N na Nako ike ko Katangirai bwa N na Nako iai
Te rairaki ni koaua ae bwanin nakoia ana mwaane ao ana aine te Atua e reke man ara mwakuri i nanon ana oo ni kureebe.
I rinea te anene ae e kaunga nakoia ana toro te Uea aika kakaonimaki n roro aika bati:
Tiaki iaon te mwaunga ae rietata
Ke iaon taari ae buaka,
Ma tiaki n te rain i moa n te bobuaka
Au Uea E na kainnanoai.
Ma ngkana, e weewete, te bwana are e uarereke
Nakon kawai aika I aki atai,
N na kaeka, au Uea ae ko tangiraki, ma baiu inanon baim:
N na nako ike ko tangirai bwa N na nako iai.
(“I’ll Go Where You Want Me to Go,” Hymns, no. 270)
E koreaki iroun te aine ae tiaki kaain te Ekaretia, taeka aikai a kaota aron aia anganano natin te Atua aika a kakaonimaki n rooro nako.
E kaira Itaaka Aberaam nakon te Maunga are Moria, e kakaonimaki n nakon te tabo are e tangiria te Uea (tara Karikan Bwaai 22). E teirake Tawita ni kaitaraa te aintoa, ae Koria (tara 1 Tamuera 17). E kamaiuia ana aomata Etita, e nakonako i nanon te kawai ae kakamaaki ni maiuna ni kamwanea te uea n ana auti (tara Etita 4–5). “N na nako ike ko tangirai bwa N na nako iai, au Uea ae ko tangiraki” e kitana Ierutarem Riaai (tara 1 Nibwaai 2) ao natina ae Nibwaai e oki n anai rekoote (tara 1 Nibwaai 3). Tebubua tabun katoto man booki aika tabu aika a kona ni warekaki.
A ongotaeka aomata aika a kakaonimaki ni kabane nakon ana kairiiri te Uea ao a onimakina mwaakana ao raoiroina. E taku Nibwaai, “N na nako ni karaoi bwaai ake e tuangai te Uea, I ataia bwa te Uea e aki anga tuua nakoia natiia aomata, ma e katauraoa te kawai bwa a na katiaa te bwai are e tuangia” (1 Nibwaai 3:7).
N ara ururing ibukin taai aika a tia n nako, iai te katoto ibukin te nanorinano, ao aia mwakuri ni ibuobuoki kaain te Ekaretia. E rangi n ataaki Beretitenti J. Reuben Clark. Imwiin te tai ae raka nakon 16 te ririki n rikina bwa te moan kauntira ae rabakau n anainano, te Moani Beretitentii e baireaki kateana ao e weteaki bwa te kauoman ni kauntira. E kaota te katoto ibukin te nanorinano ao e kukurei ni beku ni kaungaia rooro nako, E taku nakon te Ekaretia: “N ana mwakuri te Uea, e aki kakawaki am tabo are ko mwakuri iai ma e kakawaki aron karaoana iroum. N ana Ekaretia Iesu Kristo, e karekea ana tabo temanna n aron weteana, te tabo are akea ae na ukoukoria” (in Conference Report, Eberi 1951, 154).
E kakawaki, e ngae ngke e aki bati n nonoraki, ke n ongoongo te aba ni bwanana, bon kaain te Ekaretia aika e nakon te mirion mwaitiia aika a mwakuri ma aika ti tebo aia onimaki ma aia anganano ma ngaia n te tabo ae raroa n ana tabo ni kureebe te Uea. Ara miitinare ake a maan te mwakuri a karekei katoto aika moan te raoiroi aika I atai.
