Te Kamaeu ao te Kakukurei
Ti kona n namakina te kakukurei ni katoa bong i nanon maiura, rinanon bwaai aika a uarereke aika ti karaoi, ao ti karekea bwaninin kukureira ngkai ti kaawakin ana tua nako te Atua ae tatangira.
Tao aua namwakaina n nako, ao I a karekea mwiokoakiu ae N na nako ni buobuoki i Bogotá, Colombia, I nako ni maeka ikekei. N te bongina, ao I a kataia ni kakaea te kawai nakon te auti ni botaki n au uoote ae boou, ao I a tei n ana tabo n nakonako te botannaomata ao n titiraki te kawai nako iai.
I konaa n nooria utu aika mwaiti ni kukurei ma kamaiun riringan te ingabong anne. I tei teutana ni matakuakiniia ataei ni kukurei n takakaro n ana tabo n nakonako te botannaomata. Iai taraan moamoaia ae itiaki, neiintaoia aura ni bingke bwa mwiin taai ao riki imwiin karaoan aia kakorakora ni uaia ni biribiri n takakaro. A uaia ni iraoraoi i marenaia n tatabemaniia nako.
I konaa n nooria ae a nang ni kukurei. Ngke I kamwataua raoi taraakiia, ao I ataia ae, mwaitia ake a kukurei, bon ataei aika uarereke ae akea aia bure a bon nang ni kukurei.
Imwiina, ngke I a buti nakon te umwantabu, ao a oki rikaki au iango nakon te tai are I bwabetoaki n te Ekaretia. E kawarai raoraou are ma ngkoa ao n titirakinai bwa tera are I a tia ni kunea ae nang ni kaokoro ikekei. I kaeka, “I a kunea raoi te kukurei ni koaua.” Akea te aeka bwai, “N airon te kukurei—bon ti taai ni kukurei.”
I ataia ae raoraou e aki ataa te kaokoro imarenan mwakuri ni kangare ao te kukurei. Are e nanonna “n taai ni kukurei” bon taai are e karekei iai mwakuri ni kangare. Tera ae aki ataia bwa te kukurei e raka riki nanona nakon are ti te mwakuri ni kangare. Te mwakuri ni kangare bon te tai ae nako ni karaurau, ma te kukurei e man riki taina.
Angiina aomata n te aonnaba aei a aki ota n te kaokoro i marenan mwakuri ni kamanga ao te kukurei. Angina a kataia ni kakaea te kakukurei ni karekean te kamaeu, ma taeka aika uoua aika a kakaokoro nanoia.
I tarai nanoia n te tikitionare ni kakaea raoi bwa tera ae nanonaki n teuana n tatabemanna. Te Kangare bon te takakaro, kaubwai, mwakuri ni kukurei, aroaro ni kukurei, bwaai ni kaunganano, kakamiimi, ni bwainakin te tatakaakaro, tatakakaro, te mwakuri ae kakarongoa, ao te kamwamwane. Te Kukurei bon te rauakin te nano, te kimwareirei, nanoraoin te nano.
I reireinaki, i mwiin ae I a riki bwa kaain te Ekaretia, bwa iai te okoro ae bubura i marenan kamaeu ao kakukurei. I reiakinna, ma ngke i mwaain ae I bwabetitoaki ae iai ana Kainibaire te Uea i bukin te Mwakuri ni Kamaiu i bukiia Natina nikabane (tara 2 Nibwaai 2:9). Rinanon te Kainibaire aei, e bon nakon ae tera n ae ti tokanikai iai i aon te Aonaaba, ti kona n oki nakon Tamara are i Karawa ao ni maeka ma Ngaia n te tabo are akea iai tokin te kukurei.
A uaia n tamaroa te kamaeu ao te kakukurei, ma ni koauana te kakukurei bon te bwai ae ko riai ni kakororaoiko i bukin kakaeana. Te kakukurei e kona naba n riki bwa iteran te kamaeu, ma te kamaeu n tii ngaia e bon aki karekea nakoira te kakukurei ni koaua.
N Ruka, mwakorona 15, ti kunea ana kaikonaki te nati ae kabanea korakorana. N te kaikonaki aio, te nati are e uarereke riki e bubutia tamana bwa e na anganna tibwana man kaubwaina. E karaoia te tama, ao te mwaane ae kairake aei e a touanako nakon te aonnaba, ni kakaea te bwai are e taku bwa e kakoauaa bwa e koaua kakukureina. E moana ni karaoa ana kangare ana waaki, i nanon te tai ae iai ana mwane i rouna, e maeka ma raoraona aika e taku bwa raoraona. Ngke e a bon bane kaubwaina ma kamaeuna nako are e karekea ma raoraona aikai, nikabane a bane ni katannako mai rouna ao e tiku ma akea ana mwane. Ngaia, i mwiina, e a rinanon nako kamarakin ao aki kamwengaraoi aika a bati. E moana ana mwakuri i bukin te aomata ni kamwarakeia ana beeki, ao e baki, e kataia ni kana kunin te koon are a kanna beeki. E iangoa ana toro tamana ae a karekea kanaia te kariki ae tau bwa kanaia ao e rawata nikirana, ao ngaia ai bon akea kanana.
