Kakauongo nakon ana wirikiriki te Tamnei
ko riai n kakoaua bwa e a tia n anga Maiuna te Tia Kamaiu bwa ko aonga ni karaoi bitaki nakon maium, bitaki ake a na uota te rau.
I kaikawaki irouia karo aika a kakawakin raoi n te mwenga ae a reiakinaki reirei aika raraoi ao ni karaoaki katauraoakin te kawai nakon te Ekaretia ao butimwaean ana reirei te euangkerio. I babetitoaki n te namakaina ae Aokati 1959, tabeua te tai imwin au ka-19 bongi ni bung. Ngke I tabe n iangoi taai ake imwain rairakiu iangoi au bong inanon au tai n ataei.
Ni kaan ma mweengau are I maeka iai ngke I uarereke ao iai te auti ae nangi ni bubura. E tei n te tabo ae e nangi n tamaroa n oaki n te oo ae rietata ae karaoaki man kaai aika mmani ao n ababaki ae tao onoua te buti rietaia. I uringa kaninganingau imarenan bangabangan kaai ake a bara kabaeai ao mani baka. Kanga aiaron te taratara n te kainikataratara are e nora are e kiraroa nakon te aonnaba ae e kaokoro. Tamaroan uteute aika boraoi koreakia, te ue n o n aroka ae tararuaki raoi, ao te tabo n aroka ake a kanaki uaia e anga tamaroana kanga te baretaiti barongakin buriki ao atibu aika unekenekeaki itinanikun te auti. Te kananokawaki, te tai ni mamataku e bon aki katokinano ibukin te kamea ae unun are e mamanganga n tararuai o n aroka mani waekoa n tauraoi ni un nakoia nake a tei ni kaan ma te o. Ma e ngae ngke te kamea are e kakamaku e kawakina te o n aroka, ma tangitangin ikeiken bairina ngkana e kerake nakon te o e karokoa te maku irou ae e korakora are e a warenako au iango man iangoi baike e na kona te kamea ni karaoia nakoiu.
Teuare ao Neiere Lyons, ake a maeka n te mwenga arei, bon taan reirei. Bon iai kateia ae tamaroa ao a taraa ni kukurei n tein aia auti are bon akea ae e kona n roko iai are e nangi ni buokiia. N reita te bwai ae kakaongora, teuare Lyons akea baina te angatai, e kabongana te biti are e tinetine ibukin bain ana tiaeketi. N au iango n ataeinimane, I kona n iangoia bwa teuare Lyons e kakioai ao man raweai ni karan baiu ni baina te matau ao e uotai ni kabureai.
I uringa moaningabongin Aokati teuana ngke ai tebwina ke tebwi ma teuana au ririki, imwin te tairiki ae kare te ang ae e korakora, mani butimaeaki irouia raraou ngke I kitana mwengau. A rotaki n te kukurei n te bwai ae e aki ataki man titiraki, “Ko ongo rebwen te ang ngke e tairiki?”
Ngke I taekinna bwa I ongo, a waaki n tuangai te rongorongo ae a karekea—te ang e a tia ni kabaka makoron te o are e oa ana auti Lyons. I aki ota bwa bukin tera e a karika te kukureia ae e korakora ao n tuangia bwa ana kabwarabwara bukina.
A kaekaai ma te ingarake n nano ae e korakora. “Ti a kona n roko nakon te aroka are te aboro!”
I nangi n raraoma ao n titiraki, “Ma tera aron teuare Lyons?”
“Teuare ao neiere Lyons akea ni bataia; a nako ni kawariia aia koraki.”
“E nga te kamea?” I kakae.
“A katikua n te tabo are a kawakinaki iai man ngkana ko nakonako bwa e na tararuaki iai,” te kaeka ae e roko.
Raraou a tia ni karekea tabwaninin te kakae. Ma, a boni koaua aia taeka, ti a mwananga ni kaea te aroka are te aboro ma te kawaekoa. Ti rinnako n te tabo anne ti tamarakei aroka ao ni kabaitira ni kiniki uanikai, kanoai ara boketa ao riki ni karini n ara kabaraki. Ti birinako. E bukibuki manawau ao e rikirake tatan burou ibukin maakakin te kamea ke teuare Lyons bwa e a tii kaoti naba ao man kuneira. Ti birinako man te tabo n aroka nakon te tabo ae e raba are e kaan ma te buakoako ao, imwin okin nanora, ti a kang aboro.