I rinanon aia beeba mitinare aika e nakon 50 mitinare aika taanga aika a bane aia tai. A tia ni kabane ni karaoi aia mwakuri ni mitinare aika e nakon teniua ngke a kanakoi aia beeba ibukin weteakiia riki. Mweengaia bon man taabo aika Aotiteria nako Arizona, Karebonia nako Mitiori. Aia ririki e moan man te 60 ao 70 nakon te—tai ae aki baireaki. Te taanga teuana, ae a tia n anga ngaiia nakon te kaitiua ni mwakuri ni mitinare, A tia na ba ni mwakuri n Tembora Tikuea, i Alatika, i Nu Tiran, i Keenia, ao Kaana. A tia naba ni kanakoaki Biribin. A mwaiti katoto aika a konaa n taekinaki.
Ana iango mataniwin te nakoanibonga iaon aia beeba taanga ni mitinare aikai bon te kakoaua ibukin aia beku ni ibuobuoki ao n anganano. I rinei tabeua mai iai:
“Kukurei n nako nakon taabo nako e aki akaaka bwa mannra te tai ae tangiraki.”
“Aikai katoto aika a raoiroi ibukiia kaain te Ekaretia ake a tia n anga rabwataia ibukin te Uea.”
“Ti na nako nako ike e tangiri[ra] iai te Uea,” A taku taanga ake tabeman. “Ti tataro bwa ti na kanakoaki nakon te tabo are ti kainnanoaki iai.”
E kaota ana iango mataniwiin te nakoanibonga ibukin aia atatai taanga aikai ma ni katauraoa taekan nakoraoin karaoan aia mwakuku ara mitinare aikai ae raoiroi.
“E rangi n raoiroi ni waakinan kanakoraoan te buroukuraem bwa e n waaki ao n te kairiiri.”
“Kimwareireia e onrake ngke a tuangaki bwa a na ‘kateia’ ma ni karikirakea; mangaia are karaoan te mwakuri n taabo aika rangi n rikirake n te Ekaretia e nako raoi. Ao a rangi ni kukurei ni beku n mwakuri nako ake a weteaki nako iai.”
“A na rangi ni manena ngkana a mwakuri ma [naake a aki bati ni kakaonimaki] ao naake a tibwa rairaki nakon kamwakuraia n aobiti.”
“A tangiriia kairake ao iai aia kona ni mwakuri mangaia.”
“A namakina nakoraoina ao iai tangiran kan buokan te kairiiri ao kaokaia naake a mamara.”
“Iai mamaraia n rabwataia, ma a marurung n tamneia ma ni kukurei nanoia n te mwakuri ni mitinare.”
“Teuare te mwaane bon te mitinare ni koaua. Moan arana bon Nibwaai ao e bon toua mwiin arana. Neiere te aine bon te aine ae rangi n raoiroi, e kakaota te katoto ae raoiroi n taai nako. E karaoa ae moan te raoiroi ni weteana ni kabane. Aio bon kanimauan aia mition.” (A tia ni mwakuri i Kuam, Naitiria, Vietenaem, Bakitaan, Tingkaboa, ao i Mareitia. A anganaki te motirawa teutana man taabo aika kangaanga ake a mwakuri iai. Ana toro te Uea a weteaia bwa a na mwakuri n te Nauvoo tembora.)
Iai taanga riki ake tabeman a taekinia aomata aika ninikoria aikai ngke a korobokii taekaia mitinare aika ninikoria aikai: “Ti na nako n taabo nako ni karaoa are ti tuangaki bwa ti na karaoia. Tiaki te anganano, ma bon reken te tai.”
Mitinare aika a bane aia tai aikai a kaota te anganano ae rine arona. Ai bon aroia naba ara mition beretitenti, beretitenti n tembora ao buuia aika kakaonimaki. A kitan mweengaia ao aia utu ni karaoa aia mwakuri ae bwanin taina n te tai ae e baireaki. Ai uana naba ma mitinare aika mwaiti kurikuri ake a tia n taon baike a na karaoi ni maiuia ma ni kaboo nakoia aia utu ao raoraoia ma ni waaki nako (ni bon oin aia mwane) ni mwakuri n te tabo are a weteaki nako iai iroun te Uea, are e taetae nakoia ana toro nako.
