Tiaki Tengaun ake a Kaitiakaki?
Ngkana ti kan kaoti ara kaaitau nakon Tamara are i Karawa, ti riai ni karaoia ma nanora ni kabane, korakorara, ara iango, ao marurungira.
Ngke a tuangaki iroun Beretitenti Thomas S. Monson kaain te Itingaun ao kaain te beretitentii irouia Kairake n Ataeinnaine ake a boou bwa a na waerake n tekateka i moa, I uringa raoi Eberi 1970, ngke I weteaki bwa N na riki bwa kaain Aia Kooram Abotoro ake te Tengaun ma Uoman– -are bon te bwai ae kakuba nakoiu. I a bon tibwa ataia inanon ti tabeua te aoa. Ngke I a kaoaki bwa N na tekateka iaon te kaintekateka teuana are e uraura i nanon te Tabaenako ni kawai, kaain te kuaea a tibwa anenea “O Divine Redeemer.” Ngke I kakauongo nakon te anene ni bubuti anne ma tangiraoin eena, I bubutiia te Tia Kamaiu i nanou bwa e na kariaiai n arou ma e na aki uring au kaairua, kabwakau, ao au bure nako (tara Taian Areru 25:7). Ai raoiroira te bong anne! Are e kianako otana n au iango ngke e taekina te kakao anne Beretitenti Monson n te bong aei.
I kukurei ni mena ikai n te bwakantaai aei ni kabanea te tai ae uarereke aei ma ngkami ni kabane ao ma ni kakoaua nakoimi ao ni kaota au koaua ao au namakin ni kaineti ma te mwakuri ae moan te raoiroi aei.
I tuanga te Unimwaane ae Neal A. Maxwell N na waerake nako moa n akea okou. E tauraoi irouna ibukiu, ma I taku, “Akea, I kona n nakonako n akea. N na kaotia nakoimi bwa iai au onimaki ao e na bon riki.” Ngkai I a kara riki ao te ririki ae bon waaki naba. I rangi ni kukurei ni karekea te tai aei ma ni karekea te kona n tei ao ni kaota au koaua nakoimi ibukin te kakabwaia man te euagkerio are e a tia n roko nakon maiu inanon ririki aika bati aika a tia n nako aikai. I aki ataia ngkana ngai te kabanea ni kara inanon te auti aei n te bong aei, I a roko n au ka 97 n ririki. Ngke e katanoataaki n te ingabong aei bwa aio ana ka 172 ni maungatabu n te nuuka n ririki te Ekaretia, I taku bwa tabeman aomata ake a mena n aia ririki n ataei, a kona n taraa 172 bwa te tai ae moan te maan, iaon te maan. N na kauringi ngkami N na kauring ngkami ibukin te ka -100 n ririki te Ekaretia. N te tai anne, Rubi ao ngai ti a mareaki. Te tai aei bon 1930. Aio ai ana ka—172 n ririki te Ekaretia, ao ti a tia ni mareaki inanon 72 te ririki. I ti kan taekinna nakoimi bwa ngkana taan numera ngkami ao uringnga 172; e roko n te aro ae moan te beebete.
I tangiria n te tai aei ni kaota kukurein nanou ao au kaaitau ae bati nakon Tamau are i Karawa ibukin te kakabwaia are I a tia ni karekea inanon ririkin maiu ni kabane—bwa I a tia ni bungiaki irouia au karo aika a rangi n raoiroi ao ni kaikawaaki rake inanon te mweenga ae moan te raoiroi. Ao ngkai ti a tia ni mwamwae man te tabo teuana nakon teuana i aon te aba aei ao ni waaki ni kabane ake ti a tia ni karaoi, I rangi ni kaaitau ngkai I a tia ni kona n iraorao ma aomata aika a rangi n raoiraoi. Aomata aika a raoiroi a kona ni kairi maiumi ma n ibuobuoki ni karikirakea bon oin maium ao kateim are e na buokiko ni kona n reitaki ma aomata n te botanaomata ma ni maeka n te aro are ko riai ni maeka iai. A kona ni buokiko ni waakinan am kambwana, ao ni buokiko ni karikiko bwa te aomata ae raoiroi riki. Ao ai ngaia are I rangi ni kaaitau nakon Tamau are i Karawa ibukin te kakabwaia are I a tia ni karekea. I kakoaua, bwa I ataia bwa bon Ngaia Tamara ao Iesu bwa bon te Tia Kamaiu, are Natin te Atua ae maiu, te Tia Karikibwai, ao te Tia Kamiu ibukin te botanaomata. I rangi kakaaitau ibukin te mwakuri ae moan te kakannato aei are E a tia ni waakinna nakon Karaoan ao kabobongaan te euangkerio i aon te aonaaba ao ibukin reken te tai are e na uotia nakon te botanaomata, ngkana a na kan ongora, n ongo ao n oota ao ni karekea te kakabwaia mai karawa ngkana a tau nako iai ma ni maiu n te aro are a na karika te euangkerio bwa te bwai ae kakawaki ianon maiuia.