E iangoia bwa e na okira mweengana nakon tamana ao ni butia bwa e na mwakuri bwa te toro ngaia. E oki ma te rairannano man are e a tia ni karaoia, ao tamana, bon te aomata ae etieti, e butimwaaia ni kamauria bwa kanga natina ae onoti. E a bon karekea raoi otana ma ikanne bwa te kakukurei ni koaua e bon mena ikekei, n te maiua ae bebete ma ana.
Nikabane ake ti kakaea te kakukurei ae bwanin, e kona ni kuneaki n ana euangkerio Iesu Kristo, ae reiakinaki n Ana Ekaretia. Rinanon Ana Tua nako Kristo, ti reireiaki bwa ti kona n riki bwa mwkoron te kainibaire ni kakukurei ae korakora ngkai E a tia ni katauraoi i bukira nikabane, Natina aine ao mwaane. Ngkai ti kaawakin Ana tua nako, ti a kakabwaiaaki ao n rikirake n ata te kakukurei ae koaua. Ti reiakinna bwa te kakukurei e kuneaki ni karaoan bwaai aika uarereke ake a buokiira ni karikirakea aron maiura n tamnei, are e na karikirakei ara onimaki ao ara koaua. Bwaai aika a uarereke ake ti kakaraoi i nanon maiura ni katoa bonga, n aron ae:
Ti kukurei ngkai ti tataro ni katoa tairiki ao ni katoa ingabong, ngkana ti kona n namakinna bwa e ongo te Uea i roura ao e tatauraoi ni kakabwaiaiira, ao ni kabwarai ara bure ao ni buokiira. Ti kukurei ngkai ti namakina karekean te Tamnei ae Raoiroi i nanon maiura—ti nanamakinan te Tamnei ae Raoiroi ngkana ti na karekea karaoan ara babaire aika a kakaawaki ni maiura. Ti kukurei ngkana ti nakon mweengara i mwiin kakuan ao tinebun te bong ni mwakuri, nako nanon baiia ara utu nako ngkai a karabarabai aia tangira ao butimwaeara. Ti kukurei n taetae nakoia natira, ni kaungaira ma ara utu, te boobotaki n Takakaro ni Utu. Ni kauarerekeana, ti kona n namakina te kakukurei ni katoa bong i nanon maiura, rinanon bwaai aika a uarereke aika ti karaoi, ao ti karekea bwaninin kukureira ngkai ti kaawakin ana tua nako te Atua ae tatangira are E tabe i bukira.
Te kakukurei ni koaua e roko man kaawakinakin ana tua nako te Atua. Ti reiakinaki n 2 Nibwaai 2:25 bwa “E bwaka Atam bwa aonga n riki aomata; ao a riki aomata, bwa a aonga ni karekea te kimwareirei,” ke, n atongana riki, bwa a na bon kukurei.
I kakoaua n te kakukurei aio i nanon maiuiia kaain te Ekaretia aika a mwaiti. Ni wiiki aika a nako ao iai tabeu teuana bwa N na tararua teuana te maungatabu n te titeiki i Cali, Colombia. I kaitibo ma te mwaane ae kairake ikekei ae bon kaain te Ekaretia, ao e bon anga te katooto n nanon te kakukurei ni koaua.
Arana bon Fabián. Ana utu bon kaain te Ekaretia ao e reiakina te Kainibaire ni Kakukurei ngke te ataenimwaane ae uarereke. N te 1984, ngke 3 ana ririki, Fabián ao ana utu a maeka n te auti ae kaan ma te kaawa ae rangi ni bubura. Te kaawa anne bon te kawai i bukin bwatin kaawa aika a mwaiti.
N te bon teuana, n noran mataroan te O bwa e uki, e kuraotina te kawai Fabián ao e a rebwe naba n te bwati. Te karabwarabwa nakon ana raoiroi Tamara are i Karawa, bwa e maiu Fabián man te kabuanibwai. A nikiria ana karo n Onnaoraki aika a teniua aika a kakaokoro are a taku bwa aki kona ni buokia. A teimatoa ni kakaea buokaia ao, ni kuneakin te tia ibuobuoki ae tau i bukina, taraan marurungina e a bon aki raoiroi. I mwiin karaoan te korokoro, e a tuangiia ana karo te taokita bwa te uruaki are ni waena ao tabon waena a bon rababanako ni kona ni kamaiua, bwa a na korea waena te angatai.
