Te Aine ae Onimaki
Te aine n onimaki ni mwiokoa te Atua … . E ataia ae E tangira aron maiuna. E ataia ae E kinaa. E tangiri Ana taeka ao E mooi nanganiko te ran ae maiu.
I tangira te Uea ae Iesu Kristo ao Ana Ekaretia are e a tia ni kaokaki nako aon te aba inanon ara bong. I kawakinii reirei ibukin Maiuna ae tabu man moani bungiakina nakon kamaiuakin te aomata, are Natin te Atua.
Ngke I a tia ni wareware n te Baibara ao I reiakina Arona iai (ti tebo ma ngai te aomata are I taratarai aron bwaai ake a riki inanon Maiuna) ngke E “rikirake wanawanana ao kakawakina, ma ni bane nanona iroun te Atua ao te aomata.”1 Inanon au wareware, ao I mena ikekei ngke E kautiia mate. E kamaiuia aoraki, kamwarakeia 5,000, ao e uota te karaunano ma te kantaninga n aron te waaki ibukin te rau nakon te aonnaba are E a tia ni karaoia. E kabwarai aia bure naake a bwainikirinna ni kammarakia ao N tauria iaon te kaibangaki—bwa aki ataa ae a karaoia. I nora te tangira mairoun te Atua are E tabe ma aron tinana e ngae ngke E maraki ibukin kororaoina. E tokanikai iaon te mate n te aro are ti na tokanikai naba. E a tia ni katauraoa nnera ibukira i karawa ma Tamara are i Karawa are Akea Tokina. E reireiniira te babaire ibukin te kukurei ae e korakora ao e anganiira te otaa ni babaire ibukin te kukurei ma te kantaninga are ti na riai ni iria. Maiuna bon te katoto ae kororaoi nakon are nanonaki bwa te anga karea ao te maiu ni mwakuri ni ibuobuoki nakon kakororaoan A na babaire te Atua are Tamana.
Te aine ae Itiaki ni Bong Aika Kaitira are e irii ana katoto Kristo ni katoa bong inanon maiuna e a moanna ni kakoroi nanon a na babaire Tamara are i Karawa ibukina. Ni karaoan aei ao e konaa n raoiroi korakorana inanon te aonnaba ae ngkai ma ni kaitarai kataakina ibukin te maiu are mamate. I a tia n atai aroia aine aikai bwa taian katoto nakoiu n ataa ae e na kanga aron maiu. Te aine ae Itiaki ni Bong Aika Kaitira are e iriira Kristo, bon te bwaai ni katoto ae raoiroi n aron are e na bon riai ni karaoia te Kiritian. Bon te aine ae iai irouna onimakinan te Atua ao iai te aki nanokokoraki ao te aki mamaaku.
Te aine ae onimaki ma ni mwiokoa te Atua ao e kaaitara te kangaanga ma te kaantaninga. E ataia ae E tangira aron maiuna. E ataia ae E kinaa. E tangiri Ana taeka ao E anganiko te ran ae maiu. E kakaitau ibukin te Burabeti are E a tia ni kanakoa ibukin boong aika kaitira ao e kakoaua ana reirei ao e iri, bwa e ataia ae mani iran nanona ao e na karekea te rauraoi ao te rau. I nanon ana tataro ao e ukoukora te aekaki—ni kairiiri ae matoatoa ao ni ibuobuoki n ongora nakon Tamara are i Karawa. Ao ngke e tataro ao e ongora—ni kariaia te taetae ni itoman bwa e na kauatabo. E kakoaua arona ae E nimamannei ao n aki kakarongoa, E na kairia ni baina ao n anganna kaekan ana tataro.2
Te aine ae onimaki ma n aki nanokokoraki ibukina bwa e otaa n ana babaire Tamara are i Karawa ao ana mwakuri ni kakabwaiai maiura. E aki nanokokoraki bwa n aron taian anga karea ake e karaoi e tau ibukin te iango are akea tokina. E ataa taekan te anga karea man ataakin maiun te Tia Kamaiu. E ataia n aron te kabotau bwa e uarereke riki ana anga karea, ma e ataaia ae Tamara are i Karawa e otaa ao e kabongana bwa tera ae karaoia ni kakorakora mweengana ma ana utu ao te aonaaba are maeka i nanona. E rikirake aki nanououana ibukin ae e kororaoi n te tamaroa ao n akoi, ao e raoiroi riki nakon te tikiraoi. Iai irouna te korakora ae e itiaki. E nang n tatangira ao n aki kakaiun ma n akoi. Nanoia kainnabana ma natina a kororaoi n te onimakinna.3 Ao ai aroia naba ataei, ke kairake, ke aine ake e a tia ni weteaki nakoia bwa e na rereiniia, ni kairiia, ni buokiia, ao n tangiriia—a bane nanoia irouna ibukin arona ae moan te onoti ma kateina ae a konaa n nooria tabeman ao anne are a na konaa n nooraki nanoia iai. Bon katotongan te Atua aron taarana n tamaroana ao ni kakawaki.4 E nanomatoa ni karikirakea te anua ae raoiroi ma ni karaoi mwakuri aika raoiroi are a na kariaia rokona n tei nako matan Tamana are i Karawa. E na kona ni karaoa anne ma n ataia ae e bon riai ni mena ikekei, bwa e bon ataaki Irouna ma n tangiraki ao ni bongana ao ni kakawaki n taainako n te tai ae akea tokina.
