Weteaki nakon te Beku
Ibukin karikirakean ara utu ao n teimatoa ni mwakuri ni ibuobuoki i nanon te Ekaretia n aki kabirimwaaka ara kona nakon korakorara n tangira te wanawana, te motiraoi, te buoka mairoun te Atua—ao n tokina bon te angakarea.
Mauri n te bwakantaai aei, tariu ma mwaneu. I uota aia kamauri mitinare ao kaain te aro mai Latin Amerika. Iraman ma ibuakomi aika a kinaia, te Unimwaane ao Tiitita Dallin Oaks ao te Unimwaane ma Tiitita Holland a tia ni weteaki bwa a na beku n aonon te Ekaretia i Biribin ao Chile. Ngkana e bati te maninogongo, e a tia n riki aei bwa te bwai ae kakaongora nakon te Ekaretia. Tao baikara ami iango, I taku bwa I riai ni kaongoi ngkami bwa ti aki nako n taabo aika a raroa aikai bwa kanga kanikinaean kangaanga aika nang roko. Ibukiia naake a taratarai “kanikina” ni waaki aikai ni kabane, taiaoka tara aei bwa kanikinaean baika a kakukurei, te rikirake, n te Ekaretia ae kabutaa te aonaaba, ma kaaina ao mitinare ake a uamaenako ibuakon bootanaomata ma kotenanti. Bon te kakimwareirei te ikotaki ao te uaia ni beku ma aomata aika Itiaki ni boong aika Kaitira n taabo nako, ae raroa ke e uakaan, n abara ke iabatera ao ti karabwarabwa ibukin ami tataro ao ami kan reitaki n te mwakuri aei.
Te beku aei irouia Naake Tengaun ma Uoman, e bon, aki tibwa riki ao I taku bwa ara roro e beebete riki irouia nakoia rooro ake imwaira. I tekeraoi bwa iai Tiitita Holland i rarikiu, nakon ae e tiku ni mweengara n tarai arona ma natira. Irarikin anne, akea te mwakuri ae I karaoia iaon kawaira bwa e aoria n reke kantokara nako Santiago. Ti kiba nakon tokin kawaira inanon tabeua te aua n te wanikiba ae boou nakon ae ti ieie inanon wiiki , ke tao namwakaina, n te kabanea ni booraoi ni kantoka iaon te kaibuke. I aki roko ma te aoraki ae te mariri ao te biua, te maraeria, korera ke te kangenge, ma I bon ituaki n te biua iaon kawaira ao e waeremwe kibara teuana te aua. Au kaantaninga bwa baikai a na karekea au tai ni itaramata ma Betero ao Bwauro, Brigham ao Wilford.
N aroia aika a bati ibuakomi, I boni ikawai rake ma rongorongoia taari rimoa ake a nako Kanata, Engiran, Scandinavia, te Kontenanti ae Eurobe, Atimwakoron te Betebeke, Metiko, Aatia ao a bati riki. Ntaai riki aikai ao I a tia ni wareka rongorongon ana mitiin Parley P. Pratt nako Chile, ike e mate iai ma n taunaki natia te mwane ae te merimeri tangan Pratt i Valparaíso. I a tia ni wareka rongorongoia Unimwaane Melvin J. Ballard ao tabeman riki ake a weteaki nako Amerika Maiaki ngke te kontenanti anne e bon boou n te waaki ni mitinare. Te beku are e katea te Ekaretia ae e a tibwa kateaki e aki manrereiaki karaoana. N taai tabetai te tutuki e a bon korakora ao e boobuaka aron karaoana.
Ao ti taetae tiaki ti ibukiia taari rimoa ake a nako ni karaoa te beku, ma aine ake a boutokaia— ike a bon kamaiuia iboni irouia ao natiia, n tiku ni mweengaia ni kaikawaia ao ni kawaakiniia aia utu, utu inanon ana nne n aroka te Uea are E katuruturua kakawakiia.