Fabián te uarereke e moana maeuna ae okoro i mwiina, n akea waena teaina. E karaurau n reirei ni kaira rabwatana bwa e na baeranti n nakonako ni buokia ni kaai n nakonako. E nako n reirei ao e karekea te boutoka mai rouiia ana tia reirei ao raoraona. Tabeman aomata a kakamamaea ma e waekoa n reiakinna bwa e na aki tabe n aia mamanikangare nakoina.
E tangiria ni kan iri n takakaro ni kakukurei, ao e iri n taai tabetai. E ngae ngke te tokanikai e bon kangaanga rekena i rouna, e bon ninikoria ao e tatauraoi ni iri.
E ibuobuoki Fabián bwa te kauntira n aia Bootaki ni Mwaane ake a Kairake n ana titeiki. E kakaei reirei n te intitute, ao e kakaonimaki n te aia bootaki ataei te reirei n te tautaeka. E tatakakaro n te bwatiketibooro ao te butibooro. E tatakakaro naba n te bingbong ma raoraona man te intitute. E bubuti n te rebwerebwe ao e karaoi bwaai nikabane ake e karaoi te mwaane. E mwakuri bwa te tia ibuobuoki n tia reirei ni te Ingiriti bwa te boto are e tabeakiniia ataei aika a kainnano.
E tangiria Fabián bwa e na buokiia raona nako ao te Atua ma korakorana nikabane. E momoangare ao e tatauraoi ni ibuobuoki nakoia ake a kainnanoia. Fabián bon te mwaane ae kuukukurei. Ma te korakora ae abwabwaki are e roko man ana onimaki ao kakoauaan te Atua, bon te katooto ae rangi n tamaroa Fabián nakoia aomata n ana kaawan mweengana.
E kakarekea kakukureina man keekeiakinan maiuakinan te kororaoi ni katoa bong, ao n ongeaba nakon ana tua nako te Atua. E kauringaai nakon te kibu ae kuneaki n Motiaea 2:41: “Ai moaraariki, I tangiria bwa kam na karekea te kakabwaia ma te aro ni kakukurei i rouiia ake a kawakin ana tua te Atua. Bwa taraia, a kakabwaiaaki ni bwaai nikabane, n te maiu n rabwata ao n tamnei; ao ngkana a teimatoa n onimaki ni karokoa te toki ao a na butimwaeaki mai karawa, ao a na maeka ma te Atua n te aro ni kukurei ae aki totoki. Kam na uringnga, uringnga bwa a koaua bwaai aikai; bwa e a tia n taekin te Uea ae te Atua.”
N ongengeaba nakon ana tua te Atua, ti na maeka ma te kukurei n akea tokina. E taku te Uea nakon Aramwa 41:10 bwa, “te aro ae buakaka e bon aki kona ni karekea te kakukurei.”
N riki bwa te toro i roun te Atua ao kaain Ana Ekaretia, I kaoko bwa ko na kuukukurei ni koaua man maiuakina marooro nakoia Ana kauntira, man maiuakinan Ana tua nako, ao man te ongeaba n ana taeka Ana burabeti ae maiu.
I ataia bwa teuana mai buakon bwaai aika a rootaki iai kakukureira bon man te kakauongo nakon aia mamarooro burabeti aika a maiu ake a reireiniira i nanon te Ekaretia aio.
Iai au koaua bwa e maiu te Atua, bwa Iesu bon te Kristo, ara Tia Kamaiu ao te Tia Kabooira. E anga maiuna ae tamaroa i bukira n tatabemaniira. I ataia bwa Iotebwa Timiti bon ana burabeti te Atua. Aikai ae I atai ma nanou nikabane. I ataia bwa ana Boki Moomon bon ana taeka te Atua, ao e kona ni kairiira nakon maiuakinan te kakukurei.
I ataia bwa Beretitenti Gordon B. Hinckley bon ana burabeti te Atua ni boong aikai, ao e reireiniira ma te tangira ao te taotaonakinnano, bwa ti na kanga ni kuukukurei n te maiu aei, ao, i nanon te maiu ae na roko.
Reirei aikai bon mwakoron au kakoaua man te koaua, ao I tibwauaia ma ngkami, bariu ao mwaneu, n aran Iesu Kristo, amen.