Te aine ae onimaki akea te maaku irouna. E aki maaka te buakaka bwa te Atua e mena irouna.5 Akea te koauaraoi irouna, akea te raraoma (ibukin ae terana ae eti) inanon maiuna. E kona ni maiuakina koauan te maiu ibukina bwa e reiakina te reirei ao n reireiniia taan reirei aika kororaoi. Te katoto ngaia ae kakannato nakoia ni kabane ake a kinaa. E aki nang ni kororaoi, eng, tiaki bukina ae akea irouna koaua aika kororaoi ke koaua aika kororaoi ibukin Kristo, ma bon ibukin ae bon te aomata ngaia. E kararoa man a na kariiri te buakaka ao aika barekareka, ma ngkana te bwai teuana ae aki riai ao e na riai ni kaotia, n aron te raian te aine ae kawakiniia natina. Te aine ae akea te maaku irouna iai ana konaa n taetae nakoia natina ibukin aro ake ana konaa ni urui aroia. Aki ti konaa n ongo ana maroro ibukin tabetabena, ma a noora aron tabena ni maiuna ni katoa bong—n arona ni kunnikaina, tera ae wareki ma ni mataku iai, e kanga arona ni kakukureia, tera ae tatangiria ao ni kan ngare iai, antai ake anai nanoia, ao e kanga aron are e na karaoia n taainako, ao ni bwaai nako, n taabo nako ake kam nako iai. Iai irouna te kinaaki n ana ibuobuoki are katika te nano n arona ni kakukurei ao ni itiaki ma n tamaraoa. Ara ataeinnaine ao aine aika kairake a kona n onimaki i nanon ana katooto. Ti tataro bwa a na aki maaku ni kakaea ao ni karikirakea aron uotakiia rake ao ni kukurei ao n aki nanououa ngkai ngaia ara taan tei n taai aika a na roko.
Ti kakaitaua karawa ibukiia aine aika iai te onimaki irouia inanon maiura. Te aine ae onimaki e tangira te Uea. E tangiria bwa E na ataia man aron maiuna are maiuakinna, man taeka ake e taekinii, man te mwakuri ni ibuobuoki are e karaoia nakoia Natina, ao man ana aroarona ni kabane. E ataaia ae E tangiria e ngae ngke e aki kororaoi ma e kataia ni karaoiroia. Bwa e ataaia ae ngkana e karaoa ana kabanea n raoiroi, ae aki tau, n aron are e a tia n tuangiira Beretitenti Hinckley. 6
Te aine ae onimaki e kakabwaiaki mairouia mwaane aika kakaonimaki inanon maiuna ake a reke irouia ana nakoanibonga te Atua ao ni karinea te tibwanga aei: tamana, bitiobi, buuna, mwanena, natina mwane. A nang ni kabonganaa ma bwai n tangira ake e anganaki natina mairoun te Atua. A kamatooa mani kaunga ao n otaa ni korakoran ana mition ibukin maiuna ngkai te aine ngaia. A tangiria; ao a kakabwaia. A bane n rairaki man ana kakabwaia te aine ae onimaki aei ngke a uaia n nakonako n te kawai ae eti are kaineti nakon te maiu, ao ni waaki iaon te kawai ni karokoa tokin te bong ni kataaki. Ataia, ngkai taan n reirei ni koroboki aika tabu, bwa “e raoiroi riki uoman nakon temanna… . Bwa ngkana a bwaaka, ao are temanna e na tabekarake raona.”7
I anga au kakaitau ibukiia aine aika onimaki ao mwane aika kakannato, ao i bukiia au utu aika tangiraki ake a tia n tabekairake ao ni kairai ma te tamnei ae raoiroi inanon au bong ni maiu. A tia n anganaki te kakabwaia ae korakora ngke I a tia ni kataia kakoroa nanon te mwakuri are I anganaki mairoun te Uea bwa te Beretitenti irouia Aine n te Roronrikirake.
Tariu ma mwaneu aika kam tangiraki, kam riai n ataa au tangira nakoimi, ao ma au tangira ibukin Tamara are i Karawa ma Natina ae Tangiria, ae te Uea are Iesu Kristo. N na karineiia ao toro ibukiia ma nanou ni kabane ae akea tokina ma ni kakaitau riki ibukin te tibwangau aei, n aran Iesu Kristo, amen.