N na nako ike ko tangirai bwa n nako iai, au Uea ae tangiraki,
Iaon te maunga ke te tawaana or taari;
N na taekinna te bwai ae ko tangirai bwa N na karaoia, au Uea ae ko tangiraki;
N na riki nakon are ko tangirai bwa N na riki nako iai.
(Hymns, no. 270)
E nakon te mirion mwaitiia ake a karaoi aia ibuobuoki mani mweengaia ni bon kukurein nanoia. Mangaia are a mwakuri ma 26,000 taian bitiobiriki ao beretitentii n taian mwaanga, ao beretitentii n taian kooram aika a kakaonimaki ao Aia Botaki Aine , Moanrinan ao Kairake n Ataeinaine ake a buokiia ao a kairiia. Magaia are iai mirion tabeman riki, taan reirei aika a kakaonimaki n taian uoote, mwaanga, titeiki, ao mwakoro. Ao iangoia irabubua riki ngaa taan reirei ni mweenga ao taan kakawari n reirei ake a kakoroa bukin ana tua n “tararuaa te ekaretia n taai nako, ma ni kakorakoraia” (tara D&C 20:53). Ni kabane naakai a rin naba n te kibu aei:
Tao n te bong aei iai taeka n tangira
Are e tangirai Iesu bwa N na taekinna;
Tao a na iai naba ngkai inanon kawain te bure
Naake a mwaninga nako tabeman ake N na ukoukoria.
Au Tia Kamaiu ko bia riki bwa au tia kairiiri,
E ngae ngkana e roo ao n taburekareka te kawai,
Bwanau e kaokioka te rongorongo ae karewerewe:
N na taekina ae ko tangirai bwa N na taekinna.
(Hymns, no. 270)
Ngkai e reirei te Burabeti-king ae Beniamina, “Bwa ngkana [ti] beku ibukiia rao[ra] [ti] beku naba ibukin Atua[ra]” (Motiaea 2:17). E kauringira naba bwa ti na “taraia bwa a na karaoaki bwaai aikai ni kabane n te wanawana ao te tangira; bwa e aki riai bwa e na kabirimwaka riki te aomata nakon korakorana” (Motiaea 4:27).
E kaewenakoira ana euangkerio Iesu Kristo bwa ti na riki bwa taan rairaki. E reireinira bwa tera ae ti riai ni karaoia, ao e karekei ara tai n riki bwa tera are ti na riki nako iai ae tangiria Tamara are i Karawa. Te rairaki ni koaua ae bwanin nakoia ana mwaane ao ana aine te Atua e reke man ara mwakuri i nanon ana oo ni kureebe.
Iai ara katei ni kawai ae korakora ibukin te iaiangoaia ni karaoan ara mwakuri inanon Ana Ekaretia Iesu Kristo ibukia aika Itiaki ni Bong aika Kaitira. Eng, teuana te katei ae ataaki n te Ekaretia aei bwa akea ae kaboaki ke akea ara mitinare aika iai aia beeba inanon bootaki nako ao n titeiki n taabo nako, mwaakoro ao ni mition nako ake a tararuaiia. Ngkai te bwai ae kakawaki n ana babaire te Atua ibukiia natina, te mwakuri ni kairiiri ao ana mwakuri Ana Ekaretia e karaoaki irouia natina ake a anga aia tai n aki kaboaki ibukin Ana mwakuri te Atua ao raoraoia nako. A ongeaba nakon Ana tua te Uea, a tangiria ao a beku ibukina (tara Ioane 14:15; tara D&C 20:19, 42:29, 59:5). Aio te kawai mwaane ao aine katauraoi nakon te kakabwaia n te miau are akea tokina.
Ma, iai tabeman aika kona ni katamaroaa riki aia boraraoi.Ngke I titirakiniia beretitenti n titeiki ibukin aia iango ni katautau i aon te boto ni iango iriai I riai ni karaoia n ana maungatabu n te titeiki, I aki toki n ongo bwa iai kaain te Ekaretia aika a rawa ni butimwaai wewete nakoia ao a aki kakoroi bukin nmwiokoaia. Tabeman a aki kukurei ma n aki kakaonimaki. E ririki aei taainako. Ma e na aki ngkana e akea mwiina.