N te bong are e na mwananga iai buuna n te kauoua n tai nako Engiran, e rangi ni maamara Nei Vilate Kimball, e rurubenebene n te maraeria, ao akea te bwai ae kona ni karaoia ma e ti iobai ma buuna ngke e roko ma rannimatana ni kaboo. Natia ae uarereke are Tawita bon iaan aua ana wiiki ni maiu, ao ti temanna te ataei, ae aua-ana ririki-ni maiu ae Heber Parley, ae tau marurungina ni ititiran ibukin maiun te utu. N aua imwiin nakon buuna, ao e bua korakoran Nei Vitale ao e a buokaki n kaokaki nakon ana kainiwene.
Nei Mary Ann Young ma natina a bon aoraki naba ngke e kitaniia Brigham n te tai naba anne n nako ni mitinare, ao e kararaoma mwaitin aia mwane inanoni baia. Teuana karakinan mwanangaia ae kanano kawaki e taekina neiei n rinanon te Karanga ae te Mississippi n tain te kamwaitoro, e mmani kunikaina ao e ruru ni mariri, n taua natina te merimeri iaon kawaina, ni kawara aobitin te kabwiianibwai I Nauvoo bwa e na bubuti kanaia tabeua te buteeta. Ngke, e bon aoraki naba n te biua, e touanako kawaina ma natina n riaon te karanga ae kakamaaku, n aki korea rongorongona ae kakaawa n ana tai n rawaawata nakon buuna.1
E burenibwai bwa ti na rinanon kaangaanga n aekakin aikai ni boong aikai, e ngae ngke e a bati aia anga-karea ae korakora mitinare ni karaoa ana mwakuri te Uea. Ngkai a roko kakabwaia ao e a rikirake te Ekaretia, ara kaantaninga bwa te beku e na aki rwaawata arona n aron taai ake ngkoa ngke a moana aia mwakuri kaain te aro, ma ngkai mitinare a anene n te bong aei mai Oslo nako Osorno ao ma i Seattle nako Cebu, ti bon “weteaki bwa ti na beku.”2 Ibukin karikirakean ara utu ao n teimatoa ni mwakuri ni ibuobuoki i nanon te Ekaretia n aki kabirimwaaka ara kona nakon korakorara,3 n tangira te wanawana, te motiraoi, te buoka mairoun te Atua—ao n tokina bon te angakarea. Man ana tai Atam nakon te aua aei, te onimaki ae koaua iroun te Uea ae Iesu Kristo e a bon tia ni irekereke ma te anganano n te angakarea, ara bwaintituaraoi ae uarereke e na riki bwa kanga bannan Ana angakarea ae kakannato.4 Ma te iango ae katiteuanaki iaon Ana Mwakuri ni Kamaiu Iesu Kristo, e reirei aei te Burabeti ae Iotebwa Timiti bwa te aro/ekaretia are akea iai te angakarea akea mwaakana ni karekea te berita ibukin te maiu ae akea tokina.5
Kariaia bwa N na tibwaua teuana te banna ni katoto n taai aikai ibukin te kakaewenako ao kakabwaia are “weteara nakon te beku” e kona ni uotia nakoira. Temanna mwanera ae kakateke are e taku nakon raona: “I tangiria n tuangko ibukin te tai are I katoka iai ribaakin ana angakarea buu n ana tai ni bitiobi. E koro kamiimin reken kaangaanga bwa a kanga ‘bwaai aika katawe’ ni birimwaaka i roun temanna te membwa ngkai ti nang nako ao ni karaoa riki te bwai ae kakaawaki.
“N te bong teuana I a boni bunnra nanoua ae babane ma nanobuakau ao e kariaia bwa ti na uaia ni kakoaua bwa irarikin tairikin te Moanibong koraki, ti na karekea riki teuana te tairiki n te wiiki ibukira. Eng, e a roko te ‘moan tai’ ao ti nang bon toka n te kaa bwa ti nang kabanea ara tai iboni imarenara ngke e a ti tang naba te tareboon.
