Nakoia Mwaane n te Nakoanibong
Ngkami mwaane ake iai iroumi te nakoanibonga, kabaea nakon rabwatam. Taraia bwa ko na kororaoi n taai nako n aeka ni maiu nako.
Ngkai tariu aika tangiraki, I taetae ma te kaantaninga bwa e na ibuobuoki nakoim. I tataro ibukin Tamnein Uea bw e na kairai.
I aki kan tuangi ngkami bwa ti a riki bwa te Ekaretia ae rangi ni bubura ma ni kanganga baireana. Ara buroukuram e a rangi rababa nako ao ti a roroko n taabo aika rangi raroa nako n te aro ae kangaanga iangoana. Ti a riki bwa te Ekaretia ae mena iai te rabakau ni kairiiri Bon te bwai ae raka arona ma ni kamiimi. E na teimatoa n arona aei. E na aki bitaki man aron rababan nako ana mwakuri aika a kaboaki. Ma ti ataia ngkai bwa moan te rawawa aron te uota n te babaire.nakoia ara Bitiobi ao ara beretitenti n titeiki, ao ai uana naba nakoia ake tabeman. Ataakin te koaua anne ao e a tia te Beretitentii ao te Tengaun ma Uoman ni karaoi bootaki, tabeua ao mai buakon botaki aikai e kakukurei, ao n norana ti a tia n tibwatibwaa te Ekaretia ao imwiina ti manga botia. Ara kaantaninga bwa ti na taraia bwa a na iai burokuraem aika a na katokaki. Ma ngke ti karau n rarangai taekan baikai, ti aki nooria bwa e rangi mwaiti n te aro ae na iai ae na tiku. Katukan teuana ti tebo kanakoan am ataei temanna. A na akea i roumi ae na kan karaoia. Ma I kan kakoaua nakoimi bwa ti ataa rawawatan te uota ae kam uotia ao te tai ae kam kabanea. N i bootakin te Nakoanibonga aei ao I kan taekin bwaai tabeua aika ti a tia ni maroroakin. I taku bwa kam kona noria bwa tia a tia ni karekea te rikirake teutana, e ngae ngke tao e uarereke.
N na taekin baika a bati man bwaai riki tabeua.
Ti a tia ni baireia bwa ni moa man Nobembwa 1, te beeba ni kariaia nakon te tembora e iangoaki bwa e na toki kabonganaana i nanon uoua te ririki n onea mwiin are teuana.. N te aro aei ao e riai ni kauarerekea te tai are a na kabanea bitiobi ao beretitenti n titeiki ao aia kauntira te maroro ibukin taian beeba ni kariaia nakon tembora. Eng, ngkana iai te tai are e aki kororaoi iai te aomata are e reke irouna te beeba ni kariaia nakon te tembora, ngkanne e na riki taben te bitiobi ke te beretitenti n te titeiki bwa e na anai aia beeba ni kariaia aomata n tatabeman nako.
Ma n nooran baika a tia n riki e kaotaki iai bwa iai bwaai tabeua aika a riai n taraaki raoi. Ao mangaia are, tariuaio ngkanne te buroukuraem, tariu. Ni moa man Nobembwa, n aki tabeakina bongin te namwakaina are e koreaki iaon te beeba ni kariaia, taina e na karakaaki riki nakon teuana te ririki. Ngkanne a na kabouaki beeba ni kariaia ni katoa uoua te ririki. Ara kaantaninga bwa e na rangi ni bongana. Tiaki nanououa bwa e na bongana.
Te Bwai riki Teuana.
E a tia te Unimwaane ae Ballard n taetae nakoimi ni kaeineti nakoia mitinare. I kani kakoaua are e taekinna. Au kaantaninga bwa ara kairake n ataeinimwaane, ao ara kairake n ataeinnaine, a na rikirake nakon te kangaanga are e a tia ni baireia. Ti riai ni kawaerakea tokin kororaoira ao konabwaia te koraki ake a nako nakon te aonaaba n riki bwa a na taan tei te Uea ae Iesu Kristo.
Iai te katei ae kakukurei inanon te Ekaretia. Mitinare a nang nako e karaoaki nakoia te karaure. Inanon uoote tabeua ao e a tia n riki te bwai aei bwa te kangaanga. I marenaia mitinare ake nako ao ake a roko, angiin Botaki n Toa a karaoaki bwa tain te karaaure ma ni butimwaai nakon okiia nakon mweengaia.