E taekina aron kabotauan te kakaonimaki ao te aki kakaonimaki te Tia Kamaiu n te kaikonaki are koreaki n te ka-25 ni mwakoro ni Mataio. Iteran mwaitiia iruaa ake a kaoari man te baka ni mare ibukina bwa a tuai n tauraoi ngke e roko te tia mareaki (tara Mataio 25:1–13). Te toro ae aki kakaonimaki are e aki kona ni karaka ana tarena are anganaki iroun te toka a aki kariaiakaki bwa a na rin i nanon kimwareirein te Uea (tara Mataio 25:14–30). Ao ngke e roko te Uea ni mimitongin ueana, E kamaeia nako tiibu ake a tia n toro irouna ao irouia raraona nako mai buakoia kooti. Bon ti te koraki ake a tia “ni karaoia nakoia aika a mangori aikai tariu” (Mataio 25:40) a weteaki nako angataina bwa a na rin ueana are e a kaman katauraoaki ma n moan karikan aonaaba. (tara Mataio 25:31–46).
Tariu ao mwaaneu, ngkana kam rawa ni beku ibukin te Uea, taiaoka iangoia bwa antai ae ko rawa ni beku ibukina ko ko totokoa te wewete ke ngkana ko kariaia te wewete, ma ni kakoroa bukin te berita. I tataro bwa ngaira n tatabemaniira nako ti na ira te katanoata mairoun te Uea aei:
Bon te koaua bwa iai te tabo ae rinano
N te aonaaba n taian marae n ununiki aika rababa
N na mwakuri iaa inanon maiu ae kimototo aei
Ibukin Iesu , are e Tauraki n te Kaibangaki.
(Hymns, no. 270)
E kaota te kawai Iesu. E ngae ngke e tangiria bwa e na aki boo ma te kanganga are e reke nakoina i Ketetemwane ao Kareware (tara D&C 19:18), E kananorinanoa ma n taku nakon Tamana, “E ngae n anne, ma tiaki nanou, ma nanom ae karaoaki” (Ruka 22:42).
E reirei i mwaan aei:
“Ngkana e iriirai te aomata, ke kaakea bongana, ma n uouota ana kaibangaki, ao ni iriirai.
“Bwa antai are e kawakina maiuna ao e na kabuaa: ao are kabua maiuna ibukiu e na karekea.
“Bwa te tera are karekea te aomata, ngkana e na karekea te aonaaba ae bwanin ma ni kabuaa maiuna? ke tera ae e anga te aomata ni kaaibibitia ma rabwatana?” (Mataio 16:24–26).
Ti riai n uringnga te kaantaninga ibukin mwakuri ni ibuobuoki nakon temanna ma temanna. Ngkana ti ibukin kabobongaan mwakoron ana mwakuri tabeua, e na “kanakoia anera te Atua,” n ai aron Iesu ngke e anga reirei n te bong teuana (tara Mataio 26:53). Ma anne e na aki kakoroa bukin te kaantaninga ibukin mwakuri ni ibuobuoki are E a tia ni kabaea taekana. Ti beku ibukin te Atua ao raoraora bwa ti aonga n riki bwa aekan natin te Atua ake kan oki ni maeka ma ara karo ake i karawa.
Mangaia are mwiokoai nakon kawakinam ni kabane,
Ao I ataia bwa ko tangirai,
N na karaoa nanom ma te koaua:
N na riki n aron are ko tangirai bwa N na riki nako iai.
