Wirio: Aio Ngai; Kanakoai
Bonnie D. Parkin
Tebubua onobwi ma teuana te ririki n nako, i aon te katabuki are ko kona iai n tara on te kaawa ae Nauvoo, Illinois, ike a kawenea iai atibun koonan ana auti te Uea Aomata aika Itiaki ni Bong aika Kaitira. Teuana raoi te ririki imwiina, te Uea, rinanon te Burabeti ae Iotebwa Timiti, e a katea iai te Botaki ibukiia aine [are ti aranna ngkai bwa Aia Bootaki Aine—te mwakuri ae riai, e taku te Burabeti, nakon kabobongaan raoi katean te Ekaretia. Te botaki ibukiia taari aine anne e riki bwa te bwai ae moan te bongana ibukin katean ao kabobongaan raoi te tembora ae mimitong ae akea kabotauana. Ara bwai mairouia ara bakatibu n tamnei n te berita ibukiia natin te Atua aika aine n te botaki aei are e moanaki ana waaki ikai n te Kaawa ae Tikiraoi aei. Te Nauvoo tembora bon te kanikina ae iai rabwatana are ti a tia ni kabobonga raoi, te bwai are ti kona ni kabobonga, ao te bwai are e a tia Tamara are i Karawa ni kawakinna ibukiia natina aine aika kakaonimaki.
Kathleen H. Hughes
Ni moan botakin Aia Bootaki Aine anne e iraki ti irouia 20 aine. Tabeman a roko n te roro n ateiaine, tabeman a bon tibwa rairaki nakon te Ekaretia, tabeman a tobwaia ataei, ao tabeman a tuai iein. E kuri n ti te arona ma Aia Botaki Aine ni bong aikai! Ao e rikirake te botaki aei ni waetata, ma ni mwaneia aine n aekaia nako nakon ana karinan n nakoa; a bane taari aine ni kainnanoaki—n ai aron kainnanoan temanna ma temanna ngkai. E korakora te ikakorakora n ekinakoia aine akekei: mateia ataei, karakon te amwarake, te ribaaki man te utu, te bwainikirinaki, ao karakon te onimaki. Ma ibukin berita ake a tia ni karaoaki ma te Uea, a kakauongo iroun temanna ma temanna, a tongoia i bon irouia temanna ma temanna, a karikiia ngaia n tatabemania nako bwa taan kaeti. A tibwauai amwarake ao kunikai ao aia namaki ma aia iango. Ngke e kauringaki Nancy Tracy te ataei n te kakabwaia: “Kam kinaa bwanaan te tia kawakin tiibu … ao ngke E roko bwa e na ikotia ana tiibu, kam kina ana rongorongo ao kam butimwaaia ma te kimwareirei ao te kukurei.”1 Aia anganano taari aine aikai ma rairan nanoia e oneaki nakon mwakuri n tangira, n nanoanga, ao te katiteuanaaki n te aro n tari n aine.
Anne C. Pingree
Taari aine n ara moan Botaki n Aine a kuri n ti te arona aroia ma arora! Iai taai ake a namakina iai te tiku n ti ngaia, te aki mannanoaki, te kaokoroaki man te kangaanga ioroun te ataei ke te ikawai, taan roko ni maeka ke naake a tibwa rairi nanoia. Ma a kaonaki n te onimaki, ao a waaki rake taari aine aikai, ma ni katiteuanaaki ni karaoan tabeia ni katean ana auti te Uea. N tatabemaniia aanga bwaai n tituaraoi, anga kunikai ake a waei, a bonobonoti kunikai, a kamwarekeia taan mwakuri, a biribiriia boon bwaai aika a kakawaki ibukiia utu, a karekei mweengaia aomata, a kawakiniia aoraki ao naake a kara, ao tiaki ti ngaia ma a itui rooki ibukin te tembora. Aia mwane aika beene, ake a aki kona ni kaboa te amwarake ke te kunikai iai, a kaboi iai neera ibukin katean te tembora ao kiraati ibukin winto. E taku te titita temanna ibukin ana aanga nano: “I moana nakou n te onimaki ae raoiroi nakon aobitin te Tembora n anga au angabwai. N te tai ae waetata ao e roko te kabwakabwa ka nakoiu … bwa te mwane [aei] e kona ni buoka karekean baika a riai ibukiu. Imwiina ao I rawa. I taku, ‘Ngkana akea riki ae I karekea nakon te mwamwa ni kariki ni katoa bong i nanon te wiiki, N na bae ni kabwaka te mwane aei nakon te tabo ni mwane.’”2 Ara Bootaki n Aine are e moan tei taari aika aine a noora te bwai are ana tekeraoi riki iai are bon “kanakoan [aia] mwane ae uarereke mwaitina nakon buokaia taari ni katean ana Auti Uea.”3 A taku ma kukurein nanoia, “Te Uea, aio Ngai; Kanakoai!”
Bonnie D. Parkin
Man te moan tai, kaantaninga ibukin Aia Bootaki Aine a tia ni kamaiuia aomata, ni kakaeaia kainnano ao naake akea aia bwai, n anganiia te bwai ae a na mweraoi iai te koraki ake a bakaineaki ni kakorakora temanna ma temanna. Ngke a tabe taari aine akekei ni buoka katean te tembora ao imwina a karekei aia entaumente, a kunea te rau ao te ninikoria ae riai ibukin mwanangaia ae kangaanga. N te bong aei e koaua anne ibukira naba. I Nauvoo e tangiriia taari aine ni kabane te Uea—n aki tabe ma te roro, te reirei, te kareke mwane, te taetae, te atatai— nakon buokan katean ueana.
Bon akea te okoro naba n te bong aei! Ti bane ni kainnanoaki n Aia Botaki Aine. E a tia ara burabeti ae maiu n tuangira bwa ti na waaki rake ma n kakoroa bukin mwiokoara nakon kamaiuaia aomata. N te koaua ti a tia ni berita bwa ti na karaoia. Ana moan mwakuri te Burabeti ae Iotebwa Timiti bon “buokaia kainnano,” ni “kamaiuia aomata,”4 e kaeineti naba nakoira. Ngaira naba ti riai n rabwatiia tabeman, ni kabebetei rawawataia, n tibwauai ara koaua ao ara onimaki iroun Iesu Kristo. I tangira ana taeka te tari te aine ngkoa temanna, ae Zina Young, n ana iango ibukin te aro ni itaritari n Aia Bootaki Aine: “Bon te kakabwaia te uaia ni botaki… . Tamnein te Atua e mena ikai, ao ngkana ti taetae nakon temanna ma temanna, ti tabo ma te oera are kanakoaki nakon te kaibuke teuana ma teuana.”5
Taari aine, aio ara bwai mairouia ara bakatibu n tamnei are e moa mai iai te onimaki. Ngkana ti tara ana auti te Uea are e a tia ni kaokaki aei, ti riai n uringa iai bwa e a tia Iesu Kristo ni kariaira, i nanon boong aika kaitira aikai, bwa ti na buoka katean ueana. Ti riai n taraia, ni karinea Ana nakoanibonga, ao ni maiuakin berita. N aki tabeakin aroaron maiura nako ao n te tabo are ti mena iai, ti kona,—ao ti riai—n waaki rake kaanga natin te Atua aika aine ma n teimatoa n tataekina ae kangai, “Te Uea, aio Ngai; Kanakoai.”