Akea temanna n te Ekaretia ae na karaoa ana botaki ni kaaitibo ao ni karaure ngkana roko ni karaoan te mwakuri teuana. Ti tuai ma ni karaoi botaki ni butimwaai aika onoti ibukin te bitiobi ae boou, ibukin te beretitenti n te titeiki, ibukin te beretitenti n Aia Bootaki aine, ibukia Mataniwi ni Kabuta, ke tabeman riki ake I kona ni iangoi. Bukin tera bwa ti karaoa te butimwaai ao te karaure ibukiia mitinare?
Te Moani Beretitentii ao te Tengaun ma Uoman, imwiin aia tataro mwaaka ao aia iango mwaaka, a tia n reke aia baireia bwa te buroukuraem ae boou ibukin te bomata ao te karaaure ma mitinare e riai ni manga bitaki.
A kona n anganaki aia tai mitinare ake a na nako n taetae ni botakin te toa i nanon 15 ke 20 te miniti. Ma kaaro ao natiia a na aki tuangaki bwa a na taetae. E kona n iai uoman ke e raka riki mitinare ake a na taetae n te taromauri ae ti teuana. Te botaki e na mena baireana i nanon bain te Bitiobi, ma e na aki baireaki mairoun te utu. A na akea te anene ae onoti ke bwaai riki n aron akanne.
Ti ataia bwa e na aki kakukurei te aro aei nakoia utu aika mwaiti. Taama ao tiina, taari ao tititati, ao raao, a tia n anganaki aia tai n te tai are e nako. Ti bubuti bwa kam na kariaia te iango aei. N taabo ike e a tia ni baireaki iai te bomata ao te karaaure e riai ni waakinaki. Ma akea n katei ni kawai ae e riai ni baireaki ibukin te tai ae na roko. Ti kaungaaki bwa ngkana a kona ni kakaeaki aanga iango nako ibukin te aro aei, aio bon te iango ae wanawana. Taiaoka kariaia, tariu aika kam tangiraki. I uotarake naba te bubuti aei nakoia mwaanera, e kaeineti riki nakoia tiina.
Ara kaantaninga naba bwa karaoan neweabaan auti imwiin te botaki n toa are taetae iai mitinare e na aki kariaiakaki. Kaain te utu a kona ngkana a tangiria ni kan ikotaki ni botaki. Akea ara totoko nakon aei. E ngae n anne, ti bubuti bwa a na aki kaoaki kaain te botantaomata n te mwaiti ae bubura.
Te mwakuri ni mitinare bon te atatai ae raoiroi are e uota te kanuanga ibukin tituaraoina. Ao ngkana e oki te mitinare nakon ana utu ao ana uoote e kona n anganaki riki ana tai n taetae n tain bootakin te toa.
Te bwai are imwiina.
Kariaiai bwa N na angani ngkami te ribooti ae uarereke iaon te Mwane ni Buoka ibukin te Reirei are e kateaki teuana ao te iterana n nako n te maungatabu n Eberi. Te buroukuraem e a waaki raoi ngkai iaon aana ae raoiroi. Iai te mwane are e biribiriaki mairouia Aomata aika Itiaki ni Boong aika Kaitira. Ara kaantaninga bwa a na iai riki aika a na roko n te aro bwa e aonga ni kona ni buoka te mwaiti ae bubura mai irouia te koraki ake tau ni buokaki.
N te bong aei e nakon 5,000 mwaane ao aine, angiia bon kairake, ake a tabe n reireiaki ake a na aki kona ni karekei aia tai. Iangoa mwiin te bwai aei. Aomata aika Itiaki ni Bong aika Kaitira aika kakaonimaki aikai a aanga te kaintamwarake are a kona iai n tamwarake ma n otinako man te aeka ni maiu ni kainnano aei are a tia ngaiia ao aia bakatibu ni maiu i nanona. Aron aia kona ni kareke mwane e a rangi ni korakora rikirakena. Mwaakaia ni kairiiri e tabe n rikirake n tamaroa. A na riki bwa mwaane ao aine aika a kaubwai, aika kaain te Ekaretia ake a na uotaarake ana buroukuraem n te katei are e tuai n iangoaki n taai aika nako.
