“O Bwa ngke Ngai te Anera, ao e Kona n Reke te Bwai are e Tangiria Nanou”
I kairoroi ngkami tariu ao mwaneu … bwa kam na kabonganai ana tembora te Ekaretia. Naako ikekei ao karaoa ana mwakuri te Atua are e a tia ni katanea ibukira.
Tariu ma mwaneu aika kam tangiraki, ti a manga kamaurii riki ngkami inanon te maungatabu ni kabuta n te aonnaba n Ana Ekaretia Iesu Kristo Ibukia Aika Itiaki ni Bong Aika Kaitira.
E taku Aramwa: “O bwa ngke Ngai te anera, ao e kona n reke te bwai are e tangiria nanou, bwa n na waaki nako ma n taetae ni bwanan te Atua, ma te bwanaa ae na ioa te aba, ao man takaruaea te rairannano nakoia aomata ni kabane!” (Aramwa 29:1).
Tia roko n te tabo are ti a konaa iai ni karaoi te bwaai anne. Kanoan ana waaki te maungatabu e na katanoataaki nakon te aonnaba ni kabuta, ao taan taetae ana nooraki man ongoraeaki aia taeka ni kabuta te aonnaba irouia Aomata Aika Itiaki ni Bong Aika Kaitira. Tia tia ni karekea te rikirake ae korakora n ataakin kakororaoan nanon mii ni burabeti ake a kaotaki n te boki ae te Kaotioti: “Ao I nora te anera temanna ae kibakiba i nukani karawa, ao iai i rouna te euangkerio ae aki totoki bwa e na taekinna nakoia ake a maeka i aon te aba, ao nakoia botanaomata ni kabaneia ma baronga ma taian taetae ma natanaomata” (14:6).
Ai tikauara te botaki aio, tariu ao mwaaneu. Bon akea n aron kabotauana. Ti taetae mai inanon te Tabo ni Maungatabu ae nang n tikiraoi aio. Akea riki te kateitei ae I konaa ni kabotaua ma ae ai aron aei.
Bon ti teuana ni utu ae korakora ngaiira, n tei ibukiia utu n aomata iaon te aonaaba ae moan te bubura man tikiraoi.
Inanon Tuun ae nako ao mwaitimi kam ira kaukakin te Nauvoo tembora. Bon te botaki ae tikauarerei man tamaroa, te bong teuana ae e nang ni ururingaki. Tiaki ti katabua te kateitei ae moan te tikiraoi, ae ana auti Iehova, ma ti katabua naba te kanuringa ae tikiraoi ibukin te Burabeti Iotebwa Timiti.
N te 1841, uoua te ririki imwiin rokona i Nauvoo, katabua aontano ibukin ana Auti te Uea ae moan te tikiraoi iaon te tabuki ae rietata ibukin ana mwakuri te Atua.
Moan te kanganga kakoauan ae inanon te tai ni kanganga arei ao ibukin anne ao te babaiire ibukin katikiraoana e korotamneiaki ao e na tei bwa tian ke oon Amerika.
I nanououa, moan te korakora nanououau, bwa ana iai riki tamnein te babaire teuana ma tikiraoina inanon nako aban Illinois.
E na katabuaki nakon a na mwakuri Teuare Mwaaka, ni kakoroa bukin A na kantaninga are akea tokina.
Akea te korakora ae karakaaki. Akea te karea ae korakora. Inanon nimaua te ririki aika ana roko ao aomata a na korokoroi atibu bwa bwaai ni kamatoa ao aan te kateitei, tena n o ao tena ni katamaroa. Irabubua a nako meang, ni maeka ikekei teutana ao a koroi kaai aika bati ao a babatii ni karaoi ebaeba ake a kabeibeitaki n te karanga are Nauvoo. Tamnei aika tamaroa a koreaki man kaai aikai. A rikoaki beene ibukin kaboan neera. Te anganano ae korakora e karoaki ibukin kaboan te kiraati. A katea umwan Tamara arei Karawa, ao ena tikaua ni kaota aia kabanea ni konaa.
I nanon karaoan aio, te Burabeti ma tarina ae Hyrum a tiringaki i Carthage ni 27 bongin Tuun 1844.
Akea mai uakora ae maiu ngkai ae kona n ataa te kanganga are reke nakoia Aomata Aika Itiaki n te bae riki aei. Aia tia kairiri e a mate—ngaia, te mwaane ae karekei mii ni burabeti ao kaotioti. Bon aia tia kairiri. Bon aia Burabeti. E korakora nanokawakiia, rawawataia e a taonamwaina.
Ma Brigham Young, te Beretitenti n aia Kooram te Tengaun ma Uoman, e riki bwa te tia kairiiri. Iotebwa e katokai iaon angaia Abotoro ana kariaia. Brigham e baireia bwa e na katiaa te tembora, ao e waakinako te mwakuri. Te ngaina ma te bong ao a karaoi a rimwiin aia kaantaninga, n aki tabe ma te mwakuri aika kamamate ake a karaoaki nakoia mairouia taan urua te tua. N 1845 a bon ataia ae a nang aki kona n tiku n te kawa are a karaoia man te rereua. A ataia ae a nang nako. E a reke bwa te tai ni katawe: te moan, katiaan te tembora, te kauoua, karaoan kaa ake a katikaki iroia aoti ao ikoikotan bwaai imwain te mwananga nakon te tawaana nako maeao.
Karaoan otenanti a moanaki imwain ae bobonga raoi te tembora aio. E kataweaki aio ni karokoa kamwaitoron te tinoo n te 1846, aomata a kitani mwengaia , ao bwaoia a mwaing rikaki rinanon kawain Parley nako mataniwin te karanga, imwina ao rinanon te karanga ao n otirake ni iteran te karanga are mena i Iowa.