Iai nanou te kan kaaitauia au bakatibu ake a kaaina te Ekaretia n moan tein te Ekaretia, ake a mwae mai New York n iriia Aomata aika Itiaki i Nauvoo ao man ira te waaki are e karaoaki ibukin te Nauvoo Tembora ao imwiina ao n wairio nako Maeao. Ao ibukin kakabwaia aikai, are I a rangi ni kakaaitau iai n te bong aei, n aron ae I taekinna nakoimi.
I riai n taekinna bwa Beretitenti Gordon B. Hinckley. E anga ana taeka ae moan te kakawaki n te ingabong aei—are e anganira iai manga taraan baika a tia n riki n ririki aika a nako ma ai moara riki taraan bwaai aika a tia n riki nakon te Nauvoo ao manga katean te tembora ae kakannato. Bwaai ni kabane ake a tia ni karaoaki n te tabo anne e a tia n riki bwa te kakabwaia nakon te aonaaba ao te botanaomata.
I tangira Beretitenti Hinckley bwa e na ataia bwa I a tia n tarataraia raoi man te tai are e weteaki iai bwa e na riki bwa temanna riki ana kauntira Beretitenti Spencer W. Kimball ao ngkai e a tia ni moana ana mwakuri n te Moan Beretitentii. E kanga n tia n rikirake ao n riki ni ikawai ma n kairaki ni karaoan waakinan bwaai ake ti a tia ni kakoaua ibukiia! A mwaiti mai buakora aika a tia ni karaoi tabeua mwakuri aika uarereke n te kaotioti are e a tia ni karekea ibukin te rikirake are e a tia n riki nakon te Ekaretia n te tai ae e a tibwa tia n nako, ni ikotaki ma katean tembora ake ti a karekei ngkai aika 114 aika a mwakuri ngkai. A tia bwaai ni kabane aikai n reke man mwiin ana kairiiri Beretitenti Hinckley. Ke e kakabwaiaaki iroun te Uea ibukin te bwai are e a tia ni karaoia ni buokan te Ekaretia bwa e na rababa nako ao aron aia iango te botanaomata ibukin te Ekaretia bwa e na rikirake ao ma n rikirake n raoiroi ni kabutaa te aonaaba. Ti bon rangi ni kaaitau ibukin te bwai are e a tia ni karaoia, ibukin te nakoa ae rine ae karekea ni boong aikai i nanon te Ekaretia, ao ibukin ana kairiiri.
N aron are koreaki n Ruka, bwa n te bong teuana e rin n te kaawa ike iai iai tengaun rebera. Ngkai, naake a tia n rikirake mai buakora inanon te ririki ae e a tia n nako e na uarereke aia atatai ibukiia rebera. Te rebera bon te aoraki ae moan te buakaka, bon te aoraki ae rangi ni mamakaki rimoa. Rebera aika 10 aikai a kawara te Tia Kamaiu ao a taku, “Iesu, ae te Tia Reirei; ko na nanoangaira; nanoangaira ngaira ake iai iroura manin te aoraki ae te rebera.” Ao E taku nakoia rebera ake 10, “Kam na nako n kaoti ngkami nakoia ibonga, ao e na tabeakin ngkami”—are a karaoia. A nako ni kawara aia ibonga, ao a kaitiakaki, ni kabane ngaiia ake 10. N te tai ae kimototo imwiina, temanna mai buakoia e oki nakon te Tia Kamaiu ao bwaka ni bobaraaki ma n taui bubuani waena, ao e kaaitaua te Tia Kamaiu ibukin kakabwaiakina ao n anganna te marurung man te aoraki ae kakamaaku. Ao te Tia Kamaiu e taku nakon te mwaane are temanna arei: “Tiaki 10 ngkoa? Tera ae e a tia n riki nakoia naake ruaman? Anga ngaiia?” (Tara Ruka 17:11–19.)