N na angani ngkami te katoto. Te moani kairake ni karekea ana tangomwane e tia ngkai ni kabanea teuana te ririki ni kataneiai ao e a tia ni bubuti ibukin te mwane ibukin ana kabanea n ririki ni kataneiai. E reirei bwa e na riki bwa te tia ibuobuoki nakon te tia karao wii.
I mwaain aei ao e mwakuri n te auti ni ka amwarake ao e karerekea $130.00 n te namwakaina. E kaantaningaaki bwa ngkana e bane ana kataneiai inanon te tai ae kimototo e na karekea $650.00 n te namwakaina ni moana ma—te rikirake ae waetata ae 500 te katebubua. E na rikirake anne i nanon te ririki.
Ai kamimiira te kaokoro tabeua te taara ae kona n reke ngkana a bubuti raoi. Ngkai, ko na kamwaita ana atatai ma 5,000. E na aki kona ni mwanuokinaki ngkana e iangoaki. Bon te bwai ae moan te kakawaki ae e riai n iangoaki. Ataein te reirei ae a tabe ngkai ni karaoi aia kataneiai bwa a na riki bwa mwakaeneke, taan kabwarabwaraa aron te waaki, taan karaoi babaire, taan iti, taan iti ibukin kareke rongorongo, neeti, taan mwakuri n te oo n aoraki, taan karaoi buroukuraem ni kaombiuta, tani karao kaombuta, taani korotamnei, taani mwane, taan mwakuri n teiti, taan reirei n Taetae n I-Matang, taan kariki, taan mwakuri n taian auti ni irua, ao taan taumwiin waare ao tabeua riki.
Te bwai ae riai e aki kona n toki, ao tera te bwai ae riki bon te bwai ae moan te raoiroi ao e kamimi.
Te bwai are imwiina ae I kan taekinna bon te botaki n utu n te tairiki. Ti mwaaku bwa te bwai ae moan te bongana aei e taraa ni keerikaaki n taabo tabeua. Tariu, akea te bwai ae kakawaki riki nakon ami utu. Kam ataa anne. Te buroukuraem aei e moanaki n 1915, 87 ririki n nako, ngke e kaumakiia kaain te Ekaretia Beretitenti Joseph F. Smith bwa a na katuka teuana te tairiki ti ibukin te utu. Bon te tai n anga reirei, te tai ni wareware ni booki aika tabu, te tai ni karikirakei tarena, te tai ni maroroakin bwain nako te utu, Tiaki te tai n iri takakaro nako. Eng, ngkana iai te takakaro ibukin te utu n aekan aei n taai tabetai, tao e na raoiroi anne, Ma ngkana iai ienikuri ke te aki oota raoi ni maiura e kakawaki bwa taama ao tiina a na bootaki ma natiia, n tataro, reireiniia ana kawai te Uea, iangoi aia kangaanga n aia utu, ao kariaia ataei bwa a na kaoti aia tarena. I rauaki nanou bwa te buroukuraem aei e roko iaan ana kaotioti te Uea ni kaekaan te bwai ae kainnanoia te utu n te Ekaretia.
Ngkana iai te bwai ae kainnanoaki 87 te ririki nako, te kainnano anne bon e a rangi ni korakora riki ni boong aikai.
Te iango are e karaoaki n tairikin te Moanibong anne e katukaki nakon ana mwakuri ni kakukurei te utu. N taabo ike e mwaiti iai kaain te Ekaretia taan mwakuri n te reirei ao tabeman riki ake a karinea te buroukuraem ma n aki katabea te tairiki anne.
E rikirake te kona ni bairei bwaai ake a na karaoi n tairikin te Moanibong anne. Ti bubuti ma te karinerine bwa taan mwakuri n te reirei ao tabeman riki a kariaira bwa ti na karika te tairiki ae teuana n te wiiki aei ni waakina te buroukuraem ae kakawaki aei. Ti bubuti bwa a na aki baireaki bwaai ake a na tangira aia tai ataei n tairikin te Moanibong aei. Ti aki nanououa bwa a na ataia bwa moan te kakawaki bwa utu a na reke aia tai, tao teuana te tai n te wiiki, ni bootaki n aki ekanako te kakaonimaki. Ti na kakaaitau ngkana a kona ni uaia ni ibuobuoki n te bwai aei. Ao ti kairoroaki n taeka aika matoatoa bwa taama ao tiina a na mwannanoa riki te tai aei ao ni kaewenakoaki bwa ti na karika tairikin te Moanibong bwa te tai ae tabu n te utu.