Te mwaing e bon waaki nako. E buraoki te karanga ao e a nang ni mwaitoro. Ma buraokin te karanga e karekea aia tai ni mwananga iaon te aiti.
A taraa mainuku ni kamwataua raoi kabanean taraan aia kawa ao ana tembora Atuaia. Ao a manga taara maeao are nneia n taai aika ana roko te tabo ae aaki ataia.
Te tembora anne e katabuaki ao naake a katabua a taku “amen” ao ma n waaki nako. Te kateitei aio e kabuekaki iroun te tia iowawa are e kuri naba ni mate inanon ana tai ni karaoa ana mwakuri ni iowawa aio. Te buua n ang e keutaa nako nikiran are tiku n tei. Ana auti teUea, are ngaia aan aia mwakuri, e a uruaki.
Nauvoo e a reke bwa te kawa ae akea kaaina. E a kerikaki kaaina ni uua ae e a kan mauna. Nnen te tembora e a kamarauaki tanona mani boo te ununiki iaona. A nako tabeua ririki, ao e a moanna ni maiu aona. Ara aomata, aia bakatibu naake a maeka ngkoa ikekei, e tokaki nanoia bwa ana nora mwiin ao man kamoamoaia naake a karaoa te mwanaga. Teutana imwin teutana, te kaawa aio e a moanna ni maiu ao a kaokaki nakon aron aroia tabeua bwaai iaon Nauvoo.
Iaan ana kairiri te Tamnei, ao ni kaungaaki n ana iango tamau, are e a tia ni beku bwa te beretitenti ngaia n te mition n te tabo anne ao ngaia e tangiria ni manga katea te tembora n te tabo ae Nauvoo ma e aki kona ni karaoia, ti katanoataa n maungatabu n Eberi n 1999 are ti na manga katea te auti ae bubura ae kakaongora rongorongona anne.
Te ungannano e taonira nako. Aiane ao mwane a anga nanoia ni kan ibuobuoki. Anga mwaane aika bati ao tan rabakau aanga nanoia. Riki, akea te kabanemwane ae nikirana. Ti na manga katea ana Auti te Uea bwa kauringaan te Burabeti ae Iotebwa ao ai bon ara karea nakon Tamara arei Karawa. Ni 27 n Tuun ae nako, n te bwakantaai n te tai are a katiaki iai Iotebwa ma Hyrum i Carthage 158 te ririki n nako, ti karaoa ara katabu nakon te auti ae tikaua ma n tamaroa ae boou aio. Te tabo ae rianako tikiraoina. E tei raoi iaon ana tabo te embora are mai imwaina. Abwakina bon abwakin raoi are bue. Bon ngaia raoi te kanuringa ibukin te Burabeti ibukin boong aikai, ae Iotebwa te Tia Mamata.
Ai kukureira Ngai, ao ai kakatongara ngai ibukin te bai are riki. Ngkai, ni kaitaraa maeao, iaon te tabuki teuana ae taraa te kawa ae Nauvoo, ni kaitaraa Missisippi, ao rereua ake a kaitaraa Iowa, ao e tei iai ana tembora Iotebwa, a ana auti Te Atua ae tikiraoi. Ikai n te Salt Valley, ni kaitara ma te tembora are tei i Nauvoo ae tikiraoi e tei iai ana tembora Brigham Young, te tembora are i Salt Lake. A tei ni kaaitaraia i bon irouia kanga tukan booki imarenabooki aika bubura ma kanoaia ae rongorongoni ngkoa n taai ni kainnano ao te nanokawaki, te anganano, tiaki ti ngaia ma mateia ngaa ma ngaa ake mwananga man te Karanga ae Mississippia nakon te mwarua ae Great Salt Lake.
E riki Temboran Nauvoo bwa te ka-113 n tembora. Tia tia naba ni katabua te ka-114 n tembora n te Hague, Netherlands. Tenaan kateitei aikai aika kakaokoro buburaia ma kaminonanon kateaia a rang ni mwaiti ngkai ni kateaki ngkai n te aonnaba. A kateaki ibukiia ara aomata ibukin kabutan ana mwakuri Teuare Moan te Mwaaka, are e karaoia ibukin karekean te akimamate ao te maiu ae aki totoki irouia aomata (tara Mote 1:39). Tembora aikai a kateaki bwa ana kabonganaaki. Ti karinea Tamara ngkana ti kabonganai tembora aikai.
Ni kaukan te maunagatabu aio, I kairoroi ngkami, tariu ao mwaneu, bwa kam na kabonganai ana tembora te Ekaretia.
Naako ikekei ao waakina te mwakuri ae korakora ae kamiimi are e a tia ni baireia ibukira Atuan karawa. Ikekei ti na reireiniira Ana kawai ao Ana babaire nako. Ikekei ti na karaoi berita aika tabu ake a na kairirira nakon te raoiroi, te aki aonikai, ao te koaua. Ikekei naba are ti na kabaeaki ma ara utu iaan te berita ae akea tokina iaan ana kariaia te nakoanibonga mairoun Tamara are i Karawa.
Ao are ti kona naba ni karababai kakabwaia aikai nakoin roro ake a tia n nako, ni ikotaki ma ara bakatibu ake a tangira te mwakuri are ti na karaoia.
E bia mena ana kakabwaia te Atua iaomi, tariu aika tangiraki ao mwaneu. E bia reke aroaron Eria bwa e na riinga nanomi ao ni uotiko nakon karaoan te mwakuri ibukiia tabeman ake aki kona ni kakamwakuri bwa a tataningaiko. Ti riai ni kukurei ni mimitongin tibwangara, I a tataro ma te nanorinano n aran Iesu Kristo, amen.