 1:1–4. Fai i le vasega e mulimuli i le faitauga, ma vaavaai mo le mea na molimau mai ai Ioane e teena ai lenei aoaoga pepelo. Faamalamalama atu o le fuaitau “le Lokou o le ola” (fuaiupu 1) e faatatau ia Iesu Keriso.

O a upu na faaaoga e Ioane e teena ai le manatu sese e faapea sa le’i i ai se tino faaletino o Iesu Keriso?
E tusa ai ma fuaiupu e 3–4, aisea na faasoa atu ai e Ioane lana molimau paia e uiga ia Iesu Keriso i tagata o le Ekalesia? (Sa manao o ia ia latou mafuta ma taitai o le Ekalesia, o e na mafuta faatasi ma le Tama Faalelagi ma Iesu Keriso. Sa manao foi o ia ia latou maua le atoatoa o le olioli.)

Faamalamalama atu, ina ia mafuta o lona uiga ia olioli i se mafutaga o le talitonuina, fesootaiga, ma faamoemoega tutusa. E mafai ona tatou maua se mafutaga ma taitai o le Ekalesia a o tatou maua ma mulimuli i a latou aoaoga ma fautuaga.

Tusi le faamatalaga le uma lenei i luga o le laupapa: Afai tatou te maua ma mulimuli i aoaoga a perofeta ma aposetolo, e mafai ona tatou …

E faavae i aoaoga a Ioane i le Ioane 1:3, e faapefea ona e faaumaina lenei faamatalaga ia maua ai se mataupu faavae? (I le faaaogaina o upu a tagata aoga, faauma le faamatalaga o loo i le laupapa ina ia faaalia ai le mataupu faavae lenei: Afai tatou te maua ma mulimuli i aoaoga a perofeta ma aposetolo, e mafai ona tatou maua le mafutaga faatasi ma le Tama ma le Alo.)

Faaali atu ni ata o le Peresitene o le Ekalesia o loo i ai nei ma isi perofeta ma aposetolo.

O a ni auala e mafai ona fesoasoani ai le mulimuli i aoaoga a perofeta ma aposetolo ina ia tatou maua ai le mafutaga ma lo tatou Tama Faalelagi ma Lona Alo o Iesu Keriso?

Valaaulia se tamaitiiti aoga e faitau leotele le 1 Ioane 1:5–6. Fai atu i le vasega e mulimuli i le faitauga, ma vaavaai mo le mea e mafai ona taofia i tatou mai le mauaina o se mafutaga ma lo tatou Tama oi le Lagi.

O le a le mea e mafai ona taofia i tatou mai le mauaina o se mafutaga ma lo tatou Tama oi le Lagi?

Faailoa atu, o le faaaogaaga e Ioane o le upu pouliuli e faatatau i le pouliuli faaleagaga.

O le a lou manatu i le uiga o le savali i le pouliuli faaleagaga?

Valaaulia tamaiti aoga e suesue i le 1 Ioane 1:7–10; 2:1–6, ma vaavaai mo ni upumoni na aoao mai e Ioane e mafai ona fesoasoani ia tatou iloa ai le auala e savavali ai i le malamalama o le talalelei. Faamalamalama atu o le upu togiola i le 1 Ioane 2:2 o lona uiga o se taulaga togiola e faamalieina ai le faamasinoga tonu a le Atua. Valaaulia tamaiti aoga e suesue filemu i nei fuaiupu, ia le tagata lava ia pe ma ni paga foi po o ni vaega toalaiti.

O a ni upumoni na outou maua i nei fuaiupu? (Mafaufau e tusi tali a tagata aoga i luga o le laupapa.) E ono aofia ai upumoni e pei o nei: Na togiola Iesu Keriso mo a tatou agasala. A tatou tausi i poloaiga a le Atua, ua faaatoatoaina lo tatou alofa i le Atua.)
Aisea e te manatu e oo ai ina sili atu le atoatoa, po o le atoa o lo tatou alofa i le Atua, ao tatou tausia Ana poloaiga?
O le a se taimi na e mauaina ai se alofa faateleina mo le Atua a o e taumafai e tausi Ana poloaiga?

Faitau leotele faamatalaga nei a ni talavou se toalua o le Au Paia o Aso e Gata Ai. Valaaulia tagata aoga e faalogologo mo se poloaiga faapitoa na faigata i nei tagata e toalua ona usitai i ai.

E faitau e se alii talavou ia tusitusiga paia i aso taitasi ma faia ma le faamaoni le tele o ona tiute o le perisitua, ae e masani ona le alofa i lona uso laitiiti.
E masani ona auai atu se tamaitai talavou i ana fonotaga a le Ekalesia ma ua maua lana Taui o le Tulaga Faaletamaitai Talavou. Ae peitai, e masani ona ia tuuina i luga o ala o faasalalauga faalauaitele ni faamatalaga mataga e uiga i nisi o tamaiti o lana vasega ma faiaoga.

O le a le poloaiga o loo faigata ona usitaia e nei tagata talavou e toalua?

Valaaulia tamaiti aoga e mafaufau i ni tulaga atonu o loo faigata ona latou faaalia atu ai le alofa i isi.