Ngkai I a tia ni wareka te karaki ma ni warekia riki, e karekea te kaantaninga ae korakora nakoiu. Kam tangiria ni kan riki bwa raoia te “koraki ake ruaman”? Tera te aeka ni bwai ae ai aron anne—ae te warekaki ibukoia te koraki ake aki oki nakon te Tia Kamaiu ibukin kakabwaiakiia are E a tia n anganiia? Ti temanna are e oki.
E rangi ni beebete ni maiura ibukira ni karekean taiani kakabwaia, a mwaiti mai buakoia aika aki kona ni warekaki mwaitiia, ao ma ni kariaiai rikin bwaai inanon maiura ake a kona ni buoka te bitaki ni maiura, ma ni katamaroai maiura, ao ma ni karokoa te Tamnei i nanon maiura. Ma n taai tabetai ao ti kariaia. Moan kukureira ngaira ni kaaitau ibukin taian kakabwaia are e a tia n uotia nakoira ana euangkerio Iesu Kristo inanora ao tamneira. I kan kauringi ngkami ni kabane bwa ngkana ti kan kaota ara kaaitau nakon Tamara are i Karawa, ti riai ni karaoia ma nanora ni kabane, korakorara, ara iango, ao marurungira—ibukina bon Ngaia are e anga maiuna ao ikeikena. E anganiira ara tai ni maiu n arora ae ngkai, ni karekea te euangkerio ni maiura, ni karekea aia katoto aomata ae raoiroi n ai aron Beretitenti Hinckley ni kairan te Ekaretia ni katobibia te aonaaba ni boong aikai ao reken te tai ibukiia aomata aika kairake n taraia ma te kamoamoa ao te kakaaitau ibukin te tia kairiiri are tararua raoi man karaoa raoi mwiokoana ma ni kamataata te bwai are e kona n uotia Tamnein Kristo nako nanora ao Tamneira. Ngkana e kabuburaaki te kaaitau ma n karikirakeaki ao ni karababaaki, e kona ni kakabwaiai nanora ao tamneira nakon te tabo are ti kan waakinna ao ni karaoi bwaai akanne ake ti tuangaki bwa ti na karaoi.
Iai kaain ara utu aika mwaiti aika uamaenako nakon taabo aika e nakon 20 iaon Amerika ao Engiran. I a tia n katautaua nakoia bwa ngkana a reke aia tai ni kamatoaia Mataniwi ni Kabuta—ai moara riki Beretitenti Hinckley ao ana kauntira—ngkana a tei i rarikin te rerio ke n te tabo are a mena iai, ao ni katei baia ma kukurein nanoia ma n taku nakoia, “Ngai naba temanna ae kamatoaia taan kairiiri n te Ekaretia.” E reke n au iango n te bong aei ngke ti katei baira tabeman kairake—ataei ake tangiriia ma n karineia—a katei baia ni mwakoron nako te aonaaba aika a kakaokoro. Ara kaantaninga bwa ti na reireiniia ni ikotaki ma Tamnein te Uea nakon tangiran te kan reirei, te kan ataia, te kan maiuakinna ao ma n riki bwa mwakoron ana euangkerio Iesu Kristo. Ara kaantaninga bwa a rangi ni kukurei n reken aia tai ni karikirakei aron kateia ao ma ni kona ni kawariia tabeman ni buokiia ao ni kakukurei nanoia.
E maiu te Atua. Bon Tamara. I kakoaua nakoimi bwa Iesu bon te Kristo, Natin te Atua ae maiu ao Iotebwa Timiti bon ana burabeti ibukin Kaokan te Ekaretia ao te Euangkerio. BeretitentiHinckley bon ara tia kairiiri mairoun te Tamnei ibukin te Ekaretia aei ni katobibia te aonaaba. Kakabwaiaa nanona ibukin bwaai ni kabane ake e karaoi ao ibukin ana buoka te Tamnei ao te kaotioti ao te mii ni burabeti are bon ana bwai ngaki e tabe ni kawakaa rake te mwakuri. I katika te kakoaua aei ma ngkami n aran Iesu Kristo, amen.