I a tia ni kaoaki bwa N na iri ana botaki nako te botanaaomata n te bong ae Moanibong n aeka bootaki aika a kakaokora. I a tia n aki aki kariai kakao aikai ma te kukurei, ma te karautaeka bwa I a tia ni katabea te bong ae te Moanibong bwa bootakin te utu n te tairiki. Au kaantaniga bwa ngkami n tatabeman nako kam na karaoa ae ti te arona.
Te bwai are imwiina.
Tariu, I tangiria ni kairoroi ngkami nakon riki kakawakin te toronibwai are bon tabeia kaain te Ekaretia n tatabeman nako ao te utu.
Akea mai iroura ae ataia bwa ni ngai are e na roko iai te kangaanga n oroira. Te aoraki , te ikoaki, te aki mwakuri e kona n rootira.
Iai ara buroukuraem ni kamweraoi ae korakora ma bwaai ibukin bwaai n aekaia nako n aron kawakinan te burawa n taabo nako. E kakawaki bwa ti na karaoa aio. Ma te tabo ae moan te raoiroi ibukin kawakinan amwarake inanon mweengara, ni ikotaki ma te mwane teutana ae kawakinaki. Te buroukuraem n te kamweraoi ae moan te raoiroi bon oin ara buroukuraem ni kamweraoi. Nimaua ke onoua bwaketi ni buraoa n te mweenga a raoiroi riki nakon teuna te bwantoro n te auti are a kawakinaki iai burawa.
I aki N ae I taekin kangaanga aikai imwaain rikia. Au kaantaninga bwa a na aki riki. Ma te babaire raoi e riai ni kawakin maiura. Ni kabane aomata ake iai mwengaia a atai baika a kainnanoaki ibukin kaboanmwin te bue. Ara kaantaninga ao ara tataro bwa e na aki kona n reke te bue n te ai. E ngae ngke ti kakabwaka boon te kabomwi are e na kona ni kaboamwin te kangaanga, ngkana e riki.
Ti riai ni karaoa te bwai ae ti tebo ae kaeti nakon ana kamweraoi te utu.
Ti kona ni moanna man ae moan te mangori Ti kona ni moanna man karekean te amwarake ae tau ibukin teuana te wiiki ao ni karikirakea teuaana imwiin teutana nakon teuana te namwakaina ao imwiina nakon teniua te namwakaina. I taekin taekan amwarake bwa a na reke aekan amwarake ake a kainnanoaki. Ka kinai ni kabane, bwa tiaki te reirei ae boou. Ma I maaku bwa a na mwaiti aika a na iangoi amwarake ake a maan taia ma e na rangi n riaon are a kona ni karekei.
Moanna man ae uarereke, tariu, ao karikirakea teuana imwiin teutana nakon are ko kaantaninga. Kawakina te mwane ae uarereke n taai nako ao ko na miimi bwa e kanga n rikirake.
Kararoako man te tarau ao kararoako man te kabaeaki ae kakamaaku are e reke man te tarau.
Ti bati n ongoongo taekan te kauoua ni mortgages. I tuangkaki bwa iai te kateniua ni mortgages.
Reireiniko ataan te riai n aron te kabane mwane, te tangobwai, mwakuri ake e kairiko nakon kabanean am mwane ao te nanokawaki are e na roko nakoim.
Ngkai, n tokina, tariu, I tangiria n okiri bwaai ake I a tia n taekin ao are e a tia n taekinaki mairoun te Unimwaane ae Ballard ao Beretitenti Monson n te bootaki aei. Au kaantaninga bwa a na aki kaaitara te bwai ae I kataia ni katurutua riki bwa tera are a tia n taekinna. I kan kaira ami iango nakon te katei ae riai ibukia kaain te Ekaretia.
Moan te mwaiti aika a mwane ni ngaon te buakaka. Ao ni kabane te uaa ae mao are e raanga mai iai. Nakoia ataeinimwaane ake a mena ikai n te tairiki aei—kairake n ataeinimwaane—I tangiria n taekina te taetae ae matoatoa are I kona, kararoaa te maiu ae buakaka. Ko ataia bwa tera ae riai ao ae kaairua. Ko aki kona ni kabongana kabi bwa karekean am anga.