“‘Aio bon te kataaki,’ I ngare nakoina. E reitinako tangin te tareboon. ‘Uring ara boraraoi. Uringa ara motinnano. Uringai. Ke e tang te tareboon.’ N tokina ao I a bon aki matangare.
“Ai kawara buu bwa e a tara n nikobuaka imarenau ma te tareboon. I bon ataia bwa e ngai ana moanibwai ao I ataia bwa e bon tangira nakora ni kakakibotu n te tairiki anne n ai arou naba. Ma e a bon betanga n tangin te tareboon.
“‘Tao N na ti ongoraea moa,’ e taekinna ma matana aika a rawaawata. ‘Tao bon te bwai ae beebete arona.’
“‘Ngkana ko kaekaa, ao e na uruana nakora ni kakakibotu,’ I takarua. ‘I bon ataia raoi.’
“E koona baiu ma n taku, ‘I waekoa n okiriko,’ ao e kabanea birina n tabeka te tareboon.
“Ngke, e aki waekoa n okira te kaa kaainabau, I ataia bwa iai te bwai ae riki. I otinako man te kaa, rinnako n te auti ao n tokara au kainiwene. N te ingabong are imwiina e taetae ma te kakabwara bure, I kaeka ma te kaeak ae e aamarau riki ao ai boni ngaia naba anne.
“Ke tao e a toki ikanne. I kunea bwa te bwai are e riki e titiku n au iango inanon wiiki aika bati. I aki bukina kaainabau, ma e ngae n anne I bon nanobuaka. E bon bati uringakina irou ngke I kaitibo ma temanna te aine n te uoote are Iaki bati ni kinaa. E teitei, arona ni kainnanoa te marooro ma ngai. Ngkanne e tuangai bwa e a tia n taatana temanna te mwaane are titebo ma e uota te kaunga nano nakon maiuna are e a kabotu ngkai buuna e mwakuri ao e kakaea naba ana kiraati n te reirei ae rietaata. E uarereke aia auti. Iai natina aika a uarereke ake a kaau, a kaberoro ao a kakua: ‘I tangiria ni kani kitana kaainabau ao n airinako ma te mwaane arei. Arou e a roko n te itera are n nang bon ira nanou. E a roko irou te iango are I boni kona ni kitana kaainabau, natiu, au berita ae tabu are I a tia ni karaoia inanon te tembora, ao ni kunea te kimwareirei ma te ianena.’
“E taku: ‘E a tia te baire; e a motinnanoaki au tai ni birinako. Ma, kaanga iai taribi ni iango raoi, e tuangai nanou bwa N na tareboonia kaainabam, are au bitiobi. I atongnga bwa “nanou,” ma I ataia bwa bon te wirikiriki ma i karawa. Ma e bati te totoko inanou ao I tareboon. E a tang man tang te tareboon ao e aki waekoa ni kaekaekaaki. E a bon bua au iango ao I taku inanou, “Ngkana e aki kaeka au bitiobi, ao tao boni ngaia te kanikina are N nang waaki ma au baire.” E bon reitinako tangin te tareboon ao e nang bon bwara nanou ao N nang waaki nakon uruan arou ngke I a ti ongo naba bwanaan kaainabam. E neneranako tamneiu kaanga te iti. N tokina I a maangoa te tang, ni kangai, “Bitiobi, boni ngkoe anne? I a reke n te kaangaanga. I kainnanoa ami ibuobuoki.” E roko kaainabam ma te buoka ao I namakina te rau n te bong aei kioina bwa e kaeka te tareboon kaainabam.