Bon Aokati te tai anne, ao a tuai bati n tawa aboro ibukin te kanaki. N te koaua a bon kamangingi kanakia, ma tangiran te aboro ae kirin aio e aki katokira ma iai are e kaingaingai nanora kanakina ma te nano ae tokabeti, karaoan te mwakuri ni kakeru ae I aki kona ni kabwarabwaraa. Imwin kauitataira ni kang aboro aika a bon tau maitia, I katibutauai ni kang nikara n aboro ao n tewenakoi nikiran ake aki bane n te buakoako ae uakaan. E koenako angin te kang aboro ngke a karaurau rabwatara n rotaki teutana imwin teutana mai imwin te kabowikoa ni kang aboro. Tautian rabwatau imarenan ranin birotou ao aboro aika aki tawaa a karika te maraki ni biroto ae e korakora ao te kani mumuta. Ngke I a tekateka ma te uringaba ao te nanokawaki ibukin te bwai are I atia ni karaoia, I kakoauaa bwa te namakin are e roko irou e karikirakea riki te mwebuaka nakon aboro ake aki tawaa.
E otinako te mwebuaka ae e korakora ma imwin ataakin te bwai ae I atia ni karaoia ae e kairua.
Ngke a tuangai raraou bwa ana ninia te o n aroka I namakina te namakin ae I aki riai n nako ma akea te ninikoria ni kangai, “I rawa” ao I atia n aki tabeakina au namakin are e roko. Ngkai, imwin te moti ae e a tia ni korobukina, I rotaki n te nanokawaki ao te kabwarabure. Ibukin au uringaba, I a tia ni kakeaa te wirikiriki ni kauringaaki kairuan au mwakuri.
Totoko aika a rabwata ao korakora mai tinaniku tao a kona n totokoira man karekeakin kawai aika a kairua, ma iai te namakin I bon iroura, n tabetai e kabwarabwaraki bwa te bwana ae e uarereke,1 bwa ngkana e kinaki ao e karaoaki nanona e na bon kawakinira man rekera nakon te kaririaki.
Tabeua ririki imwina, ana taeka Beretitenti Boyd K. Packer e ringai ngke e anga ana reirei, “Ti aki kona ni bwenako man kawai aika kairua ngkana ti aki moa rinanon te reirei ni kauring.” Iangoa te tai are I a tia n aki ira ana wirikiriki te Tamnei ni kimoakin taian aboro, ao a mwaiti riki n aron are e riki—taian namakin ao kantaninga ake a roko ngke ti tabe n iangoi raoi rekenikai ma n ara mwakuri.
Te Burabeti Moroni e karababai ara taratara ibukin baikai n namakin inanon taeka aikai: “Tamnein Kristo anganaki aomata ni kabane, bwa ana ataa te raoiroi man te buakaka.”2
Te iango are ti bane ni karekea te bwaintituaraoi ni ibuobuoki e boutakaki n te Euangkerio ni kaineti nakon are e koreia Ioane ni kaineti ma Te Tia Kamaiu “bwa [Ngaia] bon te Ota ni koaua, are e kaotai nanoia aomata ake a roko n te aonnaba.”3
Kaungaara a boboto mairoun te Atua ao, ngkana ti irii, a na buokiira ni kaetiira ao n te aro aei are a na kona iai ni kawakinira man anainano aika kakamaaku
Tabeua te wiki imwin te bwai ae e riki n te aboro, I nako bwa nna iria raraou nakon te tabo ae rawata kaina are e kaan ma mwengau, te ingainga n nano bwa ti na karaoi mwakuri ke takakaro ake ti na takakaroni. Ngke I a roko irouia, a bane n ibetutu n ikotaki. I nora bubun te ai ae e waerake iaoia ao ni kina te boi ae boiarara man buen te bake. Temanna ma ibuakoia ae e uota te bakete n tikareti, ao a moko. A weteai bwa N na iria ma I rawa. A kairoroai, ao a taku bwa aki kani karaoan are a karaoia boni kanikinaean kabwakana. Aia manikangare buaka e karika te kangare, n ikotaki ma aia kabwarabwara ae kabuebue. Ma akea te bwai ae a kona n taekinna ke N na ana nanou bwa N na bita au iango. I aki ikawai rake ma te rabakau ibukin kaokan te euangkerio ao n aki ata Tuan te Mauri, ma I totoko ma n au namakin ae I riai n aki karaoa are a karaoia.
Ngke I a okira mwengau ma iangoan te moti are I a tia ni karaoia, I rootaki nanou n te kukurei. E ngae ngke tao au kantaninga ibukin te bwai ae I kani karaoia ibukin te bong anne e aki nako raoi ao N na riai ni boni karekea te anga ma ni kabongana au tai n akea raraou. I a tia ni kunea te bwai teuana ibukiu—ibukin reken te kukurei ni koaua ao te korakora ae kororaoi are e a kaotinakoa man karaoan te rinerine ae eti, bwa tera te bwai ae e karaoaki ke te bwai ae e na reke.