Ko na kanga ni iangoia bwa ko kona ni karaoi mwakuri aika bubuaka ao imwina ko nako nakon te tabo are ko na karaoa iai am mition n riki bwa ana tia tei Iesu Kristo? Ko taku n am iango bwa ko tau n nako nakon ana auti te Uea, ni mareaki ikekei ibukin te tai aei ao te tai are akea tokina, ngkana ko a tia ni bure n te aeka ni mwakuri teuana?
I ubutiko, raoraou aika kairake, ni katokan te aeka ni katei anne. E na bon aki kanganga. E na tangira ataan te katei ae riai. Te mwaaka are ko kaaitara a rangi ni korakora ao a kakao n tai nako. Bon mwaakan te kairiribai ae wanawana. Ko kainnanoa te korakora are e roko man te tataro.
Kararoai tamnei aika bubuka man te intanete. A na bon katikiko ni bouaiko. E kona ni kairiko nakon te kamamaunaaki.
Tai kabua taraan te koaua are iai iroum te nakoanibonga mai iroun te Atua. Ngke e anga te nakoanmibonga ae te Aron Ioane nakon Iotebwa ao Oriwa Kauri e taku bwa te nakoanibonga aei “iai iai kingin aia mwakuri anera, ao te euangkerio ibukin te raira n nano, ao te bwabetito ni kateboaki nako aan te ran ibukin kabwaraan bure” (tara D&C 13).
Ko tangiria ni karekea aia mwakuri anera?
Bwa aia mwakuri ni ibuobuoki anera e na uoti kanuanga aika aki kona kabotauaki aroia ma ni kairiko nakon kawai aika ririeta inanon maium ao te Atua e na kakabwaiako ao ni kaikawaiko rake ao ni kairiko n taua baim, ao e na anganiko kaekaan [am] tataro” (tara D&C 112:10).
Nakoimi mwaane aika kam a ikawai I kanakoa nakoim te bubuti ao te kauringa naba ae ti te arona. Moannakin te bwai man ae uarereke e kairiko nakon te kangaanga aika korakora. Ti katoki n taainako. Moan te bati te maraki n nano, te aki ongotaeka, te raure, ibuakora.
I kan taekinna riki te bwai are I a tia ni karaoia n te tai ae e a tia nako. I taetae nakon karaoan ae buakaka nakon te ataei.
Tiaki kona n taotaon nanora nako iai. Ti na aki kona ni katokia. Te aomata are e karaoa ae bukaka nakon te ataei e kona n anganaki te reireiaki n te Ekaretia ao ai uana naba ma karaoan te katuaeaki n te tua.
Karaoan te mwakuri ae bubuakaka nakon te ataei bon te bure i matan te Atua Iesu e taekina aron raoiroia ataei. Nakoia naake a bure nakon karaoan ae buakaka nakoia ataei, I taku n te taeka ae matoatoa bwa I kona n reireini ngkami te katei ae riai. Ukoukora buokam imwaain are ko kaikoaka te ataei ao mani urua rabwatam.
Ngkami mwaane ake iai iroumi te nakoanibonga, kabaea nakon rabwatam. Taraia bwa ko na kororai n taai nako n aeka ni maiu nako.
Ngkana ko karaoia ko na kimwareirei ni karekea te “rau mai iroun te Atua, are e rinanon atatai ni kabane” (I-Biribi 4:7).
Ke kakabwaiako te Atua, tariu aika kam tangiraki n te nakoanibonga, aika ataei ao ikawai. Taama, karaoi katoto ibukiia natimi. Ataei ni mwaane, kaeti matami n taraia tamami ibukin te wanawana ao te kaetieti ao te ataibwai.
Moan te raoiroi ana berita te Uea nakoia te koraki ake a nakonako n te onimaki. I katuka au kakabwaia nakoimi, au tangira, ao au koaua. Ai raoiroira ma ni kamimi te mwaaka aei ibukin te raoiroi ibukin te nakoanibonga aei ngkana ti a katiteuanaaki ma ni waaki rake n teuana. Ke e kakabwaiaira te Uea ni karaoana, I tataro ma te nanorinano n aran Iesu Kristo, amen.