Valaaulai ni nai tagata aoga e feauauai i le faitauina leotele mai le 1 Ioane 2:9–11; 4:7–11, 19–21. Fai atu i tamaiti aoga e mulimuli i le faitauga, ma vaavaai mo le mea na aoao mai e Ioane e uiga i le alofa. Atonu e te manao e valaaulia tamaiti aoga e mafaufau e faailoga aoaoga o loo i nei fuaiupu e anoa ia i latou.

O le fea o aoaoga a Ioane e anoa ia te oe? Aisea?
O le a se mataupu faavae e mafai ona tatou maua mai nei fuaiupu e uiga i le mea o le a tatou faia pe a tatou alolofa i le Atua? (Atonu e faaaoga e tagata aoga ni upu eseese, ae e tatau ona latou faailoa mai se mataupu faavae e talitutusa i lenei: A tatou alolofa i le Atua, o le a tatou alolofa i isi.)
Aisea e te manatu ai, o le a tatou faaalia le alofa i isi pe a tatou alolofa moni i le Atua?

Ia faailoa atu, e ui ina sa faaaoga e Ioane le upu ita i le 1 Ioane 4:20, ae e tele auala e mafai ona tatou taofia ai le alofa po o le agalelei mai isi e ese mai i le ita ia i latou. Valaaulia tamaiti aoga e ta’u mai o latou manatu po o a nisi o na auala.

Valaaulia se tamaitiiti aoga e faitau leotele le 1 Ioane 3:17–18, ma fai atu i le vasega e vaavaai po o a ni auala e tatau ona tatou faaali atu ai lo tatou alolofa i isi. Valaaulia tamaiti aoga e lipoti mai mea ua latou mauaina. E tatau ona iloa e tamaiti aoga le taua o le alofa atu e le na’o “o le upu” ae faapea foi “o le amio.”

Aisea e te manatu e taua ai ona tatou faaali atu lo tatou alolofa e ala i a tatou faatinoga ae le na’o a tatou upu?
O ai e te iloa o se faataitaiga lelei o le faaali atu o le alofa i isi? O le a se mea e faia e lenei tagata e faaalia ai lona alofa i isi?

Valaaulia tamaiti aoga e mafaufau i se tasi i o latou olaga e mafai ona latou faaali atu i ai le alofa faateleina. Fai atu ia i latou e tusi i se fasipepa le igoa o lena tagata faatasi ma se mea faapitoa e mafai ona latou faia e faaali atu ai le alofa po o le agalelei i lena tagata. Faamalamalama atu, e le manaomia ona latou faaali atu lo latou alofa i ni faiga taugata ma o nai faatinoga laiti ma faatauvaa o le alofa mama ma le agalelei e masani lava ona sili atu ona anoa. Valaaulia i latou e o ma ave le pepa i le fale ma faatino le mea na latou tusiaina.

Ia faailoa atu, a faaali atu lo tatou alolofa e ala i a tatou faatinoga, ua tatou mulimuli i le faataitaiga a Iesu Keriso (tagai 1 Ioane 2:6; 3:1–3). Atonu e te manao e faaiu le lesona i le faasoa atu o lau molimau e uiga i upumoni na faailoa mai e tamaiti aoga i la latou suesuega o le 1 Ioane. Uunaia tagata aoga e faaaoga nei upumoni i o latou olaga.

Tala ma Faamatalaga o Talaaga

1 Ioane 3:2. “Ona foliga ai lea o i tatou ia te ia”

Na faamalamalama mai e Elder Dallin H. Oaks o le Korama a Aposetolo e Toasefululua e faapea, o le faamoemoega o le olaga i le tino o le, ia avea e pei o le Atua e ala i le Togiola a Iesu Keriso:

“I aoaoga e uiga i le Atua a le ekalesia toefuataiina a Iesu Keriso, o le faamoemoega o le olaga faaletino o le saunia ai lea o i tatou ia ausia lo tatou taunuuga i le avea o ni atalii ma afafine o le Atua—ia avea e pei o Ia. … Ua faamatala e le Tusi Paia tagata faaletino o ‘fanau a le Atua’ ma ‘suli o le Atua, ma suli faatasi ma Keriso’ (Roma 8:16-17). Ua tautino mai foi ‘ua tatou tiga faatasi ma ia, ina ia faamanuiaina foi i tatou faatasi ma ia’ (Roma 8:17) ma pe a ‘faaali mai o ia, ona foliga ai lea o i tatou ia te ia’ (1 Ioane 3:2). Ua tatou talitonu moni lava i nei aoaoga a le Tusi Paia. Ua tatou talitonu o le faamoemoega o le olaga faaletino o le maua lea o se tino faaletino, ma e ala mai i le togiola a Iesu Keriso ma le usiusitai i tulafono ma sauniga o le talalelei, e agavaa ai mo le tulaga mamalu o le toetu faaselesitila lea e taua o le faaeaga po o le ola e faavavau (“Apostasy and Restoration,” Ensign, Me 1995, 86–87).

1 Ioane 5:3. “Aua o lenei lava le alofa i le Atua”

Na aoao mai Elder Joseph B. Wirthlin o le Korama a Aposetolo e Toasefululua e uiga i le sootaga o le alofa i le Atua ma le tausia o Ana poloaiga:

“A tatou alolofa i le Alii, ona le avea lea o le usiusitai ma se avega. E avea le usiusitai ma se mea fiafia” (“O Le Poloaiga Sili,” Ensign po o le Liahona, Nov. 2007, 30).