Te Kaotioti are e karekea Iotebwa Timiti te Burabeti e kabwarabwarai bwaai aika a na reke ake a irekereke ma te ongeaba nakon te tia kairi kawaira are te tamnei inanon makoron taeka aikai man taeka aika tabu: “Ao te Tamnei e anga te ota nakoia aomata ni kabane ake a roko n te aonnaba; ao te Tamnei e kaotaia aomata ni kabane rinanon te aonnaba, ane e ongo nakon bwanan te tamnei.”4
Tiaki ti nakon te kibu aio are e katauraoa te kakoaua bwa ti bane ni kona ni karekea te waki aio man taian kaetieti ma ieta, ma e katuruturua kainanoara bwa ti na ongo ke ni kakauongo ao man karaoa ana wirikiriki te tamnei are ti karekea. Te berita are e iria bon te bwai ae e nangi ni bongana nakoiu: “Ao te aomata are e ongo nakon bwanan te tamnei e na nakon te Atua are bon te Tama.”5
Namakin aikai, n tabetai a kaineti nakon ara namakin n ataa te eti ao te kairua ma ni bon etina ni koaua e kabwarabwaraaki bwa Otan Kristo, e aki tii buokira n rinea ae eti ma ae e kairua are ti na karaoia, ngkana e iraki, e na kairira nakon boton te ota are e nako ma iroun te Tama ao te Nati.6
Te Uea e berita nakoia Ana Abotoro: “Ngkana kam tangirai, ao kam na tou mwin au tua. Ao N na butia te Tama, ao Ngaia E na anganingkami te Tia Ibuobuoki temanna, bwa e na memena iroumi n aki toki. Are te Tamnei ni koaua.”7 E reita ana kabwarabwara te bai n tituaraoi aio bwa “ao te Tia Ibuobuoki, are te Tamnei are Raoiroi.”8 Temanna e na kona ni karekea ana mwakuri te Tamnei ae Raoiroi ma te Tamnei e kanakoaki ao e ti kona ni karekeaki man te katoka bai imwin te bwabetito.9
I atia n reiakinna riki ma te ota raoi bwa bukin tera bwa e koreaki rongorongoia Ana Abotoro iaon iteran te aonnaba are I maeao, “Ao a bon tataro ibukin te bwai are a bon kainnanoia raoi; ao a bon kainanoa te Tamnei are e Raoiroi bwa a na anganaki.”10
Bon Metintian te koaua ae kororaoi ngaia.
Ngke I a tanrikaki n tarai baike I a tia n rinanoi n au tai ni maiu ao e teretere nakoiu bwa motinnano aika a maiti, tabeua a tara ni uarereke n te tai anne, ao tabeua ake a karika kurakaiu n anga au motinnano iai ibukin ae a nangi ni kakawaki, a karikai bwa nna rikirake n tamaroa n te maiu n tamnei nakon are I a tia ni kakakea ana mwakuri ni ibuobuoki te Tamnei ae Raoiroi.11
Bwa ngkana akea te bwai n tituaraoi ae mimitong aio ao ti na aki kona n ataa bonganan te maiu ke ana kai ni baire Tamara are I karawa ae kakawaki.12 Bwa “e bon kanganga iroun te aomata bwa e na kunea kawaina. Ao akea te aomata ae e ataa kawaina ma ti ngkana e kaotaki nakoina.”13
Mwiokoakin iango aika ti taku bwa a koaua ao ni kabonganai oin rabakaura n ataa ae e riai ma ae e aki e bon aki tau: “Bon akea te aomata ae iai ana atatai ni karaoi bwa ana ataaki, ma a bon ti kona n noraki ma n ataaki ni mwakan te Tamnei, are e a tia ni kanakoa te Atua nakoia ake a tangiria ao a kaitiakia imatana.”14
I aki konai ni kunei taeka ake nna kabarabarai raoi au namakin ni kaineti ma Otan Kristo ao ana bwai n tituaraoi te Tamnei ae Raoiroi. A riki bwa “bwaeni waeu am taeka, ao otani kawaiu.”15
Iangoa ana bubuti te Tia Kamaiu nakon te Tama, ni kaineti ma Tengaun ma Uoman n te aba are Bountiful, a kabarabaraaki n taeka aikai:
“Tamau, I karabwako bwa ko a tia n anga te Tamnei ae Raoiroi nakoia te koraki ake I a tia n rineia. Ao ibukin aia onimaki irou are I a tia n rineia ma ibuakoia kain te aonnaba.
“Tamau I tataro nakoim bwa ko riai n angania te Tamnei ae Raoiroi nakoia te koraki ni kabane ake a kakoauai am taeka.”16
Ni korakoran kangangan te aonnaba aio ti kona n ata te koaua ao ni kukurei n ara namakin n ataa te eti ma te kairua mani kakoauaan aia taeka Burabeti ao rinanon ana iraorao te Tia Ibuobuoki. Ma ngaiare ti riai n ataia bwa Iesu Kristo bon Natin te Atua, te Tia Kamaiua te Aonnaba.17
I kaota au koaua ibukin taian koaua aikai n aran Iesu Kristo, amen.