“‘I a boni kua ao n nanobaba. Ma I bon tangira kaainabau ao natiu ma nanou ni kabanea. I aki kona ni iangoa te kabuanibwai nakon maiu ngke akea ngaiia irarikiu. Bon taai naba aikai aika ti rootaki iai ni kaangaanga n ara utu ma I ataia bwa anne naba aia kaangaanga aomata. Ma e a rikirake nakoraoin arora. E na bon riki anne n tokina.’ Ngkanne e taku: ‘I aki rangi ni kinako ma I kan karabwako ibukin boutokaan kaainabam n nakoana. I aki ataia bwa iraua boon te mwakuri ae aekakin aei iroum, ke nakoia natim ma ngkana iai tebongina ae ko maraki iai, taiaoka n ataia bwa akea tokin au kakaitau ibukin am angakarea are ko a tia ni karaoia ni kamaiuakiia aomata n arou.’”
Tariu ao mwaneu, taiaoka ataia bwa ngai temanna are I tataekinna ni katuruturua aron baike ti kaantaningai mairouia ara bitiobi ao ara tia taani kairiiri. I namakina riki bwa iai bwaai ake a kainnanoaki mairouia kaaro, riki tiina, itinanikun te mweenga ike a borikaki iai ataei bwa bon maibuakon bwaai aika akakaawaki n te bootanaoamata. I ibukina bwa I kamatoa bwa buu aine ma ataei a riai n anganaki, te tai ae tabu ma n onoti ma taama ao buu mwaane tiaki ni kaeka te tareboon. I kakaitau n oin nanou n aron te aine arei n nanona n te bwai are e riki ngke te mwaane arei e ira ana wirikiriki te Tamnei ao e kaeka “te wewete”—n te tai arei—bon “weteana nakon ana beku.”
I kakoaua ibukin te mweenga ao te utu ao te mare, bon bwaai aika moan baan te kakaawaki inanon maiuia aomata. I kakoaua kainnanoan kaawakinan baikai ngkai iai ara tai ao aanga naba ni beku inanon te Ekaretia. Inanon taai aika a burenibwai ngkana a itabarara baika, ngkana ti kunea te kaangaanga n te aua ke te ngaiana ke te bong ao ngkana e roko te wirikiriki n tamnei ni kaineti ma te wewete bwa e kainnanoaki ara kaeka, n taai akanne I kaota au karinerine nakoia buu aine are e a tia n tekateka n amwarake n ti ngaia, buu mwaane are e a tia ni kuukana kanana ngkai mwaane aki bati ni mwatai ni kuuka, ao ataei ni kabane ake a tia n rootaki n taonan aia tai ma karo ke tinaia (ao e riai n aki bati n ririki anne!) I karineia naba beretitenti ni mitiin nako ma buuia aine, natiia, taanga ni kabane ake a weteaki nakon te beku mangaia, are ibukin aei ao a bon aki roko n taai ni bung ao bwabetito, maare ao taunimate, aia utu ao kaungan aia bootaki ni utu ibukin kaekaan te “wewete nakon te beku.” I karabwai ngkami ni kabane, ake kam a mena n taabo waaki aika a kaangaanga rinanon te Ekaretia, taiaoka ti karaoa ami kabanea n tamaroa.
I kakoaua Ana angakarea ao Ana beku te Uea are Iesu Kristo are E anga ni kabane ibukira n te tamnei n angaanga ao e taku “irai ngkoe.”6 “Ngkana e beku ibkiu temanna, ke e irai,” E taku, “ao ike I mena iai, e na mena naba ikekei au toro: ngkana e beku ibukiu temanna, e na karineaki iroun Tamau.”7 Aekakin beeku aikai a karokoi naba titiraki ni kakaewenako ni kaineti ma kabaerantan taai ibukin bwaai aika a kakaawaki ao ti na kaanga n riki bwa taan iriiri ngaira aika E tangirira bwa ti na karaoia. I karabwa i bukin raonakira mai Karawa ni buokiira ni karaoi babaire aikai ao ni anganira kawai aika a eti i bukin bwaai bwaai nako. I karabwa ngkai “E a tia ni amoamoi nanokawaakira, ao n uouoti rawaawatara”8 ao E a tia ni weteira bwa ti na karaoi naba anne imarenara. N aran Iesu Kristo, amen.