Elaine Schwartz Dalton
Kauoman ni Kauntira, te Beretitentii ni Kabuta n Aia Bootaki Aine Aika Kairake

N aki maan i mwiin ae e rin n ana kauoua n ririki Elaine S. Dalton n te reirei ae rietaata n te Brigham Young University, e a toki naba maiun tamana n ae aki kantaningaaki. Bon ana tai ae kataaki iai ni maiuna, ao e kabatia te tataro ni kaota bwa bukin tera e anaaki tamana man te utu ngkai e rangi ni kainnanoia.

Te reke nakon ana tataro e aki te roko n te roko nikarokoa te tai ni kabuebue are i mwiina, ngke e neweabaa Eurobe ma ana tiim te reirei ae rietaata ae BYU. N aia bong Kaaro, ngke a botaki n te toa aia tiim, temanna te tia taetae e kaineta ana marooro nakon Taeka n Rabakau 3:5–6: “Ko na onimakina Iehova n nanon ni kabanea; ao tai mwiokoa oin am ataibwai. Ko na ataia n nakonakom nikabane, ao E na kaeti kawaim.”

“I a ataia bwa e kaekai te kibu,” e taku ngkai te tari te aine ae Dalton. “I teimatoa n aki ataia bwa e aera e kitana te maiu aei tamau, ma I ataia bwa I kainnanoia n onimaki i roun te Uea. Te koroboki ae tabu anne e a tia n raonai ni maiu. Ni bwaai nikabane ake a tia n riki ake I aki ota iai, ao I a ataia bwa ngkana I onimaki i roun te Uea, E na bon kaeti kawaiu.”

Ni weteana ae boou bwa te kauoman ni kauntira n te beretitentii ae kabuta n aia Bootaki Aine aika Kairake, te tari ae Dalton e kantaningaia bwa e na kaungai nanoia aine aika kairake bwa a na karikirakea te onimaki are titebo arei i nanon te Tama ae i Karawa ao ni kakaea ana iraorao te Tamnei ae Raoiroi.

Te tari ae Dalton e bungiaki i Ogden, Utah, n 1 Nobembwa 1946 nakon Melvin Leo ao Emma Martin Schwartz. E mare ma Stephen E. Dalton n 13 Tebetembwa 1968 n te Tembora i Salt Lake. A karekeia onoman natiia ao a maeka ni kaawan Salt Lake.

E karekea ana beeba ae rietaata te tari ae Dalton i Ingiriti man te reirei ae rietaata ae Brigham Young University. E a tia naba n riki bwa kaain ana baba n tararua te Bootaki n Aine aika Kairake, bwa te beretitenti n te titeiki i rouia Kairake n Ataeinnaine, bwa te tia ibuobuoki, ao bwa te tia reirei n te Bootaki n Aine.

“Aine aika kairake ni boong aikai a bon aki kakoauaaki—a bon rangi n tituaraoi ao ni matoatoa,” e taku. “Iai i rouiia te kakaewenakoa ae aki nonoraki mai i mwaina bwa a na riki bwa aomata aika a kororaoi n te aonnaba ao ti maeka iai aei. Ngkai bon kaain te Ekaretia, a kona n tei bwa banna ni katooto ao ni kairiia tabemwaang ake a kakaea te banna ni katooto aika kororaoi.”