(Hymns, no. 270)
Uabwi te ririki n nako, I wareka te reta mairoun te mitinare are a bane ana tai are kabwarabwara te waaki ibukin karaoan ana mwakuri te Uea inanon maiuna. E a tia ni kaaitauia te koraki ake a tia ni kairia n ana mwakuri ni mitinare “bwa e na kanakoa nakoai nakon te tabo are tangiria te Uea ma tiaki nakon I taku bwa e riai ibukiu.” E a tia n roko, e taku, “man te kainikatonga, ao te kaiangatoa.” I mwaain karaoan ana mition bon ataein te reirei ae rietata i Amerika mainiku. Aio au taeka ake I taekin:
“I keetinna te mwakuri ae N karaoia ma I aki bita au iango, I kanoaa au boomwa ni mitinare ao I kanakoa, ma ni mwakena raoi te kaoram are kaota nanou bwa I tangiria ni kan karaoa au mition i tinanikun abau n taetae aika boou. I kanoaia raoi bwa e na oota bwa ataein te reirei ngai mai Rutia ao I rangi ni kona ni kabanea uoua te ririki ibuakoia kaain Rutia. I aki nanououa bwa a na akea te komete ae e na totokoa rabakau, I motirawa ma te aki nanokokoraki bwa N na kukurei n noora te katei n reirei ae okoro.”
E nako nanona bwa e mena ao e tareboniaki bwa e na karaoa ana mition iaon Amerika. Akea te bwai ae ataia ibukin te titeite are e na mwakuri iai, ma tao bon ti iaon abana are a kabongana te taetae ni I-Matang nakon aaba ake itinanikun abana are a kabongana te taetae are e a tia n ataia, ngke e taku, “Aomata ake N na mwakuri ma ngaiia e tara n ae naake a aki reirei.” E reitia ma n taku, “Ai teutana ao I a rawa ni kariaia te wewete, I taku bwa tao e na karoaki bukin au kaantaning riki ngke I kabaea arau n te Peace Corps ke tao n taabo riki tabeua.”
E tekeraoi, te kairake n ataeinimwaane ae kamoamoa aei bwa e reke korakorana ao ana onimaki bwa e na kariaia te wewete ao ma n iiri taeka n reirei mairoun mairoun ana mition beretitenti ae raoiroi. E kamimi bwa maiuna tamnei e rikirake. E kabwarabwara ni kangai:
“Ngke I moana au mwakuri ibuakoia aomata aika a akea aia reirei n te kaawa aei. I karakora inanon tabeua namwakaina, ma te mwakuri ae kakukurei mairoun te Tamnei e karaurau ni moanaki n urua oon te kainikatonga te aki kani kakoaua are a tauaki iai. Te kakai ibukin te rairaki nakon Kristo e moanaki. Namakin raoi ana koaua te Atua ao te itaritari ma mwaane ni kabane e rikirake korakorana n au iango ae e aki rau.”
E aki beebete, ma e kariaia, ma man ana kairoro ana mition beretitenti ao man rikiraken ana tangira ibukia aomata ake e beku ibukia, e riai, ao e riki.
“Nanou n tangiria ni beku ibukiia aomata aikai a ke a I uaroro ma ngaiia, a riki ni kakannato irou, a rikirake ni korakora ma ni korakora. I a ataa te nanorinano n te moan tai inanon maiu; I ataia bwa tera nanona n iangoa aron kakawakiia aomata ma n aki tabeakin bwain nako te maiu aei. I namakina tangiran te tamanei ae inanou are roko ikai nakon te aonaaba ma ngai” (letter to General Authorities, Beberuare 1994).
Aio te kakai ibukin te mwakuri. N aron are e koroia te tia otoa te kamatenano:
Ma ngkana, e wewet e te bwana, ae uarereke
Nakon kawai aika I aki ataia,
N na kaeka, au Uea ae tangiraki, ma baiu inanon baim:
N na nako ike ko tangirai bwa N na nako iai.
(Hymns, no. 270)
I kakoauaa Iesu Kristo, are e kairiira nakon kawaina ao Ana mwakuri, ao n tataro bwa ti na karekea te onimaki ao ni berita bwa ti na iriiria ao te mwaaka n riki nakon te bwai are e tangirira bwa rik nako iai, n aran Iesu Kristo, amen.